السبت، 18 ديسمبر، 2010

حكايتي مع الايام (12)

سافرت يوم السبت وانا مش عارف ايه اللي هيحصل ورحت شغلي وعشت مستني اللي هيحصل لحد يوم الاربعاء اتصلت بابوها وكلمته ايه الاخبار والدنيا عامله ايه قلي عايز اتكلم معاك قلت ليه وماله وانا كمان عايز اتكلم معاك ايه رايك نقعد في حته بره البيت ونقعد براحتنا رفض وقلي وهتفرق معانا ايه تعالى على البيت قلت ليه وماله انا هنزل النهارده واجيلك بكره الصبح ورحت تاني يوم سلام عليكم وازيك وبدا الكلام انا عايزك تجيب شقه هنا في كفرالشيخ قلتله بس انا شقتي في القاهره وشغلي في القاهره قلي وايه يعني بيع الشقه اللي هناك وهات شقه هنا سالته وبالنسبه للشغل قلي تعالى اشتغل هنا في كفرالشيخ قلت ليه بس صعب اني الاقي الشغل اللي انا عاوزه هنا قلي خلاص اشتغل هناك وابقى تعالى هنا خميس وجمعه قلتله وده منطق يعني انا يبقى عندي شقه وشغل وادوخ نفسي طيب ليه قلي هو ده اللي عندي قلت ليه والله يا عمي احنا عندنا هنا بيت لو انا كنت ناوي اقعد هنا في كفرالشيخ كنت شطبت شقه ارخص من اني اشتري شقه واشطبها بس موضوع كفرالشيخ مقفول بالنسبه ليا وانا قبل ما اخش بيتكم واشوف حد منكم الوسيط مابيني وبينكم قلكم شقته في مصر واقامته وشغله هناك صح قلي هو ده اللي عندي عايز بنتي جيب ليها شقه في كفرالشيخ قلتله بالنسبه لمراتي شقتها موجوده ومفتوحه وترجع بيتها في اي وقت سلام عليكم.
ومشيت على بيتنا وحكيت لوالدي اللي حصل والناس اللي راحت معانا اول مره وطبعا لما اتكلموا معاه تاني كان نفس الرد ورجعت على شغلي ومستني الفرج من ربنا وفي ناس قرايبهم عرفوا ان هي غضبانه في بيت ابوها وحاولوا بس مفيش .
وسافرت تاني على شقتي وشغلي وبعد يومين تلاته جت على دماغي فكره ان المفروض ان اقرب واحده لمراتي اختها اكبر منها ب4سنين ومتجوزه واكيد في حوار ما بينهم بس اوصل ليها ازاي وبعد تفكير كان معايا رقم جوزها اتصلت بيه وازيك واخبارك انت مش نازل القاهره قريب قلي هنزل قلت ليه كويس انا عايز اقعد اتكلم معاك شويه وعلى يوم الخميس كان في القاهره اتقابلنا في كوفي شوب اسمها الامريكين في وسط البلد بس جامده على فاكره قعدنا وحكينا وقلت ليه انا قلت بدام انت عارفهم قبل مني بسنين اكيد في طريقه للحل ضحك ما فهمتش قلي هما دماغهم صعبه شويه ومش موجوده وانقرضت من زمان بس ربنا يسهل الحال انا هتكلم مع اختها وهنشوف ايه اللي ممكن يحصل وسلمنا على بعض ومشينا اتصل بيا بعدها بيومين وقلي انا اتكلمت مع زوجتي وهي تقريبا مقتنعه تماما عكس ماكنت متوقع بس انا مش هحكي ليها حاجه وعايزك انت اللي تحكي عشان لا ازود في الكلام ولا اقلل قلت ليه ماشي قلي تقدر تيجي امتى عندنا في الشرقيه قلتله بكره انت بتخلص شغلك امتى قلي على 7 قلتله خلاص هاجي على 8 ونزلت قابلني في الموقف ورحنا على البيت مراته حضرت العشا وكان تمام لان هو لسه راجع من شغله وانا كمان يعني رز وطبيخ ولحمه وصنية بطاطس اللي بموت فيها وكلنا واول ما بدات اكل كانت هي واقفه قلتلها ممكن تناوليني المعلقه مدت ايدها واخدها قالت ليا لامؤاخذه قلتلها ولا يهمك هي ده سبب المشكله وضحكنا انا وجوزها خلصنا اكل والفاكهه وعملت الشاي ونيمت العيال اللي زي العسل وطلعت وقعدنا واتكلمنا وطبعا من ردها بان ان في حاجات كتير هي عارفها اساسا من المصدر مش مني ولا من جوزها وخلصت القعده ان ربنا يسهل وهتكلم معاها وسلمت ومشيت واستنيت يوم يومين  ثلاثه واتصلت بيها خير ايه اللي حصل قالت والله انا مش عارفه اقول ليك ايه بس انا ما عرفتش اعمل اي حاجه واصبر وربنا يسهل وتتحل واتصلت بجوزها قلي يا سيدي اتكلمت مع اختها وقعدت تحكي معاها وازاي وانت غلطانه وهو غلطان بس الامور ما تستاهلش وفكري في بيتك واللي في بطنك وبعد ماقفلت معاها بكام ساعه اتصل ابوها بيها وقلها ازاي تدخليه بيتك اساسا وتاكليه عندكم ولو ادخلتي في الموضوع ده تاني مش هدخلك بيتي قلتله لا يا عم خلاص هو انا هنقل مشاكلي ليكم لا خلاص خليها بعيد وانا شاكر ليكم محاولتكم .
وحاول ناس يتدخلوا كان من ضمنهم اتنين اصحاب والدي في الشغل منهم واحد عنده 6 بنات ومتجوزين وهو تطوع وقال انا ادرى واحد بالمشاكل ده واتصل بيه واتكلم معاه مره واتنين وحاول يوصل معاه لنتيجه وساب المواضيع عايمه ومفيش حل وصلوا ليه وبعدها بفتره اتكلمت مع مراتي على الموبايل بعد ما اخيرا فتحته وكلمه كده على كلمه كده اديتني رقم ابن عمتها وقالت هو قريب من بابا قوي كلمته واتناقشنا وواضح ان هي كانت حكيت ليه لاني سمعت حكايتها في كلامه وقال ليا انا هتصرف ان شاء الله عدى يوم اتنين تلاته اتصلت بيه قلي انا مش عارف اقلك ايه بس انا اتكلمت معاه وفي الاخر اتخانقت معاه وقلت ليه انت ظالم بنتك قبل جوز بنتك وانا لو مكانك اصبر شويه وما اتكلمش معاهم خالص .
وكان صاحب والدي اللي اتدخل ساكن جنبه اخو حمايا العزيز اتكلم معاه والبيوت مليانه واحنا مفروض نساعدهم مش نهد بيتهم وكده وبعدها بكام يوم قال ليه انا اتكلمت معاه وكان رده انا ما ادخلتش ليك في جوازات بناتك ملكش دعوه ببناتي ويبقى الوضع على ما هو عليه لحد العيد الكبير ما جه .... 

