وداعا 2010

وداعا 2010 بكل ما فيكي سنه عدت في عمري يارب اكون استفدت منها واتعلمت فيها كتير من الاشياء واتعرفت فيها على كتير من الاشخاص
سنه كانت مليانه بالاحداث وفيها حاجات حلوه وحاجات وحشه بس في الاخر عادي الحمدلله بدام احنا لسه عايشين بنتنفس ونمشي على رجلينا واحب اقلها وداعا عديتي عليا زي النسمه عملت فيكي كتير فوق ما كنت متصور في بدايتك وانا دلوقتي بقرا كل اللي كتبته في بدايتها لاقيتني ماكنتش متفاؤل يمكن كان نفسي اوصل لاكتر بس في الاخير دلوقتي وانا بودعها شايف اني انجزت فيها كتير واحب احكي معاكم واقلكم على انجازاتي في تلك السنه اللي كمان شويه هتبقى ماضيه
1- الحمدلله ربنا رزقني بفضل كبير من عنده بنعمه في بداية السنه ما كنتش مخطط ليه الا وهي حج بيته العتيق واشوف الكعبه بعنيه واطوف حواليها وكنت رحله ميسره وربنا يتقبلها مني ويرزقكم جميعا ويكتبها ليكم .
2- على الجانب العملي يعني شغلي اللي كان زمان حياتي وكان كل حياتي من 2005 الى 2008 رجعت من تاني اركز فيه ووصل مرتبي في شهر 3 الى ضعف مرتبي في اول 2009 وفي شهر سبعه تضاعف الدخل الشخصي وكان في شقتي اللي كنت ساكن فيها لما اخدوا العفش استفدت منها واجرتها من اول 2010 يعني الحاله عال العال وكله من فضل الله(ملحوظه: لو حد من اللي هيقرا شغال في الضرايب انا خسرت كل ثروتي في البورصه ) وماشي بخطوات ثابته بحضر نفسي للزوجه الجديده ومطالبها يارب تكون طيبه وما تخلصش عليا .
3- بالنسبه لحياتي الشخصيه اللي تقريبا عرفتوا ماضيها كانت بداية السنه كانت نهاية حلمي اللي كان غلط وكان ممكن يقلب بكابوس كبير بس ربنا اختار ليا الاحسن واقتنعت ان مفيش رجعه وكنت تحت تاثيرالصدمه وبحاول افوق وساعدني اهلي واصحابي اللي يستاهلوا تحية كبيره على اللي عملوه ليا وفقت ورجعت لشغلي بس كان لسه فاضل شوية جرح جوايا لانه مش بيطيب في يوم وليله بس اخد وقته عشان ما يظهرش من تاني .
4 - مدونتي الجميله الرائعه وده بالنسبه ليا كانت من احلى احداث السنه وابدا فيها بالشكر للي عرفني بالتدوين وعمل ليا المدونه وهو صديقي العزيز ابو العريف ودخلت كتبت فيها في الاول كلام مهم برده بالنسبه ليا بس مكنش هو مهمة المدونه اللي انا راسمه ليها بس كان لازم ادخل اتعرف واتكلم واسمع قبل ما اكتب فيها موضوع شخصي لحد ما استريحت وعملت فريضة الحج عشان يبقى الموضوع متسلسل ما اخدتش اجازه في النص ويضيع التركيز وانا بالنسبه ليا حققت هدفي اني سجلت حكايتي ومكنتش برده متخيل ولا حاطط في حسابي اني اقابل اصدقاء زيكم اللي بصراحه انتم ساعدتوني كتير وبفضلكم انا حاسس اني فتحت الباب وبتفرج على الدنيا ومش حاسس بالخوف .
5- من انجازاتي اني سافرت وسبت مصر وكانت بداية تفكيري في الموضوع خلال السنه اولا انا من زمان كنت رافض فكرة السفر للخارج تماما لاني عايش في مصر ومعايا مرتبي يفتح بيت ويتوفر منه وعندي امكانيات ماديه اني اعيش مستريح وعندي شغلي مستريح فيه بس كانت عندي مشكله كبيره جدا نظرة صعبان عليا اللي كنت شايفها في جيراني واهلي وخصوصا ابويا وامي وحاجات زي مثلا لقطة عادل امام في فيلم عريس من جهه امنيه لما بنته بتتجوز شريف منير وهي في المستشفى بتولد وهو بيحضن حفيده وشريف واقف وياخد ابنه في ايده ابويا قاعد ما تحولوا هاتوا حاجه تانيه   عشان مايجرحش شعوري بلحظة الابوه اللي اتحرمت منها وكان لازم اخرج من مصر ومن البيت لان احنا بنجدد الام بعض وبشوف الالم في عينه شويه عليا وشويه على نفسهم قررت ابعد عنهم عشان نعيش كلنا وننسى جراحنا من غير زعل يعني سافرت ومفيش حد زعلان من سفري ومسافر وهما راضيين عني والحمدلله كل يوم معاهم على الشات والمايك والكاميرا كاننا مع بعض على طول .  
6- اتعرفت على اصدقاء جدد من عدة دول عربيه وكان اهمها المهندس ميثاق من سوريا راجل محترم جدا وانا بعتز بصداقته جدا غير كتير تاني وطبعا اصدقائي من المدونه اللي بجد بتعب لو ماشوفتهمش كل يوم ولو انا قصرت مع حد ياريت يعاتبني عشان ما اعملش كده تاني ابدا ابدا .
اما سلبياتها فانا مش فاكر حاجه منها لاني خلاص رميتها بكل سلبيتها خلينا نفكر في بكره احسن .
نفسي في 2011 
1- وده اهم حاجه اني ابطل السجاير تماما وتخرج من حياتي.
2- اني ارجع مصر واخد بنتي في حضني .
3- اني احضر تجمع واشوف مين الناس السكره اللي وقفوا جنبي من غير ما يعرفوني.
4- اني اخلص من كل القواضي والمشاكل المتعلقه واطلق مراتي واخلص .
5- اني الاقي بنت الحلال اللي اكمل معاها حياتي بس يارب الاقي حد يوافق بيا .
6- اني انول شرف اعجابكم واتطور ومفيش حد يزعل مني والى كل زواري الاعزاء انا مش زعلان من اي حد فيكم وياريت لو حد زعلان مني يسامحني .
7- اني استمر بتركيزي في شغلي واتقدم في مجالي واستكمل بناء نفسي .
8- الاستمرار في الحفاظ بالروابط الاجتمماعيه ابويا وامي واخواتي واعمامي واخوالي واولادهم وكل قرايبي واصحابي وتكون في الزياده بعيد عن النقصان .
وكل سنه وانتم طيبين وبخير وفي سعاده دائمه وتتحقق كل امالكم في السنه الجديده وتندفن كل الامكم مع السنه القديمه .

اهلا 2011 وانا جاهز ومشتاق ليكي 

ملحوظه صغنتته

مش عايز اعمله واجب بس ياريت كل واحد يشوف نفسه امبارح عمل ايه وبكره ناوي يعمل ايه وياريت نسمع كلامكم ونشوف اجابتكم والا احوله لواجب واللي مش هيحله مش هرحمه وهحضر الفلكه

كشف حساب

احب اولا وقبل كل شئ اشكر ليكم متابعتكم ليا طول الفتره الطويله وكتير كنت بزعل لما حد كان بيكتب انا اتخنقت وزهقت واتنرفزت وللاسف سمعتها كتير منكم وانا مكنتش عايز اكون سبب لتعبكم وزعلكم وكتير كنت بفرح لما حد كان يكتب انا بدعيلك او حد يدعي ليا في تعليقه وكتير كنت بحس بايد حنينه بتمسح على راسي وكتير الاقي ايد قويه بتشد ايدي وتقولي قوم وكمل حاول تاني وانا شفت فيكم حاجات من كلامكم وده مش نقد بس مجرد اني احاول افهمكم وياريت مفيش حد يزعل مني او يزعل بسببي لاني خلاص عديت كل اللي فات ورايح على بكره ودايما والدي يقولي ماتقلقش بكره احسن من امبارح .
محتار ابدا بمين بس هبدا باختي كارمن والحب الجميل شفت في كلامهم رقه واحيانا بيكونوا زياده عن اللزوم وحسيت اني تعبت الحب الجميل معايا كتير ودموعها نزلت بسببي بس في الحقيقه هو بسبب ناس تانين ممكن بسبب مراتي بس برده في جرح جديد حسيت بيه في كلامك اما اختى الكبيره جايدا انا متاكد انك ام رائعه وقريبه جدا من اولادك ومرتبطه بيهم اكتر من زوجك حسيت في كلامك بحنية قلب ام بجد اخي سواح في ملك الله بتحاول تبعد قلبك قدر الامكان عن التدخل في اتخاذ القرارات وتحاول يكون قرارك من عقلك بس بتدور على الحلول المنطقيه والصحيحه وبتقول اللي انت شايفه صح ومش بتشغل بالك باراء الناس ويمكن يشاركك شويه في كده الدكتوره ولاء صلاح بتحب تبعد قلبها عن كل احكامها وكلامك كنت بحس كانك بتديني دوا بكلماتك عشان اتعالج من حكايتي اما افروديت واضح انها بتعاني من ثقه في النفس احيانا بتغرقها لاني كنت حاسس انها لو شافتني هتقلي يا ابني ارحمني وخلصني وطلقها وكانت معاها وداد من زمان وهي بتقول مفيش امل بس لازم برده نحاول يمكن الوحش يتغير ويتحسن اختي ومش عارف ليه حسيت انها اختي الصغيره حره من البلاد سامع في صوتها مجاهده صغيره الام اوطانها طابعه على صوتها بس ما تقلقيش القدس راجع لينا ولو بعد حين اما خواطري مع الحياه كنت حاسس انها شويه وهتقولي لو سمحت وسع شويه عشان اشوف القصه كويس كنت حاسس انها ماشيه جنبي ومعايا في كل كلمه اما رحاب صالح ياترى الجو عامل عندكم ايه انا سامع ان في مطر كتير واضح انك بنت اصول ووالدك راجل بحترمه وانت بتحبيه قوي tears انت الوحيده اللي هكتبك بالانجليزي لانك ليكي شخصيه قويه في ردك وبتحاولي تخفي اي ضعف مع اني شخصيا بحب الضعف في الانثى وبحس انه من صفاتها الطبيعيه وده كان واضح في كلامك اللي كانت واخده شكل ايجابي وبتبعد عن حاول وجرب والكلمات الضعيفه امواج الكويت كليتك شغلتك عني ورجعت تاني تحاولي ترجعي اللي فاتك خلي بالك في المستقبل اللي بيضيع من العمر مش هيرجع تاني شهرزاد اختي الكبيره اللي كنت حاسس انها خايفه عليا بمزيج من خوف الام والاخت وكانت بتقرا بقلبها كلماتي قبل ما تترجمها بعقلها وترد بالمفيد اما هبه فاروق وصلتي متاخر بس عوضتي كل اللي فاتك وكان حضورك ليه بصمته معايا واندمجتي جامد مع الحكايه وقلبك الطيب واضح انه بيتعبك وممكن يسبب جرحك اما اختى العزيزه الغاليه اللي بجد حاسس بقلق عليها موناليزا ليه جرحك واخد كل ده من وقتك لازم تقومي وتفوقي وتكملي حياتك النهايه مش نهاية تجربه بالعكس ممكن نهايتها تبقى بدايه جديده لدنيا جديده اخرجي من الماضي وعيشي لبكره صدقيني انا اكتر حاجه كانت بتتعبني لما كنت بفكر في اللي فات وانا رميته وكان فاضل منه حبة حاجات صغيره مع نهاية كتابتي في البوست اللي فات راحوا خالص وانتهوا ارجوكي ارجعي تاني لنفسك .

صديقي ابو العريف ومره ظهرت غير معرف واضح بغض النظر عن شخصيتك انك اليومين دول عندك تردد كبير في حياتك اختار طريقك وعيشه وربنا يكتب ليك الخير وصاحبي دكتور هيثم انا قلتلك ردي على كل كلامك وراي فيك من زمان مش لازم افضحك قدام الناس دكتور نور انا عايز اعرف انت مين لاني حسيت بعقل متزن جدا واعتقد ان سنك فوق الثلاثين فتاه من الصعيد انا حسيت انك مش مصدقه كلامي او عندك احساس اني بخبي رد فعلي بس تاكدي انا معرفش حد من اللي بيحكم وحكمه لو كان مبني على قصه غلط يبقى مش هستفاد منه حاجه وهي ده الحقيقه الكامله لادق تفاصيلها اما نهى صالح انت كان نفسك تدافعي عنها بس هي لم تعطيكي تلك الفرصه بس صدقيني انا مش كاتب الكلام ده لاني بحارب المراه بالعكس لاني بحبها ونفسي تكون احسن مما نتصور لاني شايف انها اساس البيت وهي اللي بتشيل هم كل اللي في البيت شيرين سامي بتحبي الحياديه وتجاوبي على قد السؤال وما تسبيش حاجه تتوقعيها بس الحقيقه بتحبي تشوفيها وتحكمي عليها .
انا شفت فيكم شخصيات متميزه كلكم عايزين تعملوا الصح في حياتكم وتقولوا الصح ونفسكم تساعدوا اي حد محتاج لمساعده وفعلا حسيت اني وسط اسره مكتمله بتفكر في مصلحة الفرد والمجتمع ممكن تكون رؤيتي لكل واحد فيكم مش كامله او فيها غلط بس كلامكم اللي كان طالع من القلب شجعني اني اكتب البوست الغريب ده بس انا كنت عايز اقول بجد شكرا انتم ساعدوني في الخروج من الحفره وكل واحد فيكم كان بيشد فيا عشان ينقذني واحب اهنيكم لانكم اخرجتوني بنجاح ولو كلامي على حد هيزعله مني ياريت تسامحوني انا حبيت اقول انا شايفكم ازاي في عيوني وكنت بقرا كل تعليق بمنتهى التركيز لاني كنت فعلا بستفيد منه بشوف اخطائي القديمه وامتى كنت غلط وامتى كنت صح وامتى انا ضيعت نفسي واحسن ما حصل ليا في 2010 اني قابلتكم وعرفتكم ويارب تكون سنة 2011 عام الفرح والسعاده وتحقيق الاحلام وكل واحد فينا يحقق طموحاته ويلاقي كل اللي نفسه فيه واسمحو ليا اسيب صورة بنتي شويه

كل عام وانتم بخير جميعا

 

ملك اسامه

خلصت الحكايه صحيح لسه ما وصلتش النهايه بس كلنا عرفناه والباقي مسالة وقت مش اكتر وانا كنت ناوي اكتب في موضوع وانتم اجبرتوني اني اكتب البوست ده وبداية كلامي فيه كلمه كلكم كتبتوها ربنا يعوضك وتلاقي اللي تسعدك.
كان في ناس عايشه معايا وتقولي لازم تتجوز تاني انت هتقعد كده ليه بس انا كان ليا راي تاني وشعور تاني اني لازم استنى شويه مش عشان حد غير نفسي اولا وبعدين عشان اللي هرتبط بيها لاني كنت حاسس اان الست اللي هتجوزها دلوقتي هظلمها ظلم كبير لانها هتاخد قلب مش بيعرف يسامح هتاخد عقل تعب من التفكير في الشر اللي حصل ليه ويمكن كتير احاسبها على افعال غيرها وفسر كل اعمالها اللي كنت زمان ممكن اعديها عشان المركب تمشي وتعدي انها زي غيرها هتكون احسن من غيرها في ايه وافترض سوء النيه من اول الطريق لاخره يعني من الاخر كنت حاسس اني لو اتجوزت تاني انا اللي هجري بسرعه عشان اهد البيت قبل ما يتهد عليا زي المره الاولى وابيع انا احسن ما غيري يبيعني وطبعا عمري ما هثق في زوجتي عشان ثقتي قبل كده دخلتني قسم الشرطه برجليا.

