الأربعاء، 29 ديسمبر، 2010

كشف حساب

احب اولا وقبل كل شئ اشكر ليكم متابعتكم ليا طول الفتره الطويله وكتير كنت بزعل لما حد كان بيكتب انا اتخنقت وزهقت واتنرفزت وللاسف سمعتها كتير منكم وانا مكنتش عايز اكون سبب لتعبكم وزعلكم وكتير كنت بفرح لما حد كان يكتب انا بدعيلك او حد يدعي ليا في تعليقه وكتير كنت بحس بايد حنينه بتمسح على راسي وكتير الاقي ايد قويه بتشد ايدي وتقولي قوم وكمل حاول تاني وانا شفت فيكم حاجات من كلامكم وده مش نقد بس مجرد اني احاول افهمكم وياريت مفيش حد يزعل مني او يزعل بسببي لاني خلاص عديت كل اللي فات ورايح على بكره ودايما والدي يقولي ماتقلقش بكره احسن من امبارح .
محتار ابدا بمين بس هبدا باختي كارمن والحب الجميل شفت في كلامهم رقه واحيانا بيكونوا زياده عن اللزوم وحسيت اني تعبت الحب الجميل معايا كتير ودموعها نزلت بسببي بس في الحقيقه هو بسبب ناس تانين ممكن بسبب مراتي بس برده في جرح جديد حسيت بيه في كلامك اما اختى الكبيره جايدا انا متاكد انك ام رائعه وقريبه جدا من اولادك ومرتبطه بيهم اكتر من زوجك حسيت في كلامك بحنية قلب ام بجد اخي سواح في ملك الله بتحاول تبعد قلبك قدر الامكان عن التدخل في اتخاذ القرارات وتحاول يكون قرارك من عقلك بس بتدور على الحلول المنطقيه والصحيحه وبتقول اللي انت شايفه صح ومش بتشغل بالك باراء الناس ويمكن يشاركك شويه في كده الدكتوره ولاء صلاح بتحب تبعد قلبها عن كل احكامها وكلامك كنت بحس كانك بتديني دوا بكلماتك عشان اتعالج من حكايتي اما افروديت واضح انها بتعاني من ثقه في النفس احيانا بتغرقها لاني كنت حاسس انها لو شافتني هتقلي يا ابني ارحمني وخلصني وطلقها وكانت معاها وداد من زمان وهي بتقول مفيش امل بس لازم برده نحاول يمكن الوحش يتغير ويتحسن اختي ومش عارف ليه حسيت انها اختي الصغيره حره من البلاد سامع في صوتها مجاهده صغيره الام اوطانها طابعه على صوتها بس ما تقلقيش القدس راجع لينا ولو بعد حين اما خواطري مع الحياه كنت حاسس انها شويه وهتقولي لو سمحت وسع شويه عشان اشوف القصه كويس كنت حاسس انها ماشيه جنبي ومعايا في كل كلمه اما رحاب صالح ياترى الجو عامل عندكم ايه انا سامع ان في مطر كتير واضح انك بنت اصول ووالدك راجل بحترمه وانت بتحبيه قوي tears انت الوحيده اللي هكتبك بالانجليزي لانك ليكي شخصيه قويه في ردك وبتحاولي تخفي اي ضعف مع اني شخصيا بحب الضعف في الانثى وبحس انه من صفاتها الطبيعيه وده كان واضح في كلامك اللي كانت واخده شكل ايجابي وبتبعد عن حاول وجرب والكلمات الضعيفه امواج الكويت كليتك شغلتك عني ورجعت تاني تحاولي ترجعي اللي فاتك خلي بالك في المستقبل اللي بيضيع من العمر مش هيرجع تاني شهرزاد اختي الكبيره اللي كنت حاسس انها خايفه عليا بمزيج من خوف الام والاخت وكانت بتقرا بقلبها كلماتي قبل ما تترجمها بعقلها وترد بالمفيد اما هبه فاروق وصلتي متاخر بس عوضتي كل اللي فاتك وكان حضورك ليه بصمته معايا واندمجتي جامد مع الحكايه وقلبك الطيب واضح انه بيتعبك وممكن يسبب جرحك اما اختى العزيزه الغاليه اللي بجد حاسس بقلق عليها موناليزا ليه جرحك واخد كل ده من وقتك لازم تقومي وتفوقي وتكملي حياتك النهايه مش نهاية تجربه بالعكس ممكن نهايتها تبقى بدايه جديده لدنيا جديده اخرجي من الماضي وعيشي لبكره صدقيني انا اكتر حاجه كانت بتتعبني لما كنت بفكر في اللي فات وانا رميته وكان فاضل منه حبة حاجات صغيره مع نهاية كتابتي في البوست اللي فات راحوا خالص وانتهوا ارجوكي ارجعي تاني لنفسك .
صديقي ابو العريف ومره ظهرت غير معرف واضح بغض النظر عن شخصيتك انك اليومين دول عندك تردد كبير في حياتك اختار طريقك وعيشه وربنا يكتب ليك الخير وصاحبي دكتور هيثم انا قلتلك ردي على كل كلامك وراي فيك من زمان مش لازم افضحك قدام الناس دكتور نور انا عايز اعرف انت مين لاني حسيت بعقل متزن جدا واعتقد ان سنك فوق الثلاثين فتاه من الصعيد انا حسيت انك مش مصدقه كلامي او عندك احساس اني بخبي رد فعلي بس تاكدي انا معرفش حد من اللي بيحكم وحكمه لو كان مبني على قصه غلط يبقى مش هستفاد منه حاجه وهي ده الحقيقه الكامله لادق تفاصيلها اما نهى صالح انت كان نفسك تدافعي عنها بس هي لم تعطيكي تلك الفرصه بس صدقيني انا مش كاتب الكلام ده لاني بحارب المراه بالعكس لاني بحبها ونفسي تكون احسن مما نتصور لاني شايف انها اساس البيت وهي اللي بتشيل هم كل اللي في البيت شيرين سامي بتحبي الحياديه وتجاوبي على قد السؤال وما تسبيش حاجه تتوقعيها بس الحقيقه بتحبي تشوفيها وتحكمي عليها .
انا شفت فيكم شخصيات متميزه كلكم عايزين تعملوا الصح في حياتكم وتقولوا الصح ونفسكم تساعدوا اي حد محتاج لمساعده وفعلا حسيت اني وسط اسره مكتمله بتفكر في مصلحة الفرد والمجتمع ممكن تكون رؤيتي لكل واحد فيكم مش كامله او فيها غلط بس كلامكم اللي كان طالع من القلب شجعني اني اكتب البوست الغريب ده بس انا كنت عايز اقول بجد شكرا انتم ساعدوني في الخروج من الحفره وكل واحد فيكم كان بيشد فيا عشان ينقذني واحب اهنيكم لانكم اخرجتوني بنجاح ولو كلامي على حد هيزعله مني ياريت تسامحوني انا حبيت اقول انا شايفكم ازاي في عيوني وكنت بقرا كل تعليق بمنتهى التركيز لاني كنت فعلا بستفيد منه بشوف اخطائي القديمه وامتى كنت غلط وامتى كنت صح وامتى انا ضيعت نفسي واحسن ما حصل ليا في 2010 اني قابلتكم وعرفتكم ويارب تكون سنة 2011 عام الفرح والسعاده وتحقيق الاحلام وكل واحد فينا يحقق طموحاته ويلاقي كل اللي نفسه فيه واسمحو ليا اسيب صورة بنتي شويه
كل عام وانتم بخير جميعا
 

