الخميس، 28 أكتوبر 2010

اعتذار

اعذروني يا جماعه وانا حقيقي اسف لاني هحاول اسمع كلام ناس كتير قالتلي انت ليه بتتكلم في السياسه مع اني كنت فاكر اني مليش دعوه بالسياسه فخلاص انا اخدت قرار اخير اني هبعد عن السياسه.
لو في يوم لاقيت رئيس عربي محبوس في بيته مش هتكلم ولا هقول ازاي وليه ولو الرئيس علقوه على المشنقه مش هنطق واقول كرامه او حرام عشان خلاص هعتزل السياسه.
يحاصروا غزه ياخدوا فلسطين مش هتفرق يقتلوا الاطفال هو ده العادي ويحتلوا العراق ويقتلوا الرجاله والستات في افغانستان وباكستان اصلهم بيقولوا عليهم ارهابيين مش هنطق هكون حجر صوان.
ولو في يوم سمعت ان في انتخابات رياسه مش هروح انتخب لان حكومتنا الرشيده هتقوم بالدور ده عني ملهاش لازمه اضايق الناس بوجودي وهما عارفين اختياري  صحيح هيختاروا الاختيار التاني بس اكيد هما عارفين مصلحتي اكتر مني.
ولو انتخابات مجلس الشعب بدات ياريت مفيش حد يبلغني  عشان ما تحرجوش نفسكم معايا لاني خلاص مليش حق الاختيار في بلادي.
اما لو الغاز راح لاسرائيل بارخص الاسعار ده مشاكل كبيره ما يعرفهاش غير عالم الاسرار اما انا هسكت وادور على حد يسلفني انبوبه وربنا يستر وما اطمعش في الغاز لوحدي يمكن حد يحتاجه بعدي.
اما الطماطم فمن زمان بيقولو عليها مجنونه وانا مليش في شغل الجنان وبعدين هي حمرا(قصدي على الطماطم طبعا) وانا زملكاوي ومش بحب اللون الاحمر لانه لون الدم  للي نزفوها رجالك يا مصر في اكتوبر وقبلها بسنين وناس خانتهم وباعت الغاز لاعدائهم ومش اللون الاحمر بس كمان الحليب لو غلي سعره مش هشربه لان خلاص مفيش حاجه بيضه في البلد كله اتلوث والبركه في المبيدات المسرطنه اللي ربنا اكرمهم وجابوها من اسرائيل.
حتى منتخبك يابلدي فضحنا مع النيجر وسيراليون حتى اللعب مش نافعين فيه طيب نعمل ايه وعايشين ليه وبنخطط بقالنا سنين عشان نوصل للفشل ومش جديد علينا الصفر اللي بنحاول نحافظ عليه يا خوفي يضيع منا هو كمان ويا ترى ساعتها هنساوي كام.
اعذروني يا جماعه خلاص مش هتكلم تاني في السياسه ولا اي حاجه تتعلق بالسياسه حتى عربيتي هركنها بره الجراج لاني حاسس انا سايس الجراج ليه علاقه وثيقه بالسياسه .
اعذروني يا جماعه لو طولت عليكم واوعدكم اني ناوي اطبق اللي قولته اول ما نفسي يروح وممكن بعد خروج الروح البلد بلدي وليا حق فيها وعليا حق ليها وانا مش هسيب حقي ومش هفرط في حق بلدي

السبت، 23 أكتوبر 2010

صدام حسين

قررت انسى موال الانتخابات وكان اللي فكرني بيها ميعادها اللي قرب وكنت بفتكر اللي حصل السنين اللي فاتت عشان خايف انه يتكرر تاني .
ورجعت بيا الايام واحنا قاعدين بنحتفل مع العجل بليلة العيد ومتجمعين ورحنا الصبح صلينا العيد وراجعين ندور على الجزار عشان يجي وندبح العجل وناكل اللحمه عشان نخرج ونتفسح ويدوب رجعنا من الصلاه ولاقينا التلفزيون جايب لينا اعدام صدام معقول اكيد في حاجه غلط ازاي يعدموا صدام في يوم العيد لا مش صدفه اكيد ليها معنى كبير. 
كان موت صدام رساله بس مش لينا المره ده كانت للملوك والرؤساء العرب كانت رسالة تحذير اي واحد هيفكر يكبر علينا هيكون اضحيه واي رئيس هيفتكر انه ممكن يتكلم ويقول اللي احنا مش عاوزينه هيحصله اللي حصل لاخوكم .
ويا سلام على اختيار التوقيت واكيد كان بعد تخطيط  وكأنهم بيقولوا انتم يا مسلمين بتذبحوا الحيوان واحنا يوم ما هنضحى هنضحى بانسان عربي  ومش اي واحد لازم يكون ملك او سلطان .
والغريب ان التصريحات بعد كده جت جبانه وكانهم بيقولوا خلاص وصل كلامكم واحنا اسفين لو ضايقناكم ومش هنعمل زي صدام وهنعمل اللي انتم عايزينه ومش هنخالف الاوامر.
انا مش هحاسب صدام ولا هقول هو كان طيب او كويس او وحش بس هو زي غيره على الاقل يا ترى في كام رئيس يستهلوا الموته ده وهنبقى فرحانين بس ياريت ما يبقاش بايدي الامريكان .

