الأحد، 10 أكتوبر، 2010

فلسطين

فتحت بابي وخرجت قلت اشوف الدنيا يعني هيحصل ايه ما في كتير بشر عايشين ماشيين وعادي لبست وقلت انزل جامعتي ودخلت من باب الجامعه حسيت احساس غريب سالت اصحابي في ايه ؟
رد واحد وقلي انت نايم من امتى ؟؟ البلد مقلوبه وانت قافل بابك ويمكن تكون عامل مش واخد بالك انت ما تعرفش ان اسراءيل حبست الرئيس ياسر عرفات ومش عايزاه يخرج من بيته.
قلتله معقول ده انا لو ابويا عمل معايا كده ان كنت ممكن اهد الدنيا يعملوا فيه كده ازاي  هو مش رئيس دوله طيب فين الامم المتحده؟؟؟؟
قلي ده مصر مليانه مظاهرات والدنيا مقلوبه واحنا طالعين النهارده على جامعة القاهره بيقولوا في مظاهره كبيره تيجي معانا ؟
قلت وماله لازم نقف جنب الرئيس العربي وجنب بلادنا اللي بنحلم نزورها فلسطين
وصلنا هناك لاقيت العسكر مالي المكان استغربت قلتله هو العسكر كمان طالع في المظاهره معانا مبصش ليا حتى مش عارف ليه بس عرفت بعد كده لما منعونا نخش قدام الجامعه واتفقنا نتفرق ونحاول ندخل باي طريقه ودخلت واندمجت مع ناس انا ما اعرفهمش بس كلامهم اعرفه وعاجبني وقعدت اقول معاهم بعلو الصوت :
ابو عمار صرح تصريح يا جبل ما يهزك ريح..... ابو عمار قالها ثوره واحنا رجالها....يا ابوعمار لاتهتم راح نفديك بالروح والدم...
يااااااه قد ايه حسيت اني رجعت للدنيا من تاني وفجأه رد علينا الجيش بس رده ماكنش كلام كان قنابل مسيله للدموع وانا دمعي غالي عليا وفتحت سيارات المطافي مياه ملهاش لا اول ولا اخر ايه في ايه مش احنا اللي حبسينه ده اليهود رجعت بعيد عن باب الجامعه لاقيت واحد بيعرج سند عليا قلتله مالك ؟؟
قلي ضربوني العساكر بعصيانهم عشان نطقت قدامهم بكلمة حق .
وصلته لباب بعيد وخرج على البيت وجوه قلبه بيغلي من المصريين اكتر من اليهود ورجعت قلت اشوف حصل ايه لاقيت واحده بتعيط جامد سالتها مالك ؟؟؟
قالتلي مش شايفه حاجه انا شكلي اتعميت وخايفه ما اشوفش الشمس من تاني
ردت في سري (وانا خلاص بكيت) واخدتها دخلتها في قاعة جوه لاقيت واحد نايم على طاوله كبيره ممدد وناس بتجري شوفوا دكتور او طالب في الطب اي حاجه الحقوه ده خلاص مش بيتنفس صرخت جوه نفسي وانا خلاص هموت في ايه يا بشر عشان خرجت ليكم يوم تعملوا معايا كده وتعملوا في بعض كده .
خرجت من الجامعه روحت على بيتي وقفلت عليا بابي وقلت مش خارج تاني ده بره غابه وما ينفعش تعيش قنوع بين الديابه لازم تكون اسد او تكون انت الفريسه خلي بالكم لو خرجتم.



الكلام ده كان من سنين بس تجربه حقيقيه عشت فيها ومشيت حزين

هناك 16 تعليقًا:

أبو العريف يقول...

يعني انت مجيتش تخرج غير يوم المظاهره

ياراجل خليك راكن احسن

هههههههههههههههههه

لو بصيت للموضوع هتلاقي خروجك موضوع

خرجت فشفت الدنيا ووعرفت ايه اللي بيحصل

عرفت ان في ناس حقها مسلوب

وناس بطالب بيه

يعني خروجك كان ايجابي

فتاه من الصعيد يقول...

يعني يوم ما تخرج الدنيا تتقلب كده هههههههه

بس ده حال الدنيا معلش

انا بنصحك توارب الباب بلا شتقفله ولا تفتحه اوي

تحياتي

BNT ELISLAM يقول...

حلو اوى الموضوع وحلو كبدايه واهلا بيكى فى عالم التدوين
ومستنين المزيد دايما

BNT ELISLAM يقول...

حلو اوى كبدايه
والموضوع جميل فكرته
مستنين المزيد

جارة القمر يقول...

أدمعت عيناي ياصديقي

أبوعمار قلب ينبض في ضلوعنا جميعا ...


شكرا

miroooo يقول...