هناك 46 تعليقًا:

سواح في ملك الله- يقول...

اخونا الطيب
الباشمهندس اسامة
انا علي فكرة مبسوط جدا ان لسة الدنيا
فيها ناس محترمين وطيبين امثالك
ووبعدين لو دورنا في القران
هنلاقي انبياء ورسل من عند ربنا كانت زوجاتهم ((ضرب الله مثلا للذين كفروا امرأة نوح وامرأة لوط كانتا تحت عبدين من عبادنا صالحين فخانتاهما فلم يغنيا عنهما من الله شيئاً وقيل ادخلا النار مع الداخلين" التحريم آية "10".
هم كانوا صالحين وزوجاتهم لم يكن صالحات
فلا تتغير اخي
ولاتعامل كل النساء بعقدة سابقتها
المهم ان تضع انت الاساس فيما هو قادم
وكن مبادرا ولاتكن ردة فعل
فليست كل النساء يشبهن بعضهن
والبيت والاسرة هم عامل اساسي
تحياتي

Dr/ walaa salah يقول...

جميل كشف حسابك ده

لكن متستغربش من رد فعل اي واحد فينا

ورا كل شاشه يا اسامه انسان عاش جرح من نوع معين

وكان بيرد عليك من تجربته مع الجرح ده


لما قلت اني بحاول ابعد قلبي عن قراراتي واحكامي

يمكن لان في يوم من الايام كنت بعمل العكس

وخليت قلبي هو اللي يتحكم في اي قرار اخده

لكن للاسف الناس مبتقدرش ده

واكتشفت ان العقل مع قلب ميت هو اللي بيعجب الناس

عشان كده كنت بكلمك بعقلي وبس

وصدقني ده بينفع اوقات كتير

ماهو لازم تريح قلبك شويه وخصوصا مع بعض الناس

سنه سعيده عليك يا اسامه وان شاء الله تنحل فيها كل مشاكلك

أم هريرة (lolocat) يقول...