لازم اقف تاني على رجلي واشوف من الناس اللي يخليني اثق تاني في حد وامسح كل اللي باقي من دموعي واخرج واتعافى بالكامل من جروحي هو المريض بيبلع الدوا يقوم يجري ويبقى سليم لازم يصبر شويه مع المرض لحد ربنا ما يعافيه وانا قررت اداوي جروحي على مهلى وادور على شريكة حياتي الجديده لما اخف واحس اني كويس ومش هظلم اللي هرتبط بيها لانها ممكن تكون انسانه كويسه وطيبه ونتيجة جرحي اظلمها وانا مش عايز احاسب حد بظلم ارتكبه شخص تاني والى الان لسه ما اخدتش خطوتي الاولى في اختيار شريكه لحياتي لان لسه فاضل جوايا شويه صغيرين هيدوبو مع الايام وكمان عشان اختار على مهلي ولا يمكن انتم عايزاني اعيد القصه من تاني ويحصل ليا نفس اللي حصل زمان من تاني .
وقصه تانيه شدتني بعضكم تناولها في كلامه بنصيحه بريئه وانا عارف انه اكيد قصده الخير الاقيه يقلي خلي بالك من بنتك وما تقصرش معاها وقرب منها على قد ما تقدر انت مهما كنت ابوها لازم برده انت اللي تصرف عليها .
كل الكلام ده في الطبيعي جميل ونصايح غاليه اما معايا كانك ماسك سكينه وبتشرح فيا ؟ اخلي بالي ازاي في شئ من الاساس هو مش معايا ينفع اقول لحد منكم خلي بالك مني هي ده نفس العلاقه ما بيني وبينكم هي نفسها اللي بيني وبين بنتي برغم وجود فوارق بسيطه ان انا عارف انكم موجودين وانتم عارفين بوجودي انما انا عارف ان بنتي موجوده وهي مش عارفه ان ليها اب  ده حد وصلتني معلومه من واحد قلي انهم بيقولوا للعيال الصغيره في العيله انها اسمها( ملك حسين ) حتى اسمي بيحاولوا يلغوه من اسمها بعضكم يقول قرب منها ياريت لو بايدي انا مش هسيبها بس هي بالنسبه ليا حلم بعيد اني اشوفه ولما هاشوفه هيكون اتملى بالحقد والكره ليا اما حتة الانفاق ما تقلقوش من ده بالذات انا سايب مع امها عفش بمية الف جنيه ودهب بعشرين متهيالي دول يكفوا بنتي كتير وبعدين في نفقه بتاخدها عن طريق المحكمه ليها وللبنت كمان يعني كده او كده انا اللي هصرف عليها حتى من غير ما اشوفها ومن غير ما تعرف اني ابوها والصوره اللي فوق ده صورتها تخيلوا اخيرا عرفت اشوف صورة بنتي اخيرا ممكن اتخيل شكلها وجت ليا عن طريق فاعل خير راجل محترم بيفهم في الاصول وانا مش هقول اسمه عشان تفضل في ميزان حسناته ليوم القيامه ان هو اللي عرفني صورة بنتي .
اقتراح 
كنت بفكر اكتب رقم تليفون حسين ابو مراتي اللي سارق اسمي من بنتي ونبعت رساله لبنتي بمنتهى الادب والاحترام يوم راس السنه رساله بسيطه جدا ولتكن ( كل سنه وانت طيبه يا ملك اسامه ) بس مش اكتر ويا سلام لو اشترك فيها اصدقائي من الدول العربيه ياريت تقولوا رايكم ليا في الفكره ده. 

حكايتي مع الايام (15)

تاني يوم طلبني مديري في الشركه وكان يوم 28/3/2009وقلي انا جه ليا جواب من المحكمه بمرتبك وقلت ليهم بجواب رسمي مرتبك 200 جنيه ومثبت في التامينات وانا سالت عليك اصدقائك في الشغل مدير الموقع والمحاسب والمهندسين وده شجعني اني اقلك انا ليا تجربه شخصيه في المواضيع اللي زي ده واسمح ليا اني احاول اساعدك .
من كتر همي حكيت وقلت كل حاجه عندي وعنه ماخبيت شئ وانا قلبي بيصرخ في ايه ليه كل ده بيحصل عشان ايه ومش عارف ساعتها اخد رقم ابوها مني او من المحامي اللي جاب الورقه وكلمه واقنعني انها لسه برده مراتك لازم تبعت ليها فلوس عشان تثبت حسن نيتك وبعت معاه على 3شهور مبلغ 3500 جنيه وقلت في داهيه الفلوس وانا مش عارف اعمل حاجه بيها تبسطيني يبقى ايه فايدتها واستنيت اي رد ولكن وصل ليا خبر اكيد مراتك ولدت من عشر ايام جابت بنتي يوم 9/4/2009 وانا عرفت من الشارع يوم 19/4/2009 وكمان سمتها ملك اتصلت بيه زي المجنون هو انت بتحل مع مين قلي في ايه هو في جديد قلتله بنتي جت للدنيا بقالها عشر ايام مفيش حد قلك منهم امال انت بتحل في ايه وبصراحه استحمل كلامي برغم انه راجل كبير في السن ومديري بس انا جرحي عجوز وجرحي بقى اكبر من المحيط وعرفت انه اخد مراته من القاهره وراح عندهم كفرالشيخ بعدها واتكلم معاهم كذا مره بس مفيش جديد.
وفي وسط ده زميل ابويا قابل ابوها وقله يا عم حسين بدام مفيش حد عاجبك كلامه واللي في دماغك مش عارفينه ايه رايك في الطلاق واهو برده حل قال ليه انا عايز قايمتها ونفقتها ومؤخرها وشقتها رد عليه انا مش هعرف اجيب ليك الكلام ده لو عندك حد يعرف روح ليه وسابه ومشي وفضل الوضع زي ما هو لحد ما جت ليا ورقه تانيه بتقول انها رفعت قضية نفقه للبنت يوم 6/6/2009 اتصلت بمديري تاني
هو انت بعت الفلوس ولا ايه قلي ليه في ايه قلت ليه انا جت ليا قضيه تانيه نفقه للبنت قلي فلوسك وصلت ليهم وانا هكلمهم تاني واشوف وعادي ولا حاجه حصلت .
لحد ما دخل رمضان وبعد حوالي اسبوع اتصل بيا وقلي تعالى على الشركه هنفطر سوا النهارده رحت ليه لاقيت المحاسب هناك وتقريبا هو كان عارف كل حاجه لانه زميلي وقريب من المدير جدا وطلب مني نمرة تليفون والدي واتصل بيه وقال ليه يا حاج عبدالرحمن انا هاجي افطر عندكم يوم الجمعه وبعد مكالمة والدي قعدنا وفطرنا في مطعم اسمه وادي النيل بتاع سمك جامد برده على فكره وبعد الفطار والصلاه قال ليا تعالى هنشتري حبة هدوم لبنتك وبصراحه انا كنت رافض اني اروح اشوفها عشان مااربطش نفسي بيها او اتعلق بيها ويمكن ما اعرفش اشوفها بعديها وكان نفسي يأما ترجع لبيت ابوها يأما احاول انساها او على الاقل ما اربطش نفسي بيها وكنت رافض الفكره تماما واشترى هو والمحاسب كل حاجه وبعدها روحنا وهو اخد مراته وجاب لبنتي  كمان سلسله وخاتم وطبعا انا دفعت تمن كل حاجه لانها بنتي ورحنا فطرنا عند والدي في البيت وبعد العشاء اخدني ورحنا على بيتهم مااتكلمناش في اي حاجه ابوها طلع بنتي واخدتها على رجلي وشيلتها وحضنتها وقلت ليها في ودنها ما تخافيش ابوكي مش هسيبك وهتفضلي معاه لو حتى ذكرى والمدير بتاعي قلي بص الناحيه ده عشان اصورك معاها ابوها قام وخطفها مني وقال اصلي اسمع ان تصوير العيال الصغيره حرام وانا ضحكت غصب عني لاني قلت في سري ويعني ماسمعش ابدا انه حرام يحرمها من ابوها ومش حرام انه يحرمني من بنتي وقعدنا حوالي ساعه وقمنا ومشينا واحنا في الطريق سكت الكلام خالص مش قادر انطق بكلمه ورجعت معاه على بيتي في فيصل واحنا في الطريق قلي ابعت لمراتك رساله حلوه قلت ليه لما اوصل البيت هبعت ليها وهبعتها ليك عشان تعرف انا قلت ايه وردت عليا بكلام مش جميل بعت برده الرد ليه قلي رد تاني برساله رديت وردت هي برده برساله اوحش من الاولى قلي كفايه ماتبعتش تاني حاجه وبعدها بيومين وصلت رساله تانيه منها ولسه معايا في التليفون لانها اغلى رساله في حياتي وكان مضمونها بالحرف (ازيك انا عايزه اقعد واتكلم معاك) ما صدقتش نفسي طبعا زيكم ياااه اخيرا في امل اتصلت بالمدير على طول وقلت ليه قلي ردت قلت لا قلى اتصل بيها وكلمها على طوول واتصلت وكلمتها وقلت ليها وماله نقعد سوا ونشوف الدنيا فيها ايه انا هنزل كفرالشيخ اخر الاسبوع ولا اجي دلوقتي قالت لا خليها اخر الاسبوع وقبلها بكام يوم رنت طبعا قفلت عليها واتصلت انا امال هي تدفع تمن المكالمه لا عيب قلت ليها خير في حاجه قالت انا هاجي القاهره ونتقابل هناك احسن قلت وماله هتيجي امتى قالت غالبا يوم الاتنين قلتلها ماشي هتجيبي البنت معاكي قالت اه طبعا يا فرج الله ماشي انا ف انتظارك وجت يوم ماتش مصر وزامبيا في تصفيات كاس العالم كان الماتش قبل الفطار بس ضحيت بمصر وصليت العصر واتشيكت ومليت جيوبي عشان افطرها بره في مكان كويس واتفقنا على المكان اللي هنتقابل فيه في اول الشارع بتاع بيتنا اللي اتجوزنا وبدانا فيه واتصلت تاني انت فين قلت انا هنا واقف قدام محل العصير اهو طيب خلاص انا دقيقتين وهاجي ولاقيت واحد قرب مني وبعدها اتنين قلي انت اسامه عبدالرحمن قلت ليه ايوه طيب بطاقتك قلت ليه من حضرتك قلي انا الظابط .... من تنفيذ الاحكام وياريت تيجي معانا من غير شوشره انت عليك حكم في قضية تبديد قايمه  (اللي هي بتاعة العفش وكده ) وانا جي اخدك وبعد ما ركبنا سوا العربيه قلي انت عمرك شفتني قبل كده قلت ليه لا قلي امال مراتك ليه مقدمه شكوى اني اخدت منك رشوه عشان ما اقبضش عليك وعشان ما تفكرش كتير هي اللي عملت ليك الكمين .

