الأربعاء، 22 ديسمبر، 2010

حكايتي مع الايام (14)

انا مليش قرايب في كفرالشيخ غير بس بيت عمتي وجوز عمتي حس انه معملش اي حاجه عشان تساعدني قرر يتكلم مع الراجل ويحاول معاه هو صحيح ليه طريقه هاديه ومقنعه وبيتعامل مع الناس بما يرضي الله بس ده ماكنش كافي لاقناع الراجل او تغيير اتجاه الحياه وكان بيحاول المحاولات ده من غير ما يقول لينا وسالني كذا مره على مواقف فانا حسيت هو بيعمل ايه وقلي والله يا اسامه انا بحاول لو وصلت لنتيجه طيبه اكيد انت اول واحد هيعرف لو ماوصلتش يبقى بلاش اوسع الفجوه مابينكم قلتله ربنا يوفقك.
وبعد كام يوم وصل ليا عن طريق واحد صاحبي تحذير من واحد قريبهم قال لصاحبي خلي اسامه ياخد باله لانهم مشيوا في طريق المحاكم وطبعا كلمت جوز عمتي وقلت ليه الكلام قلي انت مفيش ورق وصلك وانا هتكلم مع الراجل واشوف وطبعا الراجل قال لا طبعا مفيش السكه ده خالص ومش في دماغنا نمشي بيها وبعد عدة محاولات من الاقناع من جوز عمتي قال لابوها انت مش بتقتنع بكلام اي حد شوف كام واحد حاول معاك طيب بقلك ايه انت مش بتقتنع بكلام ربنا قال ليه ونعم بالله جوز عمتي قال ليه انا عندي اقتراح نروح لدار الافتاء فرع كفرالشيخ نقعد ونحكي ونشوف راي الشيوخ ايه وناخد اسامه وميرهان رفض جدا حضوري وصمم انه لو هيروح مفيش حد فينا يروح معاه راح هو وجوز عمتي وحكى اللي عنده وجوز عمتي مش الطرف التاني فكان مش بيشترك في الكلام الا في اقل الحدود وبعد ما خلص كلامه مع الشيخ قال الشيخ لجوز عمتي وانت ايه رايك في الموضوع ده او ايه ردك قله انا معرفش حاجه عن المواضيع ده ساله الشيخ امال فين الزوج قال ليه رفض الحاج حسين ابوها حضوره ابتسم الشيخ وقال ليه لازم وجوده انت عايز يا حاج حسين تحاكمه من غير ما تسمع دفاعه وممكن يكون كلامك كله صح بس بنتك عملت فيه اللي تستاهل عليه اكتر من كده لازم وجود الطرفين وخرجوا على كده وتبادلوا ارقام التليفونات عشان متابعة الموضوع بجلسه اخرى .
بعدها حصل موقف كانت والدتي في شغلها دخل مكتبها موظف معاه شيخ وقال ليه الحاجه ريستنا كلنا هنا وهي هتعمل ليك يا شيخنا كل اللي انت عايزه وسالته كان عايز ينقل زوجته من مدرسه لمدرسه وبعدين سالته بالمره والله يا شيخنا انا ابني ساكن في القاهره وهو لسه متجوز جديد شهرين بس ومراته رجعت على بيت ابوها وهو مش عايز يرجعها قال ليها الشيخ هو انت والدة البشمهندس اسامه قالت ليه اه قالها انا قعدت مع ابو البنت وواحد قريبكم وحكى ليا حاجات وانا قلت ليه لازم وجود الطرف التاني بس ما تاخذنيش يا حاجه اصله كان بيقول انك موظفه انا فهمت من كلامه انك يعني موظفه صغيره على قد حالكم يعني انت و والده ده كان معنى كلامه والدتي قالت