السلام عليكم ورحمة الله

اسال الله لك اخى بداية جديدة ان شاء الله
جزاك الله خيرا على اهتمامك باصدقاءك وحبك لهم وحرصك على شكرهم بارك الله فيك

لك ارق الامنيات الطيبة بالسعادة ودعواتى لك ان يبارك لك فى ابنتك وينبتها نبات حسن ان شاء الله

تحياتى لك وتقديرى

الحــب الجميـــل يقول...

ايش عرفك انى دموعى نزلت ؟؟
ههههههههههه
تعليقى كان مبلول ولا ايه ؟؟
ههههههههه

والله احساسك صح يا اسامه
وبالذات اخر بوست اللى فيه صورة بنوتك الجميله ملك اسامه
فعلا بكيت صعب عليا حال ملك وحالك
ربنا يخليهالك يارب
وتشوفها عن قريب يارب
ويهدلك الحال يارب

والسنه الجديده تحقق كل اللى نفسك فيه وتتمناه وتشوف بنوتك القمر

كل سنه وانتى معانا
كل سنة وانت طيب
عام جديد سعيد عليك وعلينا
ياااارب

قول يارب

*****

غير معرف يقول...

مش عارف ليه يا مان حسيت انك شايف كل واحد بيتابعك من ورا الشاشه بتاعتك كانه معاك بالظبط

يمكن انا فعلا معاك بس برضك حكمت علي وحللت شخصيتي اليومين دول من خلال تعليقاتي ومن ورا شاشتك

واحيانا بحس ان الشاشه دي بتبقي اصدق من الواقع مع ان ناس كتير هتختلف معايا

بس انت قلت من خلال الشاشه اللي مقلتوش مباشره



ربنا يوفقك ف حياتك اللي جايه

ويسعدك

وافضل عالاقل حد بتفتكره بالخير

eng_semsem يقول...

سواح في ملك الله
الف شكر على كلامك الجميل ويارب اكون استحقه بجد وانا لم تغير نظرتي للحياه قسوتها وربما عندما ذقت المر سوف استمتع من بعدها بطعم الحلو واعلم جيدا ان هناك من النساء من يرفع لهم القبعات سواء مع ازواجهم او في بيتهم او مع اولادهم ويارب الاقي واحده من دول
كل عام وانت بصحه وسعاده

eng_semsem يقول...

dr/walaa
صدقيني انا مش شايف في ردودك عيوب انا كل قصدي اللي انت قلتيه دلوقتي ان قلبك تعبك وعشان كده بتحكمي عقلك وصدقيني مش وحش لانه بجد عجبني وساعدني وبسمع ليه وبستريح معاه وغلطات القلب اكتر واكبر من غلطات العقل واتمنى لك سنه سعيد مليئه بالانجازات الشخصيه ويوفقك في حياتك العمليه وبجد انا بكون مبسوط جدا لما اشوف تعليقك

eng_semsem يقول...

ام هريره
انت زعلتي عشان ما جبتش اسمك ؟؟؟
بس انا حسيت ان ده اريح ليكي وانك مش هتحبي حد يحكم على شخصيتك وبحس باحترام كبير فيكي وانك بتحبي تكون مش ظاهره على قد ما بتحبي تكوني مؤثره في حياة الناس ولو بجد زعلانه قولي ليا وانا هقدم اعتذار قدام الناس كلها
كل عام وانت بخير وسعاده

eng_semsem يقول...

الحب الجميل
اولا التعليق مكنش مبلول كان منقط كتير وواضح دموعك وظاهره فيه وعلى قد ما هي رقه منك على قد ما كانت بتنزل على خدودي تخليني اصلب عودي واقوى واقف واقول بكره احسن ويارب تكون ايامنا في 2011 كلها سعاده وامل وفرحه ونكون برده مع بعض كلنا اسره بتحب بعض بجد ومن غير هدف غير اننا بنحب بعض

eng_semsem يقول...

غير معرف
صديقي العزيز احنا واحنا بنكتب مش هنعرف نكدب لاننا مش هنتجمل علشان حد مانعرفوش ولو فضل كل واحد مستخبي ورا كلمات مش من قلبه هينسى نفسه وبجد انا لاقيت صراحه ووضوح من الناس عشان كده انا اتكلمت معاهم بكل صراحه ويارب ما يعتبروهاش بجاحه وما تقلقش انت مش حد كويس بالنسبه ليا
لا في ناس كتير كمان بتشوفك حد كويس المهم انت تشوف نفسك كويس
كل عام وانت بخير

أم هريرة (lolocat) يقول...