طبعا مش هحكي شعوري لانه اكيد وصل ليكم انا كنت عامل ازاي انا اتخرست واتعميت وشبه اتشليت ومش قادر اعمل شئ واخر ما قدرت اعمله بعت رساله للمدير ولابويا انا في قسم الهرم اتصرفوا ودخلت القسم ساعة اذان المغرب فطرت هناك وكنت بتخيل شعور ابويا كان عامل ايه ابنه الوحيد واخدينه على القسم وبصراحه كل الناس اتحركت ووقفت معايا ليا عم شغال في النيابه خلاني ابات في غرفه هناك لانزلت لا حجز ولا حطوا في ايدي كلبشات بس برده انا بايت في القسم وجه المحاسب وجاب ليا سجاير وكنز ومياه معدنيه بس برده بايت في القسم وجه عمي وعمي التاني ظابط في الجيش وجابوا ليا اكل من مطعم فلفله بس برده انا بايت في القسم موبايلي معايا وقرب يفصل شحن جابوا ليا شاحن بس برده بايت في القسم وقضيت ليلتي هناك وشفت ناس محترمه جدا وملناش دعوه بيهم والصبح خرج معايا امين شرطه ورحنا بعربية عمي النيابه وعلبال ما وصلنا كان المحامي خلص كل حاجه ورجعنا على قسم الهرم سلمنا جواب الاستئناف ورجعت مع عمي وابويا وقالوا ليا تحب تعمل ايه قلت ليهم خدوني على شقتي وصلت شقتي وطلعت وقلت ليهم روحوا انت عند ستو وانا هنام شويه وهاجي افطر معاكم ودخلت اول حاجه عملتها اخدت دش غسلت فيه نفسي من كل ذرة ضعف باقيه من كل نقطة حب جوه قلبي من كل لحظة شوق اني اشوف بنتي وقتلت نفسي بنفسي وحلفت على نفسي اني اكون غير نفسي وبعدين انا الغلطان انا اللي سلمت نفسي وطلعت بعد ما نشفت نفسي كويس عشان مفيش نقطه تكون لسه ماسكه في جسمي ودخلت نمت نوم من نوع تاني انا اعلنت بنومي وفاتي واول ما صحيت اتولدت من تاني لوحدي وبدات اعلم نفسي المشي بنفسي وقررت اني اعيش بس لنفسي وبعت كل حاجه تستاهل اني انساها وقمت ولبست ونزلت وانا مليش غير اهلي ابويا وامي وعمي وخالي وغير كده انا قلبي خالي وشوفت محامي كويس وعملت ليه توكيل واحد في القاهره و واحد في كفرالشيخ وسلمت عفشي بنفسي ليهم وانتهت القضيه والمحامي معاه اوراقها ونسيت كل حاجه فاتت وماتت وعرفت بعدها ان كان في قضية طلاق رفعتها يوم 25/12/2008 واترفضت عشان جابت اتنين شهود خالها من الشرقيه و واحد جارهم في كفرالشيخ انا معرفوش وشهدوا انهم شافوا اثار ضرب على جسمها مني والقاضي طبعا قال شقتها في القاهره وواحد من كفرالشيخ والتاني من الشرقيه ازاي وبعدين بدام ماشوفتهوش بيضرب ملكموش شهاده عندي ورجع خالها بيته اللي انا عمري ما شوفته ولا اعرفه ويمهل ولا يهمل اصابه ربنا بفيرس c ومات في شهر اربعه اللي فات والتاني انا معرفش عنه حاجه ومش عايز اعرف و لسه قضية النفقه بتاعتها وقضية نفقة البنت في المحاكم لسه مخلصتش والمحامي بتاعي رفع قضية طاعه ورؤيا للبنت الى الان لما يصدر الحكم ومش هيفرق معايا كتير لاني بقالي شهور بره مصر كلها بناسها واهلها ومش عايز ارجع لها تاني  وهي ده كانت حكايتي مع الايام حتى 1/1/2010 اما 2010 كلها انا عايش مع نفسي ولنفسي من غير ما انسى اهلى اللي وقفوا جنبي من البدايه للنهايه وعمري ما هقصر معاهم ولاهنساهم والحمدلله رجعت لنفسي ولشغلي ولحياتي من تاني تخيلوا ورا كل قصه حزينه ليها نهايه سعيده انا كنت تهت من نفسي ومعاكم لاقيت نفسي شكرا على متابعتكم ليا .... 

حكايتي مع الايام (14)

انا مليش قرايب في كفرالشيخ غير بس بيت عمتي وجوز عمتي حس انه معملش اي حاجه عشان تساعدني قرر يتكلم مع الراجل ويحاول معاه هو صحيح ليه طريقه هاديه ومقنعه وبيتعامل مع الناس بما يرضي الله بس ده ماكنش كافي لاقناع الراجل او تغيير اتجاه الحياه وكان بيحاول المحاولات ده من غير ما يقول لينا وسالني كذا مره على مواقف فانا حسيت هو بيعمل ايه وقلي والله يا اسامه انا بحاول لو وصلت لنتيجه طيبه اكيد انت اول واحد هيعرف لو ماوصلتش يبقى بلاش اوسع الفجوه مابينكم قلتله ربنا يوفقك.
وبعد كام يوم وصل ليا عن طريق واحد صاحبي تحذير من واحد قريبهم قال لصاحبي خلي اسامه ياخد باله لانهم مشيوا في طريق المحاكم وطبعا كلمت جوز عمتي وقلت ليه الكلام قلي انت مفيش ورق وصلك وانا هتكلم مع الراجل واشوف وطبعا الراجل قال لا طبعا مفيش السكه ده خالص ومش في دماغنا نمشي بيها وبعد عدة محاولات من الاقناع من جوز عمتي قال لابوها انت مش بتقتنع بكلام اي حد شوف كام واحد حاول معاك طيب بقلك ايه انت مش بتقتنع بكلام ربنا قال ليه ونعم بالله جوز عمتي قال ليه انا عندي اقتراح نروح لدار الافتاء فرع كفرالشيخ نقعد ونحكي ونشوف راي الشيوخ ايه وناخد اسامه وميرهان رفض جدا حضوري وصمم انه لو هيروح مفيش حد فينا يروح معاه راح هو وجوز عمتي وحكى اللي عنده وجوز عمتي مش الطرف التاني فكان مش بيشترك في الكلام الا في اقل الحدود وبعد ما خلص كلامه مع الشيخ قال الشيخ لجوز عمتي وانت ايه رايك في الموضوع ده او ايه ردك قله انا معرفش حاجه عن المواضيع ده ساله الشيخ امال فين الزوج قال ليه رفض الحاج حسين ابوها حضوره ابتسم الشيخ وقال ليه لازم وجوده انت عايز يا حاج حسين تحاكمه من غير ما تسمع دفاعه وممكن يكون كلامك كله صح بس بنتك عملت فيه اللي تستاهل عليه اكتر من كده لازم وجود الطرفين وخرجوا على كده وتبادلوا ارقام التليفونات عشان متابعة الموضوع بجلسه اخرى .
بعدها حصل موقف كانت والدتي في شغلها دخل مكتبها موظف معاه شيخ وقال ليه الحاجه ريستنا كلنا هنا وهي هتعمل ليك يا شيخنا كل اللي انت عايزه وسالته كان عايز ينقل زوجته من مدرسه لمدرسه وبعدين سالته بالمره والله يا شيخنا انا ابني ساكن في القاهره وهو لسه متجوز جديد شهرين بس ومراته رجعت على بيت ابوها وهو مش عايز يرجعها قال ليها الشيخ هو انت والدة البشمهندس اسامه قالت ليه اه قالها انا قعدت مع ابو البنت وواحد قريبكم وحكى ليا حاجات وانا قلت ليه لازم وجود الطرف التاني بس ما تاخذنيش يا حاجه اصله كان بيقول انك موظفه انا فهمت من كلامه انك يعني موظفه صغيره على قد حالكم يعني انت و والده ده كان معنى كلامه والدتي قالت الحمدلله احنا على قد حالنا انا مديرة الشئون الماليه والاداريه بالاداره التعليميه و والده رئيس لجنة طعن ضرايب كفرالشيخ وانتهى الكلام بربنا يسهل الحال واللي فيه الخير يقدمه ربنا وبصراحه الشيخ ماقصرش ضغط على الراجل وجوز عمتي هو كمان واتفقنا وقعدنا قاعده في كافتيريا النادي رحت انا وابويا وجوز عمتي وجه الراجل ومعاه بنته وابن عمته ومراته واخت الحاج حسين ومعاهم الشيخ اول ما دخل الشيخ قمت انا ووالدي سلمنا عليه وبيعرفنا بيه انا رديت وهل يخفى القمر انا صليت وراك يا شيخنا في مسجد كذا وحضرت خطبه كانت عن موضوع كذا ووالدي قال بس انت قبلها كنت بتصلي في الجاممع الفلاني انا حضرت ليك كام خطبه هناك وقعدنا واحكي يا بنتي وحكت وانا رديت وكان الشيخ بيسمع كانه اول مره يسمع الكلام وانا جوايا بسال امال هو لما راح حكى ايه وارد على الكلام و وصلت الامور ان حتى الناس اللي كان جايبهم عشان يقفوا ضدي قمت ارد على التليفون لاقيت ابن عمته جه ورايا وقلي اهدى شويه وربنا يسهل الحال انا شايف ان الامور ماتستهالش واحنا اتحكى لينا كلام دلوقتي قدامكم اتغير كله اهدى عشان ما يجبش غلط عليك وان شاء الله مراتك هترجع ليك ورجعنا واخرالكلام قال الشيخ بص يا حاج حسين الامور مش مستاهله انت ايه يرضيك انت عايز ايه وطبعا قعد يتهرب من السؤال قطع كلام الشيخ الكلام قال انا شايف مشاكل من اللي بتحصل في بيتي كل يوم ويا سيدي عشان ماتبقاش قلقان على بنتك تكتب يا اسامه تعهد انك تعاملها كويس وهيبقى معايا التعهد ده ايه رايك
قلت ليه يا شيخنا هو في بعد كلامك كلام اللي انت تقول عليه انا معاك ووالدي ورايا قال يا شيخ احنا جايبن عشان انت تحكم بحق ربنا لو هو ده حق ربنا يبقى لازم نمشي وراه وتخيلوا الرد ده نرفز الحاج حسين جدا لدرجة انه قام مره واحده وكانت بنته مشيت من شويه وقال انا عايز شقه في كفرالشيخ ومفيش حل تاني وقمنا على كده وطبعا سلمنا على الناس والناس سلمت وقالت ربنا يصبرك يا ابني وربنا يهديه حتى قرايبه اللي جايه معاه مشيت وهي مش معاه .
وبعدها بكام يوم ومعرفش ليه وصلت رساله وكلمتها تاني وسالت عن اخباري قلت خير يمكن ربنا هدى القلوب واخبار شغلك ايه انت فين دلوقتي قلت انا في قريه اسمها ريحانه بعد مدينة الانتاج الاعلامي بنبني فيلل هناك وتاني يوم يا اصدقائي كلمني واحد من اصحابي وقلي في محامي جه هنا الشركه المالكه للمشروع ومعاه ورقه من المحكمه وبيسال على مرتبك عشان مراتك رافعه قضية نفقه وهيروح بكره على شركتك اللي هي كانت مقاول بينفذ في المشروع كلمت المدير المالي عندي وبلغته ان في كذا هيحصل شوف انت ممكن تتصرف ازاي وعشان نعرف احنا وصلنا لفين كان الكلام ده يوم 27/3/2009......

حكايتي مع الايام (13)

قبل العيد الكبير بحوالي 3 ايام تقريبا 6/12/2008 بعتت رساله ليا كلمتها ورحت واخدت اجازة العيد من شغلي ونزلت على كفرالشيخ وقعدت مع ابوها تاني واتكلمنا وقلي عايز اشوف ورق الشقه قلتله ورق ايه يعني قلي عقد البيع ولا الشقه ايجار قلتله سهله بس الورق في مصر قلي عايز اشوفه قلتله بس كده واخد مراتي وامشي عايز اعيد معاها قالي ايوه خرجت ورجعت تاني القاهره جبت الورق اللي كنت سايبه كله مع عمي وكلمتها هو ايه عايز يشوف الورق ده لمحت انه عايزك تكتب الشقه باسمي رحت قايل الاجابه بمنتهى الصراحه والوضوح يبقى كده عايز يحط العقده في المنشار لان ده عمره ما هيحصل وهو ما قلش الكلام ده ليه وانا قاعد معاه وبعدها قالت اصل في واحد قله ان الشقق في فيصل اغلبها ايجار وهو عايز يتاكد ان كانت ايجار او تمليك قلتلها وماله كلها كام ساعه ونعرف هو عايز ايه وبرده رجعت ورحت عنده الورق اهو بص عليه وبعدين قلي عقد البيع بتاع عمك ليك ده ملوش لا صحة توقيع ولا تسجيل قلتله انا والدي هنا في كفرالشيخ وعمي هناك ومعاه المحامي بتاعه خلص هو اجراءات البيع مع الراجل الغريب وكتب بعديها بحوالي سنتين العقد اللي بيني وبينه لما جيت ادخل الغاز واغير عداد الكهرباء لاسمي وادي وصل الغاز والكهربا باسمي غير كده انا كنت شايل العقد معاه هو اصلا لان احنا بينا وبين عمي حاجات كتيروارتباطات كتير الشقه ده بالنسبه ليهم شئ لا يذكر قلي ازاي وانت تضمن منين عمك ما يختش منك الشقه قلت ليه لو هقلق مش هيبقى على الشقه خالص يبقى هقلق على الحاجات التانيه قلي لا انا عايز العقد يتسجل في الشهر العقاري او تعمل صحة توقيع رديت عليه لو هو ده اللي هيوقف الدنيا مفيش مشكله بعد العيد اعمل صحة توقيع وبعدين قام وجاب 3 ورقات الاولى اقرار اني ما اضربش مراتي وانفق عليها بما يرضي الله والتانيه اني ما اكسرش في اساس البيت والتالته انك تعاملها بما يرضي الله وقلي ده ورق كتبته على الكمبيوتر ورق عادي يعني مع ان الورق كان مكتوب على اله كاتبه مش كمبيوتر وباين من شكل الحروف وده صوره منه وبصراحه قلقت بس قلت ليه هو انا حصل مني غير كده هو انا بعاملها مش بطريقه اسلاميه هو انا بكسر عفش البيت قلي عشان ابقى مطمن عليها وبعدين الورق ده مش فيه حاجه غلط قلت ليه وماله همضي عليه بكره الصبح قدام الاتنين اصحاب ابويا اللي كانوا ادخلوا ويمضوا عليه شهود واخد مراتي وامشي قلي لا تمضي دلوقتي يا كده يابلاش قلت ليه بلاش سلام عليكم ولمت ورقي ومشيت وسافرت على مصر قضيت العيد وتاني يوم جت رساله من اختها كل سنه وانت طيب اتصلت بيها وكان في ما بينا كلام كل فتره وسلمت عليها وعلى العيال وقالت ليا ان خالو صابر وده غير اللي اخدها من البيت ممكن يعرف يقنع بابا قلتلها باب دماغه ناشفه قوي قالت ليا خد رقمه وكلمه يمكن ربنا يسهل الحال اتصلت بخالها وكلمته واتفقنا ورحت ليه الشرقيه تاني يوم وعمل الواجب وتمام واتكلمنا وفي الاخير قلي انا اتكلمت معاهم وابوها معندوش غير حلين انك تكتب وصل امانه وترجع معاك او لو معندكش امكانية تشتري شقه في كفرالشيخ ممكن هو ياجر ليك شقه عنده في البيت قلت ليه هو ده كلام قلي هو ده اللي انا وصلت اليه معاه قلتله خلاص ربنا يسهل الحال وانا هرد عليك ونزل وصلني لاول الشارع وسلمت ورجعت تاني القاهره وبعد يومين كلمته قلتله حتة وصل الامانه مش هينفع لان هي ملهاش ضمان وفين مراكز صيانتها (على اساس اني بشتري غساله او تلاجه) وبالنسبه للشقه انا شاكر ليه كرمه انا عندي شقه فعلا في القاهره منين ماتحب ترجعها اهلا وسهلا وعمر الدنيا ماهتقف على حل راح قايل ليا طيب ايه رايك تجيب ليها هديه دهب ونروح سوا وناخدها قلت ليه وماله انا معنديش مانع قلي هتكلم معاهم وارد وطبعا مفيش رد جه.
وبعد العيد بيومين وصلني ورقه من النيابه طلب حضور رحت اشوف في ايه لاقيتها عامله محضر اني طردتها من البيت قدام الجيران واخدت دهبها وغيرت كالون البيت ورافض رجوعها قلتلهم الحقيقه عكس كده تماما وانا عايزها ترجع امبارح مش دلوقتي وهي مشيت مع خالها انا ما طردتهاش وجه معايا امين شرطه وسال الجيران عن الواقعه المذكوره بالمحضر واحد منهم لما سمع الكلام خلى مراته تعمله ميه بسكر عشان داخ وكلهم استغربوا حصل امتى ومشيت ليه وكان في واحد من الجيران كانوا قابلوه ابو مراتي وهي   في البيت عنده معرفش امتى ومعرفش برده ليه وقلي هو الموضوع وصل للنيابه انا معايا رقم ابوها ورقمها انا هتكلم معاهم واشوفهم عايزين ايه قلت كويس عشان تكمل والراجل مشكورا نزل ليهم كفرالشيخ وقعد مع ابوها وما وصلش لاي حاجه ورجع كما راح . 
خلاص اقتنعت بكلامكم ياجماعه انا لازم اخد هدنه واقف وافكر واشوف الدنيا واخداني لايه ولفين وقعدت احاسب نفسي واشوف انا غلطت في ايه واستاهل ايه والناس ده بتعمل كده ليه ووصلت اخيرا لنتيجه اني مش فاهم اي حاجه من اللي بيحصل . 
 