الحمدلله احنا على قد حالنا انا مديرة الشئون الماليه والاداريه بالاداره التعليميه و والده رئيس لجنة طعن ضرايب كفرالشيخ وانتهى الكلام بربنا يسهل الحال واللي فيه الخير يقدمه ربنا وبصراحه الشيخ ماقصرش ضغط على الراجل وجوز عمتي هو كمان واتفقنا وقعدنا قاعده في كافتيريا النادي رحت انا وابويا وجوز عمتي وجه الراجل ومعاه بنته وابن عمته ومراته واخت الحاج حسين ومعاهم الشيخ اول ما دخل الشيخ قمت انا ووالدي سلمنا عليه وبيعرفنا بيه انا رديت وهل يخفى القمر انا صليت وراك يا شيخنا في مسجد كذا وحضرت خطبه كانت عن موضوع كذا ووالدي قال بس انت قبلها كنت بتصلي في الجاممع الفلاني انا حضرت ليك كام خطبه هناك وقعدنا واحكي يا بنتي وحكت وانا رديت وكان الشيخ بيسمع كانه اول مره يسمع الكلام وانا جوايا بسال امال هو لما راح حكى ايه وارد على الكلام و وصلت الامور ان حتى الناس اللي كان جايبهم عشان يقفوا ضدي قمت ارد على التليفون لاقيت ابن عمته جه ورايا وقلي اهدى شويه وربنا يسهل الحال انا شايف ان الامور ماتستهالش واحنا اتحكى لينا كلام دلوقتي قدامكم اتغير كله اهدى عشان ما يجبش غلط عليك وان شاء الله مراتك هترجع ليك ورجعنا واخرالكلام قال الشيخ بص يا حاج حسين الامور مش مستاهله انت ايه يرضيك انت عايز ايه وطبعا قعد يتهرب من السؤال قطع كلام الشيخ الكلام قال انا شايف مشاكل من اللي بتحصل في بيتي كل يوم ويا سيدي عشان ماتبقاش قلقان على بنتك تكتب يا اسامه تعهد انك تعاملها كويس وهيبقى معايا التعهد ده ايه رايك
قلت ليه يا شيخنا هو في بعد كلامك كلام اللي انت تقول عليه انا معاك ووالدي ورايا قال يا شيخ احنا جايبن عشان انت تحكم بحق ربنا لو هو ده حق ربنا يبقى لازم نمشي وراه وتخيلوا الرد ده نرفز الحاج حسين جدا لدرجة انه قام مره واحده وكانت بنته مشيت من شويه وقال انا عايز شقه في كفرالشيخ ومفيش حل تاني وقمنا على كده وطبعا سلمنا على الناس والناس سلمت وقالت ربنا يصبرك يا ابني وربنا يهديه حتى قرايبه اللي جايه معاه مشيت وهي مش معاه .
وبعدها بكام يوم ومعرفش ليه وصلت رساله وكلمتها تاني وسالت عن اخباري قلت خير يمكن ربنا هدى القلوب واخبار شغلك ايه انت فين دلوقتي قلت انا في قريه اسمها ريحانه بعد مدينة الانتاج الاعلامي بنبني فيلل هناك وتاني يوم يا اصدقائي كلمني واحد من اصحابي وقلي في محامي جه هنا الشركه المالكه للمشروع ومعاه ورقه من المحكمه وبيسال على مرتبك عشان مراتك رافعه قضية نفقه وهيروح بكره على شركتك اللي هي كانت مقاول بينفذ في المشروع كلمت المدير المالي عندي وبلغته ان في كذا هيحصل شوف انت ممكن تتصرف ازاي وعشان نعرف احنا وصلنا لفين كان الكلام ده يوم 27/3/2009......

