الثلاثاء، 30 نوفمبر، 2010

حكايتي مع الايام(4)

وانا رايح الاجازه كنت بحلم انها هتبقى احلى ايام عمري رجعت وانا نفسي انساها وحاولت اعيش عادي ولا كان في اي حاجه حصلت والمفروض انها كانت هتنقل شغلها في فرع المهندسين بدل ماكانت في فرع كفرالشيخ قبل ما تروح اتكلمنا قلت ليها انا برجع من شغلي الساعه اربعه ونص خمسه بالكتير ياريت ارجع الاقيكي على الاقل في البيت عشان الغدا وراحت تاني يوم الشغل ورجعت بدري وانا كمان بس لاقيتها بتقلي انا اتفقت مع صاحب الشغل اني هخلص على الساعه خمسه قلتلها ازاي وترجعي البيت في فيصل على الساعه سته وانا اعمل ايه اكل امتى ده مش هينفع وطبعا قالت ده نظام شغل مش هينفع انا اغيره قلت بس مش هينفع مع نظام البيت وممكن تسبيه واحنا اتفقنا زمان ان البيت اهم وطبعا كأني بكلم نفسي وتاني يوم جت الساعه 6 واستمر الوضع على كده قلت اتكلم مع امها يمكن تفهمها وطبعا الست مشكوره اتكلمت معاها ولاقيت الكلام خلاص انا هطلع من الشغل الساعه اربعه قلت كده تمام يمشي الحال وفي جوه نفسي بقول ماهو كان ينفع اهو امال هي قفلتها في وشي الاول ليه المهم  يوم اتنين اسبوع ورجعنا للوضع القديم بحجة ضغط شغل وكلام من هذا القبيل سكت خالص وبقيت ارجع احضر اكل واصبر نفسي ترجع هي تحط الاكل طبعا مفيش عندي مكان يوم اكل يوم انام يوم مليش نفس وما اتكلمتش ولا اعترضت كانت النتيجه خلاص انا هسيب الشغل اخيرا فهمتي الحمدلله طبعا في سري بس الظاهر سمعت عشان بعدها لاقيتها بعد كام يوم بتدور في الجرنال على شغل وفي يوم رجعت البيت لاقيت مرات البواب بتقلي انا جبت رقم الراجل بتاع النت المدام كانت سالتني الصبح عليه وهي نازله الشغل 
طلعت فوق استنى اسمع منها اي حاجه مفيش فتحت انا الكلام الرقم بتاع النت انا جبته من مرات البواب قالت كويس ابقى كلمه سالتها هو انت نزلتي النهارده قالت اه رحت الشركه القديمه كان ليها معايا حبة ورق وكان في انترفيو في شركه جنبها .
سالتها طيب ما قلتيش ليه امبارح بليل ما احنا كنا قاعدين طيب حتى كلميني وانت نازله امال لازمة الموبيلات ايه ؟ قالت انا فاكره اني قلتلك هو انا ما قلتش ليك؟
الصراحه شكيت في نفسي هو انا مره مش بسمع ومره بنسى لا انا اكيد عايز اتعالج وبعدين سكت والنتيجه انها مفكرتش تاني تروح شغل وفي وسط المواقف ده كان ليها اخت في الشرقيه متزوجه وكانت عايزه تروح ليها قلت ليها وماله نروح .....

هناك 27 تعليقًا:

Dr/ walaa salah يقول...

بصراحه انا حاسه بشئ غريب بيحصل بس يارب يطلع احساسي غلط

بس اللي شايفاه لغاية دلوقتي انك استحملت كتير

على العموم بلاش اسبق الاحداث

انا في انتظار القادم

Tears يقول...

موضوع مواعيد الشغل ممكن فيه التكيف و المرونة من طرفك لان ايجاد عمل مش سهل و المرأه عموما مش خادمة وظيفتها تعمل الاكل و تحضرة و تستنى لما الراجل يجي انما هى مساوية ليك تماما فى الحقوق و الواجبات و لو انت عندك شغل بيخلص بعدها يبقى برضة هى ح تستناك

و مادام بتقول سابت الشغل يبقى ماكانش فيه امكانية انها ترجع فى معاد باكر بس كونها ضحت بالشغل ده فى حد ذاته اثبات لتقديرها لك و صراحة كتير غيرها و انا اولهم لا يمكن اسيب شغلى عشان ساعه عمل

اما حكاية البواب و عدم اخبارك انها ح تخرج فغريبة و مش عارفه صدفة و لا لأ بس ح استنى التكملة

ياريت تكبر البوست شوية :)

eng_semsem يقول...