اولا شكل مدونتك هتبقى جميله جدا
ثانيا منور عالم التدوين لانه يبدو انك لسه جديد وده اللى انا فهمته
ثالثا وده الاهم ان خروجنا مش هو المشكله المشكله فى الناس اللى حوالينا والبلد اللى مش عارفه اقول عليها ايه؟ مهما قولت عن الفساد اللى فيها مش هاقدر اقول كل الحقيقه او حتى نصفها
بس احنا لازم نبص لنص الكبايه المليان ده لو كان لسه مليان هههههه
على العموم احنا مش لازم نمنع نفسنا من الخروج علشان لازم فى يوم هنخرج وهنتصدم من الواقع اللى احنا مش شايفينه زى ما حصلك كده بالضبط
عذرا لو كنت اطلت عليك
تقبل مرورى وتحياتى
ميرووو

جايدا العزيزي يقول...

ههههههههههههه

حظك كده

ما اهو المنحوس .............

هههههههههههههه

بس حقيقى يسلم احساسك

لانه وصلنى


انا بردوا بكتب خواطر وبفهم كتير

وجايز بحس الكلام قبل ما اقراه

حقيقى يسلم احساسك

تحياتى

شهرزاد يقول...

بس الحل مش في الاختباء ولا في قفل الباب
عمر الاسد ما بيتولد اسد هو بيكون زي القطه وبعدين بيكبر ويتقوى لغاية ما يبقى اسد
اخرج للدنيا هي فيها الدمعه اه
بس فيها البسمه
هي فيها الحزن اه بس فيها الفرح
هي فيها الظلم اه بس فيها العدل
بلاش تنكمش على نفسك
لازم يبقالك دور انا مش عاجبني احساس الاستسلام
علشان انا لو كنت زيك وفي الظروف الي منريت بها لكنت اما في القرافه واما في السرايا الصفرا
بلاش تنخ وخليك جبل
احساسك قوي لانه وصلني بشدة حتى فجر في بركان الغضب ضد موقفك اعذرني

eng_semsem يقول...

عزيزتي شهرزاد انا اشكرك على رايك واخبرك بان هذا كان موقف في حياتي مر عليه قرابة 8 سنوات واستمري في متابعتي حتى تعرفي ما تلاه وانا لم استسلم يوما للحياه

رحــــيـل يقول...

كان لازم تخرج عشان تعرف الدنيا ماشية ازاى
اوقات بنحتاج نستخبى حتى من نفسنا بس ما ينفعش نفضل كده

تدوينة وبداية موقفة ان شاء الله

Noha Saleh يقول...

بداية موفقة
بس نصيحة... ماينفعش الباب يفضل مقفول
لكن المدونة واضح انها هتكون حلوة ان شاء الله
بالتوفيق

مها البنا يقول...

مع إعتراضى على غلق الباب .. لكن أنا مع الرأى اللى بيقول إن خروج حضرتك كان إيجابى

وما الدنيا الا حقوق مسلوبه ولكن ...

ما ضاع حق وراءه مطالب

بدايه موفقه وبوست قوى

متابعه بإذن الله

re7ab.sale7 يقول...

صباح الورد
دي اول زيارة ليا
وميرسي جدا علي زيارتك اللي اكيد اسعدتني جدا
بالنسبة للبوست يمكن كان عن شيء قديم لكن المشكلة مازالت موجودة
ولو كل واحد فينا قال وانا مالي وقفل عليه بابه عمرنا ما عنتغير ولا نتصلح ولا يمكن نقوم من الطين اللي وقعنا فيها من سنين فاتوا وسكتنا عشان خفنا وكل واحد فينا قفل بابه
مش معاك انك تقفل بابك عليك وتسكت ...انا اللي مغلبني زي ما ماما بتقوللي اني لساني مبيسكتش علي اللي شايفاه ادامي ...لو شفت حاجة مش عجباني اقول مش عجباني واحاول اغير واثر في اللي حواليا ..ومش هسكت عن شيء ظلم او شيء مش صح ...يا رب كلامي ميكونش ثقيل عليك..تقبل مروري

Tears يقول...

اذا كنا احنا محتلين و الفسدة سارقينا و ساجنينا و معذبينا يبقى ح نساعد الجيران

افتح الباب و ربنا كبير

بنت الغربة يقول...

انا اول مرة ازور مدونتك ...استفزنى تعليقك عند ندى الياسمين..خصوصا انى من انصار المرأه...
عموما انا قريت البوست بتاعك واتضايقت جدا من اللى حصل..بس للأسف العساكر عندنا زى الروبوت..تمشيهم بالرموت كنترول من غير مايفهموا هم بيعملوا ايه وليه...
بس ده مش معناه اننا نستسلم ونقعد فى بيوتنا..ياما دقت على الراس طبوول
واذا كان ده رأى الرجاله...
الستات تعمل ايه؟؟؟
تحياتى

الغاردينيا يقول...

صح الدنيا صارت غابه

وياريت قفل الباب كان حل

اعطر التحيات