الخميس، 28 أكتوبر، 2010

اعتذار

اعذروني يا جماعه وانا حقيقي اسف لاني هحاول اسمع كلام ناس كتير قالتلي انت ليه بتتكلم في السياسه مع اني كنت فاكر اني مليش دعوه بالسياسه فخلاص انا اخدت قرار اخير اني هبعد عن السياسه.
لو في يوم لاقيت رئيس عربي محبوس في بيته مش هتكلم ولا هقول ازاي وليه ولو الرئيس علقوه على المشنقه مش هنطق واقول كرامه او حرام عشان خلاص هعتزل السياسه.
يحاصروا غزه ياخدوا فلسطين مش هتفرق يقتلوا الاطفال هو ده العادي ويحتلوا العراق ويقتلوا الرجاله والستات في افغانستان وباكستان اصلهم بيقولوا عليهم ارهابيين مش هنطق هكون حجر صوان.
ولو في يوم سمعت ان في انتخابات رياسه مش هروح انتخب لان حكومتنا الرشيده هتقوم بالدور ده عني ملهاش لازمه اضايق الناس بوجودي وهما عارفين اختياري  صحيح هيختاروا الاختيار التاني بس اكيد هما عارفين مصلحتي اكتر مني.
ولو انتخابات مجلس الشعب بدات ياريت مفيش حد يبلغني  عشان ما تحرجوش نفسكم معايا لاني خلاص مليش حق الاختيار في بلادي.
اما لو الغاز راح لاسرائيل بارخص الاسعار ده مشاكل كبيره ما يعرفهاش غير عالم الاسرار اما انا هسكت وادور على حد يسلفني انبوبه وربنا يستر وما اطمعش في الغاز لوحدي يمكن حد يحتاجه بعدي.
اما الطماطم فمن زمان بيقولو عليها مجنونه وانا مليش في شغل الجنان وبعدين هي حمرا(قصدي على الطماطم طبعا) وانا زملكاوي ومش بحب اللون الاحمر لانه لون الدم  للي نزفوها رجالك يا مصر في اكتوبر وقبلها بسنين وناس خانتهم وباعت الغاز لاعدائهم ومش اللون الاحمر بس كمان الحليب لو غلي سعره مش هشربه لان خلاص مفيش حاجه بيضه في البلد كله اتلوث والبركه في المبيدات المسرطنه اللي ربنا اكرمهم وجابوها من اسرائيل.
حتى منتخبك يابلدي فضحنا مع النيجر وسيراليون حتى اللعب مش نافعين فيه طيب نعمل ايه وعايشين ليه وبنخطط بقالنا سنين عشان نوصل للفشل ومش جديد علينا الصفر اللي بنحاول نحافظ عليه يا خوفي يضيع منا هو كمان ويا ترى ساعتها هنساوي كام.
اعذروني يا جماعه خلاص مش هتكلم تاني في السياسه ولا اي حاجه تتعلق بالسياسه حتى عربيتي هركنها بره الجراج لاني حاسس انا سايس الجراج ليه علاقه وثيقه بالسياسه .
اعذروني يا جماعه لو طولت عليكم واوعدكم اني ناوي اطبق اللي قولته اول ما نفسي يروح وممكن بعد خروج الروح البلد بلدي وليا حق فيها وعليا حق ليها وانا مش هسيب حقي ومش هفرط في حق بلدي

هناك 21 تعليقًا:

الحب الجميل يقول...

اكتب اللى يجول بنفسك وخاطرك
اكتب ما ترتاح له نفسك
بس
يمكن الناس دى تكون خايفة عليك مش اكتر
الكل حاسس بمدى صعوبة الموقف الراهن واللى فات واللى جاى .
فية اللى بيقدر يعبر ويتكلم وفيه الضعيف اللى مش قادر يتكلم
ربنا يوفقك

سواح في ملك الله- يقول...

مهي كل حاجه في دنبتنا سياسه هي القوطه برضه مش سياسه الناس اللي مش لاقيه تاكل مش سياسه الشباب الضايع مش سياسه للاسف لافرق بين السياسه والحياه

Dr/ walaa salah يقول...

يعني اللي قالولك تبطل كلام في السياسه مش ملاحظين ان دي الحاجه الوحيده اللي بنقدر عليها


كمان نتحرم منها


عفوك يا الله


اكتب وخد راحتك يمكن الكتابه تهون شويه علينا اللي بيحصل

جمهورية فوضى يقول...

احنا لو ماتكلمناش فى السياسة ممكن نموت لان احنا كده مش حنتكلم خالص

الغاردينيا يقول...

حقك :)

وفي الاخير الكتابة متنفسنا الوحيد :)

تحية عطره

mrmr يقول...

يالهوووووووى
كل اللى قلته ده ومش ح تتكلم ولا تعلق فى السياسه
طيب ما شئ
ابقى شوفلك حاجه غيرها
اصل انا مش بحب اجيب فى سيره حد ولا وزير ولا غفير
ولا مجلس الشعب ولا الانتخابات ولا بحب اروح انتخب
وانتخب ليه ما الحكومه بتعملنا كل حاجه وتريحنا... نتعب ليه ونروح نتمرمط فى الطوابير علشان انتخب
ما كل شئ سهل وسلس جدا
ولا تعبنين ولا شقيانين
كفياك بقى كده وانفد بجلدك لحسن تلاقى اللى يسلخهولك
تصبح على خيرررررر

المجهول يقول...

لا عذر لك اليوم مادامت تكلمت في السياسية فهي كياسة !!!

تحياتي لك

eng_semsem يقول...