هناك 49 تعليقًا:

Tears يقول...

انا مش فاهمه انت مطوووووووول بالك اوى كده ليه ما خلاص خليهم يشبعوا ببعض و يفرحوا

اصلا مش ح ينفع التعايش بعيلتها دى و لا بعقلها الصغير

سواح في ملك الله- يقول...

معلش يااخونا اسامة

دي مراتك
يعني ابن عمتها ايه وابن خالتها ايه
مينفعش طبعا الكلام ده
وباي حق اي مخلوق علي الارض غير الزوج
والاخوات والاب ان امكن
يتدخل مابين راجل ومراته
وليه هي قاصدة تهينك وتخليك تكلم ده وده
مش هي اللي عقدت الامور
تحلها هي
وبابا مين
الاب اللي
مبيهموش مصلحة بنته
خليها عنده يشيل همها هوه
منتزعلش مني
يااخويا الطيب
السيدة الفاضلة دي لو كملت معاك
يااما هتقرفك في عيشتك
يااما هتموتها
والابن المنتظر هيتربي
وانتوا مرتبطين او من غير

karmen يقول...

عارفة انا قهوة الامريكين باكل فيها ايس كريم وانا مستنية الفيلم يبدأ في السينما ^_^
بصراحة يا استاذ اسامة مش عارفة اقولك ايه ربنا يكون في عونك ويهديهالك
تحياتي العطرة

شهر زاد يقول...

باب مقفول
اسمع نصيحتي وابعد شوي ما تلزقش كده كل ما لزقت كل هما هم اتكبروا وعندو استنى شويه واثقل حتلاقي ابوها بيرودها لبيتها
وعلى كل حال الصبر جميل بس انت اصبر
وربنا يفتحها في وشك وترجع لك علشان العيل الي في بطنك
تحياتي

eng_semsem يقول...

tears
عشان خاطر بنتي ومش عايز بيتي يتهد وهو لسه مفيش حاجه تستاهل طلاق كلها امور ممكن تتصلح بانها بس تبطل تحكي اللي بيحصل في بيتها
وشكرا على متابعتي

eng_semsem يقول...

سواح في ملك الله
ان كان الراجل قافل دماغه ومفيش طريق والكلام اللي اتفقنا عليه رجع فيه واهلها كانوا عايزين يحلوا المشكله اللي كبرت بلا داعي وهي مش بوصلها ولا بكلمها وبالنسبه لدماغ ابوها لو مشينا وراها يبقى خلاص ضيعنا كل حاجه اما كون لو رجعت انا مكنتش بفكر ان في احتمال تاني غير الرجوع وكنت عايز اللي في بطنها يعيش ويتربى مع ابوه وامه
وشكرا على متابعتي

eng_semsem يقول...

karmen
اختي العزيزه ربنا يهديني ويهدي كل المسلمين للي فيه الخير ويكون في عون كل واحد محتاج العون
اشكرك على متابعتي

Amwaj يقول...

أتوقع أبوها أهوا واحد من اللي زادوا تعقيد المشكلة

بس صج زوجتك ما تستاهلك لأنك تحملتها بما فيه الكفاية

eng_semsem يقول...

شهرزاد
هو انا مكتوب عليا الصبر وهي معايا وبعد ماترجع بيت ابوها بس انا مش جبل صبر انا انسان وليا حدود مش هعرف اخرج منها وهي ده طاقتي وكنت بتحمل على قد ما اقدر وعلى العموم هو ده اللي بيفضل ليا الصبر
شكرا على متابعتي

eng_semsem يقول...

amwaj
ده كان رايي واللي كنت بحاول اعمله اني اشوف طريقه عشان ابعده عن طريقنا وان كانت هي متستاهلش بس اللي في بطنها يستاهل
شكرا على متابعتي

dr semsem يقول...

