الجمعة، 31 ديسمبر، 2010

وداعا 2010

وداعا 2010 بكل ما فيكي سنه عدت في عمري يارب اكون استفدت منها واتعلمت فيها كتير من الاشياء واتعرفت فيها على كتير من الاشخاص
سنه كانت مليانه بالاحداث وفيها حاجات حلوه وحاجات وحشه بس في الاخر عادي الحمدلله بدام احنا لسه عايشين بنتنفس ونمشي على رجلينا واحب اقلها وداعا عديتي عليا زي النسمه عملت فيكي كتير فوق ما كنت متصور في بدايتك وانا دلوقتي بقرا كل اللي كتبته في بدايتها لاقيتني ماكنتش متفاؤل يمكن كان نفسي اوصل لاكتر بس في الاخير دلوقتي وانا بودعها شايف اني انجزت فيها كتير واحب احكي معاكم واقلكم على انجازاتي في تلك السنه اللي كمان شويه هتبقى ماضيه
1- الحمدلله ربنا رزقني بفضل كبير من عنده بنعمه في بداية السنه ما كنتش مخطط ليه الا وهي حج بيته العتيق واشوف الكعبه بعنيه واطوف حواليها وكنت رحله ميسره وربنا يتقبلها مني ويرزقكم جميعا ويكتبها ليكم .
2- على الجانب العملي يعني شغلي اللي كان زمان حياتي وكان كل حياتي من 2005 الى 2008 رجعت من تاني اركز فيه ووصل مرتبي في شهر 3 الى ضعف مرتبي في اول 2009 وفي شهر سبعه تضاعف الدخل الشخصي وكان في شقتي اللي كنت ساكن فيها لما اخدوا العفش استفدت منها واجرتها من اول 2010 يعني الحاله عال العال وكله من فضل الله(ملحوظه: لو حد من اللي هيقرا شغال في الضرايب انا خسرت كل ثروتي في البورصه ) وماشي بخطوات ثابته بحضر نفسي للزوجه الجديده ومطالبها يارب تكون طيبه وما تخلصش عليا .
3- بالنسبه لحياتي الشخصيه اللي تقريبا عرفتوا ماضيها كانت بداية السنه كانت نهاية حلمي اللي كان غلط وكان ممكن يقلب بكابوس كبير بس ربنا اختار ليا الاحسن واقتنعت ان مفيش رجعه وكنت تحت تاثيرالصدمه وبحاول افوق وساعدني اهلي واصحابي اللي يستاهلوا تحية كبيره على اللي عملوه ليا وفقت ورجعت لشغلي بس كان لسه فاضل شوية جرح جوايا لانه مش بيطيب في يوم وليله بس اخد وقته عشان ما يظهرش من تاني .
4 - مدونتي الجميله الرائعه وده بالنسبه ليا كانت من احلى احداث السنه وابدا فيها بالشكر للي عرفني بالتدوين وعمل ليا المدونه وهو صديقي العزيز ابو العريف ودخلت كتبت فيها في الاول كلام مهم برده بالنسبه ليا بس مكنش هو مهمة المدونه اللي انا راسمه ليها بس كان لازم ادخل اتعرف واتكلم واسمع قبل ما اكتب فيها موضوع شخصي لحد ما استريحت وعملت فريضة الحج عشان يبقى الموضوع متسلسل ما اخدتش اجازه في النص ويضيع التركيز وانا بالنسبه ليا حققت هدفي اني سجلت حكايتي ومكنتش برده متخيل ولا حاطط في حسابي اني اقابل اصدقاء زيكم اللي بصراحه انتم ساعدتوني كتير وبفضلكم انا حاسس اني فتحت الباب وبتفرج على الدنيا ومش حاسس بالخوف .