حكايتي مع الايام (12)

سافرت يوم السبت وانا مش عارف ايه اللي هيحصل ورحت شغلي وعشت مستني اللي هيحصل لحد يوم الاربعاء اتصلت بابوها وكلمته ايه الاخبار والدنيا عامله ايه قلي عايز اتكلم معاك قلت ليه وماله وانا كمان عايز اتكلم معاك ايه رايك نقعد في حته بره البيت ونقعد براحتنا رفض وقلي وهتفرق معانا ايه تعالى على البيت قلت ليه وماله انا هنزل النهارده واجيلك بكره الصبح ورحت تاني يوم سلام عليكم وازيك وبدا الكلام انا عايزك تجيب شقه هنا في كفرالشيخ قلتله بس انا شقتي في القاهره وشغلي في القاهره قلي وايه يعني بيع الشقه اللي هناك وهات شقه هنا سالته وبالنسبه للشغل قلي تعالى اشتغل هنا في كفرالشيخ قلت ليه بس صعب اني الاقي الشغل اللي انا عاوزه هنا قلي خلاص اشتغل هناك وابقى تعالى هنا خميس وجمعه قلتله وده منطق يعني انا يبقى عندي شقه وشغل وادوخ نفسي طيب ليه قلي هو ده اللي عندي قلت ليه والله يا عمي احنا عندنا هنا بيت لو انا كنت ناوي اقعد هنا في كفرالشيخ كنت شطبت شقه ارخص من اني اشتري شقه واشطبها بس موضوع كفرالشيخ مقفول بالنسبه ليا وانا قبل ما اخش بيتكم واشوف حد منكم الوسيط مابيني وبينكم قلكم شقته في مصر واقامته وشغله هناك صح قلي هو ده اللي عندي عايز بنتي جيب ليها شقه في كفرالشيخ قلتله بالنسبه لمراتي شقتها موجوده ومفتوحه وترجع بيتها في اي وقت سلام عليكم.
ومشيت على بيتنا وحكيت لوالدي اللي حصل والناس اللي راحت معانا اول مره وطبعا لما اتكلموا معاه تاني كان نفس الرد ورجعت على شغلي ومستني الفرج من ربنا وفي ناس قرايبهم عرفوا ان هي غضبانه في بيت ابوها وحاولوا بس مفيش .
وسافرت تاني على شقتي وشغلي وبعد يومين تلاته جت على دماغي فكره ان المفروض ان اقرب واحده لمراتي اختها اكبر منها ب4سنين ومتجوزه واكيد في حوار ما بينهم بس اوصل ليها ازاي وبعد تفكير كان معايا رقم جوزها اتصلت بيه وازيك واخبارك انت مش نازل القاهره قريب قلي هنزل قلت ليه كويس انا عايز اقعد اتكلم معاك شويه وعلى يوم الخميس كان في القاهره اتقابلنا في كوفي شوب اسمها الامريكين في وسط البلد بس جامده على فاكره قعدنا وحكينا وقلت ليه انا قلت بدام انت عارفهم قبل مني بسنين اكيد في طريقه للحل ضحك ما فهمتش قلي هما دماغهم صعبه شويه ومش موجوده وانقرضت من زمان بس ربنا يسهل الحال انا هتكلم مع اختها وهنشوف ايه اللي ممكن يحصل وسلمنا على بعض ومشينا اتصل بيا بعدها بيومين وقلي انا اتكلمت مع زوجتي وهي تقريبا مقتنعه تماما عكس ماكنت متوقع بس انا مش هحكي ليها حاجه وعايزك انت اللي تحكي عشان لا ازود في الكلام ولا اقلل قلت ليه ماشي قلي تقدر تيجي امتى عندنا في الشرقيه قلتله بكره انت بتخلص شغلك امتى قلي على 7 قلتله خلاص هاجي على 8 ونزلت قابلني في الموقف ورحنا على البيت مراته حضرت العشا وكان تمام لان هو لسه راجع من شغله وانا كمان يعني رز وطبيخ ولحمه وصنية بطاطس اللي بموت فيها وكلنا واول ما بدات اكل كانت هي واقفه قلتلها ممكن تناوليني المعلقه مدت ايدها واخدها قالت ليا لامؤاخذه قلتلها ولا يهمك هي ده سبب المشكله وضحكنا انا وجوزها خلصنا اكل والفاكهه وعملت الشاي ونيمت العيال اللي زي العسل وطلعت وقعدنا واتكلمنا وطبعا من ردها بان ان في حاجات كتير هي عارفها اساسا من المصدر مش مني ولا من جوزها وخلصت القعده ان ربنا يسهل وهتكلم معاها وسلمت ومشيت واستنيت يوم يومين  ثلاثه واتصلت بيها خير ايه اللي حصل قالت والله انا مش عارفه اقول ليك ايه بس انا ما عرفتش اعمل اي حاجه واصبر وربنا يسهل وتتحل واتصلت بجوزها قلي يا سيدي اتكلمت مع اختها وقعدت تحكي معاها وازاي وانت غلطانه وهو غلطان بس الامور ما تستاهلش وفكري في بيتك واللي في بطنك وبعد ماقفلت معاها بكام ساعه اتصل ابوها بيها وقلها ازاي تدخليه بيتك اساسا وتاكليه عندكم ولو ادخلتي في الموضوع ده تاني مش هدخلك بيتي قلتله لا يا عم خلاص هو انا هنقل مشاكلي ليكم لا خلاص خليها بعيد وانا شاكر ليكم محاولتكم .
وحاول ناس يتدخلوا كان من ضمنهم اتنين اصحاب والدي في الشغل منهم واحد عنده 6 بنات ومتجوزين وهو تطوع وقال انا ادرى واحد بالمشاكل ده واتصل بيه واتكلم معاه مره واتنين وحاول يوصل معاه لنتيجه وساب المواضيع عايمه ومفيش حل وصلوا ليه وبعدها بفتره اتكلمت مع مراتي على الموبايل بعد ما اخيرا فتحته وكلمه كده على كلمه كده اديتني رقم ابن عمتها وقالت هو قريب من بابا قوي كلمته واتناقشنا وواضح ان هي كانت حكيت ليه لاني سمعت حكايتها في كلامه وقال ليا انا هتصرف ان شاء الله عدى يوم اتنين تلاته اتصلت بيه قلي انا مش عارف اقلك ايه بس انا اتكلمت معاه وفي الاخر اتخانقت معاه وقلت ليه انت ظالم بنتك قبل جوز بنتك وانا لو مكانك اصبر شويه وما اتكلمش معاهم خالص .
وكان صاحب والدي اللي اتدخل ساكن جنبه اخو حمايا العزيز اتكلم معاه والبيوت مليانه واحنا مفروض نساعدهم مش نهد بيتهم وكده وبعدها بكام يوم قال ليه انا اتكلمت معاه وكان رده انا ما ادخلتش ليك في جوازات بناتك ملكش دعوه ببناتي ويبقى الوضع على ما هو عليه لحد العيد الكبير ما جه .... 

حكايتي مع الايام (11)

اخيرا خرجت من البيت وحسيت اني عايش صحيح كنت مستغرب انها ضحت ببيتها وزوجها عشان مفيش بس اناكنت تعبت واتقفلت معايا كل طريق وبصراحه انا فرحت جدا وانا بقفل الباب وراهم وخصوصا ان خالها قال ماتتكلمش ياريت تبعت ورقتها لبيت ابوها 
وبصراحه اكتر انا لما هديت وقعدت شربت كوبية الشاي التمام من عمايل ايدي انا حسيت اني ارتحت اكتر كمان بس عشان اخيرا هي راحت بيت ابوها ونتكلم بقى اخيرا وهنقعد ونشوف في ايه هي بتعمل كده ليه وكلمت والدي قلت ليه سالني ايه اللي حصل حكيت ليه استغرب وقلي ايوه بقى سابت البيت ليه؟؟؟
قلتله ده اللي حصل قلي خلاص اصبر وظبط امورك وربك يحلها بعد يومين جارهم جوز طنط ام وائل اتصل بوالدي وساله ايه في ايه الحاج حسين اتصل وقال ميرهان غضبانه وقاعده عنده في البيت ايه اللي حصل ابويا حكى ليه قله كده بس طيب هشوف كده ممكن نعمل ايه واتصل بيا مهندس اعرفه ويعرفهم وسالني وقلت نفس الكلام لان مفيش غيره قلي يعني انت عايز ترجعها قلت ليه هو انا مشتها هي اللي مشيت وبيتها ترجع ليه في اي وقت قلى خلاص انا هتكلم معاهم واشوف وبعدين اتكلم مع والدي وقله هنروح اخر الاسبوع نقعد معاهم وانا روحت في الميعاد على كفرالشيخ وسالني والدي في ايه كانت ده اول مره احكي لوالدي كل حاجه قلي وانت ساكت كل ده ليه انت لما حكيت المره اللي فاتت كان كلام تاني قلتله كنت بصبر يمكن تتغير قلي خلاص بكره لمانقعد ربك يحلها ورحنا في الميعاد مع الناس ودخلنا ونده ليها ابوها احكي وبدات تحكي حكيت اني ضربتها 3 مرات وطبعا انا اللي سالتها امتى لاني ما اعرفهموش حكيت على الحكايه الاولى اللي ابوها جه بعدها ونيلها والمره التانيه مره شدتها من قميص النوم والتالته لما مشيت بس زودت بس اني خنقتها قلتلها انا قالت اه قلتلها ساعة ما انا كنت ماسكك مش انت قلتي حاسب الاطباق اتكلمتي كده عادي وبدل ما تقولي سبني هموت تقولي حاسب الاطباق وده كان الجزء اللذيذ بعد كده فاكر عليت صوتك عليا قدام ماما ومامتك امتى ده يا بنتي وازاي الناس اللي كانت قاعده مخدتش بالها مش انا بس طيب فاكر لما كنا في رمضان واختك كانت نايمه جنبك على السرير بتاعي قلت ليه نعم انت بتهزري امتى ده قالت في رمضان قلت ليها يعني كمان كنت صايم لما كنت نايم وجت تصحيني قبل المغرب عشان افطر قالت اه ومددت جنبك وبعدين قالت انا مش بحب حد ينام على سريري رديت يا بنتي احنا كنا صاحين وبندردش لحد ما المغرب ما ياذن وبابها قاعد عادي بيسمع ولا كلمه وبعد كده لما جيت اتكلم واحد منهم قلي اسكت مش مستاهله كلام هي ما قلتش حاجه تستاهل انها تسيب البيت عشانها اساسا وشويه وعيطت ودخلت جوه شويه وابوها قام ورجع وقال انت مش بتجيب فاكهه ليه قلتله انا والله يا عمو ساعة ما مشيت كان في البيت تفاح ورمان وتين وفي درج في التسريحه هي عارفه مكانه انا سايب فيه فلوس وعمره مافضي في الشهرين اللي قاعدناهم انا ماقلتش ليها ماتجبش وهي كانت بتنزل الشغل عادي يعني ولو مش عايزه تشتري هي ماقلتش ليه ليا انا عايزه كذا او حتى بعتت البواب يشتري وكلمه كده على كلمه كده الناس اتكلمت لا يا اسامه ماتمدش ايدك عليها تحت اي ظرف قلت ليهم حاضر والامور ماتستاهلش انها تسيب البيت يا حاج حسين وفي الاخير وصلنا خلاص هي عشان اعصابها مشدوده سبها النهارده تستريح وربنا يسهل الحال وقمنا وسلمنا والكل بيضحك والامور بخير تاني يوم اتصلت بيه قلي ده كانت لسه بتكشف عند الدكتور ظهرها واجعها شويه قلتله في علاج اجيبه قلي لا خلاص انا جبته طيب اجي قلي لا مش مستاهله طيب اكلمها قلي اصلها جت تعبانه ونامت قلت ليه خلاص انا استنى بكره لما تستريح ونسافر بكره قلي لا سافر وربنا يسهل على اخر الاسبوع قلت ليه ماشي ابقى سلملي عليها لما تصحى وياريت تفتح تليفونها وسافرت تاني لبيتي لوحدي ....  

