الأحد، 28 نوفمبر، 2010

حكايتي مع الايام(3)

الطريق اخد منا ساعتين ونص كنت قاعد افكر فيهم انا ممكن اعمل ايه عشان اسعد البنت اللي ارتبطت بيها وياترى العمر هيكفي عشان اسعدها واهنيها لحد ما وصلنا شقتنا الساعه 4 الفجر وطبعا كان يوم طويل قبلها وعريس جديد والفرحه اللي عاشها عارفها واللي لسه متوقع بتكون عامله ازاي واتفقنا ننزل نقضي اربع خمس ايام في مرسى مطروح وحجزنا للسفر وكان اول موقف يقلب بنكد في حياتنا عمي اتصل يومها بليل وقلي انتم مسافرين طيب كنا عايزين نسلم عليك قلتله احنا هنسافر بكره الساعه 11 الصبح قلي خلاص هعدي عليك الساعه 10 نسلم على طول ونمشي قلت ليه تنور.
وكنت ده الخطيئه اللي ماعملتش حسابها زعلت في ايه يا بنتي قالت حد يزور حد الساعه 10 الصبح طب ده عمي ومش زياره فضلت زعلانه وتاني يوم جه عمي نقطني هو ومراته وعشر دقايق ومشيوا واحنا حضرنا حالنا ونزلنا ولسه الوش مقلوب لحد ما ركبنا الباص قلت اصالحها مع اني مش عارف اقول ايه بس اهو عيطت كمان وفضلت لحد ما صالحتها عشان دول يومين العسل ومفيش سبب للزعل اساسا .
وصلنا وقضينا يومين حلوين وفي الليله الاخيره شركتها كان ليها فرع هناك وواحد كان جايب لينا تذاكر الرجوع نزلت عشان اخدها حوالي الساعه 11 بليل وقلت ليها لما ارن انزلي رحت اجيب التذاكر كان قاعد معاه كام واحد من الشركه سلموا وباركوا رجعت بطلع التليفون لاقيتها واقفه قدامي ايه يا بنتي نزلتي ليه ردت عليا الدنيا حر قلتلها يعني تنزلي كده تقفي في الشارع بليل ينفع سكتت وعشان اغير الكلام واعدي الموضوع وخلاص قلتلها كان في فلان وفلان قاعدين بيسلموا عليكي راحت بصه ليا وقالتلي قصدك اني نازله عشانهم انا اصلا مااعرفهمش شكلا كتيري ممكن اتكلمنا في التليفون عشان شغل وقلبت دراما وحرب وخلاص مفيش مسك ايد والبوز قفل الطريق وماشيين على الكورنيش ما بنتكلمش وفجاه لاقت نفسي ماشي لوحدي بصيت ورايا لاقيتها قاعده ضحكت وسالتها في ايه قالتلي من قلت ليك عايزه اقعد قلت ليها انا ؟؟؟ قلت ليا الكلام ده ؟؟؟وبعدين ؟؟ انت ماردتش فانا قعدت كانوا احلى يومين وطبعا خلصوا بالفقره ده ورجعنا على البيت نمنا ولمينا حاجتنا ورجعنا على بيتنا في فيصل.......

هناك 25 تعليقًا:

Dr/ walaa salah يقول...

بصراحه يا باشمهندس مش عارفه اقول ايه

بس يمكن ده دلع العرايس ^_^


الله اعلم


على العموم انا منتظره الباقي

الحب الجميل يقول...

العروسه بتكون مبسوطه وفرحانه لاستقبال الاهل فى بيتها الجديد

انا بستغرب موقفها جدا
ايه المشكله لما يجوا عشر دقايق يهنوا ويباركوا
مش شايفه اى مشكله!!!
وبتصالح فيها ليه واصلا انت معملتش شىء يضيقها
بالعكس انت بتتعامل معها كويس ودا اللى حسيته من خلال اللى بتكتبه

وبعديــــــــــــــــن
؟؟؟

Tears يقول...

صراحة فى اول مشكلة معاها حق...و شىء مش شيك خالص ان حد مهما كان حتى لو مامتها يزوركم يوم الصبحية عشرة صباحا و المفروض اللى عمل كده يبقى مكسوف اوى و مش كده برضة

مستنية الباقى :)

eng_semsem يقول...

tears الكلام ده كان بعد الصبحيه ب3 ايام مش تاني يوم لان تاني يوم محدش جه اصلا لان احنا كنا نايمين وصحينا 6 المغرب لانننا رجعنا زي ما قلت 4 الفجر

eng_semsem يقول...

الحب الجميل ويرضيكي ابقى ماشي مع عروستي بعد الفرح ب 3ايام وهي زعلانه واروح البحر والمصيف ازاي

eng_semsem يقول...

dr/walaaلو هو ده الدلع فكريني الغيه من القاموس لانه دلع يزعل وده كانت بداية الدلع تابعيني

حرّة من البلاد..! يقول...