واللة يا اخ اسامة انت جوعتنى جدا والظاهر ان كواليد شهر 7 كلهم بيحبوا البطاطس ازاى انت تقبل انك تكلم ابن عمها وازاى هى تحكيلة اصلا مهما كان دة محرم عليها وانت لسة جوزها وبالنسبة لاختها فباين عليها عاقلة شوية عنها وجوزها محترم وبالنسبة لمراتك هى مش ماشية بدماغها ومش عارفة هى عاوزة اية ومن الواضح انها كمان مش طايقة اهلها وممكن تكون مريضة نفسيا وبالنسبة للى فبطنها ربنا يحفظها ويحميها وبالنسبة لابوها فهو مختل عقليا ومفيش اب يخرب ع بنتة بالشكل دة وربنا يهدى معلش طولت عليك وتقبل مرورى

خواطري مع الحياة يقول...

السلام عليكم
بصراحة بدائت اعصب مع كل حكايه
لاتزعل مني لكن انت زوجها
لو كنت مكانك كنت شدتها من شعرها لبيتها او اخذها لبيت الطاعة او طلقتها
بجد بدائت اعصب
بجد عندك طولت البال
مستنيه التكمله
تقبل مروري
سلامي ليك اخي اسامة.

eng_semsem يقول...

drsemsem
كل كل اللي انت قلته كان بيلف ويدور قدام عنيه ما بين مش معقول اللي بيحصل ياما انا بحلم معقول في الدنيا ممكن يحصل كل ده في وقت واحد مش عارف وبالنسبه للي في بطنها بدام كده او كده هيعيش ويتربى انا كنت افضل انه يتربى معايا
وشكرا على متابعتي واتكلم براحتك ولا يهمك الصفحه كبيره

eng_semsem يقول...

خواطري في الحياه
يعني انت شايفه اني كنت اخش البيت ازق ابوها واضربه واشدها واخدها وبعد كده نعيش مع بعض وبعدين انا كنت فاكر انها ندمانه على اللي عملته بسبب حاجه تافهه وصلت الامور لباب مقفول
شكرا على متابعتي

غير معرف يقول...

ازيك يا اوس اوس

حلو ازيك دي علي اساس انك واحشني مثلا


شوف يا ريس

انا لفت نظري حاجتين مهمين جدا ف البوست ده


اولا
كوفي شوب اسمها الامريكين في وسط البلد بس جامده على فاكره

ههههههههههههههه شكلك شريك فيها وبتعملها دعايه


ثانيا


يعني رز وطبيخ ولحمه وصنية بطاطس اللي بموت فيها

مش تقولي انك بتحب صنية البطاطس

هو انا حارمك من حاجه



هههههههههههههههه

طبعا انا ما اتكلمتش ف الموضوع عشان معنديش كلام اقوله بصراحه

لاني لو اتكلمت هتبتدي اتعصب

فقلت اهزر احسن

eng_semsem يقول...

غير معرف
نفسي اعرف يا ابو العريف انت ليه دخلت بغير معرف ويارتني شريك فيه مكنتش هقوم من عليها اما بالنسبه للتانيه ربنا ما يحرمني من عمايل ايدك وعايزين ندوق بس انت اعمل وادعينا وانا ممكن اجيب اصحابي
وبالنسبه للبوست اللي هيعصبك انا مش عايز كده انا عايز اراجع واتعلم من اللي حصل زمان وانقل تجربتي لاكبر عدد عشان يعرفوا الصح من الغلط سواء ولد او بنت هدفي الاول والاخير نحافظ على بيوتنا ونهتم بازواجنا ونحل مشاكلنا بطريقه صح
وشكرا على متابعتي

bride ghost يقول...

مممممممممم
هو أنا لازم كنت بلشت من الجزء الأول لحكايتك مع الأيام بس قلت لحالي بقرأ الجزء الأخير وأشوف أخر الأخبار
بس فهمت من الحكاية إنك على خلاف مع مدامتك :((
الله يهديها ويهديك ويلم شملكم ويصلح حالكم يارب ....
ما بئيد فكرة الطلاق لأن بينكم بنوتة وبيبي جاي علطريق
أنا مع الأخت شهرزاد ....إستنى عليهم شوي .....
بس أنا إستغربت من شغلة يلي هي إنو مراتك فتحت جوالها وقدرت تتلكم معاها يعني بتقدر تقوللها ....إزا حابة ترجع لبيتها مشان بنتها ما تتربى من دون اب ومشان البيبي يربى مع إمو وأبوه تقنع أبوها يشيل الفكرة العنيدة من راسه إنو تنقلو لبلدهم وتسيب بيتك وشغلك
لأن برأيي متل ما قدرت تقنعو إنو ياخد موقف سلبي منك متل ما رح تقدر تقنعو بإلغاء هلفكرة
يعني المفتاح بإيد المدام
أتمنالك التوفيق والسعادة
سأكون متابعة إن شاء الله
تحياتي......

هبة فاروق يقول...

اسمع منى طول ما هى شيفاك متلهف عليها ووالدها المحنك طبعا فاهم دة
الدلال حيزيد ولا حتعرف تاخد لا حق ولا باطل معاهم
افضل شىء هو التجاهل وحاول تنسى الموضوع شوية ومحدش قالك انك تطلق بالعكس دة ابغض الحلال ولكن الصبر
والتجاهل ثم التجاهل
وربنا يهدى الاحول
فى انتظار باقى الموضوع

عاشــــــ النقاب ـقــــة"نونو" يقول...

