الخميس، 2 ديسمبر، 2010

حكايتي مع الايام (5)

وبعد مرور حوالي شهر من زواجنا تقريبا 20/8/2008 طلبت زوجتي العزيزه ان احنا نروح عند اختها في الشرقيه قلت وماله اهو منه تغيير ومنه انا عارف ان هي بتحكي ليها كل حاجه يمكن تتكلم معاها تنصحها شويه وقبل مانسافر سالتها نجيب حلويات من محل محترم هنا جنبنا لابوار او توينكي قالت هنشيلها من هنا بلاش نجيب من هناك قلت ليها ماشي ونزلنا من البيت قلت ليها ممكن شنطة كتفك تخليها الناحيه التانيه عشان بتحك في جنبي قالت مش بعرف اشيلها غير في الكتف ده قلت وماله الف انا وركبنا المترو ونزلنا في محطة المظلات واحنا نازلين المخرج ضيق قدام المحطه وفي قهوه قافله الطريق سبقتها وعديت الزحمه ببص ورايا لاقيتها واقفه في محل العصير رجعت ايه في ايه قالت انا هشرب قلتله مش تقولي قالت انا قلت وانت ما سمعتنيش طبعا اخدت قرار اني اكشف على ودني اللي عمري ما اشتكيت بيها ومشينا ركبنا الباص الغريب اني لاقيت الشنطه وسطينا سالت في ايه قالت عادي وشالتها نزلنا في بلد اسمها منيا القمح مع احترامنا لكل اهلها انا ما اشتريش من اي محل حلويات فيها وقررت اشتري فاكهه احسن ورحت عند الفكهاني نقيت كذا حاجه وسالتها اجيب حاجه تاني قالت هات اللي انت عاوزه وبعدين رحنا على سوبر ماركت وجبت حبة حلويات عشان عندهم طفلين ورحنا البيت قعدنا واتكلمنا واخدنا واجبنا وتمام التمام  وبعد العشاء قمنا عشان نرجع نزلنا لاقينا بيجو ركبنا في الكرسي اللي قدام جنب السواق وكانت المفاجاه لاقيت الشنطه وسطينا سالت عادي انت قاصده حكاية الشنطه ده قالت عادي انت حاطط نقرك من نقرها ليه ضحكت وسكت وروحنا البيت.
ولاقيت سكون غير طبيعي لا كلام ولا اي حاجه حاولت اتكلم قالت انا هنام سبتها ونزلت قعدت تحت شويه على القهوه رجعت قعدت في الصالون ونمت زي ما انا وصحيت على وشها الصبح قالتلي خد الخمسين جنيه ده تمن مشوار امبارح في ايه يا بنتي انت بتعملي ايه انت فاهمه اللي انت بتعمليه هو انا اشتكيت وقلتلك صرفت كتير وكالعاده بكلم نفسي وسكتت ومشيت كانت لسه بتروح الشغل مره واتنين شيلي فلوسك قعدت على الترابزه 3 ايام اعمل ايه اقول لامها يمكن افهم في ايه وطبعا امها ازاي لا طبعا عيب وفضلت بعدها كمان 3 ايام سالت امها تاني قالتلي اصل الحاجه اللي انت جبتها ماعجبتهاش طيب المفروض اعمل ايه نجيب من هنا لا اجيب حاجه تانيه لا هات اللي انت عايزه وكان يوم ظريف وجميل ما يتننسيش ......

هناك 27 تعليقًا:

Dr/ walaa salah يقول...

في حاجه غريبه في الموضوع يا اسامه

اولهم حكاية ودانك دي وانها مصممه انها كانت بتكلمك وانت مبتسمعش

حكاية الشنطه وحكاية انها تديك فلوس تمن الحاجات حاجه تانيه

بصراحه في حاجات كتير غامضه

بس متزعلش مني يا اسامه بالرغم انك لغاية دلوقتي مغلطتش في حاجه وكل معاملتك ليها كويسه

بقول بيني وبين نفسي يمكن عشان انت اللي بتحكي

يعني لو نفترض انها كمان حكت يمكن كنا عرفنا بردوا وجهه نظرها

على العموم انا منتظره الباقي يا اسامه

بس متتأخرش علينا

eng_semsem يقول...

dr/walaa صعب ان الواحد يظهر عيوبه بسهوله لانه غالبا لما بيعمل حاجه بيبقى مقتنع انه صح 100% بس توقعي انت ايه اللي ممكن اكون عملته استاهل المعامله ده وبعدين انا قدام شويه هجيب شهود من اقرايبها وشكرا على متابعتي

Dr/ walaa salah يقول...