هههههههه
ليه اخى قلت انى زعلانه والله بالعكس انا اليوم سعيدة جدا بكلامك حسيت انك ارتحت من هم كنت حبسه فى قلبك و باصدقاءك حواليك شعرت بدفا الاهل بيهم

يا اخى انا مش صغيرة عقل اوى كده اكرمك الله

وبعدين لما الصديق يقدم نصيحة او دعاء طيب لصديق مش بيبقى مستنى جزاء او شكر عليه يكفى اننا نطمئن على بعض بنفوس صادقة ونتمنى الخير لبعض

ويا اخى انا اللى اشكرك على كلمتك انى ممكن اكون اؤثر فى حياة الناس ياااااااااه والله كلمتك دى تاج يوضع على الراس اشكرك عليها لان ده احساسك
ويارب يخليلك بنوتك ويبارك لك فى عمرها وفى دينها وييسر لك حياتك كلها فى سبيل الله تعالى

دعائى لك بالخير دائما

eng_semsem يقول...

ام هريره
كده الواحد ممكن ينام مستريح لانه حاسس انه مش مزعل حد منه وربنا يكتب لينا ولكل المسلمين الخير وربنا يدي كل طالب حاجه طلبه ويوفقنا على فعل الخير

هبة فاروق يقول...

قلوبنا معاك وحوليك ويارب تبقى سنة سعيدة وتعوض كل اللى فاتك
ملحوظة اظفر بذات الدين وتأنى فى الاختيار وان شاء الله ترزق بزوجة صالحة تعوضك ما فات
وكل سنة وانت طيب يا اخى الكريم

eng_semsem يقول...

هبه فاروق
كل سنه وانت طيبه وسعيده وملحوظتك ده خلاص بقيت اساس حياتي وربنا يهدينا ويحقق لينا امانينا دمتي بخير

موناليزا يقول...

المفروض ازعل من رسالتك ليا لانى بكده ماحققتش مرادى من التعليق عندك وطبقت المثل
"جيبتك ياعبد المعين تعينى لقيتك ياعبد المعين عايز تتعان"

بدل ما انا اللى أخفف عنك على اعتبار انى خبرة فى هذا المجال:)
ألاقيك أنت اللى بتهون عليا وبتشجعنى
طب أقول إيه أنا دلؤتى!!

بس تعرف حقيقى أنا سعيدة لاجتيازك هذه المرحلة وانك خرجت كل اللى جواك بكتابتك على المدونة وانك حسيت ان المدونين بجد اسرة واحدة واننا قدرنا نساعدك ولو حتى بتعليق بسيط

وبحييك كمان على فكرة الموضوع
حسيت فيها بحاجة مش موجودةكتير
بس مش عارفة ألاقى لها مسمى
وهى انك تعبر عن اللى علقوا عندك وعرفتهم من خلال كلماتهم فقط زى ماتكون عارفهم من زمان وشوفتهم كمان:)

دعواتى لك دائماً بكل الخير

carmen يقول...

استاذ اسامة
حقا ونعم الصديق والاخ والانسان
ادام الله عليك رجاحة عقلك وطمنأن قلبك
تحياتي وخالص احترامي

الغاردينيا يقول...

يااااااا سلام !
وانا ليش ماذكرتيني ؟؟
مش عاجبين سيادتك ؟
هههههههههههه بصراحة احسن
حسيت كذا اني الشخصية الغامضة او يمكن الشخصية اللى خلف الكواليس وانا بحب دائما اعيش الحالتين :)

كل عام وانت بخيرررررر
طب صعب اقولك انسي لان النسيان مش سهل بس بقولك اسمح للوقت ينسيك والحياه لازالت ... حلوة :)
وربنا اذا احب عبد ابتلاه وانت محبوب من عند الله واطيب الامنيات بسنة السعيده ,

Dr : Nour يقول...

الســلام عليكم و رحمــة الله و بركاته

بداية و بصراحــة
مش عارفــة ليه ضحكت من كــلامك !!
ضحكت أوووى كمان

أنا بأخص بالكلام رأيك عنى أنا شخصيا
بمعنى إن كلامى لا يخص أحد غيرى

هو يعنى لا يجوز أن الإنسان يفكر بعقلانية و إتزان إلا إذا كان فوق الثلاتين ؟؟؟؟

أعرف كتير زملاء و أصدقاء
و ما شاء الله على فكرهم و دماغهم بجد
بالرغم إن سنهم لا يتجاوز العشرين إلا بقليل ..!!