حكايتي مع الايام (10)

 مر شهر رمضان الكريم صحيح فطرت فيه 3ايام لوحدي واتسحرت نصه مع نفسي حتى ايام كنت اكسل واشرب ميه واصلي الفجر وخلاص او ممكن يكون باقي حبة تمر من الفطار اتسحر بيهم وفي الاخير رمضان عدى وكمان اول يوم العيد راح ما عملتش حاجه من اللي نفسي فيها لا وكمان اتسدت نفسي فيه وعادي ورجعنا نمنا وقمنا تاني يوم فطرنا وشربنا الشاي وقلت ليها انا داخل البس عشان انزل واروح اقعد شويه مع الجماعه هتيجي معايا ردت وقالت لا مش هينفع سالت ليه قالت اصل زمان بابا وماما جايين عندنا قلت ليها طلعوا يعني من كفرالشيخ قالت خلاص زمانهم داخلين دول طلعوا من زمان حسيت بحاجه غريبه طيب ليه ماقلتش ما هي اكيد عارفه من بليل ان هما هيجوا او حتى الصبح لما طلعوا ايه يعني عايزه تفاجئني بيهم قلتلها طيب خلاص اقعدي معاهم براحتك وانا رايح هناك ولبست ونزلت وانا اصلا مش عايز اقابل الراجل ده من ساعة الحركه اللي عملها معايا رحت عندنا البيت كان عمي صايم انتظرناه واجلنا الغدا لحد المغرب واكلنا معاه وبعدين ابويا قلي روح بقى اقعد معاها ولو هما لسه موجودين سلم واقعد عادي ولو ما اتكلموش استاذن وادخل غرفتك  ورجعت البيت لاقيت مفيش نفس دخلت اغير لاقيتها نايمه ناديت عليها مريهان انت نايمه قالت لا كويس ان انت لسه فاكر اسمي رديت انا اقدر انسى قالت ليا انت بعت لماما رساله قلتلها اه قالت ليا احسن عشان هي مش عايزه تسمع صوتك قلتلها كويس يعني اخيرا عملت حاجه ريحتكم غيرت وقلت ليها هتنامي  ردت لا انا نايمه طول النهار هما ماقعدوش كتير طيب يلا نتفرج على التلفزيون فضلت قاعد وهي قاعده على اللاب رحت في النوم وانا قاعد وقمت لاقيتها هي كمان نايمه صحتها وقلت ليها نخش جوه ودخلنا نمنا .
قمت تاني يوم الصبح لاقيتها مش جنبي وكانت في الصالون صباح الخير صباح النور انت لسه قاعده على اللاب من امبارح ومشغله التلفزيون كمان طيب مش هنقعد مع بعض شويه هنزل البرنامج ده بس طيب اتفرج انا على التلفزيون لحد ماتخلصي عدى نص ساعه ومفيش طيب مش هنفطر طيب هحضر الفطار قامت حضرت الفطار وجابته انت مش هتفطري لا مليش نفس اكلت يااااه البيض ملحه زياده ردت عليا ازاي وجت داقته ماهو كويس اهو دقته انا تاني اه كده اتظبت لما حطيتي ايدك بقى كويس خلصت فطار لسه هي قاعده استنيت شويه طيب مش هنشرب كوبية شاي حلوه قامت عملت الشاي وقعدت تاني اخدت الكوبيه وطلعت على البلكونه وشربت سيجاره وقعدت شويه وانا بفكر ايه حتى يوم اجازتي مش هعرف اقعد مع مراتي يعني خرجت مش نافع قعدت مش نافع نخرج سوا مش نافع اعمل ايه دخلت تاني قعدت شويه لسه اه لسه شويه جبت ام كلثوم وتغني ولا حياة لمن تنادي وشويه وقامت انا هاخد دش وماله كان اذن الظهر نزلت اصلي وقلت ليها عايزه حاجه من تحت لا ونزلت صليت واتمشيت شويه ورجعت على البيت لاقيتها قاعده في مكانها دخلت ايه لسه قالت لا خلاص اهو انا هقوم احضر الغدا قلت ليها لا انا بقول عشان انا عايز اقعد معاكي شويه ردت عليا اصل انا جعت عشان انا مافطرتش هقوم احضر الغدا وقامت وانا باكل في نفسي بمنتهى الصراحه وجهز الاكل وجابته ومن باب فتح الكلام حطت المعلقتين جنب الطبق قلت ليها مش تناولين المعلقه بدل ما تحطيها وكانت تلك القشه التى قسمت ظهر البعير ما انا حطيتها قدامك اهو خلاص يا ستي انا خلاص اخدتها مش عايز حاجه تسكت لا طبعا كملت وبعدين انا ماشفتش مامتك بتدي لبابك المعلقه رديت وانا بمسك في نفسي ياستي دول متجوزين بقالهم 30سنه يعني خلاص راحت عليهم وبعدين اخر مره اكلوا معانا ماما ادته حتة لحمه من منابها قالت عادي احنا كلنا كده لما بنشبع بنوزع اللحمه بس هو الجواز عندك كده تعالى كل يا حبيبي واناولك المعلقه  واكلك كمان رميت المعلقه يا ستي خلاص مش عايز اكل اساسا وقمت كان العصر اذن صليت العصر ورجعت نايم على الكنبه وبتفرج على التلفزيون قالت ليا 3مرات تعالى كل وانا قلت ليها لا مش عايز قعدت تاكل قلت ليها قومي كلي في اي حته في السفره في المطبخ في اي غرفه في اتنين  جوه قالت هو انت هتاكلني في المكان اللي على مزاجك قلتلها لا اختاري المكان اللي انت عايزاه بس بعيد عني دلوقتي لا مش قايمه قمت شيلت طبقين وحطيتهم على الباب وقلت قومي مش طالبه خناق وقرف قامت وبرده ماسكتتش هو انا خدامه عندك هو انت هتاكلني على مزاجك قمت مسكتها لفيت وشها مسكتها من رقبتها وثبتت وشها في وشي وقلت ليها اهدي شويه خلينا نعيش راحت قايله حاسب الاطباق هتقع رحت زاقق الطبق وقلت ليها يعني الطبق اهم من حياتنا راحت قاعده على الارض وعيطت استنيت شويه وقمت شلتها وحططتها على الكنبه اهدي شويه ما ينفعش كده اكلمك كلمه تردي عليا بمسلسل كامل لحد الحلقه الاخيره انا خلاص مش مستحمل كده هي مامتك بترد على بابك كده وردها الطبيعي ملكش دعوه بامي وابويا انت مالك ومالهم وطلعت يا بنتي ارحمي اللي في بطنك من النكد ده شويه ما ينفعش كده ردت انت اللي ترحمه ما انت مبهدله اهو وقعدت تعيط سكت لاني بجد تعبت وهي فضلت شويه لاقيتها نامت شيلتها دخلتها غرفة النوم  وعلى العشا دخلت اشوفها لاقيتها قلقانه يا بنتي عايزين نتكلم مع بعض شويه فضلت على نفس النغمه وانا مش عايزه اتكلم معاك شويه وجرس الباب رن قلت ليها انت عارفه مين اللي بره قالت لا وانا هعرف منين طلعت لاقيته خالها قلي هي فين مش عايز كلام يلا لمي حاجتك طيب اسمعني انا لا ضربتها ولا شتمتها اسمع الكلام قالت هي ما انت جبت سيرة بابا وماما ولبست واخدت دهبها واللاب ومشيت مع خالها وحسيت اني انتهت فترة عقوبتي من 20/7/2008الى 5/10/2008......
ملحوظه:
اول خناقه كانت بعد ما اهلها كانوا عندنا وكان في واحده في النص اول ما رجعت من كفرالشيخ لما راحت لوحدها والتالته ده لما اهلها كانوا عندها قبلها بيوم

حكايتي مع الايام(9)

واجتمع الاهل من اجل تمضية ايام العيد في بيت العيله وطبعا فطار يوم الوقفه كلهم متجمعين هناك ولكن رفضت زوجتي الحامل حضور هذا التجمع وبالتالي اعتذرت لوالدي حتى لا اتركها تاكل وحدها وذهبنا لهم بعد الفطار جلسنا معهم بعض الوقت وكانت من عاداتنا في العيد ان نتجمع عند الصلاه في المسجد المجاور لنا ونتقابل مع اقاربنا وقد يمر العيد تلو العيد ولا نراهم الا في الاعياد مثل اولاد عم والدي واولادهم وعم والدي وعمته والاصحاب والجيران وبعد الصلاه نتجمع اما بيت العيله ساعه او اكثر نتقابل ونبارك ونهنئ على من يمر بنا من اصحاب واقارب ثم نطلع فوق لتناول وجبة الفطور وبعدها ننام الى اذان الظهر ونقوم لنتابع انشطة العيد ولكن كان هذا العيد مختلفا .
فقد رفضت الاستيقاظ لصلاة العيد وبالتالي نزلت الى المسجد القريب من منزلي وانا لا اعرف احد هناك غير جيراني في العماره فانا لم انتقل الى تلك المنطقه الا من شهرين فلم اجد من ابارك له او اعيد عليه وطلعت الى شقتي فليس هناك من اقف معه وسالتها هنروح وطبعا ردها استنى شويه لحد ما فطرنا وتقريبا بقت الساعه 11 ثم ذهبنا وكان من الطبيعي ان اجد اغلب البيت في ثبات عميق واستيقظوا بعد الظهر وتحدثنا وتسامرنا وهزرنا وبعدها تجمع الشباب على السرير للعب الاستيمشن التي ننتظر العيد كي نلعبها سويا وننقسم الى فرق وتشجيع والاشبال الصغيره تشجع هذا وتتريق على المغلوب وهي طبعا مش بتعرف تلعبها ولا عايزه قعدت جنبنا على صلاة المغرب شويه وقمنا نصلي الجماعه سوا في البيت وبعدها لعبوا حبة العاب خفيفه عشان الصغار زي الشايب و 31 قعدت شويه معاهم وقلت اطلع اتهوا واشرب سيجاره طلعت فوق السطح  ونزلت لما سمعت اذان العشاء طلبت ان احنا نمشي وانا بكل صراحه مكنتش عايز بس قلت ليها اصلي العشا ونمشي بس للاسف ملحقتش الجماعه والغرفه اتملت ومفيش مكان استنيت لما خلصوا وعملت الجماعه التانيه صليت وبعد الصلاه كانت اختي مسافره تاني يوم سلمت عليها فقالت ليا انا كنت عايزه اخد رايك في حاجه قلت ليها خير قالت عمو جمال بيقول في صيدليه هنا عايزين دكتوره ايه رايك قلتلها لا بلاش خليكي جنب بابا وماما وانت شغاله هناك وكنت عايز اكمل واقول انت ممكن بعد كده يتقال عليكي انت السبب في المشاكل ما بيني وبين مراتي لاي سبب ولو عشان بتيجي عندي البيت وقطع كلامنا صوتها العالي علينا في الغرفه مش يلا بقى انا عايزه امشي انا تعبانه وطبعا ابويا جه من الصاله عشان ما اتكلمش ولا ارد وسالها في ايه قالت ليه انا عايزه امشي قال وماله يلا يا اسامه خدها روحها بدام هي تعبانه وقمت لبست ويلا وابويا نادى عليا اصبر واهدى عليها واضح انها مش واخده على جو اللمه وماتزعلش وبكره احنا مع بعض قلت ليه ان شاء الله يا حاج ونزلت من البيت عندهم وانا نفسي اسهر معاهم  بس بجملت اللي ضاع مني في العيد ده وما عرفتش اعمله غيرانها تكلمني بالطريقه ده قدام اهلي وطبعا روحنا وهي تعبانه دخلت نامت وانا قعدت شويه ودخلت نمت واهلا اهلا بالعيد....

ملحوظه صغيره
لاهل الخير ياريت تزور بيت المدونين في خبر عن واحده محتاجه مساعده ياريت اللي يعرف يساعد يكون ليه الثوابhttp://bloggers-house.blogspot.com/

حكايتي مع الايام(8)

اخدت ليها العذر في كتير من اعمالها واقول عشان الحمل معلش وصبرت بس كان في حاجات مقدرتش افهمها زي مثلا اول زياره لستي بعد الجواز وهي ست كبيره ما حضرتش الفرح وانا متربي في بيتها وكانت فترة جامعتي معاها لفت انتباهي شئ غريب  وبعد ما خرجنا من عندها سالت عليه هو انتي ليه وانت ماشيه ماسلمتيش عليها ردت عليا عادي وبعدين احنا مش مسافرين احنا قاعدين جنبها بس الاصول يا بنتي بتقول غير كده بتقول انك قاعده مع ناس وانت ماشيه تسلمي معلش ما اخدتش بالي سكت وقلت ولا يهمك ابقي خدي بالك بعد كده.
تاني زياره اتكرر نفس الموقف وسالت نفس السؤال كان الرد اصلي ظهري واجعني شويه والاغرب ان تالت مره حصل نفس الكلام روحت ناده عليها وقلت ليها ستو مدت ايدها ليكي معقول برده ده من اثار الحمل.
وبرغم حجة مش قادره وتعبانه اللي ظهرت لما قلت ليها ننزل كفرالشيخ ولما عمي عزمنا نفطر عنده ورفضت لنفس الحجه الا انها يوم 22 رمضان طلبت منى وقالت انها عايزه تنزل كفرالشيخ كنت لسه رايح الشركه الجديده بقالي اسبوع قلت ليها مش هينفع انا لسه رايح الشغل الجديد اول حاجه هعملها اطلب اجازه ردت عليا خلاص مش مشكله انزل لوحدي اصلي زهقانه وتعبانه قلتلها ماشي بدل ماتقعد وتقرفني ورجعت بعد يومين قلت ليها يارب تكوني استريحتي قالت اه سالتها عملتي ايه بقى في اليومين قالت وانا رايحه نزلت في طنطا وبابا جه هناك هو والجماعه ورحنا فطرنا في مطعم قريب من البحيره وتاني يوم رحت كشفت عند دكتور هناك وخلاص هتابع معاه ازاي تتابعي مع دكتور في كفرالشيخ وانت قاعده هنا في القاهره والحكايه كان ليها اصل ؟؟
انا عمي دكتور واغلب العيله بتتابع معاه ومراته دكتوره في جامعة القاهره قسم نسا وانا مطمن ليه وكانت لسه بنت عمي هو اللي عملها عملية الولاده قبل زواجي بفتره قليله وكنت عارف ان هو بيروح ليها كتير البيت ولو مش فاضي بيبعت ممرضه ليها غير متابعتها الشهريه العاديه وكنت بحاول اقنعها بس عشان من طرفي يبقى لا طبعا مع اني كنت عايز راحتها واتكلمت معاها كتير .
ويوم الوقفه جه والدي ووالدتي والعيله عشان يقضوا العيد كالعاده في بيت العيله مع ستي وقعدت والدتي معايا لوحدنا وسالتني هو في حاجه جديده انت زعلتها تاني قلتلها لا عادي الجو ماشي اشمعنى بتسالي هي قالت ليكي حاجه قالت ليا لا بس اصلها لما نزلت كفرالشيخ المره اللي فاتت راحت هي وامها لطنط ام وائل وقعدت تشتكي ليها سالتها بتشتكي من ايه مقالتش حاجه معينه بس قالت خلي اسامه ياخد باله وهي عقلها صغير قلت ليها يا ماما خلاص ولاكأنك عرفتي حاجه وماتتكلميش معاها في حاجه وهي كانت ماشيه عادي مش عشان مشكله او حاجه والعيد بكره ولا بعد بكره كل سنه وانت طيبه وفعلا والدتي ما اتكلمتش ولا فتحت سيره وانا كنت مستني لما هي تحكي لوحدها  وكنت بقول في بالي  طيب هي ليه مقالتش على المشوار ده  وبعدين احنا اصلا مفيش حاجه امال ليه راحت ده لسه كانت قاعده تتحايل عليا اتكلم مع امها واقول كل سنه وانت طيبه وانا عشان هي ماتزعلش وبرده عشان مايحصلش احتكاك مابيني وبين امها بعت ليها رساله كل سنه وانت طيبه بشكل ظريف ورقيق