يا اسامه واضح انك فهمت كلامي غلط
بالعكس انا فعلا مستغربه من معاملتها ليك بالرغم من معاملتك الكويسه ليها

اما بالنسبه لرأيي اننا لو سمعنا منها هيكون في نظره للموضوع مختلفه

ده مجرد رأي مش اكتر

يعني مش بعيب فيك ولا حاجه


على العموم بعتذر لو كلامي ضايقك

وانا متابعه حكايتك

شهر زاد يقول...

اقولك بصراحة يا خويا اسامه وما تزعلش
انتو لثنين مستفزين
علشان كل واحد بكلم نفسو وبيخبي على الثاني
الحوار اساس الزواج
حاول تقرب كلمه حلوة لمسه حنينة ماتبقاش جامد
اتحرك بقى
قصة شيقة ومثيرة
تسلم
تحياتي

خواطري مع الحياة يقول...

السلام عليكم
القصة كلها فيها غموض كانها فزورة
يارب خير
مستنيه الباقي
تقبل مروري
سلامي ليك اخي.

eng_semsem يقول...

dr/walaa المدونه مكان للحوار واي كان رايك فانا احترمه كل الاحترام ومفيش اي نوع من الزعل عندي انا برده بجاوب على سؤالك لو سمعنا منها وانا بحكي بكل ضمير وهجيب الشواهد في وقتها وانا مستني كل مره من اصد قائي يكتبوا اللي هما بيفكروا فيه مش اللي انا عايز اسمعه اتكلمي براحتك ده المراه ليها 64 كرسي في المجلس واحنا مضطرين نسمعها
حرية التعبير حق ليكي ولغيرك ومفتوح على الاخر وانا مش زعلان من رايك

eng_semsem يقول...

اختي شهرزاد حاولت على قد ما اقدر اني احاول افتح حوار بس كان دايما مقفول بالضبه والمفتاح شكرا على متابعتي

eng_semsem يقول...

خواطري مع الحياه
الدنيا اكبر فزوره بس مهما طولت او بعدت ومهمه كانت صعبه في الاخر بتنتهي وتتحل
شكرا على متابعتي

غير معرف يقول...

ربنا يعينك ياصاحبى الحريم كلة واحد خد بالك الرسول قال تكفرن العشيردى حاجة وموضوع الشنطة دة يمكن بتتقل عليك ويتمنعن وهن راغبات اخوك الدكتور هيثم جمال

وداد يقول...

بس انا عرفت الحقيقة

انتوا معمول ليكم عمل

انت شايفها واحده مبتتكلمش ومش بتسمع كلامك

وهي كذلك شيفاك انسان مش بيسمعها

ومهما تكلمت صوتها مش هيوصلك

فبتتعامل معاك على انك غريب

وممكن تكون عندها عقدة نفسيه

ياريت حضرتك تكشف على الأذن

وهي توديها لدكتور نفساني

علشان نعرف بس العيب من مين ؟

اعذرني على تعليقي

بس انتوا الاتنين كلامكم غريب مع بعض

صحيح بخصوص الشنطة

يمكن كانت حاطه جهاز تصنت علشان تسجل كل حواركم

هههههههه

eng_semsem يقول...

اختي وداد انا رحت فعلا كشفت على وداني بس الظاهر كان دكتور تعبان عشان قلي كله تمام
شكرا على متابعتي

Tears يقول...

اكيد من الافضل السمع للطرفين و اكيد فى اى علاقة زوجية اهم حاجة الحوار و القلب الفتوح

لغاية دلوقتى كل الحاجات تبدو تافهة مع انها تعصب و غامضة

اسلوب يردك شيق و ياريت تكبر البوست شوية

مستنية الباقى :)

lossy❤❤ يقول...

لا تعليق ...


متابعة وانتظر البقية ,,,

karmen يقول...