أعتقد إن الإنسان الواعى الذى يدرك أهدافه و ينظم حياته منذ نعومة أظافره
لابد أن يكون مميز بفكره على الأقل
لأنه لا يترك شىء للصدف و لا يترك الأحداث هى التى تحركه

و حتى لو حدث هذا
حتما سيستفيد من أى تجربة
و ستكون له بمثابة عبرة يضعها نصب عينيه حتى لا يقع فى الخطأ مرة آخرى

خلاصــة الكــلام
بالرغــم أنى حنونة و طيبة فى معاملاتى
إلا أنى ساعة الجد عقلانية لأبعد الحدود
و قادرة على إتخاذ القرار الصائب فى وقته
ولا أندم أبدا بفضل الله

موجــز كلامى
أنه ليس بالســن
فهناك الكثير من الشخصيات السلبية التافه و الهوائية الغير قادرة على أخذ قرار ولا تحمل المسئولية و بالرغم من هذا تجدهم تخطو الثلاتين و أحيانا الأربعين

شكرا جزيلا لك على كلماتك الطيبة

و عام سعيد عليك إن شاء الله

دمت بســعادة و راحــة بال

حرّة من البلاد..! يقول...

أخي أسامة
والله سعدت انك اعتبرتني أختك الصغيرة
مع انه انا ممكن أكون مش صغيرة كثيرة
والله احسست بك وبالظلم الواقع عليك وانا عايشت الظلم في شكل مختلف وكنت في مرحلة ما ـضعف لكن الحمد لله ايماني يقويني وانا كنت انظر لصبرك على البلاء باعجاب وانا حقا كنت صادقة عندما قلت لك اني ادعو لك ولا انساك في صلاتي ولا انسى ابنتك الجميلة
اوعى تشيل صورتها من المدونة
افتخر حقا ان تعتبرني اختا لك
اتمنى لك الخير وتابع حياتك بارادتك
الصلبة هذه
تحياتي واخلاصي لك

dr haitham simooooooooooooooo يقول...

انا زعلان جدا ومش مسامحك خالص لانى اكتر واحد كنت خايف عليك وع بنتك دى اخرتها عاوز تفضحنى ياخى داحنا زملكاوية زى بعض وانشاء اللة هنكسب

eng_semsem يقول...

موناليزا
مين قال انك ما ساعدتنيش واني فعلا ما استفدتش من كلامك وبعدين هو انا ما ينفعش اساعدك انا كمان احنا هنا عشان نساعد بعض وانا هكون اسعد لما تكوني خرجتي من حالتك وانا بجد حسيت ان في اسره تانيه حواليا بتحاول تخفف عني وصدقيني انا كمان نفسي اكون جنبك واساعدك على قد ما اقدر وتعليقك التاني هعتبره رساله وتستاهل انها تكون بوست بس انا لازم اسمع كلامك وخلاص مش للنشر
كل سنه وانت بصحه وسعاده ويارب تكون نهاية احزانك والامك في 2011

eng_semsem يقول...

carmen
ياريت اكون اخ وصديق مخلص وانسان بجد واعيش وسط بني ادمين يحافظوا على بعض ويخافوا على بعض ويساعدوا بعض وربنا يسعد كل الناس ويفرحهم وتكون ايامنا كلها احلى في السنه الجديده

eng_semsem يقول...

الغاردينيا
انا اقدر انساك يا عسل وبعدين ده انت تملي العين وتنوري مدونتي باسمك بس ليا سبب مقنع اني مجبش سيرتك ولو مش مقتنعه قولي وانا اعتذر ليكي هو انت احلامك الغريبه خفت اكتب عنك ما تعرفيش تنامي وتشوفي احلام مش كويسه وتتعبيني معاكي في تفسير الاحلام وبعدين انت في بيتك بتخبطي في كل الدنيا لو كتبتك هنا في المدونه تخيلي الحوادث اللي ممكن تحصل في انا وفي اصحابي وكتير كنت بشوفك بتحاولي تفرحني وما تبينيش اللي جواكي هعرفك ازاي وانت بتخبي
كل سنه وانت طيبه واوعي تكوني زعلانه مني ويارب تكون سنه سعيده عليكي وعلى الاسره وعلى كل اهالينا في البلاد العربيه كلها

eng_semsem يقول...

dr nour
حكايتي سنك ده زعلتك انا عارف البنات بتزعل من حكاية عمرهم ده حتى ماما بتزعل قوي لما بنقولها انت بقى عندك 30 سنه بس زي ما انت قلتي في كلامك في كبار بعقل صغير وفي صغار بعقل كبير بس انا شفت فيكي ثقه بناء على تجربه وحكم باتزان وعقل مسيطر على التفكير بيحاول ما يظلمش حد وانا قلت على سن ردك مش سنك الحقيقي وويارب تفضلي حنونه وطيوبه على طول لان هي ده زينة المراه مع عقلك الهادي هتكوني نموذج طيب
كل سنه وانت طيوبه وحنونه ولذوذه كمان وتكون السنه الجديده فيها الفرح والسعاده والاطمئنان

eng_semsem يقول...