هناك 44 تعليقًا:

خواطري مع الحياة يقول...

السلام عليكم
على قولت الست ام كلثوم لصبر حدود وانت شكله عندك حدود الدنيا كلها
منتظره الجديد
تقبل مروري
سلامي ليك اخي اسامه.

سواح في ملك الله- يقول...

تعرف يابابشمهندس
انت والله العظيم يااخي اخ طيب جدا
بس الدنيا مش عايزة الاخلاق دي
المؤمن كيس فطن
ليس معني انك مؤمن
انك متكونش محتاط
يعني لما مراتك تكلمك باسلوب ناعم
تبقي ليها مصلحة
هل ينفع بعد كدة اعيش مع البني ادمة دي
وازاي هديها الامان واسيبلها بيتي بعد كدة
بشمهندس ايا كانت النتايج بعد كده
متهيالي ميصحش ترجع
ومعلش ابنك اي بتعتبرة ذريعه او مبرر
لوجودها معاك
هي نفسها هتتحايل عليك عشان تاخده
لانها في الاساس لاتصلح اما
مجرد طلاقها منك هتتجوز وابنها هيبقي عبا عليها

Tears يقول...

ما انا قلتلك المرة اللى فاتت ان واضح ان همه مش عايزين يكملوا و لا عايزين الجوازة تستمر لسبب غير معلوم

و حتى لو انت عايز عشان الطفل فبرضة ما ينفعش تعيش مع واحدة مش عايزة تعيش معاك لان لازم قبول الطرفين حتى لو هى اللى غلطانة

بس رايي ان مافيش داعى للمحاكم و كله يخلص ودى و مصاريف الطفل اكيد مسئوليتك و نفقة سنة مش مشكلة من غير محاكم لكن اتمنى تقدر تشوف الطفل بسهولة لان اهلها ماعندهمش مبدأ و ممكن يماطلوا فى ده و مع السنين يشوهوا صورتك

dr simoooooooooooooooo يقول...

ههههههههههههه عرفت تضحك عليك يامعلم وانت طبعا قلت الدنيا بتضحك والبحر هيضحك لكن الكمين اتنصب يا معلم عرفت تلعبها صح وبجد ربنا بيحبك وان كيدهن عظيم وتكفرن العشير وناقصات عقل ودين

الحــب الجميـــل يقول...

معنديش غير لا حول ولا قوة إلا بالله
سورى فى كلامى
عيله متتنسبش
ربنا يهدى الحال يارب
شكرا لسؤالك
تحياتى

موناليزا يقول...

لأ بقى
ده كده كتير اوى بجد
السؤال اللى بيفرض نفسه
هل لو كانت زوجتك بعد جلسة الشيخ رجعت لك وروحت معاك كانت العلاقة بينكم هتبقى عاملة ازاى بعد كل اللى حصل؟؟؟
أنا شايفة ان الشرخ فى العلاقة كل يوم بيكبر لدرجة تستحيل فيها العشرة
واخرها انها تكلمك عشان تعرف عنوان شغلك وتبعت لك عليه محضر محكمة!!!

بجد ربنا يديها على قد نيتها

eng_semsem يقول...

خواطري مع الحياه
يعني واحد سعى للصلح وحاول واجتهد ولما يحتاجني معاه اقول ليه شكرا مش عايز وبعدين انا مكنتش شايف حل قدامي غير الصبر
شكرا على متابعتي وانتظري البوست القادم ضروري جدا

eng_semsem يقول...

سواح في ملك الله
يعني قصدك يا اخي في الله لما تكلمني ما اردش عليها ولا اقول كلام كدب واكدب ليه وبعدين المشكله مش اني وصلتني ورقه بالقضيه المشكله والغلط هي ليه رفعت قضيه اما شعوري بالامان والاطمئنان بعد كده ده سيبه للبوست القادم اللي هستناك فيه ضروري واوعى تتاخر وانا عارف انك عمرك ما بتتاخر عليا ورايك كتير بيكون بيوصف حالتي
شكرا على متابعتك

eng_semsem يقول...

tears
انا عمري ما كنت عايز اعيش مع واحده مش عايزاني وانا كان ممكن استحمل اني اعيش معاها وانا مش عايزها بس ما ينفعش العكس اما بخصوص المحاكم هو ده اللي انا بقوله لحد دلوقتي في الحكايه وباكد جدا انها مش طريقه محترمه لحل نزاع اسري والوصول ليها يبقى في على الاقل طرف مش محترم ومش هتحل المشكله ده هتقتل اطرافها الاتنين
شكرا على متابعتك وهستناكي البوست اللي جاي ضروري

eng_semsem يقول...