أخي أسامة
يوميات طيبة
تحياتي لك
اتمنى ما تنتهي بشر أبدا

غير معرف يقول...

اخى اسامة اللة يعينك ويصبرك والحريم كلة نكد وتكفرن العشير ياريت تكمل الموضوع بسرعة عشان اعملة فيلم مستعجل اخوك الدكتور هيثم جمال

ولا بالاحلام يقول...

السلام عليكم ورحمة الله وبركاته
والله كل ده عادى وبيحصل فى أحسن العائلات
واكيد هتكون النهايه جبتو صبيان وبنات وعايشين فى تبات ونبات
فى الانتظار
تحياتى
ابتسام محمد (ولا بالاحلام)
سنووايت (اميرة الاحلام)

سواح في ملك الله- يقول...

ربنا يستر البدايه مش مبشره بسيارب يطلع ظني غلط تحياتي

افروديت يقول...

عادي وبتحصل.......مش كل الناس زي بعضها

بس شكلها بتحبك ولا أيييييييه وعسوله كمان

تحياتي ليكوا

Noha Saleh يقول...

انا قريت الا3 اجزاء مرة واحدة
كل حياة جديدة فى بدايتها بيكون فيها مشاكل كتير
وبعدين بيحصل تعود على الطباع
انا مستنية باقى الاجزاء
بجد الاسلوب بسيط وجميل اوى ومفيش تطويل فى الاحداث

eng_semsem يقول...

اختي ولا بالاحلام مش هقدر اقول غير ولا بالاحلام الكلام اللي انت بتقوليه

eng_semsem يقول...

انا كان تفكري نفس اللي انت فكرتي فيه يا noha saleh بس بعد كده فهمت حاجات كتير

دودو يقول...

اسامه انت عملت اللى عليك واكيد ربنا شيلك الخير وطول ماانت مع ربنا عمرك ماهتندم

karmen يقول...

الستات دول عليهم حركات
تودي في داهية^_^
جميل استاذ اسامة مستنية باقي اليوميات

خواطري مع الحياة يقول...

السلام عليكم
من بدايتها كده دي لازم ترحب فيهم بصدر رحب لانهم مااجوا لعندكم عشان يجلسوا اليوم كله دول جوا عشان يباركوا عليكم
اعذرني على كلامي
لكن دي عقلها صغير شي مايزعل ولايستحق البكاء عليه
تقبل مروري
سلامي ليك اخي.

جايدا العزيزي يقول...

اسامه

ليه دايما بتاخدوا مواقفنا على انها

مشاكل

ههههههههههههه

طبعا عروسه جديده وعايزة تكون دايما مع زوجها

لانها بتحبه جدا

والموقف التانى اتاخرت عليها ووحشتها بس ما حبتش تبين ليك

انا لو مكانها هعمل كده واكتر شويه

بس بحب مش بخناق

لازم تحسها اووووووووى

وربنا يوفقكم يارب

تحياتى

eng_semsem يقول...

والله ان بررت المواقف على حاجه زي كده دلع بس غشيم ومش فاهمه هي بتعمل ايه بس جت احسبها لاقيت منين هي زعلانه ومش قادره على بعدي ولما نزلت بقيت مش طايقني ولا عايزه تمشي جنبي؟؟

lossy❤❤ يقول...

ولا يهمك .... دلع بنات وزاد عليه دلع عرايس...

احنا بنات وبنفهم على بعض..

المطلوب تفعد تراضيها وتراضيها

لحد ما ترضي غرورها....!!!

كل البنات كذا...!!!

Amr يقول...

أصبر شوية ...كل حاجة في أولها صعبة

كمل متابع

دودو يقول...

اسامه ازيك يارب تكون بخير يلا انا فى انتظار اليوميات

eng_semsem يقول...

نورتيني يا دودو وانا بخير الحمدلله

وداد يقول...

بصراحه موقفها غريب جدا

بالنسبة لزيارة عمك في التوقيت ده

امر مش مقبول لو انتوا كنتوا نايمين

لكن انتوا اصلا صاحيين وبتحضروا نفسكم للسفر

يعني عمك مجاش يصحيكم ولا حاجة

بس عجبني انك بتعدي الامور وبتحاول تسعدها ومتقلبش شهر العسل بصل من اولها

وبعدين انا حاسه انه مفيش تواصل بينكم

يعني حاسه انها في عالم وانت في عالم تاني

اعذرني على كلامي لكن دا إللي حسيته من ردود افعالها

الله يوفقكم

اروح اشوف باقي الأجزاء

الغاردينيا يقول...

يمكن حساسه شوي هي

يعني مثلا زيارة عمك مش مستحقة منها انها

تبكي ... وتعليقها على كلامك انها مش

نازله علشان زملاءها في العمل يوحي بهالشئ

واشوفك في 4