السبت، 4 ديسمبر، 2010

حكايتي مع الايام (6)

تراكمت الاحداث مع مرور الايام  وقبل بداية رمضان بيومين تقريبا 30/8/2008 رجعت من شغلي وغيرت لبسي وقاعد في الصالون بقلب في قنوات التلفزيون وكانت هي تحضر طعام الغداء  وقامت برص الاطباق  على ترابزة الصالون وقطعت الصمت بكلامها
احنا هنقعد نتفرج على الاكل
انا ماسمعتش او تقدروا تقولوا عملت مش سامع وسالتها احول في حاجه تانيه عايزه تشوفيها ردت عليا 
لا انا بقول هنقعد نتفرج على الاكل كتير
رديت وانا بحاول ما اخرجش عن نفسي طيب وفيه ايه لو قلتي ماتيجي يلا ناكل او الاكل جهز يا حبيبي كان ردها صدمني شويه وقالت  
هو انت ضيف عشان اعزم عليك
رديت لا ضيف ولا تعزمي ودخلت على غرفة النوم مددت على السرير دخلت ورايا انت في حاجه مزعلك في الشغل
قلت لا عادي ماشيه الامور
امال في ايه؟
انت سددتي نفسي ايه هنتفرج على الاكل ده ما تقولي اي حاجه عادي تعالى كل الاكل جهز اي حاجه كلامك كله كده ليه؟
يعني هو انا لازم اعزم عليك واقلك تعالى كل يا حبيبي ايه نظام سي السيد ده
وقامت على الغرفه التانيه ولحد كده عادي كان ده الطبيعي بتاعها وخلاص نايم على السرير وبقول لنفسي ايه في ايه هي بتتعامل معاك كده ليه ايه السبب انا مقصر معاها في ايه وبعد حوالي عشر دقايق لاقيت تليفوني بيرن ابويا يا سلام انا فعلا محتاجك الكلام معاك بيريحني لاقيت بيقولي ازيك عامل ايه انت مزعل مراتك ليه قلتله مفيش حاجه ماشيه الامور قلي ازاي يا بني ده اتصلت بامها وامها اتصلت وتقول انها بتعيط وانت منكد عليها انا انكد عليها ده هي تنكد على بلد بس عادي مفيش حاجه وخلصت كلام وسالت نفسي طيب هي اشتكيت قالت ايه مرضيش ياكل ولا بيقولي قولي تعالى ناكل بدل نتفرج على الاكل مش فاهم اعمل ايه قمت وكلمتها قومي يا بنتي نتكلم نفهم في ايه
طبعا كالعاده بكلم نفسي طيب انا هعمل شاي لحد ماتفوقي ونتكلم عملت وشربت مفيش دخلت ليها بقى قومي بقى شويه نتكلم انا عايز افهمك انت عايزه ايه وايه اللي مزعلك دلوقتي 
لا مش هقوم ولا هتكلم
كنت انا خلاص جبت اخري ومعدش في جوايا اي صبر وخلاص زهقت شدتها من ايديها قومي واخدتها على المطبخ رشيت وشها بميه وقلتلها فوقي واتكلمي زي ما بكلمك انت عايزه ايه بالظبط ولا حياة لمن تنادي صدقوني لحد دلوقتي انا مش عارف انا كان ممكن اعمل معاها ايه لاني كنت غلبت وتعبت ومش فاهم ليها طريقه للتعايش معاها وطبعا اتصلت تاني وعيطت وعلى اثرها والدي ووالدتي جم عندنا في نفس اليوم بليل من كفرالشيخ والدي اخدني على البلكونه وسالني انا عمري ما سالتك قبل كده في ايه بس متهيالي ده وقت الكلام حكيت ليه اللي حصل وطبعا كالعاده غلبني بالكلام لا ماينفعش سبها خالص ماتتكلمش معاها احسن لحد ما تطلع من زهقك وبعدين حاول وكل اللي حصل زمان انت ما حكيتش ليه وتشيل جواك حسيت انه بيضحك عليا عشان استحمل بس ضحك فعلا عليا واقتنعت وكانت والدتي الناحيه التانيه قاعده معاها بتسالها في ايه بس اللي اعرفه ان والدتي بعدها لا قالت ليا اعمل ولا ما تعملش غير انها قالت ليا اصبر شويه هي شكلها عقلها صغير استحمل عشان تعيش يعني مقلتش حاجه على موضوع معين وخلاص الامور هديت ورجعت المياه لمجاريها وقعدنا واتعشينا والامور كلها اتحلت وعادي تاني يوم رجعت من الشغل لاقيتها بتقلي
بابا جي النهارده وهو عرف اللي حصل وماما حاولت تمنعه بس هو صمم لازم يجي قلتلها ينور وايه المشكله وحلفتني اني استحمله عشان هو ممكن يقول ليها تعالي معايا على البيت واوعى يا اسامه تسيبوه يخدني طبعا انا كنت في منتهى السعاده وانا بسمع الكلام ده وكنت مستعد اني استحمل اي حاجه عشان خاطرها بس كانت المفاجاه انه لا يحتمل ولا يتنسي وصل ابوها قعدنا في نفس المكان في البلكونه وعمل اللي عمري ما تخيلت انه يحصل حتى انا مكسوف اكتبه لانه كان كبير وهكتفي بالكلام اللي بعده اني هوديك ورا الشمس وهعمل واسوي واناسكت حسيت اني خايف بس على بيتي ومراتي ولاقيت نفسي بتعامل مع عقليه بعيده كل البعد عن اي عقل وقعد معانا واتسحر ومشي الفجر وبعد الفجر قعدت معاها وقلت ليها لو اللي عمله ابوكي ده هحطه مابيني وبينك يبقى ملناش عيشه مع بعضنا وانا سكت واستحملت علشانك وعلشان يميني اللي حلفته قبل ماهو يجي البيت ولحد كده وقصة ابوكي عندي انتهت لا كلام لاسلام ولاتجيبي سرته قدامي ودوست على نفسي علشان اعدي واعيش وهي ده كانت كل امنيتي في حياتي اني اعيش..............  