الحب الجميل
محدش اجبرهم انهم يتعاملوا مع الناس بالطريقه ده ومن غير اسف ده اقل وصف ممكن يتوصفو بيه والسؤال عن الاصدقاء واجب ولا شكر على واجب دمتي بخير ونطمن عليكي
تقبلي تحياتي

eng_semsem يقول...

dr simooooo
اه ضحكت عليا يا دكتور ونصبت الشبكه وانا وقعت فيها زي ال..... بس غصب عني اني بتوقع الخير من الناس والدنيا فيها الكويس وفيها الوحش فيها بنت الاصول اللي بتعمر البيوت وفيها اللي من اقلل شرر تولع الدنيا في بعضها
واهلا بيك تاني وانا زعلت انك مكنتش موجود البوست اللي فات

eng_semsem يقول...

موناليزا
عارفه يا امة الله هو ده كل اللي كان شاغل تفكيري قبل ما اروح معاهم اني بحلم نوصل لحل الطلاق اكتر من الاتفاق بس لو مراتي قالت هرجع ماينفعش ارفض لاني ساعتها هظلم اللي في بطنها وكنت بفكر استحملها واتجنبها وتبقى صفر على الشمال وخلاص وارجع في تفكيري واقول انا ما كنتش بحلم بكده انا كنت عايز مراتي تبقى اغلى واحلى حاجه عندي ومكنتش مرتاح لا كده ولا كده
شكرا على متابعتك وانتظري البوست القادم ضروري جدا

سواح في ملك الله- يقول...

لا طبعا مش قصدي تكدب
بس اللي ميعبرنيش ويسيبني ويمشي والشيخ الجليل موجود
ميستاهلش يترد عليه ولو بتليفون
وعلي فكرة
مشيها ده ادي اشارة لابوها
انه مايوافقش
متزعلش

شغل مش كويس يعني

eng_semsem يقول...

سواح في ملك الله
اولا انا مش زعلان ثانيا وانا في وسط الموقف او ساعة ما هي مشيت ماتوقعتش الرد بتاع ابوها هيبقى كده خالص لكن بعد رده فهمت وزي ما انا رقلت في رد قبل كده انا كان بالنسبه ليا الطلاق او الرجوع زي بعض ملهمش طعم وانا مش بزعل من كلامك انا قلت ليك قبل كده انت بتقرب من شعوري بكلامك جدا وتوصل للي انا عاوز اقوله بالظبط وتوصل للنتيجه
وانت ما تزعلش لو ردي ضايقك

Dr : Nour يقول...

السلام عليكم و رحمة الله و بركاته

زيارة أولى لمدونتك و أعتقد لن تكون الأخيرة

بالفعل شدتنى الأحداث و المفارقات الغريبة حقــا !!

لكن لى تعقيب بسيط ..
ما مدى معرفتك بتلك العائلة قبل الخطوبة و الإرتباط
هل لم تجد فرصة واحدة للحكم الصحيح عليهم قبل الزواج ؟!

أجد الكثير من السيطرة و التحكم بدون وجه حق من الأب
و أجد تعالى و تكبر عليك و على أهلك من زوجتك
لمــاذا كل هـذا ؟؟
مع أنك و عائلتك ما شاء الله عليكم
فلا ينقصك شىء على الإطلاق
و لكن يبدو أن عائلة زوجتك و بدون مجاملة ... ليست أصيلة و أصحاب مشاكل

ما معنى أن الأب هو الحاكم الناهى فى كل الأمور
و لماذا التشدد لهذه الدرجة ؟؟

أجد حلقة مفقودة و نقطة غائبة لا أفهمها ؟؟

المفروض أن أول سنة زواج .. سنة مشحونة بالخلافات و المشاكل
نظرا لإختلاف البيئات و التنشئة
و لكن اذا كنا متعلمين و على درجة كافية من الدراية بالأمور و يحدث هذا
فماذا تركنا لغير المتعلمين الغير قادرين على الفهم