هي سلبت الشغل لما انا سكت ماعبرتهاش وبقيت اكل واسابها وبعدين لما مامتها كلمتها عرفت تيجي بدري بس معناها اني اقبل انها تشتغل وانا اكل بره طيب فين البيت والعيله في الكلام ده وخصوصا ان البيت مش محتاج راتبها في حاجه

Noha Saleh يقول...

كان ممكن مواعيد الشغل دى تتفقوا عليها لان هى فعلا اكيد شغلها مهم بالنسبة لها برضه
اما موضوع البواب ده انا مش عارفة بقى
هستنى الباقى ومتابعة اللى هيهصحل

Noha Saleh يقول...

كنت اقصد اقول متابعة اللى هيحصل
علشان اللخبطة اللى حصلت فى كتابة التعليق الاول

الفقيرة إلى الله أم البنات يقول...

متابعين والحكم فى النهايه
ربنا معاك

جايدا العزيزي يقول...

اسامه

كل بيت فيه مشاكل بس حقيقى مش كده

انت عارف اناكمان من كفر الشيخ

وكنت بشتغل فى مركز مرموق

وفى افضل مكان فى البلد المطار

اول مازوجى قالى بقلق عليك

قولتله خلاص مش هروح تانى

برغمانالمرتب كان خيالى

وكان اضعاف مرتب زوجى بكثير

بس علشان رضاه واستمرار بيتى

كان لازم اضحى والله يااسامه

كنت قايمه بوجباتى الزوجيه اكثر

وحريصه على رضا زوجى واولادى

التفاهم والحب اهم من حاجات تانيه

هى بس لو فكرت انك اهم شئ فى الوجود

ربنا يهديها يارب

بسحرام كل دقيقه تضيع من العمر

فىمشاكل

ربنا يوفقكم

انتظر البقيه

تحياتى

eng_semsem يقول...

اختي noha هو ده اللي انا حاولت اعمله في الاول وما نفعش نتفق على ميعاد طلبت مساعدة امها واتفقنا وبعد كده رجعت للميعاد القديم

eng_semsem يقول...

انا مش ضد ان المراه تشتغل بس لو ده هياثر على وظيفتها الرئيسيه كزوجه وام يبقى لازم تختار واشكرك على متابعتي اختي جايدا وانا معاكي ان اللي عملتيه هو الصح لان مش دورك انك تصرفي على نفسك او البيت ولو حصل تقصير في ده كله هيلوم الراجل انما تقصير في الاكل والشرب والرعايه ليه وللاولاد انت المسئوله الاولى والاخيره عنه امال الجنه تحت اقدام الامهات ليه

الحب الجميل يقول...

انا قولت من اول الحكايه
قلبى مش مرتاح للجوازه دى


متابعه

ولا بالاحلام يقول...

السلام عليكم ورحمة الله وبركاته
انا الحين مستمعه جيده وهقول رأى فى أخر القصه لانها تمت خلاص وانت بتسرد حجات حصلت بالفعل بس ممكن متقلش الموضوع من جهه واحده لازم كمان تقول ايه مبرراتها يعنى تتكلم عن الجهه الاخرى
تحياتى
ابتسام محمد (ولا بالاحلام)
سنووايت (أميرة الاحلام)

خواطر شابة يقول...

يعني موضوع مواعيد الشغل صعب ان احنا نتحكم فيه وهنا فيه حلين اما لو كنتوا محتاجين مرتبها يبقى انت تتقبل الوضع كما هو وحضر أكلك ولو مش محتاجين المرتب ممكن تتفقوا على انها تسيب الشغل وبما انها عملت كده اصلا فده دليل ثقة ورغبة في استقرار البيت لازم انت ثثمنها وتقدرها لانها مش حاجة سهلة خالص
اعجبتني السلسلة سأعود لقراءة مافاتني وسأتابع ان شاء الله

dodo يقول...

اسامه ازيك يارب تكون بخير
والله انا مش عارفه اقولك ايه بجد ربنا يعينك ويرزقك باللى فيه الخير بس انا عاتبه عليك فى انك متفقتش معاها من الاول على كل حاجه كنت المفروض انك تحط النقط على الحروف قبل اتخاذ خطوة الزواج
منتظره الباقى
واتمنالك الخير

karmen يقول...