هناك 36 تعليقًا:

غير معرف يقول...

بصراحة يابشمهندس هى زودتها شوية بس طلعت جدعة فى انها قالتلك متسبنيش ياسامة اروح معاة اول حاجة كويسة تظهر منها بس هى ممكن تكون متاثرة بابوها الى عقليتة صغيرة ومش فاهم حاجة واى بنت طبعا ابوها بالدنيا فالجزء دة طبعا اقدر اقولك انت ممكن تكون مقددرتش تنزل لعقليتها وبما ان رب البيت بالدف ضارب فشيمة اهل البيت ال..... وبعدين دة راجل فما بالك دى بنت وناقصة عقل ودين الكتور الصيدلى هيثم جمال

سواح في ملك الله- يقول...

التنازل الاول خاصة لو انت مش غلطان بيجرر تنازلات كتير

شهر زاد يقول...

تعرف والله مش انت لوحدك الي عايش الحال دا
داا معظم جيزات المجتمع العربي كده
علشان بيتعملو مع الزواج على انو نهاية ومش بدايه
نهاية الحب
نهاية الكلمة الطيبة
نهاية الحضن
نهاية الحنان
نهاية كل حاجه جميلة
الله يعينك ويعنها
تحياتي

eng_semsem يقول...

اخي دكتور هيثم وانا قدرت اللي هي عملته واستحملت عشان كده

eng_semsem يقول...

اخي سواح في ملك الله انت عندك حق بس كان لازم لما حسيت انها بتعمل حاجه صح لازم اقف جنبها مش اخرب الدنيا وكنت مش عايز ادمر حياتي

eng_semsem يقول...

وانا كنت بعتبر ان الزواج بداية بحاول ابدا بيها حياتي واحاول اقرب منها واحاول افتح مجال للحوار وللحياه كنت مستني بدايه للكلام ده لاني مااعرفوش ولا شفته قبل كده

الحب الجميل يقول...