السلام عليكم ورحمة الله
اول زيارة مش هتبقى الاخيرة والجاية اقولك فيها بعون الله مبروك رجوعكم لبعض
واضح انها صغيرة شوية وبتعمل من الحبة قبة والسنة الاولى زواج غالبا المشاكل فيها من النوع دة كتير خصوصا لو متدلعة شوية زي زوجتك
مع الاسف الاهل شوية سلبيين ومش فارقة معاهم طلاق وغيره
هي ممكن تتغير بس عاوزة شوية وقت ومجهود منك
فيه حل ممكن تعمله بحيث تقرب منها وتلم بيتك بحقنة بنج مؤقتة وهي حكاية انك تجيلها خميس وجمعة وتاخد شقة قانون جديد وتفرشها بابسط العفش وليكن سرير ومطبخ وخلاص لان الوضع مؤقت وهتقولهم لو ارتاحنا على الوضع دة هنكمل ما ارتحناش نتلم مع بعضنا
المهم تعمل اي حاجة بحيث الزوجة ترجع علشان ترتب دماغها بعد كدة
لو هترسي تاخد شقة قانون جديد وانقل فيها العفش لخد ربنا ما يهديها لما الزوجة ترجع البيت مطلوب منك التريث عليها لانها لسة ما تعرفش المسئولية خالص واهلها مسيطرين على دماغها هتدلع وتهادي هدايا وتعلمها شوية بشوية وبهدوء ومش في اي وقت تعلمها وما تعلمهاش مباشرة وبدون ضرب امثلة
اهلها بقى الزيارات تبقى قليلة وفي نفس الوقت شوف مفتاحهم ايه واكسبهم لصفك
ممكن يكون الوضع انها بتحب الاهتمام بيها وباهلها من قبلك بس الطريقة زايدة شوية وقولها بيتنا له اسرار لازم ما حدش يعرفها انتي مراتي تستري علي واللي ما بتكسفش منها ما تخلنيش اخبي عنك حاجة عارف انك هتقوليها لاهلك وتكسفني او تقوليلهم حاجة انا ممكن اكون مش قاصدها اتكلمي معايا وعاتبيني ولو قصرت خاصميني في بيتنا وانا اتنقل اوضة تانية لكن ما تسيبيش البيت
وعليك وعلى اختها تكلمها وتعلمها ازاي تبقى ست بيت كان لي اخت بتكلمني وتعيط انها بتعمل طبيخ وخدمة لزوجها فاكرة ان دة مش حقه عليها وكنت كاخت بنصحها واخدت سنة كاملة لحد ما ثبتت في بيتها والحمد لله
طبعا الحمل محتاج شويتين دلع لان الحامل اعصابها كدة كدة بايظة وتساعدها في البيت وحاجات زي كدة تحس بيها انك بتحبها وحاول اد ما تقدر تلم على بيتك
معلش عارفة ان اعصابك هتنضغط شوية بس دة نصيب انها كدة بس سهل التغيير باذن الله تعالى وربنا يوفقك بعون الله
تحياتي

الغاردينيا يقول...

ههههه احسست ان الامر شبيه بالقمه العربيه :)

تحية مازلت متابعه

اسماء عبدالعزيز يقول...

انا بجد احترت .. للدرجادي بتحبها ..
تبعت كل دوووووووول .. ولا انت حاسس بالذنب تجاه شيء ناحيتها ..

الواضح ان الغلط راكبهم كلهم ..وانت بتحاول وتحاول ..

من كلامك لحد ماجه العيد الكبير يبقى فيه بقية

لكن انا من وجهة نظرى الخربانه ..
ان الواحد لما يلاقي اهل مراته بالشكل ده يسيبهم لمااااااااااااااااااااااااااااااااااااااااااااااااااااااا
الشمس تخبطهم ويضربوا اخماس في اسداس ويقولوا هو ماعدش بيسأل ليه
وهى كمان .. تفتح الموبيل زى ماتحب كنت خليها تستوى شويه
دا مافيش حد الا وبقت حكايتكم عنده
بصراحة
الله يعيييييييين

بانتظار البقية
دمت بكل الخير

جايدا العزيزي يقول...

ربنا يهدى النفوس اسامه

اصلى لو انفجرت هقول كتير

ياطوله بالك ياخى ايه ده

انا جايه اهدى النفوس بس

ههههههههههههه

بجد قلبى معاك وبدعيلك

خدوا هدنه يوم

ربنا يسعدك ويريح قلبك ويطول بالك كمـــــــــــــــــــــان

روح يا شيخ ده انت يتعملك تمثال

تحياتى

eng_semsem يقول...

bride ghost
اهلا بيكي في مدونتي المتواضعه بس الموضوع مش طلاق او رجوع الموضوع تجربه حبيت ان البنات تعرف هي ممكن تهد بايديها بيتها وغلطات ممكن تنهي حياتها وبعدين انا صحيح كلمتها على الجوال بس مين قال ان هي عايزه تحل او ترجع بيتها لحد دلوقتي في الحكايه هي مفيش عندها نيه لانها ماعملتش حاجه عشان ترجع كل اللي بتعمله عشان تخرب البيت وخلاص وعشان تبقي معانا في القصه حاولي تقري الاجزاء اللي فاتت
وشكرا على وجودك

eng_semsem يقول...