5- من انجازاتي اني سافرت وسبت مصر وكانت بداية تفكيري في الموضوع خلال السنه اولا انا من زمان كنت رافض فكرة السفر للخارج تماما لاني عايش في مصر ومعايا مرتبي يفتح بيت ويتوفر منه وعندي امكانيات ماديه اني اعيش مستريح وعندي شغلي مستريح فيه بس كانت عندي مشكله كبيره جدا نظرة صعبان عليا اللي كنت شايفها في جيراني واهلي وخصوصا ابويا وامي وحاجات زي مثلا لقطة عادل امام في فيلم عريس من جهه امنيه لما بنته بتتجوز شريف منير وهي في المستشفى بتولد وهو بيحضن حفيده وشريف واقف وياخد ابنه في ايده ابويا قاعد ما تحولوا هاتوا حاجه تانيه   عشان مايجرحش شعوري بلحظة الابوه اللي اتحرمت منها وكان لازم اخرج من مصر ومن البيت لان احنا بنجدد الام بعض وبشوف الالم في عينه شويه عليا وشويه على نفسهم قررت ابعد عنهم عشان نعيش كلنا وننسى جراحنا من غير زعل يعني سافرت ومفيش حد زعلان من سفري ومسافر وهما راضيين عني والحمدلله كل يوم معاهم على الشات والمايك والكاميرا كاننا مع بعض على طول .  
6- اتعرفت على اصدقاء جدد من عدة دول عربيه وكان اهمها المهندس ميثاق من سوريا راجل محترم جدا وانا بعتز بصداقته جدا غير كتير تاني وطبعا اصدقائي من المدونه اللي بجد بتعب لو ماشوفتهمش كل يوم ولو انا قصرت مع حد ياريت يعاتبني عشان ما اعملش كده تاني ابدا ابدا .
اما سلبياتها فانا مش فاكر حاجه منها لاني خلاص رميتها بكل سلبيتها خلينا نفكر في بكره احسن .
نفسي في 2011 
1- وده اهم حاجه اني ابطل السجاير تماما وتخرج من حياتي.
2- اني ارجع مصر واخد بنتي في حضني .
3- اني احضر تجمع واشوف مين الناس السكره اللي وقفوا جنبي من غير ما يعرفوني.
4- اني اخلص من كل القواضي والمشاكل المتعلقه واطلق مراتي واخلص .
5- اني الاقي بنت الحلال اللي اكمل معاها حياتي بس يارب الاقي حد يوافق بيا .
6- اني انول شرف اعجابكم واتطور ومفيش حد يزعل مني والى كل زواري الاعزاء انا مش زعلان من اي حد فيكم وياريت لو حد زعلان مني يسامحني .
7- اني استمر بتركيزي في شغلي واتقدم في مجالي واستكمل بناء نفسي .
8- الاستمرار في الحفاظ بالروابط الاجتمماعيه ابويا وامي واخواتي واعمامي واخوالي واولادهم وكل قرايبي واصحابي وتكون في الزياده بعيد عن النقصان .
وكل سنه وانتم طيبين وبخير وفي سعاده دائمه وتتحقق كل امالكم في السنه الجديده وتندفن كل الامكم مع السنه القديمه .
اهلا 2011 وانا جاهز ومشتاق ليكي 
ملحوظه صغنتته
مش عايز اعمله واجب بس ياريت كل واحد يشوف نفسه امبارح عمل ايه وبكره ناوي يعمل ايه وياريت نسمع كلامكم ونشوف اجابتكم والا احوله لواجب واللي مش هيحله مش هرحمه وهحضر الفلكه