راى مع رأى سواح فى ملك الله
التنازل الاول بيجر تنازلات

اولا انت مش غلطان عشان تتهان وتتبهدل بكلام لا يليق ولا يتقال لك اصلا
وانت عملت فيها ايه ؟؟؟
لكل دا
عشان قومتها وشدتها من دراعها ورشيت على وشها ميه ؟؟
يا سلام
ما بيحصل اكتر من كدا معانا ومنجريش على اهلينا

لالالا دى حاجه مدلعه خالص

امال لو كنت مسكتها ورزعتها كانت عملت فيك ايه بس؟؟
سبحانه الله
الوحد بيستعجب

ولما هى مش عايزة تروح مع والدها ؟؟
ليه بتحكيى له وتفضح الدنيا من اساسه

ما تشوف غلطها الاول وتصلح من نفسها


الا اذا انت كنت افتعلت شىء او قولت كلمة ضيقتها وصلتها لحد الاتصال بأهالها

والصراحه انت طلعت عاقل وقدرت تتماسك ادام كلام باباها
لو حد غيرك كان البيت اتخرب فى ساعتها

ــــــــــــــــــــ
حكايتك 5 واللى معلقتش عليها

راى كاست
الشغل مش عيب ولا حرام للست لكن لو مقدرتش توفق بين الشغل والبيت يبقه على الفور لازم تضحى بشغلها عشان خاطر بيتها وزوجها واولادها طبعا

متابع

eng_semsem يقول...

الحب الجميل انا رديت على اخويا سواح على نقطته وانا كنت قدام حل من اتنين ياما اكبر المشكله ومع العقليه اللي انا شوفتها هتبقى النتيجه ان البيت هيدمر والتاني الحل اللي انا شوفته صح في الوقت ده ويمكن تفهم ماتحكيش كل صغيره وكبيره لانه ممكن يخرب عليها البيت وكان هدفي ان الحياه تستمر وكنت بفكر للطريقه للوصول لكده
شكرا على متابعتي

Tears يقول...

ايه ده هو ابوها من الجماعه اللى كتبت عنهم فى بوست المتضخمين؟
http://tears-demo3.blogspot.com/2010/11/blog-post_21.html

أبو العريف يقول...

اوس اوس حبيبي

هو سؤال صغير الاول

هو انت مبتتعشاش معانا ليه

الغريب يا اخي اني ف الاوضه اللي جمبك بقالي سنه

و اول ما اعرف حكايتك اعرفها من المدونه

بس تصدق اني اقراها احسن

انا بشوف في كلامك وف اسلوبك
كل تعبيرات وشك اللي بيتهيألي صعب اشوفها ف الحقيقه

اقصد مش حابب اشوف بعضها يعني

اسلوبك ممتع وشيق

مع انك زملكاوي

قوم بقي اتعشي يا ريس

واعملي معاك كوباية شاي

بس مش عالريحه هع هع هع

غير معرف يقول...

ما وظيفة لطيفة. أنا حقا أحب قراءة هذه الأنواع أو المقالات. هل يمكنني ذلك؟ تي ان ننتظر لنرى ما يقول البعض الآخر.

افروديت يقول...

موقف حلو منهاوأنت قدرته ...

منتظره باقي قصتك

eng_semsem يقول...

tears تقريبا بالظبط انا قريت موضوعيك بس هو ممكن معاه فلوس بس مفيش سلطه يعني ما يتخافش منه قوي وما تقلقيش اتضح بعد كده انه على مفيش

الغاردينيا يقول...

لا حول ولا قوة إلا بالله
بالاول انا معاك انو كان ممكن تقولك
اتفضل عالاكل باسلوب جميل
وبرضه انا مش معك في مساله انك تاخذها عالمطبخ وترش في وجهها ميه لكن اقدر الغضب اللى ممكن الانسان يصل له
وبصراحه مافي اسوا من ان الاهل يتدخلوا في مسائل الزوجين بجد بجد
صحيح انا مش مخطوبة ولا متزوجة لكيني مؤمنه جدا ان تدخل الاهل دائما مش في صالح اى زوجين ...
حسبت بجد بمقدار المك وخصوص في موقف ابوها معاك مش عارفه يمكن يكون مد يده وضربك اتوقعها اى كان معلش اخي
معلش .. ولا يهمك الله كريم ومانطلع من الدنيا الا متوافيين :)
تحية عطره

eng_semsem يقول...

اولا يا ابو العريف انا بتعشى بس متاخر شويه عشان لسه الغدا مش بيقبى اتهضم وبعدين انا مش بخبي عليك بس هي الظروف كده ودايما بحاول اداري بضحكتي دمعتي وشكرا على الكلام الجميل وانا زملكاوي وافتخر

وداد يقول...