هبه فارق
انا اتجوزت يوم 20/7/2008 وهي سابت البيت 5/10/2008 والفتره اللي وصلت ليها في الحكايه تقريبا 1/12/2008 يعني اللي قعدته في البيت معايا تقريبا زي اللي قعدته بعد مارجعت وانا كنت شايف ان مفيش موضوع يستاهل اساسا
شكرا على متابعتي

dodoeltaiba يقول...

هاى يااسامه انا قريت الجزء ال12 اهو وبدعيلك بالخير وربنا يوفقك ومتبعاك للاخر
وليك تحياتى

eng_semsem يقول...

عاشقة النقاب
معلش عشان اربط الاحداث ببعضها انا اتجوزت 20/7/2008 وهي سابت البيت 5/10/2008 قعدت في بيتها شهرين عملت اللي انا حكيته في حوالي 10 اجزاء من اللي فاتوا وايه اللي يخليني اضيع شقتي التمليك وارمي فلوسي على الارض في شقه ايجار في مكان انا مش عايز اعيش فيه وانا عندي فيه بيت ابويا تمليك وهي رفضت ان ده يبقى حل وابقى متجوز خميس وجمعه ومين يحضر ليا الاكل ومين لما احب اتكلم اتكلم معاه ومين اللي مفروض ياخد باله مني وانا اخد بالي منه معلش وانا اتجوزت ليه اصلا لما انا اعيش في مكان ومراتي في مكان ومين اللي غلط ويستاهل العقاب ليه انا ادفع تمن اخطائها اللي وصلتنا لكده صدقيني لازم تقري ولو عدة اجزاء من اللي فات عشان تقيمي الوضع تمام اما حكاية الكلام معاها ده المشكله الاساسيه اللي حكيت عنها حوالي 3 اجزاء وحتة تسمع كلام اختها ده اللي انا بينته لما اختها حاولت تدخل اتقابلت بالرفض التام وعلى فكره ساعة ماخرجت من البيت كانت لسه في الشهر الاول من الحمل وفي جزء من اللي فات ابوها غلط وقل ادبه عليا يبقى ممكن اتعامل معاه ازاي
شكرا على وجودك واتمنى المتابعه

eng_semsem يقول...

الغاردينيا
ممكن يكون في شبه بالقمه العربيه بس هو اقرب للقضيه الفلسطينيه نتجمع نتكلم ومحدش يوصل لحل وتفضل هي محتله وتفضل اسرائيل عايشه عال العال
شكرا على متابعتك

eng_semsem يقول...

اسماء عبد العزيز
انا مكنتش عايز احس اني قصرت معاها باي شكل لاني مش هستحمل احساس الشعور بالذنباني اقول بعد كده لنفسي انا المفروض كنت عملت كذا او كذا والواضيع لسه ليها بقيه وبالنسبه اني استنى شويه كانت المواضيع تتفتح احيانا غصب عني زي مثلا مكالمه من اختها وتقلي طيب ايه رايك يا اسامه ما تجرب كذا او زي ما هي عملت اتكلمت وقالت خد رقم فلان ممكن يبقى معاه الحل وحكاية ان مفيش حد لا لسه في ناس ما ادخلتش وانتظري البقيه
وشكرا على متابعتي

eng_semsem يقول...

جايدا العزيزي
ممكن انت ما تصبريش ولا تتحملي كل ده بس انا كان لازم اتحمل عشان كان هدفي اني احافظ على بيتي ومراتي واللي في بطنها بس المهم اللي يقدر ومتشكرين على الدعوتين الجمال ربنا يفرح قلب كل زعلان ويهدي كل غضبان وبالنسبه للتمثال عايزين مكان زحمه عشان نحطه فيه عشان السواقين لما يشوفه يفتكروا الصبر ويصبروا شويه وعلى فكره لسه في كمان حبة صبر جمال
شكرا على متابعتك وانتظري مني المزيد

eng_semsem يقول...

dodo
اهلا بيكي ونورتيني واتاخرتي بس هعمل ايه هصبر عليكي وربنا يكتب الخير للمسلمين ويملى ايامهم فرح وسعاده
شكرا على متابعتي

وداد يقول...

بجد انا زهقت من المدام دي

ازاي تكون بتكلمها وتديلك رقم ابن عمها

على اساس انه ولي امرها

استغفر الله : ربنا يهديها

انت ليه فعلا مبتدخلش على مراتك ومن شعرها تاخدها على البيت

بجد لو عملت كده ابوها مش هيقدر يفتح بوقه

ربنا يصلح الحال

بس انا شايفه انه مش هيتصلح غير بالشدة من ناحيتك

خليك شديد علشان بنتك مش عشانها

eng_semsem يقول...

وداد
يعني معقول ادخل اشدها بالقوه عشان تعيش معايا واقفل بقى عليها وانا خارج عشان ماتهربش وهي ده تبقى حياه
شكرا على متابعتك

momken يقول...

يا سيدى فى ايه سيبك وانسى
وعاوز اقولك نصيحه

اعرف فى اى معركه ان اسهل خساره هى خساره انسان
خصوصا لو ندل
فداااهيه
لان خسارته تعتبر مكسب

تحياتى

افروديت يقول...

أنت عصبتني

طلقهاااااااااا


هي مش عيزاك وربناصدقني

الدنيا مش بتقف عندحد أوحدث معين

قلتهالك وبقولهاتاني

"كرامة الأنسان أهم شيء"

lossy❤❤ يقول...