هناك 43 تعليقًا:

سواح في ملك الله- يقول...

السلام عليكم
احلامك بسيطة وجميلة
وانت انسان تستحق كل حب وتقدير
ويكفي انك مداوم علي طاعة الله
فتجد الله تعالي معك وبجوارك
حفظك الله انت وابنتك واهلك
تحياتي الطيبة

Tears يقول...

اهم خطوة و اللى اعتقد انها كتير بتساعد هى تغيير المكان

و البعد عن الناس اللى نعرفهم شوية لان احيانا بنكون عايزين نبقى لوحدنا و من غير اى ضغوط و لو غير مقصودة من اشفاق او نظرات اى حد حتى لو بيحبنا

كانت سنة مرهقة بعمق

خواطري مع الحياة يقول...

السلام عليكم
بص ياعم انا زعلانه منك
الصراحة صراحة
زعلانه منك جدددددددددددددددا
وما بسامحك
خلاص مابرجع بقراري.

خواطري مع الحياة يقول...

هههههههههههههههههههههههه
بمزح معك
مين يقدر يزعل منك
انت طيب
وربنا يحقق كل الي تتمناه
امنياتك حلوة وبسيطة
ويارب تكون سنه سعيده عليك
ربنا يخليي لك اهلك وبنتك ويارب تكون هذه السنه حلوة عليك
وتاخذها في حضنك
تقبل مروري
التعليق الاولاني
مزحة
ولا زعلانه منك ولا شي
سلامي ليك اخي.

الحــب الجميـــل يقول...

أبو ملك

كل سنه وانت طيب يا أبو ملك
كل سنة وانت طيب بخير وصحه وسعاده
وكل سنة وملك بخير وسلام

ربنا يحقق لك كل امنياتك يارب
وتشوف ملك على خير وتاخدها فى حضنك
وتبطل السجاير دى وتستقر فى حياتك العمليه والخاصه
وتنتهى مسألتك والقضايا على خير وبدون خساير اكتر مما خسرته

بس متسرعش فى الجواز
عشان متظلمش نفسك وتظلمها معاك
خد هدنه .... عشان تقدر تكمل المشوار صح

ربنا يكرمك خير يارب

وقولنا انت هتنزل امتى مصر واحنا نعملك احلى تجمع
ولا تشغل بالك
المهم رجوعك بالسلامه

مش بحب الواجب يا أبو ملك
وياريت تعفينى من الفلكه الله يخليك
ههههههههههه

ربنا الموفق يا أبو ملك

*****

Ramy يقول...

طبعاً انا جديد لانج هنا (:

اهم حاجة ان انت بدأت تستجمع نفسك من تانى

كل سنة و انت طيب

و ربنا يحقق كُل امانيك


ربنا معاك

eng_semsem يقول...

سواح في ملك الله
يارب كلنا نحقق احلامنا وتكون 2011 سنه حلوه وسعيده علينا كلنا ونلاقي فيها فرحتنا

eng_semsem يقول...

tears
وانااخترت تغيير الناس وتغيير المكان وتغيير كل الجو المحيط والحمدلله ارتاحت جامد
ويارب تكون سنه 2011 سنه مريحه ليكي وتلاقي نفسك فيها وتبعد عنك كل احزانك ودموعك

eng_semsem يقول...

خواطري في الحياه
انا ممكن استحمل اي حاجه الا زعل حد مني ويارب تكون السنه الجديده في كل الاخبار السعيده ليا وليك وكل الاصدقاء

هبة فاروق يقول...

اولا يا حج اسامة كل سنة وانت طيب
وانت انسان طيب وتستاهل كل خير
ويارب تحقق كل امنياتك مع العام الجديد
وتبقى سنة سعيدة عليكى وترجع بنتك لحضنك يارب امين
تحياتى الطيبة لك

eng_semsem يقول...

الحب الجميل
يارب احلامي واحلامك تتحقق ونشوف السعاده ونفرح بيها وبعدين انا صابر بقالي سنه ولسه مش هنزل دلوقتي بس على الاقل قدامي سنه هصبر اكتر من كده واول ما هحدد ميعاد رجوعي هكتب في صفحتي راجع ليكي يا اللي كرهتينا فيكي وهكون مبسوط جدا لما اشوفكم ونتجمع على الارض مش بس في المدونه وهرحمك من الفلكه مقابل التجمع لما ارجع
كل سنه وانت طيبه

eng_semsem يقول...

ramy
اهلا بيك ونورتني ويارب تتحقق كل احلامنا

eng_semsem يقول...

هبه فاروق
امين امين امين ليا وليكي ولكل المسلمين
يارب تكون سنه جميله نفرح فيها كلنا ونحقق احلامنا وطموحتنا
كل سنه وانت طيبه

carmen يقول...

ربنا يوفقك استاذ اسامة في كل خطوة ويحققلك كل اللي تتنمناه وسنة اجمل عليك يارب

حرّة من البلاد..! يقول...

أخي أسامة
ان شاء الله انه العام الجديد يحمل في طياته الخير لك وللمسلمين
والله أكثر ما يسعدني هنا أنني اعتبر كأختك الصغيرة وسأدعمك ان شاء الله في كل خير
شرف لي معرفة اخوة لي من المدونين لهم كل الاحترام والتقدير
تستاهل كل خير على ما صبرت
تحياتي لك

eng_semsem يقول...

carmen
كل عام وانت بخير وصحه وسعاده ويارب نحقق كا امالنا ونلاقي سعادتنا ونهرب من اي شئ ممكن يزعلنا

eng_semsem يقول...