الثلاثاء، 19 أكتوبر 2010

الانتخابات 2005

رجعت من اول الطريق من تاني وقلت لنفسي الحياه مش طريق مسدود ممكن تتغير بايدينا وجت انتخابات 2005 مجلس الشعب وقبلها كانت كل محطات التلفزيون شغاله صوتك امانه يا مواطن لازم نسمعه 
رجال الحزب الوطني كلها بتتكلم لازم المواطن وده حقه صوته امانه وبيه هتتغير مصر حتى الشيخ طنطاوي جه في حديث الروح وقال صوتك امانه يا مصري والساكت عن الحق شيطان اخرص.
انا قلت خلاص الدنيا اتغيرت قلت اجرب حظي المره ده واكيد مش هخسر كتير رحت ادور على البطاقه الانتخابيه معرفتش اجيبها وقالوا خلاص ده وقت انتخابات وكان ليا واحد صاحبي عمه مرشح الحزب الوطني جاب ليا كارت عليه صورته وفي ظهر الكارت لاقيت اسمي ورقم اللجنه ورقم كمان قلتله كده تمام.
نزلت الصبح بدري وقلت شكلها هتبقى زحمه الحق بدري بدري رحت لاقيت الدنيا هاديه استغربت وخفت ادخل سالت قالوا ليا ادخل وكان في ظابط على الباب سالني فين بطاقتك؟؟ طلعت بطاقتي قالي يا سلام بطاقتك الانتخابيه يا حبيبي؟؟
عملت اهبل ومش فاهم وطلعت الكارت 
راح قايل ليا طيب ما كان من الاول ايوه انا عايزها عشان مصلحتك بعد كده ابقى طلع بطاقتك الانتخابيه الكارت ده هنمشيه المره ديه ولجنتك فوق هناك
قلت يا سلام هي ده مصر يا جدعان الراجل خايف اني لما ادخل ممكن ما تكونش لجنتي وممكن اتوه معرفش فين اسمي بس عرفت اني لسه في مصر على طووول جه ورايا واحد ومربي ذقنه وساله نفس السؤال طلع كارت تاني لمرشح تاني قال ليه الظابط ما ينفعش ده انتخابات مش داخل طابور عيش وطرده بعيد عن اللجنه المهم دخلت وانتخبت وبصراحه مفيش حد قال ليا اعمل او ما تعمليش انا اخترت اللي انا عايزه ورجعت على البيت وانا فرحان اخيرا عملت حاجه في البلد ده وفتحت نشرة الاخبار وكنت مستني يجيب صورتي ويعلقوا على حالة الانشكاح اللي كنت فيها لكن للاسف جت حاجه تانيه خالص لاقيت ضرب نار وخناقات ومدارس محاطه بالقوات ممنوع الدخول يا حضرات وسالوا قاضي رد عليهم قال انا وظيفتي ان اللي يجي اللجنه ينتخب بدون تهديد ويختار اللي هو عاوزه
سالوه انت ما سالتش نفسك مفيش حد دخل ليه والدنيا زحمه تحت
ده مش نطاق مسئولياتي  
وكانت نتيجة الانتخابات اكتر من مائتين مصاب و150 حالة تحرش وقليل من حالات الاغماءات نتيجة ضرب المخبرين لبعض المواطنين وتم القبض على خمسين عضو من الجماعه المحظوره وبعد التزويرات الصغيره من اجل ظبط الاداء
انا اقتنعت خلاص ومش هتكلم في الموضوع ده تاني طول حياتي وياريت نريح الحكومه ونطالب بالغاء الانتخابات خالص والحكومه تعين اللي هي عايزاه عشان نحافظ على اخواتنا في الشارع ونعيش وخلاص..
صحيح هو يا ترى الشيخ ليه ماقلش اللي يكتم صوتنا ويمنعنا يبقى حكم الدين فيه ايه؟؟؟     