مشكلتكم

انو مشاكلكم تطلع برا "لأهلها" وهنا دوامة ما تخلص ...

في انتظار القادم...

eng_semsem يقول...

momken
اهلا بيك في مدونتي ونورت بوجودك
لانسبه ليا كان ممكن اخسر مراتي وخصوصا بعد اللي شوفته منها لكن فكرة خسر اللي في بطنها مكنتش قادر عليه
وشكرا على تواجدك

eng_semsem يقول...

افروديت
كل ده ولسه ما اتعلمتيش مني حاجه ماتتعصبيش لازم تمسكي اعصابك وخصوصا لما يبقى التمن بيت واسره وانا كان بالنسبه ليا الدنيا مش هتقف عليا بس لازم اخلص زمتي وارضي ضميري عشان لما اقف مابين ايدين ربي اقول عملت اللي في ايدي اعمله وبعدين هو اللي في بطنها مش جزء من كرامتي لو اتبهدل مش هيتنسب ليا
انا مش بلومك انا كنت بتحرق داخليا بس لازم افكر في غيري مش بس نفسي
وشكرا على متابعتي وانتظري البقيه

eng_semsem يقول...

lossy
اولا مشكلتي الحاليه انك اتاخرتي عليا ثانيا انا مش طرف في تطليع المشكله لو تفتكري احنا اول مشكلة ككبيره كانت بسبب انت ليه بتحكي بره مع ذلك اتكررت وتاني وتالت بس اعمل ايه اقطع لسانها عشان ماتحكيش للناس احوالنا وانها دايما تفكر مع الناس على حل وتنسى تفكر معايا للاسف ده غلطات لازم كلنا ناخد بالنا منها
وشكرا على متابعتي

Dr/ walaa salah يقول...

بجد انا مش عارفه اقولك ايه يا اسامه

هو انت من كوكب تاني بجد

يعني شوف كل التعليقات مستغربه ردة فعلك

سواء بنات او رجاله

ازاي تعدي حكايه انها تديلك رقم ابن عمتها ده

ده مش محرم ليها يا اسامه انها تقعد وتحكيله عن حياتكم

ازاي تعدي حاجه زي دي

اللي في بطنها يا اسامه هيتربي بيكم او من غيركم

ايه الفايده انها ترجع وانك تعديلها حاجات كتير واللي في بطنها يتربى بينكم وانتوا بينكم جدار ومش متفقين


وبعدين حكاية الشقه دي

هى خلاص مش اتجوزت ووافقت من الاول


بس في حاجه عايزه اعرفها

هى لما ادتك رقم ابن عمتها عشان تكلمه


كانت بتقولك بزعل ولا عشان يمكن ابن عمتها يقنع باباها؟


لو بزعل يبقى معلشي شيلها من دماغك شويه عشان تعرف قيمتك يا اسامه

ولو عايزه فعلا حد يقنع باباها

هى اكتر واحده ممكن تقنعه

يا اسامه لو عايزاك والله هتسيب الدنيا كلها عشانك مش باباها

بجد انت طيب اوي اوي اوي اوي

eng_semsem يقول...

dr/ walaa salah
عارفه الغريق اللي بيتعلق بقشيه عايز يصلح حياته اللي شايف ان بيتهد فيها جزء كبير عشان يترمم بعد كده هيحتاج سنين ولما بيسرح في تفكيره بيلاقي دمه ماشي على الارض ما يعرفش ابوه ولا يعرف ليه قيمه ولما كانت بتديني رقم التليفون كان على اساس ان هو قريب من ابوها وممكن يقنعه ده كان الواضح ساعتها وانت معاكي حق في لو عايزاك ولو عايزه تقنع ابوها وده اهم حاجه عايزه اوصلها ان الست هي سبب نجاح البيت او خرابه وجواب لو عايزاني هيبان لوحده بس استني البوست اللي جاي ومتزعليش مني عشان انا طيب اعمل ايه في نفسي اتعلم الشر والقسوه عشان اعيش انا اتخلقت انسان واحب اموت انسان لا اعرف الظلم ولا الغدر
انا ليا عندك سؤال انت كنت متوقعه ايه يحصل المره اللي فاتت ؟؟
وشكرا على متابعتي

Dr/ walaa salah يقول...

بص يا اسامه مش عيب انك تكون طيب

بس العيب انك تشوف ناس تستغل الطيبه دي

خدها مني نصيحه

في ناس لما بتشوفك طيب بيدوسوا عليك اكتر واكتر

وهتلاقي طيبتك دي قدامها شر من عندكم

انت سامحت مره واتنين وتلاته
لازم تكون في وقفه طالما ان اللي قدامك مش بيقدر طيبتك

اما بالنسبه لسؤالك

لو ركزت في تعليقاتي كنت عرفت

انا قلتلك ان مبحبش الست اللي مش بتحترم جوزها

واللي بتهمل في امومتها

وقلتلك ان مراتك عملت حاجه من الاتنين دول

لكن لو عرفت في اي بوست جاي انها اهملت في امومتها وده اللي مش بتمناه ساعتها مش هتابع تاني اليوميات دي

لان هيكون خلاص مينفعش وقتها الكلام


في الاول والاخر ربنا يصلح الحال بينكم

وبالرغم من كل ده يا اسامه مش لازم ننكر ان ربنا ان شاء الله هيعوضك خير عن كل ده بسبب طيبتك اللي منرفزانا كلنا

eng_semsem يقول...