حره من البلاد
اختي الصغيره حره من البلاد اعا د الله علينا اعيادنا اعوام مديده ونقضيها سويا في المسجد الاقصى
كل سنه وانت طيبه وتكوني في صحه دايما وبخير وتحققي كل امانيكي وتكون سنه محمله بالخيرات ليكي ولكل شعب فلسطين

شهر زاد يقول...

أسامة
انا فرحانة قوي بك
لانك طيب قوي وبتعترف بالجميل وعلشان كده انت لقيت ناس طيبة زيك توقف معاك
ولبحييك عليه قوي انك ماقفلتش عليك قوضتك وقلت للدنيا باي باي بالعكس رغم الجراح ورغم النزيف انت ضمدها وسرت في طريقك للاحسن
وانا بقولك الانفصال في حالات كثيرة بيبقى هو الحل السليم وماخفيكش يا خويا الصغير انا مجربة والسنة لعدت قطمتني من النص
وبعدت بين روحي وجسدي
ولسه وبداية السنة الجديدة لسه معدتش للشط
بس املي في ربنا كبير والي يجيبو ويحكم بيه انا راضية عليه
انا عوزه بس من السنة دي الصحة علشان اربي بنتي وابني واكون لهم قدوة خيرة
بس
وربنا معانا
والف شكر لك على انك اشركتنا تجاربك الي فعلا استفدنا منها
تحياتي

eng_semsem يقول...

شهرزاد الغاليه
بصراحه اختي العزيزه انا مش عارف ارد على كلامك اللي يرفع المعنويات لحد ما راسي خبطت في السقف خلاص بس اقلك اني في اول 2010 حسبت خسارتي لاقيت اني وصلت لمنتهاها ولو فضلت حابس نفسي هخسر اكتر واكتر وقررت اوقف نزيف الخساره واعدل الميزان شويه ومن فضل ربنا عليه انه ساعدني بحاجات كتير باهل طيبين يقفوا جنبي واصدقاء مخلصين يساعدوني وتوفيق من عنده فوق كل شئ .
ربنا يديكي الصحه والعافيه لتربية اولادك واوعي تحرميهم من ابوهم عشان تكوني قدوه ليهم في العدل والحق ويساعدك ربنا على فعل الخير ويحميكي من اذى الغير ويجعلها ربنا سنه سعيده وكلها خير

موناليزا يقول...

سعيدة بجد عشانك والحمدلله انك راضى ومبسوط
وزى مايكون ربنا بيراضيك وجعلك تحج بيته وتشوف الكعبة مباشرة وهذه والله نعمة غالية جدا لايشعر بها الا من تذوقها

ورغم انى - فى الاول ومن غير زعل كنت بعتبر سفرك ده هروب- بس حقيقى كان تصرف كويس لانه اكيد ساعدك على اجتياز المرحلة وبعدك عن جو القضايا والمحاكم
أنا عن نفسى اتمنيت كتير انى اقعد فى مكان بعيد ماحدش يعرفنى فيه

عاجبنى جدا انك خلاص نويت تبطل سجاير المهم الارادة ياباشمهندس
بص كل ماتيجى تشربها افتكر انها حرام
وانك رغم تعلقك بيها هتسيبها عشان ربنا
ومن ترك شيئا لله عوضه الله حرمانه

وان شاء الله تحقق كل اللى بتتمناه ويكون عام خير علينا جميعا

وداد يقول...

كل سنة وانت طيب يا اسامة

ويارب دايما فرحان بحياتك وناسي آلامك

انت انسان طيب جدا وربنا هيعوضك بالزوجة الصالحة

ربنا يحقق لك كل إللي تتمناه

لأنك بجد شخصية نادرة وقليل لما بشوف حد بصفاتك

ربنا يكرمك وتكون السنة دي وكل السنين إللي جايه اجمل واحلى سنين عمرك

eng_semsem يقول...