حكايتي مع الايام (7)

وبدا شهر رمضان الكريم وكان موافق 1/9/2008 وانا في رمضان بحب اجتهد على قد ما اقدر اختم القران اكتر من مره والصلاه في اوقاتها وجماعه وقيام الليل وكنت بحاول اقرب من ربنا عشان 3 اسباب الاول انه يقربنا من بعض ونفهم بعض والتاني اني ابعد عنها وارتاح منها شويه والتالت ان ربنا اكرمني ورزقني وعرفت انها شايله لحمي في مولود في بطنها وقعدت معاها واتكلمت نقرب بقى من ربنا شويه عشان يكرمنا ويرزقنا الذريه الصالحه وكانت نتيجة الحوار كالعاده بعد كام يوم في رمضان انت مش بتقري قران ليه وكان ردها 
اصلي ريقي ناشف
ما كل الناس الصايمه ريقها ناشف في رمضان وده الطبيعي طيب وبعد الفطار او في اي وقت حاولي تجتهدي وقلت في بالي ده مش فرض وسالتها طيب والصلاه مش بتحافظي عليها ليه كان ردها صدمه يقفل اي كلام بعدها
اصل انت بتنام معايا قبل ما اصلي العشا
ضحكت وقلت ليها والمطلوب اني مااعملش الحاجات الوحشه ده انا مش عارف في مليار مسلم بيتعاملوا عادي يعني وعايشين وانا بصلي العشا عادي والفجر اشمعنى انت الدنيا وقفت عندك وعشان تقفل الكلام خالص  قالت
قالت ليا ان الحمل تعبني وانا مش هصوم 
قلتلها كده تمام لا صلاه ولا صوم ولا قراءة قران هو ده رمضان بجد وسكت وانا في بالي لقد اسمعت ان ناديت حيا ولكن لا حياة لمن تنادي .
وكان الموقع بتاعي خلصت الشغل فيه وخلاص بنسلمه والشركه اخدت شغل جديد في كفرالشيخ وطلب مني صاحب الشغل اني اروح معاه هناك وطبعا رفضت وقلت ليه انا مستقر في القاهره خلاص وشفت شركه جديده وبعدين اتفقت اني اروح كفرالشيخ اصفي  معاه واسلم كارت الفيزا بتاع الشركه واقفل الحسابات والعهد وقلت ليها ان كمان يومين هنزل هتيجي معايا وكان الرد
لا انا مش هقدر وتعبانه ومش هعرف اسافر
انا لازم انزل ومش عايز اسيبك لوحدك وتاكلي لوحدك وكده لكن هي تمسكت ومش نازله لحد يوم السفر لما لاقتني عادي تيجي ولا ما تجيش لبست وقالت خلاص انا هاجي معاك ونزلنا كفرالشيخ وصلتها لبيت ابوها وطبعا ماطلعتش عشان خلاص ماعدش ينفع واتقابلنا بعدها بيومين رحت اخدتها عشان نرجع وطبعا هي ماردتش تيجي عندنا زي ما انا رفضت بس عندي سبب انت ايه سببك كان ردها انك ماجتش سكت ويلا بينا على بيتنا .
كان ليا عم عزمنا اول يوم في رمضان وبعد ما رجعت من كفرالشيخ عم تاني ليا عزمنا قلت ليها ايه رايك  تعبانه ومش قادره يا بنتي ده هنا في ش فاطمه رشدي في الهرم واحنا في الطالبيه في فيصل يعني 10 دقايق مش اكتر قالت لا مش هقدر اتصلت بيه وقلت ليه معلش واعتذرت وقلت ليه انا هاجي بليل وطبعا ما ينفعش اسيب مراتي واروح افطر بره فطرت في البيت ونزلت بعد العشا قعدت معاه شويه وقلي احنا كان نفسنا تحس ان ليها اهل هنا مش مقطوعه من شجره ضحكت وقلت ليه ملهاش في الطيب نصيب ولا يهمك ورجعت على البيت .
وطول شهر رمضان  بحاول انظم حياتي معاها بس للاسف انا كنت بنزل الساعه 7.5 صباحا وبرجع مع صلاة العصر انام ساعه واقوم على الفطار افطر وهي بعد الفطار تقوم تغسل الاطباق وتتعامل مع حاجات زي كده وتتعب وتنام علبال ماتصحى اكون انا خلاص عايز انام يا بنتي ظبطي وقتك ممكن تعملي شغل  البيت كله الصبح ماتستنيش لما اجي واصحى او على الاقل نامي الصبح زي ما انت عايزه انا بجي البيت العصر نامي لحد العصر انا عايز اقعد معاكي شويه وطبعا ولا حاجه حصلت  

حكايتي مع الايام (6)

تراكمت الاحداث مع مرور الايام  وقبل بداية رمضان بيومين تقريبا 30/8/2008 رجعت من شغلي وغيرت لبسي وقاعد في الصالون بقلب في قنوات التلفزيون وكانت هي تحضر طعام الغداء  وقامت برص الاطباق  على ترابزة الصالون وقطعت الصمت بكلامها
احنا هنقعد نتفرج على الاكل
انا ماسمعتش او تقدروا تقولوا عملت مش سامع وسالتها احول في حاجه تانيه عايزه تشوفيها ردت عليا 
لا انا بقول هنقعد نتفرج على الاكل كتير
رديت وانا بحاول ما اخرجش عن نفسي طيب وفيه ايه لو قلتي ماتيجي يلا ناكل او الاكل جهز يا حبيبي كان ردها صدمني شويه وقالت  
هو انت ضيف عشان اعزم عليك
رديت لا ضيف ولا تعزمي ودخلت على غرفة النوم مددت على السرير دخلت ورايا انت في حاجه مزعلك في الشغل
قلت لا عادي ماشيه الامور
امال في ايه؟
انت سددتي نفسي ايه هنتفرج على الاكل ده ما تقولي اي حاجه عادي تعالى كل الاكل جهز اي حاجه كلامك كله كده ليه؟
يعني هو انا لازم اعزم عليك واقلك تعالى كل يا حبيبي ايه نظام سي السيد ده
وقامت على الغرفه التانيه ولحد كده عادي كان ده الطبيعي بتاعها وخلاص نايم على السرير وبقول لنفسي ايه في ايه هي بتتعامل معاك كده ليه ايه السبب انا مقصر معاها في ايه وبعد حوالي عشر دقايق لاقيت تليفوني بيرن ابويا يا سلام انا فعلا محتاجك الكلام معاك بيريحني لاقيت بيقولي ازيك عامل ايه انت مزعل مراتك ليه قلتله مفيش حاجه ماشيه الامور قلي ازاي يا بني ده اتصلت بامها وامها اتصلت وتقول انها بتعيط وانت منكد عليها انا انكد عليها ده هي تنكد على بلد بس عادي مفيش حاجه وخلصت كلام وسالت نفسي طيب هي اشتكيت قالت ايه مرضيش ياكل ولا بيقولي قولي تعالى ناكل بدل نتفرج على الاكل مش فاهم اعمل ايه قمت وكلمتها قومي يا بنتي نتكلم نفهم في ايه
طبعا كالعاده بكلم نفسي طيب انا هعمل شاي لحد ماتفوقي ونتكلم عملت وشربت مفيش دخلت ليها بقى قومي بقى شويه نتكلم انا عايز افهمك انت عايزه ايه وايه اللي مزعلك دلوقتي 
لا مش هقوم ولا هتكلم
كنت انا خلاص جبت اخري ومعدش في جوايا اي صبر وخلاص زهقت شدتها من ايديها قومي واخدتها على المطبخ رشيت وشها بميه وقلتلها فوقي واتكلمي زي ما بكلمك انت عايزه ايه بالظبط ولا حياة لمن تنادي صدقوني لحد دلوقتي انا مش عارف انا كان ممكن اعمل معاها ايه لاني كنت غلبت وتعبت ومش فاهم ليها طريقه للتعايش معاها وطبعا اتصلت تاني وعيطت وعلى اثرها والدي ووالدتي جم عندنا في نفس اليوم بليل من كفرالشيخ والدي اخدني على البلكونه وسالني انا عمري ما سالتك قبل كده في ايه بس متهيالي ده وقت الكلام حكيت ليه اللي حصل وطبعا كالعاده غلبني بالكلام لا ماينفعش سبها خالص ماتتكلمش معاها احسن لحد ما تطلع من زهقك وبعدين حاول وكل اللي حصل زمان انت ما حكيتش ليه وتشيل جواك حسيت انه بيضحك عليا عشان استحمل بس ضحك فعلا عليا واقتنعت وكانت والدتي الناحيه التانيه قاعده معاها بتسالها في ايه بس اللي اعرفه ان والدتي بعدها لا قالت ليا اعمل ولا ما تعملش غير انها قالت ليا اصبر شويه هي شكلها عقلها صغير استحمل عشان تعيش يعني مقلتش حاجه على موضوع معين وخلاص الامور هديت ورجعت المياه لمجاريها وقعدنا واتعشينا والامور كلها اتحلت وعادي تاني يوم رجعت من الشغل لاقيتها بتقلي
بابا جي النهارده وهو عرف اللي حصل وماما حاولت تمنعه بس هو صمم لازم يجي قلتلها ينور وايه المشكله وحلفتني اني استحمله عشان هو ممكن يقول ليها تعالي معايا على البيت واوعى يا اسامه تسيبوه يخدني طبعا انا كنت في منتهى السعاده وانا بسمع الكلام ده وكنت مستعد اني استحمل اي حاجه عشان خاطرها بس كانت المفاجاه انه لا يحتمل ولا يتنسي وصل ابوها قعدنا في نفس المكان في البلكونه وعمل اللي عمري ما تخيلت انه يحصل حتى انا مكسوف اكتبه لانه كان كبير وهكتفي بالكلام اللي بعده اني هوديك ورا الشمس وهعمل واسوي واناسكت حسيت اني خايف بس على بيتي ومراتي ولاقيت نفسي بتعامل مع عقليه بعيده كل البعد عن اي عقل وقعد معانا واتسحر ومشي الفجر وبعد الفجر قعدت معاها وقلت ليها لو اللي عمله ابوكي ده هحطه مابيني وبينك يبقى ملناش عيشه مع بعضنا وانا سكت واستحملت علشانك وعلشان يميني اللي حلفته قبل ماهو يجي البيت ولحد كده وقصة ابوكي عندي انتهت لا كلام لاسلام ولاتجيبي سرته قدامي ودوست على نفسي علشان اعدي واعيش وهي ده كانت كل امنيتي في حياتي اني اعيش..............  

حكايتي مع الايام (5)

وبعد مرور حوالي شهر من زواجنا تقريبا 20/8/2008 طلبت زوجتي العزيزه ان احنا نروح عند اختها في الشرقيه قلت وماله اهو منه تغيير ومنه انا عارف ان هي بتحكي ليها كل حاجه يمكن تتكلم معاها تنصحها شويه وقبل مانسافر سالتها نجيب حلويات من محل محترم هنا جنبنا لابوار او توينكي قالت هنشيلها من هنا بلاش نجيب من هناك قلت ليها ماشي ونزلنا من البيت قلت ليها ممكن شنطة كتفك تخليها الناحيه التانيه عشان بتحك في جنبي قالت مش بعرف اشيلها غير في الكتف ده قلت وماله الف انا وركبنا المترو ونزلنا في محطة المظلات واحنا نازلين المخرج ضيق قدام المحطه وفي قهوه قافله الطريق سبقتها وعديت الزحمه ببص ورايا لاقيتها واقفه في محل العصير رجعت ايه في ايه قالت انا هشرب قلتله مش تقولي قالت انا قلت وانت ما سمعتنيش طبعا اخدت قرار اني اكشف على ودني اللي عمري ما اشتكيت بيها ومشينا ركبنا الباص الغريب اني لاقيت الشنطه وسطينا سالت في ايه قالت عادي وشالتها نزلنا في بلد اسمها منيا القمح مع احترامنا لكل اهلها انا ما اشتريش من اي محل حلويات فيها وقررت اشتري فاكهه احسن ورحت عند الفكهاني نقيت كذا حاجه وسالتها اجيب حاجه تاني قالت هات اللي انت عاوزه وبعدين رحنا على سوبر ماركت وجبت حبة حلويات عشان عندهم طفلين ورحنا البيت قعدنا واتكلمنا واخدنا واجبنا وتمام التمام  وبعد العشاء قمنا عشان نرجع نزلنا لاقينا بيجو ركبنا في الكرسي اللي قدام جنب السواق وكانت المفاجاه لاقيت الشنطه وسطينا سالت عادي انت قاصده حكاية الشنطه ده قالت عادي انت حاطط نقرك من نقرها ليه ضحكت وسكت وروحنا البيت.
ولاقيت سكون غير طبيعي لا كلام ولا اي حاجه حاولت اتكلم قالت انا هنام سبتها ونزلت قعدت تحت شويه على القهوه رجعت قعدت في الصالون ونمت زي ما انا وصحيت على وشها الصبح قالتلي خد الخمسين جنيه ده تمن مشوار امبارح في ايه يا بنتي انت بتعملي ايه انت فاهمه اللي انت بتعمليه هو انا اشتكيت وقلتلك صرفت كتير وكالعاده بكلم نفسي وسكتت ومشيت كانت لسه بتروح الشغل مره واتنين شيلي فلوسك قعدت على الترابزه 3 ايام اعمل ايه اقول لامها يمكن افهم في ايه وطبعا امها ازاي لا طبعا عيب وفضلت بعدها كمان 3 ايام سالت امها تاني قالتلي اصل الحاجه اللي انت جبتها ماعجبتهاش طيب المفروض اعمل ايه نجيب من هنا لا اجيب حاجه تانيه لا هات اللي انت عايزه وكان يوم ظريف وجميل ما يتننسيش ......