حره من البلاد
احنا اتعلمنا الاراده من اهل فلسطين وكنا بنشوف صبرهم والتضحيه بدمهم عشان قضيه مؤمنين بيها وانا اختي الصغيره اقرب واحده ليا في بيتي واسرتي وانا فعلا حسيت انك قريبه جدا مني وبجد مبسوط انك بتدعي ليا وانا برده هسمع كلامك ومش هشيل الصوره ده
كل عام وانت بصحه وخير وسلامه واطمئنان ويارب نيجي زياره عندكم ونصلي في الاقصى ويخرج المحتل في العام الجديد

خواطري مع الحياة يقول...

ايه ياعم
كنت شايفني ولا ايه
ههههههههههه
ايه لدرجة دي كان باين علي ان شوية وخرج من الشاشه
هههههههههه
كل سنه وانت طيب ويارب يحقق كل امانيك وان شاءالله السنه الجايه تشوف بنتك وتاخذها بحضنك وتعرف انك ابوها
اميــــــــــــن يارب
سلامي ليك يااخي اسامه.

eng_semsem يقول...

dr simoo
يعني انت تنرفز كل الناس ومش عايز حد يضايقك وبرغم انك رديت عليا بس برده انا احب انشر ردك الدكتور هيثم قلي مهما هتقول بدام هتكون مبسوط انا هستحملك المهم تكون فرحان يا اسامه صديقي العزيز لم نخطط لنتعرف سويا على بعض ولم تجمعنا مصلحه ماديه ولكن تجمعنا على الخير والبر جمعنا الله في الجنه وبارك لك في اسرتك الجميله
كل عام وانت بخير

eng_semsem يقول...

خواطري مع الحياه
تحياتي الغاليه ليكي انا وصفت شعوري اللي بجد حسيته من كلامك ويارب تكون السنه الجديده كلها افراح ونحقق احلامنا ونلاقي كل اللي ضاع منا
كل عام وانت في صحه وسعاده

شيرين سامي يقول...

بشمهندس أسامه أنا سعيده ان كتابتك لقصتك و تركيزك مع التعليقات أفادك بالشكل الرائع ده و في ناس كتير قدرت تحتويك و تطبطب عليك بكلامها و ناس تانيه أكيد كانت عايزه تقويك
بصراحه أنا كنت في الأول مستغربه انك تحكي تفاصيل حياتك لسببين أولاً لانك هتحكيها من وجهة نظرك ثانياً لانها أسرار بيوت و خفت ده يضر بحياتك
بس الواضح بقى انه العكس وان الفضفه دي شالت عنك كتير و ادتك دفعه للأمام
لأنك انسان طيب و اللي فقلبك على لسانك ان شاء الله ربنا هيعوضك خير و اعتبرنا اخواتك و دائماً جنبك
كل سنه و انت طيب و بألف خير

eng_semsem يقول...

شيرين سامي
اختي العزيزه انا استفدت جدا بوجودكم جنبي وفعلا ردود افعالكم اثبتت اني في حاجات كنت مقتنع انها صح وانتم قلتم صح وحاجات كانت غلط وانتم قلتم غلط سواء عليا او على مراتي بس ففي الاخير انا كنت بدور على الفايده وانا احب اوضح النقطه المهمه اللي قلتيها انا قصتي من اولها لاخرها بقول يا اخواني الرجال يا اخواتي البنات اوعو تدخلوا حد في حياتكم وبيتكم لانه مش هيحل مشاكلكم وهيعقدها واللي شجعني اني اكتبها انها انتهت ومعدتش اسرار لان كل اللي حواليا تقريبا عرفها اما حكاية بتحكي من وجهة نظرك انا اتجنبت النقطه ده باني حكيت ما لا يقبل النقاش ومفيهاش اختلاف في وجهات النظر اما اللي ممكن نختلف فيه اكيد بتبقى حاجات صغيره ومتهدش بيت
وكل عام وانت بصحه وخير وسعاده وبجد احساس جميل اني تكونت ليا اسره هنا

شهر زاد يقول...