موناليزا
ربنا يسعدك كمان وكمان لحد ما تزهقي من السعاده تفرحي بقى شويه
وجودي او عدم وجودي لا بيقدم ولا ياخر في المشاكل بس كان عبء نفسي ليا ولغيري من اهلي اللي كانت كل كلمه بحساب عشان اسامه مايزعلش فكان لازم ارتاح واحاول اريحهم شويه اما وجودي هناك مكنش هيقدم شئ انا نفسي مش عارف ان كان هما عرفوا انا بره مصر او لا بس مش فارقه وربنا يعني وابطل السجاير خالص
وشكرا على تواجدك الدائم معايا

eng_semsem يقول...

وداد
كل سنه وانت طيبه وفرحانه ومبسوطه وبعدين براحه عليا شويه في الكلام ممكن اتغر في نفسي ومحدش ببعد كده هيعرف يكلمني
ربنا يجعل سنتنا وكل السنين اللي جايه فرح وسرور وسعاده ونكون بعيدين عن الحزن والهم والتعاسه
كل عام وانت بخير

lossy❤❤ يقول...

ان شاء الله تكون سنة خير عليكـ

وتحقق جميع ما تريد,,,

فقط لا تتخلى عن ما نويت مهما كانت الظروف
فقد احببت نغمة التفاؤل في حروفكـ


مودتي

re7ab.sale7 يقول...

ابو ملك
كل سنة وانت طيب وعام جديد سعيد عليك
احنا كلنا فرحانين بجد عشانك وانك قدرت تقوم تاني من وقعتك وربنا اكرمك اكيد عشان انت انسان كريم وتستحق الخير ...
انا كمان مشتاقة احضر لقاء تاني من لقاءات المدونين اشوف الناس اللي شفتهم قبل كدة واشوف لاللي مشفتهومش...وان شاء الله تكون انت موجود....
حلوة صورة ملك دي كل مرةاقول هقولك وانسي
ربنا يخليهالك وتبقي ف حضنك
وان شاء الله تلاقي زوجة صالحة وتتق الله فيك...وتيجو تتغدوا سمك عندي ....هههه
اما بالنسبة للواجب فالحمد لله بيتهيء لي اني عملاه اول واحدة ....شطورةو انا خالص
ربنا يكرمك يا ابو ملك بكل الخير وعام جديد سعيد عليك وعلي الاسرة كلها

eng_semsem يقول...

loosy
انت فين من زمان اتاخرتي عليا كتير على العموم كل سنه وانت طيبه وربنا يوفقك ويكرمك في العام الجديد وشكرا على كلماتك

حلم يقول...

سعيدة لتواجدي هنا وانت تشاركنا احلامك لسنة 2011 وان كنت لا اتفق معك في موضوع الطلاق انما اتمنى فعلا ان تعود لبلدك وان تنعم بكل الهدوء والطمأنينة والنجاح
وكل عام وانت بالف الف خير

eng_semsem يقول...

rehab
متشكرين لكلامك اللي زي العسل ويفتح النفس للحياه انا نفسي احضر تجمع واشوفكم كلكم بجد جدا والصوره حلوه عشان العيون اللي شايفاها حلوه ويارب اعرف اخليكي تشوفيها على الحقيقه وربنا يسهل في حكاية الزوجه الصالحه انا نفسي بس لسه ما فكرتش في بداية اختياري هبدا منين لانه غالبا هيبقى لما ارجع مصر ابدا
وبعدين انت شطوره وبتحلي الواجب اول واحده برافو عليكي
كل سنه وانت طيبه

أم هريرة (lolocat) يقول...

السلام عليكم ورحمة الله

كل سنة وكل مصر
وكل الناس فى كل العالم بخير
يارب يزيل الهم
ويفرج الكرب للجميع

ويحقق لنا كلنا احلامنا ان شاء الله

جزاك الله خيرا اخى
وبارك فيك
تحياتى لك
دمت بخير حال

افروديت يقول...

جميل اوي يااسامة أنك عملت بلان لنفسك

والأجمل التفاؤل اللي مغلف بيه كلام منطوي علي جرح

برافوأنك مسافرأحيانآالغربة بتكون دوا لجروح كتير

بس مش صح أبدآتفكرفي الأرتباط وأنت لسه بتعاني علي فكرة لما أتكلمت عن الروابط الأجتماعية والحفاظ عليهانسيت اسم"ملك" دي روابط أساسية وأن أبي الجميع ..أوك ..