حكايتي مع الايام(4)

وانا رايح الاجازه كنت بحلم انها هتبقى احلى ايام عمري رجعت وانا نفسي انساها وحاولت اعيش عادي ولا كان في اي حاجه حصلت والمفروض انها كانت هتنقل شغلها في فرع المهندسين بدل ماكانت في فرع كفرالشيخ قبل ما تروح اتكلمنا قلت ليها انا برجع من شغلي الساعه اربعه ونص خمسه بالكتير ياريت ارجع الاقيكي على الاقل في البيت عشان الغدا وراحت تاني يوم الشغل ورجعت بدري وانا كمان بس لاقيتها بتقلي انا اتفقت مع صاحب الشغل اني هخلص على الساعه خمسه قلتلها ازاي وترجعي البيت في فيصل على الساعه سته وانا اعمل ايه اكل امتى ده مش هينفع وطبعا قالت ده نظام شغل مش هينفع انا اغيره قلت بس مش هينفع مع نظام البيت وممكن تسبيه واحنا اتفقنا زمان ان البيت اهم وطبعا كأني بكلم نفسي وتاني يوم جت الساعه 6 واستمر الوضع على كده قلت اتكلم مع امها يمكن تفهمها وطبعا الست مشكوره اتكلمت معاها ولاقيت الكلام خلاص انا هطلع من الشغل الساعه اربعه قلت كده تمام يمشي الحال وفي جوه نفسي بقول ماهو كان ينفع اهو امال هي قفلتها في وشي الاول ليه المهم  يوم اتنين اسبوع ورجعنا للوضع القديم بحجة ضغط شغل وكلام من هذا القبيل سكت خالص وبقيت ارجع احضر اكل واصبر نفسي ترجع هي تحط الاكل طبعا مفيش عندي مكان يوم اكل يوم انام يوم مليش نفس وما اتكلمتش ولا اعترضت كانت النتيجه خلاص انا هسيب الشغل اخيرا فهمتي الحمدلله طبعا في سري بس الظاهر سمعت عشان بعدها لاقيتها بعد كام يوم بتدور في الجرنال على شغل وفي يوم رجعت البيت لاقيت مرات البواب بتقلي انا جبت رقم الراجل بتاع النت المدام كانت سالتني الصبح عليه وهي نازله الشغل 
طلعت فوق استنى اسمع منها اي حاجه مفيش فتحت انا الكلام الرقم بتاع النت انا جبته من مرات البواب قالت كويس ابقى كلمه سالتها هو انت نزلتي النهارده قالت اه رحت الشركه القديمه كان ليها معايا حبة ورق وكان في انترفيو في شركه جنبها .
سالتها طيب ما قلتيش ليه امبارح بليل ما احنا كنا قاعدين طيب حتى كلميني وانت نازله امال لازمة الموبيلات ايه ؟ قالت انا فاكره اني قلتلك هو انا ما قلتش ليك؟
الصراحه شكيت في نفسي هو انا مره مش بسمع ومره بنسى لا انا اكيد عايز اتعالج وبعدين سكت والنتيجه انها مفكرتش تاني تروح شغل وفي وسط المواقف ده كان ليها اخت في الشرقيه متزوجه وكانت عايزه تروح ليها قلت ليها وماله نروح .....

حكايتي مع الايام(3)

الطريق اخد منا ساعتين ونص كنت قاعد افكر فيهم انا ممكن اعمل ايه عشان اسعد البنت اللي ارتبطت بيها وياترى العمر هيكفي عشان اسعدها واهنيها لحد ما وصلنا شقتنا الساعه 4 الفجر وطبعا كان يوم طويل قبلها وعريس جديد والفرحه اللي عاشها عارفها واللي لسه متوقع بتكون عامله ازاي واتفقنا ننزل نقضي اربع خمس ايام في مرسى مطروح وحجزنا للسفر وكان اول موقف يقلب بنكد في حياتنا عمي اتصل يومها بليل وقلي انتم مسافرين طيب كنا عايزين نسلم عليك قلتله احنا هنسافر بكره الساعه 11 الصبح قلي خلاص هعدي عليك الساعه 10 نسلم على طول ونمشي قلت ليه تنور.
وكنت ده الخطيئه اللي ماعملتش حسابها زعلت في ايه يا بنتي قالت حد يزور حد الساعه 10 الصبح طب ده عمي ومش زياره فضلت زعلانه وتاني يوم جه عمي نقطني هو ومراته وعشر دقايق ومشيوا واحنا حضرنا حالنا ونزلنا ولسه الوش مقلوب لحد ما ركبنا الباص قلت اصالحها مع اني مش عارف اقول ايه بس اهو عيطت كمان وفضلت لحد ما صالحتها عشان دول يومين العسل ومفيش سبب للزعل اساسا .
وصلنا وقضينا يومين حلوين وفي الليله الاخيره شركتها كان ليها فرع هناك وواحد كان جايب لينا تذاكر الرجوع نزلت عشان اخدها حوالي الساعه 11 بليل وقلت ليها لما ارن انزلي رحت اجيب التذاكر كان قاعد معاه كام واحد من الشركه سلموا وباركوا رجعت بطلع التليفون لاقيتها واقفه قدامي ايه يا بنتي نزلتي ليه ردت عليا الدنيا حر قلتلها يعني تنزلي كده تقفي في الشارع بليل ينفع سكتت وعشان اغير الكلام واعدي الموضوع وخلاص قلتلها كان في فلان وفلان قاعدين بيسلموا عليكي راحت بصه ليا وقالتلي قصدك اني نازله عشانهم انا اصلا مااعرفهمش شكلا كتيري ممكن اتكلمنا في التليفون عشان شغل وقلبت دراما وحرب وخلاص مفيش مسك ايد والبوز قفل الطريق وماشيين على الكورنيش ما بنتكلمش وفجاه لاقت نفسي ماشي لوحدي بصيت ورايا لاقيتها قاعده ضحكت وسالتها في ايه قالتلي من قلت ليك عايزه اقعد قلت ليها انا ؟؟؟ قلت ليا الكلام ده ؟؟؟وبعدين ؟؟ انت ماردتش فانا قعدت كانوا احلى يومين وطبعا خلصوا بالفقره ده ورجعنا على البيت نمنا ولمينا حاجتنا ورجعنا على بيتنا في فيصل.......

حكايتي مع الايام(2)

كنت محتار في الاختيار وسبت القدر يكتب طريقي وكنت عادي في شغلي بس مشغول بمستقبلي وعيشتي لحد لما نزلت مره اجازه عند والدي وكانت والدتي بتتكلم في التليفون مع واحده صاحبتها وقالت ليها اسامه جه قالتلها سلملي عليه اخدت منها السماعه وكلمتها 

ازيك يا طنط عامله ايه واخبار صحتك؟

الحمد لله يا اسامه هناخد زمانا وزمن غيرنا

ما تقوليش كده ده انا لو مش عارف انت مين هقول بنت حلوه وبتعاكسني

انت لسه بتهزر كده وهتقضي حياتك كلها ضحك في ضحك مش ناوي تكمل نص دينك

ايدي على كتفك بس هي فين اللي تستاهلني

سبها على الله وانا مش هسيبك تروح بعيد

يا سلام يا طنط ده انا نفسي ابقى جنبك على طول

بطل بكش بقى وهات ماما

وعادي قلت مكالمه عاديه وعديت وقضيت اجازتي واتصلوا على اخر الاسبوع وقالوا تعالى وطبعا طاعة الوالدين سيف على رقبتي نزلت واتكلموا معايا في واحده جارت طنط ام وائل(اللي كانت بتكلمني من شويه) واسمها مريهان مهندسه قلت وماله هنخسر ايه اروح واشوفها ورحت وقعدنا مش كتير هي جت من بره بعد مما دخلنا بنص ساعه ويعني مفيش سبب يخليني اقول لا حلوه ومتعلمه ومن اسره شكلها محترمه وبصراحه اجمل حاجه عجبتني فيها اسمها مش بيتكرر كتير  .

كملت وخطبت وعملنا شبكه وهي طبعا على العروسه وهي قالت مكسوفه اقعد في كوشه ونادي احنا هنعملها فوق البيت والفرح اعمل اللي انت عايزه قلت وماله فرحهم يعملوه في المكان اللي عايزينه كان الكلام ده يوم 7/2/2008 وشبكت وقضينا فترة خطوبه عاديه جدا نتخانق شويه وغالبا وتقريبا دايما كنت بصالح وعدت الامور لحد مانزلنا دمياط نشتري العفش واختارنا كل حاجه وكان في واحد رايحين عنده ودخلنا الرجاله في الصالون بعد الغدا لاقيت تليفوني بيرن اي ده؟ رقمها ازاي؟ رديت قالت انا واقفه تحت انزل نزلت لاقيتها بتعيط في ايه يا بنتي حد زعلك 

بابا مش عاجبه اللي احنا اخترناه كله

وايه المشكله مقلش الكلام ده ليه واحنا لسه بندور على العموم مش مشكله ربك يسهلها ونزل والدي اتكلمت معاه قلي ايه الهبل ده ما احنا كنا واقفين قدام الحاجه وبننقي المهم لفينا تاني وغيرنا غرفة النوم في الاخر بس وده كان اسوا موقف وعدت الايام وعملت الفرح اللي كنت بحلم بيه في يوم 20/7/2008 وبعد الفرح في كفرالشيخ رجعنا على شقتنا في شارع فيصل في القاهره ........     

  

حكايتي مع الايام

من زمان وانا عايز اكتب حاجات كتير وكنت بصبر يمكن ارجع في رايي لكن في الاخير قررت اخرج من صمتي واكتب حكايتي مع الايام واحترت ابدا منين وبايه بس لاقيت ان في جزء عادي بيعيش فيه كل الناس بمشاكله وحواراته لحد ما دخلت الجامعه واتخرجت وهتكون ده بداية حكايتي .
انا اتخرجت من كلية هندسه دفعة 2005 بعد مذاكره ومجهود اخر سنه عشان كان نفسي اخلص بقى بقالي كتير بتعلم امتى اتخرج واشتغل وابقى مهندس وبنفس الاصرار اتخرجت وبدات ادور على شغل وزي اي شاب بيقابل صعوبه شويه نزلت تدريب عشان الاقي نفسي في مجال عملي لحد ما ربنا اكرمني بشركه واسمها البنيان واراد ربنا انها تكون بدايتي وكان والدي مستقر في محافظه اسمها كفرالشيخ انما كان كل توجهي اني اعيش بالقاهره انا بقالي فيها اكتر من خمس سنين والشغل هنا كتير وكانت الشركه واخده شغل في القاهره في المعادي صقر قريش جنب الاوتو ستراد واخده عماير هناك 13 عماره .
رحت معاهم  تقريبا في اول شهر 2 /2006 وبدات شغلي بجد بمرتب بالنسبه ليا في الوقت ده كان معقول كان (600جنيه) وبدات اشتغل معاهم واتعلمت كتير وكان معايا مهندسين في نفس الشركه غير الاستشاري واتعرفت فيها على ناس كانوا زي العسل.
وتقريبا في اخر 2007 حسيت ان العمر بيجري بيا وانا عندي شقه والامكانيات عال ايه اللي ياخرني على اني اكمل نص ديني بس لاقيت مشكله كبيره اني مليش اصلا نص تاني انا طول عمري من البيت لشغلي وعلاقتي بالجنس الاخر كانت لا تتعدى الصداقه البريئه وكانت ده اكبر عقبه اني اختار ازاي امشي في الشوارع اتفرج ولا احاول اتعرف ولا ارجع للحل اللي الكل بيمشي عليه جواز الصالونات فلان عنده بنت  وكده كنت محتار بس لازم اختار وحقيقي تهت بس في الاخر اخترت.

رسالة شكر

اولا مبروك لكل اللي ربنا كتب ليهم  الحج السنه ده وربنا يتقبل منا ومنهم صالح الاعمال ويرزقنا رحمته ومغفرته ويرزق اللي نفسه يروح السنه اللي جايه ويزور بيته ويحج ان شاء الله.
ثانيا وده المهم شكر كبير طالع من القلب ودعوات ملهاش عدد لخادم الحرمين الملك عبدالله ابن عبد العزيز ولكل رجال المملكه ورجال الامن خاصة على الدور الكبير اللي قاموا بيه على احسن واكمل وجه.
سمعت كتير عن مشروع قطار المشاعر المقدسه ولكن بعد تجربته احب اقول الله يجازي خير لكل واحد فكر فيه وساعد لانه مشروع جبار كان ليا شرف تجربته اللي استمتعت بيها جدا وساعدني على التركيز في اداء المناسك لعدم وجود صعوبه في التنقلات.
رجال الامن كانوا نعم المعين في التحركات وكانت اجابتهم على اي سؤال حتى اني سالت واحد فيهم على مكان الحلاق وكان ردهم بمنتهى الاهتمام  حقيقي انا حسيت معاهم بالامن والامان والتنظيم لكافة التحركات بدون ملل وحسيت من معاملتهم ان احنا فعلا ضيوف الرحمن.
اما المشروع الكبير اللي يستاهل يتحكي عنه حكايات مشروع كوبري الجمرات منتهى السهوله والامان والسرعه ومفيش زحام انا سمعت عنه بس عمري ما اتخيلت اللي انا شوفته على ارض الواقع فعلا انجاز كبير ساعد كل الحجاج .
اما عن الخير اللي انا شوفته في يوم عرفات كان فوق الوصف كل حاجه تتمناها قدامك اكل عصير فاكهه مياه وكمان شمسيه عشان الحر حتى كان في ايس كريم من شركة البان كويتيه بيتوزع .
صدقوني كلنا فينا الخير لاننا مسلمين واول ما تيجي الفرصه بيطلع ويظهر ويبان وياريت نطفي ونقفل ونبعد عن الحاجات الوحشه اللي غيرت سلوكنا واللي هدت حياتنا لازم نبعد عن الظلم والغدر والخيانه والكدب والقتل والسرقه والكره ونرجع تاني مسلمين بنحب بعض ونساعد بعض ونقوي بعض.
واجمل حاجه في الرحله اني قابلت اخواتي من مصر وفلسطين والعراق والسعوديه وايران والكويت والبحرين والامارات واليمن والسودان والهند وتركيا واوزبكستان وباكستان وافغانستان وتشاد وماليزيا ونيجريا ودول كتير كلنا كنا لابسين نفس اللبس ماشين في نفس الطريق مع بعض بناكل نفس الاكل وكل تحركاتنا كانت مع بعض ياريت نرجع وطن واحد اسلامي.