الخميس، 14 أكتوبر 2010

الانتخابات

انا سمعت كلام اصحابي اللي قعدوا يقولوا ليا اخرج ما تخافش وجه ابويا ليا وقال ليا: يا ابني اسمعني الدنيا ده فيها كتير وزي ما فيها الشر فيها الخير وزي ما فيها الظلم فيها العدل مش عشان تجربه تخسر حياتك ده تجربه ولسه هتقابل كتير واقلك انا طالع معسكر تبع الشغل بتاعي هنلعب كوره وبنج وفرصه نغير جو.
قلت ماشي اهو حتى نغير وشوش الناس وسافرت معاه قضينا ايام جميله لعب وجري وبنج وشطرنج وبحر وميه وكمان المعسكر  كان في العريش وعادت سينا حره لينا بس احنا ما اتحررناش لسه يا سينا وفي يوم صحينا بدري على صوت البشر حوالينا ايه في ايه حصل ؟
قالوا النهارده انتخابات الرئاسه والكل هنا هيروح اجهزوا بسرعه
ناس ردت وقالت ازاي احنا جايين نغير وقت واحنا مالنا بالحوارات ده وناس قالت طيب واحنا مالنا احنا هنا مش في بلادنا مش المفروض كل واحد ليه لجنه في المحافظه بتاعته فيها صوته واحنا هنا من 12 محافظه
قالوا سكوت مش عايزين نسمع صوت كل فريق يلبس زيه ويطلع كامل واسمائكم معانا وياريت بسرعه عشان ورانا غيركم
هنعمل ايه امر ربنا قوم البس يا ابني وخرجنا كلنا وبصراحه يشكروا وزعوا علينا صور الريس ولوح كبيره تأييد ليه وكل فريق ليه صورتين ولوحه وبعد ما نخلص يرجعهم لينا ده اوامر سعادة البيه ومحدش يكسر اوامره احسن له
خرجنا من المعسكر لقينا ناس ما نعرفهاش نظمت المشيه ومشيت قدامنا تهتف واحنا معاهم وصلنا اللجنه لاقيت عساكر قلت بابا هما دول اول ما شافونا بنهتف ضربونا المره اللي فاتت قلي ما تخفش هو كل الهتاف زي بعضه وجاب ليا صورة الريس وقلي خد الحصانه مفيش حد هيعرف يكلمك من بعدها والغريب ان فعلا فتحوا الابواب كلها وقالوا انتم فين من زمان  وكان ناقص يدخلونا على اكتافهم كان هناك ظابط طلع لينا وقال بصوت مسموع:
يا اخوانا مش عايزين قلق احنا كلنا هنا بنحب الريس فخلاص كفايه هتاف وياريت عشان النظام يجي واحد يمثل كل فريق
طبعا ابويا كان قائد الفريق هو المدير الفني اشرب بقى يا حلو واحنا بنتفرج عليه دخل هوومعاه 12 كمان بعدد الفرق اللي كانوا معانا الظابط ساله بس سؤال 
انتم كام واحد في الفريق؟؟؟
رد عليه اللي انت شايفه يا بيه بهزر معاكم قال ليه احنا 25 وابني معايا يبقوا 26
قال ليه ماشي وكان العسكري جنبه نازل تعليم في الورق وكانوا اختيارين ايوه او نعم وهو شغال ولما خلص قال الظابط لبابا تحب تعد ورانا 
رد ابويا ده كلام يا حضرة الظابط وهو جوه نفسه بيقول اذا كان عرفت احنا هنكتب ايه وكتبت اللي احنا مش عاوزينه من غير ما تسالنا نعد ليه 
وخرج لينا وقال خلاص انا قلتله هنموت  ضحك وقال ليا:
ليه انا خلاص انتخبت لكل الناس اصحابه اتلموا في قلق عشان هما عارفينه ضحك وقال ما تخفوش الظابط اللي كتب.
وانا سالته هي ده الانتخابات انا مش فاهم حاجه ؟؟
رد عليا وقلي الكلمه ده ملهاش وجود عندنا زي الدولارات موجوده بس مش بنستخدمها عندنا في بلادنا الغاليه لاننا عندنا عملات تانيه زي اللي شوفته النهارده.
هعمل ايه يعني رجعت المعسكر وقفلت الباب عليا وحاولت افهم معنى الكلمه ديه واعذروني يا جماعة لو غلطت في كتابة العنوان اصل الكلمه ده غريبه عليا وما اعرفهاش ولسه ما قابلتهاش في حياتي.

 ابي يعمل بمؤسسه حكوميه ليس لها اي علاقه بالجيش وانما تابعه لوزارة الماليه بس هنقول ايه حكم ..... 
 