محمد ملوك يقول...

هي الدنيا بلا أحلام وبلا آ؟مال ماذا تساوي
لا شيئ
الحمد لله على كل النعم
متمنياتي لك بعمر يبتلى بطاعة الله
تحيتي ومودتي

eng_semsem يقول...

حلم
كل سنه وانت طيبه في موضوع قبل ما اكتب البوست ده اسمه حكايتي مع الايام هتلاقيه عباره عن 15 بوست لو دخلتي هتعرفي انه الاختيار الصح
وربنا يجعلها سنه سعيده علينا وعلى الكل

eng_semsem يقول...

افروديت
انا برسم بلان عريض وهحاسب نفسي اخر السنه ويارب اكون حققته كله والتفاؤل هي وسيلتي عشان اتقدم وجرحي انا دفنته معاكم وبايديكم وانا لسه بره مصر ومش هرتبط الا لما ارجع لسه بدري انا ممكن بس الاقيه والخطوات بعدين وهو التدوير عليها سهل ولا ايه
اما حكاية الروابط الاجتماعيه وما جبتش سيرةملك لو رجعتي كل احلامي هتلاقيها ممكنه اما حلم اني اشوف بنتي مستحيل غير بمعجزه من عند ربنا وياريت بس انا اتعودت احلم على قدي عشان افرح لما احقق حلمي ولو حلمت حلم صعب اني احققه يبقى بتعب نفسي
كل سنه وانت طيبه

eng_semsem يقول...

ام هريره
وعليكم السلام ورحمة الله وبركاته
يارب كل مسلم على الارض يكون بخير وسعاده
ونحس بالامان والحنان لوطنا صدقيني انا بحب مصر على قد ما انا مش مشتاق للرجوع ليها
كل عام والاسلام والمسلمين بخير

eng_semsem يقول...

محمد ملوك
اهلا بيك في زيارتك الاولى ونورتيني ويارب تكون سنه سعيده على الكل ونحقق كل امانينا

الاحلام يقول...

كل سنه وانت بكل خير الحمد لله على قضاء العام وانت بخير واتمنى ان تكون دائما سعيد املين من الله حسن الخاتمه تشرفت بدخولى مدونتك ارجو ان تتقبل مرورى مع وعد منك بزيارتك مدونتى المتواضعه ويهمنى رايك تقبل تحياتى الاحــــــــــــــــلام

dr simooooooooooooooooooo يقول...

اولا بقولك كل سنة وانت طيب ياسامة ولكل زائرين مدونتك مش انت بس طبعا هى متاخرة شوية بس مكنتش فاضى ثاتيا اتمنى ليا وللمسلمين الصحة والستر لانهما نعمتان مغبون فيهما كثير من الناس ثالثا يارب اجعل مصر بلد امن وامان وبعد عنها الاعادى

eng_semsem يقول...

الاحلام
اهلابيك في زيارتك الاولى ونتمنى تكرارها وهتحصل الزياره ليك بس اروح الاول اشتري حبة فاكهه ما ينفعش اجي وايدي فاضيه
كل عام وانت بخير

eng_semsem يقول...

دكتور هيثم
كل سنه وانت طيب وبالصحه والسلام ومتنهي مع عيلتك وبنتك اللي زي السكره وربنا يحفظ مصر من كل سوء

sweet angel يقول...

انا تابعت كل الي فات

ههههههههه وبصراحه انا مش اتخنقت بس اعصابي تعبت

ربنا يجعل السنه الجديده جميله عليك وسعيده في كل شئ

eng_semsem يقول...

sweet angle
ربنا يعافيكي من اي حزن وخنقه ويارب تكون سنه سعيده علينا كلنا
واهلابيكي ونورتيني

جايدا العزيزي يقول...

اسامه

احلام بسيطه وجميله

ربنا يحقق كل احلامك

وكل عام وانت بخير اخى

تحياتى

eng_semsem يقول...

جايدا العزيزي
عذرك الوحيد على التاخير انك كنت مع اللي مش ممكن تتاخري عليهم ربنا يبارك ليكي فيهم وفي زوجك ويسعدك انت والاسره الكريمه