انامسافر

اعذروني يا اصدقائي انا هغيب عن المدونه وعالم التدوين شويه عشان ربنا كتب ليا اني اقوم بالركن الخامس للاسلام وان شاء الله طالع على اداء فريضة الحج ربنا يكتبها لكل اللي لسه ربنا ما رزقوش الخير والفضل ده.

وما تنسوش تدعوليا ان ربنا يسهل ليا الرحله ويتقبلها مني ربنا ويرزقني المغفره والرحمه .

غربة كاسرة

ربي

طالت غربتي
واستنزف اليأس عنادي
وفؤادي
طمّ فيه الشوق حتى
!بقيّ الشوق ولم تبق فؤادي
أنا حيّ ميتٌّ
دون حياة أو ميعاد
وأنا خيط من المطاط مشدودٌ
.إلى فرع ثنائيّ أحادي
كلما ازددت اقتراباً
!زداد في القرب ابتعادي
أنا في عاصفة الغربة نارٌ
يستوي فيها انحيازي وحيادي
فإذا سلمت أمري أطفأتني
وإذا واجهتها زاد اتقادي
ليس لي في المنتهى إلاّ رمادي
وطناً لله يا محسنين
…حتى لو بحلم
أكثير هو أن يطمع ميت
!في الرقاد؟
…ضاع عمري وأنا أعدو
فلا يطلع لي إلا الأعادي
وأنا أدعو
فلا تنزل بي إلا العوادي
كلّ عين حدّقت بي
!خلتها تنوي اصطيادي
كلّ كف لوّحت لي
!خلتها تنوي اقتيادي
…غربة كاسرة تقتاتني
والجوع زادي
لم تعد بي طاقة
يا ربّ خلصني سريعاً
!من بلادي

 

قصيده للشاعر احمد مطر

مهاجرون

مع اقتراب السنه الهجريه الجديده كان لي وقفه مع هجرة الرسول واردت تقييم بعض الامور فما كان مني من صواب فهو من توفيق الله وما كان من خطاء او نسيان فهو مني ولمن ردني الى الصواب فله جزيل الشكر مني والثواب من الله .
لم تكن هجرة الرسول الى المدنيه هي الاولى للمسلمين فكان من قبلها هجرتهم الى الحبشه وكانت نتيجة شدة العذاب وما وجدوه من اهلهم من اهل قريش ما كان من الصعب عليهم اداء مناسك الاسلام من صلاة وعباده وذكر وعدم الاحساس بالامان .
ولم تكن اول الهجرات في الحياه فكان من قبلها الكثير اذكرمنها سيدنا موسى عليه السلام عندما استنصره رجل من شيعته على عدوه فقتله فعلم ان القوم ياتمرون لقتله فحمل حاله الى تلك البلده التي وجد فيها الفتاتين وقد تزوج احداهما وزرع الارض وبدا حياة كامله بعيده عن وطنه واهله.
وقد ترك ايضا سيدنا ابراهيم ارضه وذهب بهاجر وابنها اسماعيل لارض الحجاز وكان ذلك بداية بناء المشاعر وكان في تلك الرحله الكثير من الخير الذي نعيش فيه الان من بناء الكعبه وبئر زمزم .
وايضا سيدنا يوسف فقد كتب الله عليه ان يهجر ارضه واهله وكان ذلك وهو صغير ولكنه وجد في هجرته الكثير من الاحداث الى ان اراد الله له الملك .
كل تلك الاحداث دارت داخل راسي فلماذا لا اهاجر فقد يكون ذلك هو الحل للخروج من المشاكل التي تحيط بحياتي وهل يعد ذلك هروب لماذا؟ هناك ما هو لا يقبل الحل وقد يكون البعد حل او مع مرور الوقت يظهر الحل ولماذا اتحمل الظلم وقد اظلم من حولي ممن يهتمون لامري بان اكون سبب لتعاستهم بينما في خروجي سيجدون الراحه فهي ليست انانيه انما ايضا افضل من اجل الاخرين ووجدت ارضا فيه الخير والراحه والامان اكثر من بلدي ومفاتيح الرزق بيد الله فلا شئ مميز في بلدي افضل منها وانا بذلك اخطط للافضل لغدا قد يكون مشرق اما غدا في بلدي فهو محرق.
خاطبني قلبي لا تستعجل بل تمهل وتفكر رد عقلي لا تتردد فانت هنا ميت فان مت وانت تحاول سيكون لك شرف المحاوله وهي تكفيك واخذت قراري وبحثت عن الافضل واخترت الاصلح وحتى الان لم اندم على ما فعلت او بالاصح قد اكون نادما على اني تاخرت فهل في يوم من الايام ساعود.  

اعتذار

اعذروني يا جماعه وانا حقيقي اسف لاني هحاول اسمع كلام ناس كتير قالتلي انت ليه بتتكلم في السياسه مع اني كنت فاكر اني مليش دعوه بالسياسه فخلاص انا اخدت قرار اخير اني هبعد عن السياسه.
لو في يوم لاقيت رئيس عربي محبوس في بيته مش هتكلم ولا هقول ازاي وليه ولو الرئيس علقوه على المشنقه مش هنطق واقول كرامه او حرام عشان خلاص هعتزل السياسه.
يحاصروا غزه ياخدوا فلسطين مش هتفرق يقتلوا الاطفال هو ده العادي ويحتلوا العراق ويقتلوا الرجاله والستات في افغانستان وباكستان اصلهم بيقولوا عليهم ارهابيين مش هنطق هكون حجر صوان.
ولو في يوم سمعت ان في انتخابات رياسه مش هروح انتخب لان حكومتنا الرشيده هتقوم بالدور ده عني ملهاش لازمه اضايق الناس بوجودي وهما عارفين اختياري  صحيح هيختاروا الاختيار التاني بس اكيد هما عارفين مصلحتي اكتر مني.
ولو انتخابات مجلس الشعب بدات ياريت مفيش حد يبلغني  عشان ما تحرجوش نفسكم معايا لاني خلاص مليش حق الاختيار في بلادي.
اما لو الغاز راح لاسرائيل بارخص الاسعار ده مشاكل كبيره ما يعرفهاش غير عالم الاسرار اما انا هسكت وادور على حد يسلفني انبوبه وربنا يستر وما اطمعش في الغاز لوحدي يمكن حد يحتاجه بعدي.
اما الطماطم فمن زمان بيقولو عليها مجنونه وانا مليش في شغل الجنان وبعدين هي حمرا(قصدي على الطماطم طبعا) وانا زملكاوي ومش بحب اللون الاحمر لانه لون الدم  للي نزفوها رجالك يا مصر في اكتوبر وقبلها بسنين وناس خانتهم وباعت الغاز لاعدائهم ومش اللون الاحمر بس كمان الحليب لو غلي سعره مش هشربه لان خلاص مفيش حاجه بيضه في البلد كله اتلوث والبركه في المبيدات المسرطنه اللي ربنا اكرمهم وجابوها من اسرائيل.
حتى منتخبك يابلدي فضحنا مع النيجر وسيراليون حتى اللعب مش نافعين فيه طيب نعمل ايه وعايشين ليه وبنخطط بقالنا سنين عشان نوصل للفشل ومش جديد علينا الصفر اللي بنحاول نحافظ عليه يا خوفي يضيع منا هو كمان ويا ترى ساعتها هنساوي كام.
اعذروني يا جماعه خلاص مش هتكلم تاني في السياسه ولا اي حاجه تتعلق بالسياسه حتى عربيتي هركنها بره الجراج لاني حاسس انا سايس الجراج ليه علاقه وثيقه بالسياسه .
اعذروني يا جماعه لو طولت عليكم واوعدكم اني ناوي اطبق اللي قولته اول ما نفسي يروح وممكن بعد خروج الروح البلد بلدي وليا حق فيها وعليا حق ليها وانا مش هسيب حقي ومش هفرط في حق بلدي

صدام حسين

قررت انسى موال الانتخابات وكان اللي فكرني بيها ميعادها اللي قرب وكنت بفتكر اللي حصل السنين اللي فاتت عشان خايف انه يتكرر تاني .
ورجعت بيا الايام واحنا قاعدين بنحتفل مع العجل بليلة العيد ومتجمعين ورحنا الصبح صلينا العيد وراجعين ندور على الجزار عشان يجي وندبح العجل وناكل اللحمه عشان نخرج ونتفسح ويدوب رجعنا من الصلاه ولاقينا التلفزيون جايب لينا اعدام صدام معقول اكيد في حاجه غلط ازاي يعدموا صدام في يوم العيد لا مش صدفه اكيد ليها معنى كبير. 
كان موت صدام رساله بس مش لينا المره ده كانت للملوك والرؤساء العرب كانت رسالة تحذير اي واحد هيفكر يكبر علينا هيكون اضحيه واي رئيس هيفتكر انه ممكن يتكلم ويقول اللي احنا مش عاوزينه هيحصله اللي حصل لاخوكم .
ويا سلام على اختيار التوقيت واكيد كان بعد تخطيط  وكأنهم بيقولوا انتم يا مسلمين بتذبحوا الحيوان واحنا يوم ما هنضحى هنضحى بانسان عربي  ومش اي واحد لازم يكون ملك او سلطان .
والغريب ان التصريحات بعد كده جت جبانه وكانهم بيقولوا خلاص وصل كلامكم واحنا اسفين لو ضايقناكم ومش هنعمل زي صدام وهنعمل اللي انتم عايزينه ومش هنخالف الاوامر.
انا مش هحاسب صدام ولا هقول هو كان طيب او كويس او وحش بس هو زي غيره على الاقل يا ترى في كام رئيس يستهلوا الموته ده وهنبقى فرحانين بس ياريت ما يبقاش بايدي الامريكان .

الانتخابات 2005

رجعت من اول الطريق من تاني وقلت لنفسي الحياه مش طريق مسدود ممكن تتغير بايدينا وجت انتخابات 2005 مجلس الشعب وقبلها كانت كل محطات التلفزيون شغاله صوتك امانه يا مواطن لازم نسمعه 
رجال الحزب الوطني كلها بتتكلم لازم المواطن وده حقه صوته امانه وبيه هتتغير مصر حتى الشيخ طنطاوي جه في حديث الروح وقال صوتك امانه يا مصري والساكت عن الحق شيطان اخرص.
انا قلت خلاص الدنيا اتغيرت قلت اجرب حظي المره ده واكيد مش هخسر كتير رحت ادور على البطاقه الانتخابيه معرفتش اجيبها وقالوا خلاص ده وقت انتخابات وكان ليا واحد صاحبي عمه مرشح الحزب الوطني جاب ليا كارت عليه صورته وفي ظهر الكارت لاقيت اسمي ورقم اللجنه ورقم كمان قلتله كده تمام.
نزلت الصبح بدري وقلت شكلها هتبقى زحمه الحق بدري بدري رحت لاقيت الدنيا هاديه استغربت وخفت ادخل سالت قالوا ليا ادخل وكان في ظابط على الباب سالني فين بطاقتك؟؟ طلعت بطاقتي قالي يا سلام بطاقتك الانتخابيه يا حبيبي؟؟
عملت اهبل ومش فاهم وطلعت الكارت 
راح قايل ليا طيب ما كان من الاول ايوه انا عايزها عشان مصلحتك بعد كده ابقى طلع بطاقتك الانتخابيه الكارت ده هنمشيه المره ديه ولجنتك فوق هناك
قلت يا سلام هي ده مصر يا جدعان الراجل خايف اني لما ادخل ممكن ما تكونش لجنتي وممكن اتوه معرفش فين اسمي بس عرفت اني لسه في مصر على طووول جه ورايا واحد ومربي ذقنه وساله نفس السؤال طلع كارت تاني لمرشح تاني قال ليه الظابط ما ينفعش ده انتخابات مش داخل طابور عيش وطرده بعيد عن اللجنه المهم دخلت وانتخبت وبصراحه مفيش حد قال ليا اعمل او ما تعمليش انا اخترت اللي انا عايزه ورجعت على البيت وانا فرحان اخيرا عملت حاجه في البلد ده وفتحت نشرة الاخبار وكنت مستني يجيب صورتي ويعلقوا على حالة الانشكاح اللي كنت فيها لكن للاسف جت حاجه تانيه خالص لاقيت ضرب نار وخناقات ومدارس محاطه بالقوات ممنوع الدخول يا حضرات وسالوا قاضي رد عليهم قال انا وظيفتي ان اللي يجي اللجنه ينتخب بدون تهديد ويختار اللي هو عاوزه
سالوه انت ما سالتش نفسك مفيش حد دخل ليه والدنيا زحمه تحت
ده مش نطاق مسئولياتي  
وكانت نتيجة الانتخابات اكتر من مائتين مصاب و150 حالة تحرش وقليل من حالات الاغماءات نتيجة ضرب المخبرين لبعض المواطنين وتم القبض على خمسين عضو من الجماعه المحظوره وبعد التزويرات الصغيره من اجل ظبط الاداء
انا اقتنعت خلاص ومش هتكلم في الموضوع ده تاني طول حياتي وياريت نريح الحكومه ونطالب بالغاء الانتخابات خالص والحكومه تعين اللي هي عايزاه عشان نحافظ على اخواتنا في الشارع ونعيش وخلاص..
صحيح هو يا ترى الشيخ ليه ماقلش اللي يكتم صوتنا ويمنعنا يبقى حكم الدين فيه ايه؟؟؟