أسامة
انا وقفت وصفقت للبوست ونسخت منو نسخه لو سمحت لي وحطيتو في أجندتي
شهادة لينا كلنا ان حنا عيلة وحده ودا لناا كنت بتمناه فعلا
اناا فرحانه لك قوي ومقدراك قوي علشاان انت اانسان وعمري الانسان ماينخ ولا يقومش
بالعكس انت الي علمتناا نفصح على همومنا بكل حرية
وتكون مدونتنا مبكى لنا ولااحزان

اسامة ربك كبير كبير قوي وبعوض بخير خير قوي
اوعى في يوم تظن ان ذي تجربة فشلة ابداا علشان الحاجة الي نتعلم منها متبقاش فشلة بالعكس دي نجحه مية مية
انت تعلمت منها وعلمتنا معاك
وشاركتنا في أغلى حاجه عندك هي الذكريات
واانا فعلا بحس بنفس الااحسااس الي حسيتو اتجاهي اانا فعلا اختك الكبيرة وبكلمك بقلب الام الي بتنصح أولادهخليك معنا واوعى تظن انك لوحدك ابدا وانا قلتهالك قبل كده انا معاك بقلمي وقلبي وعقلي وايدي ممدوده لك في وقت ياا خويا الصغير
خلي بالك من نفسك وربنا يفتحها في وشك

richardCatheart يقول...

ازيك يا سمسم يارب ديما تكون بخير وسنه سعيده عليك ربنا يبدلك الحال لاحسن ان شاء الله

سعيده بأحساسك انك وسط اخواتك اللى منهم خوف وحب دون اى مصلحه
ربنا بيعوض ديما ويارب يجعل عوضك فى الخير

ربنا معاك وديما نسمع عنك كل الخير

eng_semsem يقول...

شهرزاد
اختي الغاليه مفيش حاجه تغلى عليكي وانا تحت امرك المدونه وصاحب المدونه وصدقيني انا قلت اللي حسيته من قلبي وشرف ليا انك تبقي اختي الكبيره في المقام انما السن اخرك 21 سنه زي ماما مابتكبرش عن كده وانا اخدت من فشل التجربه نجاح المعرفه واتعلمت اللي لو كان فضلوا يعلموه ليا مية سنه مكنتش ممكن افهمه وكفايه عليا اني قابلتكم هنا اكبر استفاده ليا ويارب نملى مدونتنا بافراحنا زي ما تشاركنا الاحزان وتكون سنة 2011 عام السعاده والحب والاطمئنان وكفايه عليا اني احس ان في حد واقف جنبي

eng_semsem يقول...

RICHARD CAT HEART
انت نورتيني برغم انك مش موجوده بقالك كتير بس كان نفسي تكوني معانا من زمان اهلا بيك وكل عام وانت بخير

فتاه من الصعيد يقول...

ليه بس كده :(

انا مموش موش مصدقاك لا اطلاقا ..

بمعنى اني ماحبش احكم وانا سامعه من طرف واحد

مبدئيا انا بقلق لما حد يكتب قصته .... محدش بيشوف نفسه غلطان ..

انت مثلا المحاسب بتاعك خلى مرتبك 200 جنيه ....ماخدتش بالك ان موقف زي ده كان نوع من التلاعب

هي تصرفت بعدها بنفس الاسلوب واكثر حده لما نصبتلك كامين ..

انا مش بلومك ولا بقول انت غلطان .... انا عارفه ان هي اللي ابتدت سكه القضايا .... بس صدقني محدش مابيغلطش في القصص دي ..

والنهايه اتكتبت بينكم خلاص ..... واتمنى تقدر ترجع لبنتك تاني

ارجو ان كلامي مايكنش موجع ..... وصدقني انا متعاطفه معاك وشايفاك انسان طيب ومابتحبش الشر

تحياتي

eng_semsem يقول...

فتاه من الصعيد
لا افترضي اني غلطان كل غلط الدنيا ده مبرر انها تسجن جوزها او ما تسلمش على ستي او قصة الخمسين جنيه او تحكي لكل الناس على اسرار بيتنا وحكاية المرتب انت شايفه انها في الاساس تستحق نفقه بحكم الدين الناشز ملهاش نفقه وهي بتطلب حق في الاساس مش حقها وانا مقلتش اني كامل ومفيش مني غلط انا قلت على اخطائي وذكرتها وبعدين انا جايب شهود من اهلها بيقولوا ان هما غلط اختها وابن عمتها وعمها وشيخ الازهر اللي قعد ما بينا متهيالك دول هيقفوا في صفي ليه وان كنت انا استاهل كل ده دول بيدافعو عني ليه والمفروض انهم يدفعوا عن بنتهم
وعلى العموم كل عام وانت بخير ويارب ماتشوفيش الظلم اللي انا شفته بعنيا

re7ab.sale7 يقول...