ربنا يهديها بجد

وتصرف منك كويس جدا فيه عقلانية

قليل لما نشوفها بالرجاله

بس اهم شئ تكون اتعلمت فعلا انها مش كل حاجة تكلم اهلها

ولغة الجوار لازم تكون بينكم اكتر من كده

بإنتظار البوست القادم

لعله خير

eng_semsem يقول...

افروديت شكرا على متابعتك

eng_semsem يقول...

الغاردينيا بصي انا بعترف اني فلتت اعصابي بس غصب عني زهقت لان مكنش في موضوع ليه كل القلق ده في حياتي وليه تدخل الناس في حكايات تافهه المفروض هي تحلها بنفسها مش تعقدها

eng_semsem يقول...

اختى وداد شكرا على المتابعه وده كانت امنيتي ان يبقى في درس اتعلمناه وازاي نقدر نعيش

أم هريرة (lolocat) يقول...

السلام عليكم ورحمة الله

متابعة لقصتك وحكايتك باستمرار لكن انتظر الخاتمة للتعليق الجاد عليها

اسأل الله لك هدوء الحال والبال

دمت بخير اخى الكريم

karmen يقول...

لا زلت عند رأي اهم الحاجة التفاهم بين الزوجين من قبل الجواز مايمكن ده اللي كان بيحصل في بيتهم ومقتنعة تماما انه الصح اي حد بيتولد وبيشوف اهله بيتصرفو بشكل معين صعب جدا تلغي المفاهيم دي
من قبل الجواز لازم يقعد معاها يابنت الناس انا كذا وكذا وعاوز حياتي تمشي بقواعد كذا وكذا ويتعاهدو علي كده هو احنا بنلعب ولا بنتجوز وده اقوي رباط وعلاقة ربنا سبحانه وتعالي شرعهالنا
بجد في خلل من الاول وهو الجواز عمياني كده من غير تخطيط وعهود ووعود وماحدش يقول ده المفروض من غير كلام ماينفعش لازم يقعدو يخططو لحياتهم دي ويشفوها هتستمر ازاي
في الاخر ربنا يهدي الجميع وقربو شوية من ربنا سبحانه وتعالي لعله يهديلكو الحال
تقبل مروري

eng_semsem يقول...

ام هريره
اشكرك على المتابعه وفي انتظار تعليقك عندما تجدي ان وقته قد حان وعندما تريدين ان تكتبي فانت لا تحتاجي الى استئذان

eng_semsem يقول...

اختي كارمن
كان في كلام قبل الزواج وحاولت كتير بعد الزواج ونفس الكلام اللي اتخانقنا فيه كان بيتكرر بنفس الاسلوب يعني المشكله مش مشكلة كلام زي انا قلتلك وانت ما سمعتش اتكررت مرتين والشنطه اتكررت كتير ولسه في واحده كمان وبالنسبه للعباده والتقرب لربنا انتظري الجزء القادم لاني فعلا اخدت بالنصيحه ده من قبل انت ما تقوليها
شكرا على متابعتي

dodo يقول...

السلام عليكم ازيك يااسامه يارب تكون بخير
انا مش هعلق تانى غير فى نهاية القصه وسورى على تعليقى اللى فات

Dr/ walaa salah يقول...

بصراحه يا اسامه حاجه غريبه

زعل مراتك كتير اوي وغير مقبول

وفي نفس الوقت لما قالت ليك متسيبش بابا ياخدني دليل على انها بتحبك

يبقى اكيد في سبب للي بتعمله

سؤالي بس ليك

انت ليه متقعدش معاها بس مش في وقت زعل

لا في وقت تكونوا رايقين قعده رومانسيه ومفيش مانع تجيبلها هديه وتسألها هى ليه بتعمل كده

مش يمكن تكون عرفت حاجه عنك زعلتها
او حد يكون قالها حاجه وحشه عنك عشان يوقع بينكم

اصل مفيش واحده غاويه تخرب على بيتها يا اسامه كده وانتوا لسه تعتبروا عرسان


اما بالنسبه لباباها كتر خيرك انك استحملته بس للحق ان اي اب مبيحبش يشوف بنته زعلانه