للأسف مهندسة !!!
أعرف عن الهندسة التفكير السليم و المنطقى و القدرة على الإستنتاج

حقيقة لا أعرف ماذا أقول حتى لا أصدمك
و لكن كل الحق معك
فما حدث كان كثير و بدون وجه حق

ربما الأب يخاف على إبنته من الغربة
و لكن لم تخدعهم من البداية
فالعقد شريعة المتعاقدين

و صراحة أخذ على الأب نقطة هامة عليه أن يدركها
أنه بذلك لا يحمى إبنته و لا يأمن لها حياة هادئة مطمئنة
أنما يجعلها شخصية هشة و سلبية غير قادرة على مواجهة الحياة و التعلم من سقطاتها و مشكلاتها

حقيقى خســـارة !!!

لا أملك إلا أن أدعو الله تعالى أن يفرج كربك و يزيح همك

ربنا يهديك للخير و يكتب لك النجاة من كل شر
و ييسر لك أمورك

دمت بكل خير

Dr/ walaa salah يقول...

طبعاً انا بئالي مده قدام البوست مش عارفه اعلق

يمكن خايفه اتنرفز اكتر واكتب كلمه تزعلك

ويمكن مش لاقيه كلام اعلق بيه

ويمكن انت صعبت عليا بجد

بس مخبيش عليك انا اول ما قريت البوست قلت مش هرد خلاص كفايه لغاية كده

لكن احتراماً ليك وبعدين قلت منبقاش احنا والظروف عليك رجعت تاني

بص يا اسامه ومتزعلش من كلامي عشان هكلمك بصراحه


طبعاً انا لو قلتلك ليه مستحمل كل ده ومطلقتهاش

هتقولي عشان الطفل اللي بينكم

بس انا عايزاك تقعد بينك وبين نفسك خمس دقايق بس وفكر صح

انت جواك شئ انكسر من ناحية مراتك حتى لو انت مش حاسس بيه دلوقتي اكيد هتحس بيه بعدين

لو رجعتوا دلوقتي يا اسامه الطفل اللي انت خايف عليه ده هيجي يوم ويكره اليوم اللي اتولد فيه بسبب المشاكل اللي هتكون بينكم


وبعدين معلشي مراتك كده خلاص وضحت انها مش عايزاكي ويمكن كمان مستعده انها تضرك والدليل مكالمتها ليك

مش بإيدك يا اسامه انك تسعد ابنك او بنتك

اللي مكتوبلهم هيشوفوه

فكر صح لو سمحت وبلاش طيبتك دي

قاعد معلشي بتسمع لده وتوافق على كلام ده وتروح وتيجي

ومراتك قاعده من وراك بتخطط إزاي تضرك

إزاي هتآمن انك تعيش معاها بعد كده

بالله عليك كفايه بقى اللي انت بتعمله

انت باقي على إيه تاني

سؤال اخير بجد وجه في بالي

انت بتعمل كل ده يا اسامه عشان ابنك او بنتك ولا بجد عشان بتحبها عشان كده مستحمل منهم كل ده


ياريت تفكر في سؤالي ومش مهم ترد عليا فيه

المهم تعرف انت بتعمل كده ليه

عشان بعد كده متلومش غير نفسك

جايدا العزيزي يقول...