طول عمري ضد شغل الست وبقول ان مكانها بيتها
حتي لو مظبطة وقتها وجوزها موافق استحالة تكون بنفس راحة واهتمام المتفرغة لبيتها
ربنا يهدي
بوست هايل استاذ اسامة تسلم ايدك موضوع مهم جدا

eng_semsem يقول...

اختي ولا بالحلام ايه مبرر هيكون السبب انها تختار اوقات الشغل انا مش موافق عليها وتقول ما ينفعش تتغير وبعدين لما امها تكلمها الاوقات ده فعلا تتغي وبعدين ترجع للميعاد القديم ولعدين اسكت وانفض يكون الرد انها تسيبه خالص من نفسها يعني ملوش اهميه عندها وما تقنعنيش انه عشاني عشان انا هقنعك انه مش عاشاني استمري في المتابعه ده البدايه

eng_semsem يقول...

dodo انا كويس وبخير والحمدلله واقري تاني هتلاقينا اتنفقنا قبل الجواز ان اهم حاجه البيت وحاولت اتفق بعد الجواز قبل ماتنزل الشغل وبعد مانزلت حاولت ادخل قوات خارجيه لعمل معاهده تضمن حق الطرفين

miroooo يقول...

مش هاقدر احكم غير فى النهايه
متابعه الجديد

خواطري مع الحياة يقول...

السلام عليكم
هو هيحصل ايه في الاخير
حاسة ان في شي
هي لو كانت بجد تقدر قيمة بيتها وزوجها كانت تروح بدري من الشغل من دون مانت تقول لها او كانت سابت الشغل.
ربنا يوفقك
مش هحكم من الان لما نهاية القصه هقولك حكمي عليها
تقبل مروري
سلامي ليك اخي.

حرّة من البلاد..! يقول...

أخي أسامة
موضوعك شدني وقطعته مرة واحدة مش حرام عليك .^_^
تحياتي لك

eng_semsem يقول...

انا اسف يا حره لو عملت كده بس بكره هيكمل وكل حاجه هتتعرف وسايب الخيط عشان اربط امبارح ببكره عشان مفيش حد يتوه وبعد ما اخلص كامل الحكايه يعرف يربط كل الاحداث ببعضها

florieda يقول...

حلوة فكرة انك تنشر مذكراتك هنا
دى أول زيارة لى وميرسي على وجودك عندى فى مدونتى
سيبك من المشاكل وانك تصطاد الاخطاء لزوجتك حاول تلتمس ليها العذر وحاول تتكلم معاها مش تزعل منها وتكتب هنا فى المدونة وخلاص
انا بقول دة عشان حياتكوا تكشي
دمت بود

eng_semsem يقول...

وانا التمست ليها العذر اختي fgoried والحكايه مش اصطياد اخطاء الموضوع كبير تابعيني هتعرفي كل حاجه

dodo يقول...

اسامه فين بقيت باقى اليوميات انت اتاخرت اوى واتمنى انك تكون بخير اعذرنى انا مش بقيت ادخل الياهو تانى بسبب الشغل(دودو)

mrmr يقول...

طيب يا اسمه
منتظره الباقيه علشان نحكم

وداد يقول...

بصراحة مش عارفة اقولك ايه

بس معلشي في ردي ده

هو حضرتك متاكد انك متجوز اصلا

اصل فعلا انا حاسه انها في كوكب وانت في كوكب تاني

انتوا الاتنين مش سامعين بعض

هي بتتصرف من نفسها

مش بتسمع كلامك او مش شيفاك في حياته ( اسفة على الكلمة دي )

بس جد دي انسانه استفزتني

لو معجبكش ردي ممكن تحذفه

eng_semsem يقول...

اختي وداد فكرة الصفحه ابداء الراي فكيف احذف حرف من كلامك حرية التعبير مفتوحه للجميع احنا مش في مصر اتكلمي براحتك وهاتي اللي عندك

الغاردينيا يقول...

اي نعم انا مع عمل المرأه بس لما يتعارض
مع حياتها الزوجيه الاولى تسيبه
وكان الصح تشاورك في مووضوع العمل الجديد
عموماااا خيرررر :)
اشوفك في 5 دي بقت لعبه هههه