dr/walaa
انا اتعلمت من ابويا اعمل الخير ومتستناش رد انا معاكي انا لازم يبقى في حدود وانا كان عندي حدود بس متهيالك حدود اللي في بطنها ممكن يوصلني لحد فين اما عن الوقفه فانا كنت بحاول احل مشكله مش اعلقها عشان كده مردتش بحل يقل من قيمتي او احس فيه بان حد بيستغل طيبتي كان رجوعها اللي انا قابله من غير شروط ولا قيود والبوست اللي جاي هتشوفي الوقفه اللي انت عايزاها
وكل ده عادي اما الاتهام الخطير اني مش مركز في التعليقات سواء انت او اي حد ده كتير عليا لان اللي بيخش المدونه ويكتب كانه بيكلمني ماينفعش ابص الناحيه التانيه او انسى كلمه هو قالها بس انا فهمت البوست اللي فات انك مستنيه رد فعل منهم او مني يحصل وكان بسال انت كنت مستنيه ايه على اساس ان احنا كنا وصلنا لاتفاق وانها هترجع ده في البوست اللي فات بس وانا كنت بسال انت كنتي مستنيه ايه يحصل معرفش انك قصدك على اللي قلتيه انا فاكره ومش هنساه وهتلاقيه في بوست الرد عليه
اما حكاية العوض انا مش قلقان انا واثق في ربنا جدا جدا وهنقل ليكي الثقه في بوست برده
وشكرا على الاهتمام بالرد عليا بس انا بجد بستنى تعليقك لانه بيهمني جدا

Dr/ walaa salah يقول...

رجعت مره تانيه عشان اقولك اسفه والله

انا ما اقصدش اني اتهمك انك مش مركز في التعليقات

يمكن خاني التعبير

بعتذر ليك بجد انا مبحبش حد يزعل مني بسبب كلمه


منتظره البوست القادم يا اسامه

eng_semsem يقول...

dr/walaa
وانا ابقى غلطان لو زعلت من واحده بتقدم ليا نصيحه اقل ما تستحقه الشكر وعزومه على الغدا بس ده نخليها بعدين لما نقبض انا مش زعلان خالص والله
وانت على طول منوراني

dr semsem يقول...
أزال أحد مشرفي المدونة هذا التعليق.
فتاه من الصعيد يقول...

حماك صعب اوييييييي

معلش ... ربنا يهدي الجميع

مستنيه بقيه القصه

تحياتي

dr semsem يقول...

انا مقتنع تماما تماما بالكلام الى قالتة الاخت عاشقة النقاب تماما تمام ودة بعد كمان مقريت ردك عليها لو ان المشكلة هتتحل بالشقة جيب شقة ودة هيكون حل مؤقت جدا لحد متقنع مراتك هتقولى انا عندى شقة وازاى والاكل والشرب واخد بالى عليهم وياخدوا بالهم منى ومش عقل واتحمل مصاريف زيادة لية انا اعمل كدة وانا عارف ان الامر صعب بس انا بقول مؤقت وواضح من معرفتى بيك ان ماشاء اللة حالتك المادية تسمح وانت معترض بس عالفكرة بس دى لو هتحل المشكلة وترجعالك مفيش مشكلة ولية انت مسالتش هما عاوزينك تجيب شقة لية كانالمفروض تعرف وجهة نظرهم وتريحهم
ومتخليش عندهم حجة وموضوع الاكل والشرب دة مع انة دة واجب عليها بس متحسسهاش بكدة وانتو لسة جداد ع بعض وهتقولك انت سى السيد والامور دى وانت عارف انهم ناقصات عاقل ودين وتكفرن العشير دة من ناحية الاكل والسكن من ناحية انك فمكان وهما فمكان ولا زلت اصر ع انة مؤقت بس فية ناس كتير جدا جدا جدا جدا كدة وانا اعرف كتير كدة مهندسين ودكاترة وشغالين فى القاهرة وعندهم المقدرة انهم يستقروا فى القاهرة مع مراتهم ولكن ينزل كل خميس وجمعة فقط لمراتة فبلدها جنب اهلها فبيتة برضة بس كان لازم تفهم وجهة النظر دى بتاعتهم لية هما عاوزين كدة وكان ممكن انت نفسك تستريح بكدة هتكونوا مشتاقين لبعض اوى فهترضيك وترضيها وهتطمن عليها بالتليفون وهتقولك وحشتنى وهتقولها وهتقربوا وجهات النظر دة كمان بغض النظر عن انى اعرف ناس متغربين برة مصر وعرسان جداد وسايبين مراتهم الى سنة والى اتنين والى تلاتة فاحمد ربنا انك هتشوفهم كل اسبوع ولو الموضوع مادى ومتقدرش تجيب شقة مع انى معتقدش سهل تتدبر باى شكل حتى لو وقفت انك فعلا تبيع شقتك فى القاهرة وتسكن مع ناس زى مالناس بتعمل وانت عملت كدة بنفسك قبل الجواز و كنت مغلوب ع امرك صدقنى انا قبل مكتب لك التعليق دة حطيت نفسى مكانك وكنت هتصرف كدة تمام لغايط ماشوف اخرتها ومقفلتش الامور دة بغض النظر عن انك طيب واخلاق واستحملتهم كتير اوى كمان وهما ميستاهلوش ضافرك ومعقدين حبتين ومع ذلك انا قولت دة حل مؤقت وهى الى هتعمل الى انت عاوزة فالاخر ارضى غرورها لغايط متحبك وتلين فايدك زى العجينة بعد كدة هى مش هتقدر تزعلك ابدا واللة اقرى كلامى قطعة قطعة ومتتسبش برايك ومتسمعنيش كلام وتقولى انى عاوزكتعمل كدة بس دى وجهة نظرى مش اكتر واللة الموفق وانت عارف انا بحبك اد اية واتمنى لك كل التوفيق

dr semsem يقول...