اسامه

بجد بكيت علشانك

بس ليه الطيبه دى كلها منك

وليه تقع فى الفخ بسهوله

ما انت عارف وحاسس

قلبى معاك اخى

ولا حول ولا قوة الا بالله

ربنا معاك

تحياتى

eng_semsem يقول...

dr nour
مبدئيا انت نورتيني بزيارتك الجميله واهتمامك انك تقرا القديم شدني اني اقرا كلامك مره واتنين اما عن الانطباع قبل الزواج كان ان الناس ده هتسيبنا نعيش في حالنا ومش هيدخلوا في حياتنا لان والدها يمكن ما اتكلمتش معاه قبل الزواج كتر ومحصلش غير موقف وحيد يمكن حكيته في الجزء رقم 2اما حنة التعليم فهي وسيله للرقي بالانسان بس برده في ناس بتتعلم وتخرج جاهله طريقة التعامل مع البني ادمين هي ليها دور انا معاك بس في برده بيتخذها وسيله للتكبر على الناس مش اكتر وربنا يجعل دعوتك مستجابه ليا ولاخواني المسلمين وشكرا على مجهودك الطيب في قراية اللي فات انا حاسس انا قد ايه تعبتك معايا بس الهدف يستاهل وانا كل قصدي من البدايه للنهايه نساعد بعض ونحل مشاكل البيوت من غير ماتخرج ولا توصل انها تبقى قبور ونستفيد كلنا من تجربه الفشل فيها نصنع منه نجاح لغيرنا

افروديت يقول...

جاني أنهياااااااار عصبي

هكسر الكمبيوتر وادفعك تمنه

مش هعلق ياأسامة

"ممتنعه حتي النهاية"


"دا شغل علي مية سوده وربنا"

eng_semsem يقول...

dr/walaa
حيرتيني معاكي انت متهيالك انك ممكن تزعليني اكتر مما زعلت زمان صعب جدا بعد اللي شفته حد يزعلني شفتي انا استفد من جرحي ازاي اما قصة هتعيشوا ازاي وكده اللي انت حكتيه بمنتهى الصراحه انا حكيت اللي حصل في الواقع وكلامك شرح اللي كان بيدور في عقلي يعني كلامك بيوصف كل اللي انا كنت بفكر فيه ومش عارف احله وشايف ان الناحيتين خسرانه لو رجعت هخسر بكره ولو مشيت هخسر طفلي
اما سؤالك ده كان صعب جدا عليا والغريب اني سالته لنفسي وكان جوابي معقول تكون بتحبها بعد كل اللي عملته فيك معقول بتعمل كل ده عشان اللي في بطنها يعني لا شوفته ولا ارتبطت بيه بس الحقيقه ان هي ده الاخلاق اللي احنا اتربنا عليها نحافظ على اللي حوالينا ما نبعش حد ونحاول نصلحه ولو خسرنا شويه مش مشكله لان يهدي الله بك رجلا خير من الدنيا وما فيها
ومتهيالي هو ده كان سببي الاكبر منها ومن طفلي وحقيقي تعليقك بيوصف حالي وبياكد ليا اني بحكي الحقيقه زي ما حصلت بالظبط
شكرا على متابعتي وانتظري البوست القادم ضروري

eng_semsem يقول...

جايدا العزيزي
في دموعك الم شديد ليا ومش احب اشوفها ابدا على خدودك الفخ دايما مهمته يوقع الفريسه وانا كنت ضحيه ليه صحيح بس ساعتها مكنتش ندمان اني بحاول اصلح شئ مش كويس وغلط واحساسنا كتير بيخدعنا وانا كنت بتمنى انه يخدعني ويطلع شعوري مزيف لكن للاسف هي ده اخلاقهم وطبيعتهم ويكفيني دعائك ربنا معاك لانه هيكفيني شر كل البشر
شكرا على متابعتي وانتظري البقيه الباقيه مني (ضروري جدا)

eng_semsem يقول...

افروديت
الف بعد الشر عليكي وبعدين حاسبي على الكمبيوتر انا هدفع ايه ولا ايه وان كان جالك انهيار عصبي دلوقتي هتعملي ايه البوست اللي جاي وانا اتكدت من معلومه ان ابليس ليه جنود على الارض ماشيين حوالينا وصدقيني البوست اللي جاي هتكتبي تعليق
تقبلي تحياتي ودعواتي

هبة فاروق يقول...

لا حول ولا قوة الا بالله بجد ان قلبى وجعنى هو فى كدة بجد انت انسان طيب جدا
وربنا حيديك على قد نيتك الطيبة
سلامى لك اخى اسامة

الغاردينيا يقول...