الأحد، 10 أكتوبر 2010

فلسطين

فتحت بابي وخرجت قلت اشوف الدنيا يعني هيحصل ايه ما في كتير بشر عايشين ماشيين وعادي لبست وقلت انزل جامعتي ودخلت من باب الجامعه حسيت احساس غريب سالت اصحابي في ايه ؟
رد واحد وقلي انت نايم من امتى ؟؟ البلد مقلوبه وانت قافل بابك ويمكن تكون عامل مش واخد بالك انت ما تعرفش ان اسراءيل حبست الرئيس ياسر عرفات ومش عايزاه يخرج من بيته.
قلتله معقول ده انا لو ابويا عمل معايا كده ان كنت ممكن اهد الدنيا يعملوا فيه كده ازاي  هو مش رئيس دوله طيب فين الامم المتحده؟؟؟؟
قلي ده مصر مليانه مظاهرات والدنيا مقلوبه واحنا طالعين النهارده على جامعة القاهره بيقولوا في مظاهره كبيره تيجي معانا ؟
قلت وماله لازم نقف جنب الرئيس العربي وجنب بلادنا اللي بنحلم نزورها فلسطين
وصلنا هناك لاقيت العسكر مالي المكان استغربت قلتله هو العسكر كمان طالع في المظاهره معانا مبصش ليا حتى مش عارف ليه بس عرفت بعد كده لما منعونا نخش قدام الجامعه واتفقنا نتفرق ونحاول ندخل باي طريقه ودخلت واندمجت مع ناس انا ما اعرفهمش بس كلامهم اعرفه وعاجبني وقعدت اقول معاهم بعلو الصوت :
ابو عمار صرح تصريح يا جبل ما يهزك ريح..... ابو عمار قالها ثوره واحنا رجالها....يا ابوعمار لاتهتم راح نفديك بالروح والدم...
يااااااه قد ايه حسيت اني رجعت للدنيا من تاني وفجأه رد علينا الجيش بس رده ماكنش كلام كان قنابل مسيله للدموع وانا دمعي غالي عليا وفتحت سيارات المطافي مياه ملهاش لا اول ولا اخر ايه في ايه مش احنا اللي حبسينه ده اليهود رجعت بعيد عن باب الجامعه لاقيت واحد بيعرج سند عليا قلتله مالك ؟؟
قلي ضربوني العساكر بعصيانهم عشان نطقت قدامهم بكلمة حق .
وصلته لباب بعيد وخرج على البيت وجوه قلبه بيغلي من المصريين اكتر من اليهود ورجعت قلت اشوف حصل ايه لاقيت واحده بتعيط جامد سالتها مالك ؟؟؟
قالتلي مش شايفه حاجه انا شكلي اتعميت وخايفه ما اشوفش الشمس من تاني
ردت في سري (وانا خلاص بكيت) واخدتها دخلتها في قاعة جوه لاقيت واحد نايم على طاوله كبيره ممدد وناس بتجري شوفوا دكتور او طالب في الطب اي حاجه الحقوه ده خلاص مش بيتنفس صرخت جوه نفسي وانا خلاص هموت في ايه يا بشر عشان خرجت ليكم يوم تعملوا معايا كده وتعملوا في بعض كده .
خرجت من الجامعه روحت على بيتي وقفلت عليا بابي وقلت مش خارج تاني ده بره غابه وما ينفعش تعيش قنوع بين الديابه لازم تكون اسد او تكون انت الفريسه خلي بالكم لو خرجتم.



الكلام ده كان من سنين بس تجربه حقيقيه عشت فيها ومشيت حزين

السبت، 9 أكتوبر 2010

تعارف

هابدأ كلامي بالصلاه والسلام على اشرف الانام وافضل خلق الله سيدنا محمد عليه  الصلاة والسلام
                                              اما بعد ,,,,,
انا اخوكم في الدنيا وصحيح ظلمتني الدنيا شويه فحبيت اطلع حاجات مكتومه جوايا وبحب اقرا بعد كده كل اللي كتبته واحاسب نفسي واحب الناس تحاسبني عشان اعرف صحي من غلطي وبرده  بشكي ليكم همومي بس يارب تلاقوا وقت عشان تعرفوا تسمعوني ومنكم اتعلم واكيد هتفيدوني .
بس ياريت تسامحوني لو مره طولت في كلامي او مره قصرت في حضوري عشان بقفل عليا الباب واحب استمتع بسكوني واحيانا احاول افتح الباب الاقي باب من تاني فبرجع تاني لسريري واقول احسن هخرج ليه ده في بره وحوش واقفين واحيانا تتخفى في صورة بشر بس على مين انا هنا قاعد ليوم الدين واكيد هيحصل حاجه من الاتنين يأما هموت في مكاني وارتاح وممكن برده تموت الوحوش وانا على طووول هفتح بابي بس ياريت حد يبلغني انهم ماتوا عشان اعرف واقوم افتح بابي اللي اتقفل عليا من سنين.