مشكلة العصر
عدم وجود التوافق اللي حتي اذا كان في حبك هيموته
ربنا يكون في عونكم
في انتظار القادم
تحياتي

mrmr يقول...

اكيد فى حاجه مضيقاها منك
دور كده وارجع بذاكرتك شويه يمكن تلاقى حاجه تافه صدرت منك زعلتها
وان لقيت الحاجه دى حاول تصلح علاقتك بيها واستخدم اسلوب جديد معاها
ربنا يهدي الحال
فى انتظار البقيه

حلم يقول...

السلام عليكم ورحمة الله
الزواج هو إلفة ومودة وحوار مشترك ولو ان البيت أصبح صامتا فالمشاكل تتزايد وتنمو كالفطر
شكرا على الموضوع المميز

florieda يقول...

السلام عليكم
انا شايفة ان الحل مش فى دكاترة ولا فى ودانك ولا حاجة من دى
انتم لازم تقعدوا قعدة هادية مع بعض فى جو رومنسي كدة وتسألها هى ايه الى بيزعلها منك عشان مش تعمله تانى
وبالتالى هتقولها انت كمان ليه بتزعل منها
لازم ترجعوا لغة الحوار بينكم تانى
انتوا متجوزين ووشكم فى وش بعض طول النهار

eng_semsem يقول...

floridaاختى انا ذكرت في الموضوع اني كل ما احاول اتكلم معاها بتهرب ومش بتتكلم
والموضوع القادم انتظري المحايله عشان نتكلم مع بعض

موناليزا يقول...

مش عارفة اعلق أقول ايه
تصرفات غريبة من عروسة جديدة

عموما احنا متابعين معاك للنهاية حتى وإن لم نترك تعليق

الغاردينيا يقول...

واخيرا وصلت ل 5
ممم طب مش ممكن علشان نمت انت بعيد عنها
هي افتكرت انك زعلان ؟
قامت راحت جبت لك فلوسك ؟
غريبة اى كان الامر استمر و فضفض
بترتاح وياريت تشيل الصورة بتاع
تحياتي لمن دمرت حياتي

( متسمحش لحد يدمر حياتك ياحاج :))

eng_semsem يقول...

اختي جاردينيا تعبتك معايا جامد واشكرك انك اهتمتي تقري كل الاجزاء انا كنت زعلان من طريقة المعامله تعكها بزياده
والصوره تعبير عن احساسي وقتها والبقيه تاتي

عباس ابن فرناس يقول...

اعتقد اللى حكيته من عمر القصة يا اسامة هوا شهر
لذلك وبرغم التفاصيل اللى حكيتها
محدش يقدر يحكم على علاقة زى دى فى مدة قصير لم تتعدا الشهر حتى الان
لذلك انا فى انظار باقى الموضوع
واكيد ساعتها هيكون لى راى

ودى واحترامى

eng_semsem يقول...

وده كان رايي برده يا اخويا عباس اني لازم اصبر شويه يمكن تغيير البيت محسسها بغربه يمكن هي مش متاقلمه يمكن مش فاهمه واخدت كل الاعذار اللي ممكن تيجي في البال

dodo يقول...

تحياتى الى من دمرت حياتى
ياااااااااااااااه
مكنتش اتمنى اسمع منك الكومنت ده يااسامه مفيش انسان خلقه ربنا ممكن حد تانى يدمر حياته لو فى انسان حياته ادمرت فتأكد انه هو السبب ومش حد تانى علشان على الاقل اعطا فرصه للتانى انه يتحكم فى حياته ويأثر عليه بالسلب او الايجاب
وتحياتى ليك يااسامه ومستنيه الباقى

eng_semsem يقول...

dodo عزيزتي لقد ذكرت سابقا ان هذا شعوري في تلك الفتره حسيت اني بضيع من نفسي لا لاقيني ولا شايف الطريق قدامي

افروديت يقول...

مفيش حب ولاتوافق

مجرد تصور

أنتظرباقي قصتك

تحياتي ياأسامه

eng_semsem يقول...

انا قلت من البدايه ان اساس قصتنا لا هي حب ولا اعجاب جواز صالونات كنت عايز ازرع فيه الحب المتبادل بس انا فاشل