يااااااااااااه

من 2008 لحد 2009

هههههه

يا ساتر

متابعه ,

وداد يقول...

بص بقى يا استاذ اسامة

انا متنرفزة من البوست إللي فات

وزادت نرفزتي منها لما عرفت مكانك علشان تبعت لك قضيو نفقة والكلام ده

المفروض رد فعل أي شخص تاني كان انه يتصل بيها وبصوت عالي يقول لها انتي طالق

وتاني يوم تكون ورقتها عندها

دي انسانة ملهاش امان

وخوفك على انهيار عيش الزوجية

معليش دا المفروض موقف الزوجة مش الزوج

انت طيب اوي

وهما بيتمادوا في الغلط وتوقيعك في القضايا

يا عم طلقها واخلص من القرف ده

دا انا اتخنقت منهم

ومن طيبتك مع ناس متستاهلش

mena يقول...

ويا صابره يانا يا مداريه .. يا محيره كـل المداويـه
النـاس بتمسـح دمعتـي .. وحبايبي ولا سألوا عليّـه

دى اغنية لاصاله والله لو عرفت حالك لتغنيهالك

معنديش كللام تانى اقولو ربنا يفك كربتك

مستنيه الجديد ويارب يكون خير

carmen يقول...

انت عارف انا من اول الحكاية عمالة ادور علي اي مبرر للي بيعملوه
النهاردة بقي ادركت انه عناد لمجرد المشاكل وطلع وباء متفشي في العيلة
الناس دي بتستفزني اوي
ماعرفش انت مستحمل كل ده ازاي
واحد غيرك كان جرجرها في المحاكم وخلي سمعتها زفت
ربنا يصبرك ويقويك ويهديهم

حرّة من البلاد..! يقول...

الله يعينك ويصبرك
متابعة دائما
تحياتي

فتاه من الصعيد يقول...

انا ملاحظه انها نفسها ترجع بس ابوها منشف دماغه :(

مستنيه بقيت الفضايح زي ما وعدتني :D

تحياتي

re7ab.sale7 يقول...

مش عارفة اقول اية غير ربنا يصبرك بجد يا اسامة.....
المشكلة لا مشكلة بجد انا شايفة كدة يعني مسألة شقة في كفر الشيخ دي لان كل واحد بيكون تبع شغلة وسكنة تابع لشغلة انا مش هسافر كل يوم من كفر الشيخ للقاهرة وانا عندي شقة في القاهرة يعني كلام فاضي بجد ...
طيب زوجتك دي متعرفش ان في ناس بتسافر دولة تانية عشان ازواجهم وشغلهم وبيسيبوا شغلهم ها ويشتغلوا هناك او ميشتغلوش عشان الحياة تستمر ...؟!!!

بجد حاجة غريبة وتعقد
ربنا معاك
بدعيلك

miroooo يقول...

السلام عليكم
بجد كل واحد منه لله
انت بجد انسان صبور جدا وطيب جدا جدا
الطيبه مبتنفعش فى الزمن ده
لو كان حد غيرك كان ورالهم شغلهم كويس
معندهمش قلب الناس دى ولا ايه؟ هما مجوزين بنتهم ليه؟ بجد بتنرفز اوى من الموضوع ده
ربنا معاك
منتظرة الجديد

eng_semsem يقول...

هبه فاروق
اختى العزيزه سلامة قلبك وربنا ما يوجع قلبك ابدا ويارب ادي كل انسان في الدنيا على قد نيته الظالم يخسف بيه الارض والمظلوم يرجع ليه حقه
تقبلي تحياتي وشكري على متابعتي وانتظري البوست القادم

eng_semsem يقول...

الغاردينيا
انت مستعجله لسه بدري انا مش عايز اسيب نقطه حتى لو كانت ضدي عشان الكلام ده لما اتحاسب عليه يوم القيامه مكنش اخدت حق فوق حقي
وتابعيني ستجدي الكثير البوست القادم

eng_semsem يقول...