انا مقتنع تماما تماما بالكلام الى قالتة الاخت عاشقة النقاب تماما تمام ودة بعد كمان مقريت ردك عليها لو ان المشكلة هتتحل بالشقة جيب شقة ودة هيكون حل مؤقت جدا لحد متقنع مراتك هتقولى انا عندى شقة وازاى والاكل والشرب واخد بالى عليهم وياخدوا بالهم منى ومش عقل واتحمل مصاريف زيادة لية انا اعمل كدة وانا عارف ان الامر صعب بس انا بقول مؤقت وواضح من معرفتى بيك ان ماشاء اللة حالتك المادية تسمح وانت معترض بس عالفكرة بس دى لو هتحل المشكلة وترجعالك مفيش مشكلة ولية انت مسالتش هما عاوزينك تجيب شقة لية كانالمفروض تعرف وجهة نظرهم وتريحهم
ومتخليش عندهم حجة وموضوع الاكل والشرب دة مع انة دة واجب عليها بس متحسسهاش بكدة وانتو لسة جداد ع بعض وهتقولك انت سى السيد والامور دى وانت عارف انهم ناقصات عاقل ودين وتكفرن العشير دة من ناحية الاكل والسكن من ناحية انك فمكان وهما فمكان ولا زلت اصر ع انة مؤقت بس فية ناس كتير جدا جدا جدا جدا كدة وانا اعرف كتير كدة مهندسين ودكاترة وشغالين فى القاهرة وعندهم المقدرة انهم يستقروا فى القاهرة مع مراتهم ولكن ينزل كل خميس وجمعة فقط لمراتة فبلدها جنب اهلها فبيتة برضة بس كان لازم تفهم وجهة النظر دى بتاعتهم لية هما عاوزين كدة وكان ممكن انت نفسك تستريح بكدة هتكونوا مشتاقين لبعض اوى فهترضيك وترضيها وهتطمن عليها بالتليفون وهتقولك وحشتنى وهتقولها وهتقربوا وجهات النظر دة كمان بغض النظر عن انى اعرف ناس متغربين برة مصر وعرسان جداد وسايبين مراتهم الى سنة والى اتنين والى تلاتة فاحمد ربنا انك هتشوفهم كل اسبوع ولو الموضوع مادى ومتقدرش تجيب شقة مع انى معتقدش سهل تتدبر باى شكل حتى لو وقفت انك فعلا تبيع شقتك فى القاهرة وتسكن مع ناس زى مالناس بتعمل وانت عملت كدة بنفسك قبل الجواز و كنت مغلوب ع امرك صدقنى انا قبل مكتب لك التعليق دة حطيت نفسى مكانك وكنت هتصرف كدة تمام لغايط ماشوف اخرتها ومقفلتش الامور دة بغض النظر عن انك طيب واخلاق واستحملتهم كتير اوى كمان وهما ميستاهلوش ضافرك ومعقدين حبتين ومع ذلك انا قولت دة حل مؤقت وهى الى هتعمل الى انت عاوزة فالاخر ارضى غرورها لغايط متحبك وتلين فايدك زى العجينة بعد كدة هى مش هتقدر تزعلك ابدا واللة اقرى كلامى قطعة قطعة ومتتسبش برايك ومتسمعنيش كلام وتقولى انى عاوزكتعمل كدة بس دى وجهة نظرى مش اكتر واللة الموفق وانت عارف انا بحبك اد اية واتمنى لك كل التوفيق

eng_semsem يقول...

dr semsen
اولا اهلا بيك وبتواجدك معايا وبعد كده هو مين اداه الحق اصلا انه يتحكم في حياتي بعد زواجي انا اقعد فين او اغير سكني ووبعدين هي الاصول ان الست تنتقل مع الراجل ولا الراجل يسيب شغله وشقته وعشان ايه وبعدين هو ممكن يقول الكلام ده وانا لسه رايح اتجوز ساعتها هقله انا امكانياتي تسمح او لا انما بعد ما اتجوزت مش حقه اما قصة اني اشوف مراتي خميس او جمعه انا عايزها معايا طول الوقت هو ده عيب ولا مش حقي اما ان كان في حد بيستحمل الوضع ده انا مش معارض يستحمله انما انا بالنسبه ليا انا راجل متجوز وعايز اعيش متجوز مش عازب وبعدين سواء انا امكانياتي تساعدني اني اشتري شقه او اتنين مش حق حد ان يجبرني اني انقل معيشتي ضد رغبتي وان كنت عشت عيشه عزابي قبل الزواج بس بعد ما اتجوزت ليه اعيش العيشه ده تاني وبعدين اجيب ليها شقه جنب ابوها وامها اذاكان واحنا ينا وينهم ماتين كيلو عملوا كده امال لو سكنت جنبهم هيعملوا فينا ايه
وشكرا على متابعتي