ابو ملك....
كل سنة وانت طيب وبخير وسعادة ومستريح البال والخاطر والضمير ...
ابو ملك مش هقولك تاني اسامة ما دمت عرفت ملك....
شكرا بجد علي كلامك وده من اصلك الطيب وزوقك واحنا الحمد لله ناس بسيطة بس نعرف الاصول فعلا ....وانا بح ابويا جدا وامي جدا واهلي جدا .....وبعرف الاصول عشان كدة استغرب الناس اللي انت وقعت فيهم ....خصوصا ان اهل كفر الشيخ عموما ناس بسيطة ومبتحبش المشاكل ويعرفوا الاصول كويس ...عموما ربنا يكرمك ويعوضك وشكرا علي كل كلامك تاني والجو علي فكرة عندنا وحش بس مش وحش زي المرة اللي فاتت يعني مطر خفيف علي برد وريح ....بس احسن المرة دي ....وعندي برد شنييييييييييع ...
علي فكرة كلامك بجد خلاني اعرف الاس دي اكتر , والحمد لله اننا افادناك وقدرت تلاقي صداقات ولو حتي من بعيد لبعيد...
صدقني الامور هتتصلح وان شاء الله ترجع تاني وتاخد بنتك في حضنك وتيجوا عندنا بلطيم اعزمك علي غدوة سمك ....بجد مش هزار وانا عند وعدي ما دمت حية ....بتمنالك كل خير ويارب يوفقك للخير دايما

eng_semsem يقول...

rehab
الف سلامه عليكي من البرد وتقومي لينا بالسلامه وربنا يسهل والجو يتعدل وانا اعرف كتير من اهل كفرالشيخ انا عشت فيها فتره كبيره واللي كان بيقفوا جنبي من هناك هما برده اهل كفرالشيخ وانا مش هكرها عشان واحد فيها لاني ياما عيشت ولعبت واكلت وشربت فيها وبالنسبه لعزومة السمك انت دبستي نفسك ومش هسيبها وياريت يكون جنبها اسبوع في شاليه على شاطئ الامل يعني عشان ناكل السمك على مهلنا
يارب تكون سنه جديده سعيده على الكل وتكون مليانه بالبهجه والفرحه والسعاده دمتي بخير وشفاكي الله

re7ab.sale7 يقول...

والله انا عند وعدي يا ابو ملك
وان شاء الله تيجي وتعرفني بوجودك وصدقني هتتبسط اووي سواء في شاطيء الامل او النرجس او الزهرة او الفنار .....هنعملك بروجرام كويس جدا ومش سمك وبس ...والشالية وكله علي حسابنا ما دمت هتشرفنا انت وملك ان شاء الله.....
والله ما بهزر واي حد ينورني بس يقولي قبلها عشان لو عندي شغل اكون بس عاملة حسابي ....
تنوروني كلكم

eng_semsem يقول...

rehab
اختي العزيزه اكيد لو ليا عمر هنزل بلطيم وشرف ليا اني اكون في استضافتك ويارب تكون ملك معايا واعتبريه وعد مني اول ما تكون معايا في اقرب فرصه هكون في بلطيم ويا عالم يمكن نجرب الشاطئ الجديد هما استقروا على اسمه خلاص شاطئ الفيروز
كل عام وانت بخير وسعاده

وداد يقول...

بوست جميل جدا

وصورة بنوتك اجمل

ربنا يخليها لك

بس انا بعد ما تاكدت ان دي قصة حقيقة لأني صراحة مكنتش متوقعة او مصدقة انه في واحده تتصرف التصرفات دي

قلت لازم تطلقها من الاول ومع اول موقف

على كل حال انت اكيد دلوقتي افضل من قبل

وربنا يسعدك ويفرح ايامك وتحقق احلامك

تحليلك لكل شخصية دا دليل على انك انسان دقيق وبتسمع لكلام الآخرين بإهتمام وحرص

كل سنة وانتي طيب اخي اسامة

المصوراتي يقول...

لسه الدنيا بخير و انت من اخيارها ان شاء الله


جزاك الله خيراً

اتمني ان تقبل مروري الاول بمدونتك
و يشرفني ايضا ان تزور مدونتي المتواضعه ( عيوني كاميرا )

تحياتي

زهرة(جنى)الاسلام يقول...

السلام عليكم
انا كنت متابعة بس مكنتش بكتب تعليق
لعدم وجود وقت ليا
لكن مش لاقية تعليق اقولة

eng_semsem يقول...

وداد
انا افضل بكتير جدا وخصوصا معاكملاني ده كانت اهم مراحل علاجي لنفسي اني اسيب كل الماضي
يارب تكون سنه جميله للجميع نحقق فيه كل احلامنا

eng_semsem يقول...

المصوراتي
اهلا بيك وانا فعلا زرت الدونه وشفت فيها شعراء عظام

eng_semsem يقول...

زهرة الاسلام
انت فين من زمان مش بتظهري ولا بتكتبي على العموم نورتي
وكل سنه وانت بخير وصحه وسعاده