وداد
الاول بالراحه واهدي عليا شويه وما تخفيش البوست القادم هتهدي خالص لحد مرحلة السكون واعتبريه وعد مني وبعدين الخوف على انهيار الزوج واجب على الاتنين لازم يكونوا بيخافوا على بيتهم ويحافظوا عليه وانا كمان اتخنقت منهم واتخنقت من حاجات كتير في الدنيا رابطني من رقبتي
وشكرا على متابعتك وانتظري اجاباتي البوست القادم

eng_semsem يقول...

mena
هي تغني ليا تصدقي فكره اذا كان مره قلت ليها ناوليني المعلقه سابت البيت وطفشت امال لو قلت ليها غني هتعمل ايه تقتليني
تابعيني البوست القادم اهم جزء في حياتي

eng_semsem يقول...

carmen
لو كل البشر وحش ده شئ ما يخصنيش ما يخلنيش انزل لمستواهم وبالنسبه ليه كل ده ولا حاجه ما عملوش حاجه زي ما انا تعبان هما بيحرقوا في اعصابهم بدون فايده وقضية النفقه اخرها كام ماتين جنيه ولا حاجه يعني هما بيدفعوا للمحامي اكتر من اللي هياخدوه

eng_semsem يقول...

حره من البلاد
الله يعين كل واحد على دنيته ويارب يلاقي فيها جنته وفي الاخره يكون من سكان الجنه
شكرا على متابعتي وانتظري البوست القادم

eng_semsem يقول...

فتاه من الصعيد
نفسها ترجع عشان كده اتصلت وعرفت مكان شغلي وبعتت محامي بقضيه مش فاهم قصدك؟؟؟
والفضيحه اللي جايه هتبقى تمام وهتعجبك جدا
شكرا على متابعتي واوعي تتاخري المره اللي جايه يوم الجمعه بليل

eng_semsem يقول...

rehab
يارب صبرنا كلنا على همنا وفكرة الشقه ناقشنها في بوست قديم هو كان بيقلب الترابزه بس عشان عارف انه مستحيل
تقبلي تحياتي وتابعيني البوست القادم مهم جدا يوم الجمعه بليل

eng_semsem يقول...

miroo
الجديد ممكن ينرفزك لدرجه هتبقي فيها بتضحكي ودموعك نازله وبتسكتي ونفسك تتكلمي وهتضربي كف على كف بس ربنا كبير والمهم كل واحد وكل واحده يفكر هو بيجوز ليه وممكن يعمل ايه عشان يحافظ على بيته
شكرا على متابعتك ومستنيكي ضروري الجمعه بليل الموضوع كبير ويستاهل

بنوتة مصرية يقول...

سؤال يا مهندس اسامة هو انا عشان اقدر افهم حكايتك مع الايام اقرأها من اولها عشان اقدر افهم الموضوع من البداية ؟

eng_semsem يقول...

بنوته مصريه
ممكن تبداي من اول الثامن هتبقي تقريبا معانا ولو قريتي قبل كده هتفهمي احنا وصلنا كده ازاي وليه وهتكوني معايا عايشه الحكايه زي ما انا عيشتها بالظبط
شكرا على تواجدك

Amwaj يقول...

السلام عليكم ورحمة الله وبركاته

أولا أبي أعلق على كل بوست طافني خلال هالفترة بسبب ظروفي

ثاني شي بالنسبة لمشكلتك مع زوجتك وأهلها..

أسامة إذا الأهل هذا تفكيرهم فتأكد إنك بتعاني مع زوجتك إذا استمرت علاقتك فيها

الله يهديهم ويحل مشكلتك معاهم

eng_semsem يقول...

amwaj
يارب يكون تاخيرك خير وتكون ظروفك تمام ومفيش مشاكل ولا حاجه
اما ردي هتعرفيه لما تقري البوست اللي جاي ولا صحيح زمانك قرتيه