يعني انتم كلكم شايفين كده افضل اكتب واللي يحصل يحصل
شكلكم عايزين تخلصوا مني
بس على مين انا بسبع ارواح وكل ما هيقفلوا باب هيفتحوا التاني هيلقوني وراه

السُـلطانة يقول...

السلام عليكم ورحمة الله وبركاته ..

عذرك معك .. بس اللي ظلم عره إيه ؟؟؟

عاشقة الجنة يقول...

عايزة اعلق على حاجة قولتها
"اللبن لو سعره زاد مش هشربه لان مابقاش فى حاجة بيضه فى البلد كله اتلوث فعلا بالمواد المسرطنة "

مش بس كدا ده كمان من كتر الطمع فعلا قلوب الناس اتشال منها اللون الأبيض وكمان عدم قربنا من ربنا فعلا محتاجين نصلح من نفسنا نتجه لربنا قبل مانرمى الذنب على غيرنا .

شكرا على موضوعك
عاشقة الجنة

أبو العريف يقول...

ازيك يا مان

متكلمش في السياسه

دلو تقدر

يعني انت لو هتحكي في الاخلاق
سياسه
ولو هتتكلم عن العتاااااااق
سياسه

لو هتتكلم عن اللي نايم
واللي صاحي
واللي راحي واللي جي
واللي ميت
واللي حي

عن اللي حاضر
واللي غايب

واللي شارب
واللي فايق
سياسه

لو هتتكلم عن الغاز
والجاز
والبطاله والجواز
سياسه

لو هتتكلم عن الاحلام
عن الايام
عن الافلام
وعن صدام
سياسه

لو هتتكلم عن اللي باعوك
عن اللي خانوك
واللي ظلموك
وظلموني


سياسه
لا يا ساسا
مهيش كياسه

عشان تبطل سياسه
لازم بقي تسكت وما تتكلمش
لازم بقي تسد ودانك ولا تسمعش

تغمي عنيك ولا تفتحش

كفايه عليك كده بقي

محمد الجرايحى يقول...

أخى الكريم
السلام عليكم ورحمة الله وبركاته
بداية ومع أول دخول لمدونتك فاجأتنى صورة مصر أرض الحضارة معبرة جداااااا


أخى الكريم : مين يقدر ألا يكتب فى السياسة
السياسة تعيش بداخلنا وتتحكم فى كل أفعالنا رضينا أم لم نرض....

وعلى فكرة حلوة محاولتك عدم الكتابة السياسة....
هى نفسها سياسة

eng_semsem يقول...

وهو ده اللي انا عايز اقوله بالظبط ان حياتنا مرتبطه ارتباط كبير بالسياسه لانها بتاثر على اكلنا وشربنا وفلوسنا وكرامتنا وحياتنا كلها

أنا حرة يقول...

السلام عليكم ورحمة الله وبركاته
واضح إنك مش بتتكلم فى السياسة خاااااااااااااااااااااااااالص
خليك على كده.. واوعى تتكلم فى السياسة
تانى .

أنا حرة يقول...

لو سمحت تقرأ ردى على تعليقك على مدونتى
..... ضرورى
شكرا جزيلا

علاء سالم يقول...

السلام عليكم

موضوع جميل بجد وشامل
وكأنك جمعت أغلب همومنا في موجز رائع ومبدع
ومعاك حق يا أخي العزيز فعلينا أن لا نتهاون في حقوقنا ولا في حقوق بلادنا الحبيبة

حاجات جوايا يقول...

هو مين مش بيكتب فى السياسة دلوقت
ياريت بس السياسة تديلنا فرصة منكتبش عنها ولا نجيب سيرتها
هو احنا يعنى حاطينها فى دماغنا
هى اللى بتجرنا وتستفز اقلامنا
دى بقت فى الهوا والميا
بقوا ملوثين بالسياسة
غصب عننا هنشربها ونتنفسها مع باقى الحاجات الغريبة اللى بقينا بنشربها ونتفسها
هى جت عليها يعنى :)

تحياتى اخى الفاضل

خواطري مع الحياة يقول...

السلام عليكم
اولا
على مااعتقد انا اول مرة بدخل مدونتك اصل عندي الزهايمر فبنسى
هههه
ثانيا
يعم اكتب ولا تاخذ بكلام الناس
اكتب الي انت عايز
حكومة زباله
وبعدين شكلك انت ولد شاطر تسمع الكلام ناس يقول لك بطل السياسة تبطل
متطنشهم يعم
يارب تكون فهمت كلامكي
عارفة اني جييييييييييييييت متاخرة كثير
اعذرني
سلامي ليك لكلامك السياسي.

eng_semsem يقول...

اصدقائي انا في اخر سطر في الموضوع قلت انا هبطل كتابه لما اموت اما صوتي مش هيسكت طول ما فيا الروح سكوتي عن الكلام نوع من الموت انا مش هقبله ابدا لازم كل واحد يقول اللي في نفسه

جايدا العزيزي يقول...

طبعا حقك

بس خلى صوتك دايما مسموع

اكيد نحب نشاركك ونكون دايما معاك

جايز خايفين عليك

بس المهم اننا مع بعض على الخير والشر

حالنا ما عدش ينفع فيه السكوت

والا احسن نريح روحنا ونتمنى الموت

خليك دايما هنا

تحياتى

فارسة بلا جواد يقول...

باب مقفول

اذا كنت تؤمن بحقيقه ما فلابد وأن تحارب من أجله وكون كلام الناس أثر فيك وجعلك تتراجع قليلا وربما للأبد

فأيقن تماما أنك لم تكن تؤمن بها من البدايه


اذا اردت التحدث عن السياسه فأنا سأسمعك ... لانه حقك