المشكله بس انه اتصرف بطريقه غبيه


على العموم انا في انتظار الباقي

eng_semsem يقول...

dr/walaaانا فعلا فكرت في حوار الهديه وجبت ليها يوم عيد ميلادها كان في اول تسعه حاجه تلبسها في البيت واخده بالك ععشان سالتني يعني ايه ليلة البيبي دول وفكرت اجيبه ليها عشان تعرفه
لبسته يوم 25/9 متهيالك افكر في ايه تاني وانا قلت كذا مره اسلوب الحوار بتاعها كان قفل كلام يعني مش عارف اتكلم معاها وهيبان الجزء القادم

re7ab.sale7 يقول...

لاء ......
بجد انا معرفش استحملت اكمل اللي انت كتبته ده كله ازاي ....بجد انا مش عارفة ...يا صبرك يا اخي...
بس بجد انت اللي غلطان من الاول منوجهه نظري لان الزواج في الاساس تفاهم وفترة الخطوبة معملوة عشان تشوف التتوافق ده....لو مش حابب تنشر كلامي عادي هتفهم ده ...بس انت بجد غلطان جدا وكمان انك صبرت علي كل ده كان لازم يكون لك موقف عشان تستمر حياتك بهدوء نسبي علي الاقل ....كنت لسة بقول لصديقة لي زوجها فعل شيء فظيع فعلا ...انها لازم تاخد موقف خصوصا انها مش المرة الاولي يا اما هتاخد علي دماغها دايما....يا رب تكون فهمتني ....انا علي فكرة قريت اللي فات كله بس معلقتش عشان كنت متغاظة بجد منه

eng_semsem يقول...

rehab
اولا انا بعاتبك على الغيبه الطويله ده ثانيا انت نورتيني ورايك حق وواجب عليا لازم انشره والا كنت ما كتبتش الموضوع لو هحذف راي حد كان في اتفاقات قبل الجواز انما بعده اتغيرت وبعد الجواز كنت بحاول اتكلم عشان نفهم بعض بس كان ردها بيقفل الكلام وده هيبان الجزء اللي جي عشان كله بيسال انتم ما بتكلموش مع بعض ليه وشكرا على وجودك

مدونة الأمل يقول...

السلام عليكم و رحمة الله و بركاته

أتمنى أن تقبلوني ضيف خفيف في مدونتكم

تقبلو سلامي و تحياتي و مروري اخواني الأعزاء

eng_semsem يقول...

مدونة الامل
اهلا بيك زائر وضيف وصاحب بيت كمان والباب ينفتح عشانك بس اقفله وراك

جايدا العزيزي يقول...

اسامه

كل فصل من المزكرات بيخلينى

احترمك واعرف انك انسان نبيل

حقيقى فيك صفاتكتير كويسه اخى

وساظل اتابع وانتظر

ربنا يوفقك يارب

وكل عام وانت بخير

تحياتى

eng_semsem يقول...

اختي جايدا
كلامك الجميل وسام اضعه على صدري وخصوصا انه طالع من شخصك الكريم الكبير في نظري
وشكرا على متابعتي

همسات وبحــ الحياه ــر يقول...

كل عام وانتم الي الله اقرب هذا عام جديد وعلى عملك شهيد فبادر بالسعى والتجديد .......اللهم اجعله عاااام يعز فيه الاسلام والمسلمييييييين ......ولا تنسوا احب الصيام الي الله بعد رمضان صيام شهر محرم ولا تنسونا من صالح دعائكم اللهم احسن خاتمنتنا

بعتذر عن تقصيرى معاكم

زهرة(جنى)الاسلام يقول...

السلام عليكم
اخى على فكرة انا متابعة القصة جدا
بس مبكتبش تعليق
لا زعل منى
اكيد فى شئ فى طباع حضرتك وفى طباعها انتوا اللتنين مش قادرين تفهموا بعض بسببها

eng_semsem يقول...

همسات وبحر الحياه
كل سنه وانت طيبه وكل المسلمين في عز ورخاء

eng_semsem يقول...

اختى زهرة جني الاسلام
مفيش زعل ان شاء الله
وبالنسبه للطباع انا بناقشها معاكم عشان اعدل من اسلوبي ومن طرقتي لو في طريقه