الاثنين، 27 ديسمبر، 2010

ملك اسامه

خلصت الحكايه صحيح لسه ما وصلتش النهايه بس كلنا عرفناه والباقي مسالة وقت مش اكتر وانا كنت ناوي اكتب في موضوع وانتم اجبرتوني اني اكتب البوست ده وبداية كلامي فيه كلمه كلكم كتبتوها ربنا يعوضك وتلاقي اللي تسعدك.
كان في ناس عايشه معايا وتقولي لازم تتجوز تاني انت هتقعد كده ليه بس انا كان ليا راي تاني وشعور تاني اني لازم استنى شويه مش عشان حد غير نفسي اولا وبعدين عشان اللي هرتبط بيها لاني كنت حاسس اان الست اللي هتجوزها دلوقتي هظلمها ظلم كبير لانها هتاخد قلب مش بيعرف يسامح هتاخد عقل تعب من التفكير في الشر اللي حصل ليه ويمكن كتير احاسبها على افعال غيرها وفسر كل اعمالها اللي كنت زمان ممكن اعديها عشان المركب تمشي وتعدي انها زي غيرها هتكون احسن من غيرها في ايه وافترض سوء النيه من اول الطريق لاخره يعني من الاخر كنت حاسس اني لو اتجوزت تاني انا اللي هجري بسرعه عشان اهد البيت قبل ما يتهد عليا زي المره الاولى وابيع انا احسن ما غيري يبيعني وطبعا عمري ما هثق في زوجتي عشان ثقتي قبل كده دخلتني قسم الشرطه برجليا.
لازم اقف تاني على رجلي واشوف من الناس اللي يخليني اثق تاني في حد وامسح كل اللي باقي من دموعي واخرج واتعافى بالكامل من جروحي هو المريض بيبلع الدوا يقوم يجري ويبقى سليم لازم يصبر شويه مع المرض لحد ربنا ما يعافيه وانا قررت اداوي جروحي على مهلى وادور على شريكة حياتي الجديده لما اخف واحس اني كويس ومش هظلم اللي هرتبط بيها لانها ممكن تكون انسانه كويسه وطيبه ونتيجة جرحي اظلمها وانا مش عايز احاسب حد بظلم ارتكبه شخص تاني والى الان لسه ما اخدتش خطوتي الاولى في اختيار شريكه لحياتي لان لسه فاضل جوايا شويه صغيرين هيدوبو مع الايام وكمان عشان اختار على مهلي ولا يمكن انتم عايزاني اعيد القصه من تاني ويحصل ليا نفس اللي حصل زمان من تاني .
وقصه تانيه شدتني بعضكم تناولها في كلامه بنصيحه بريئه وانا عارف انه اكيد قصده الخير الاقيه يقلي خلي بالك من بنتك وما تقصرش معاها وقرب منها على قد ما تقدر انت مهما كنت ابوها لازم برده انت اللي تصرف عليها .
كل الكلام ده في الطبيعي جميل ونصايح غاليه اما معايا كانك ماسك سكينه وبتشرح فيا ؟ اخلي بالي ازاي في شئ من الاساس هو مش معايا ينفع اقول لحد منكم خلي بالك مني هي ده نفس العلاقه ما بيني وبينكم هي نفسها اللي بيني وبين بنتي برغم وجود فوارق بسيطه ان انا عارف انكم موجودين وانتم عارفين بوجودي انما انا عارف ان بنتي موجوده وهي مش عارفه ان ليها اب  ده حد وصلتني معلومه من واحد قلي انهم بيقولوا للعيال الصغيره في العيله انها اسمها( ملك حسين ) حتى اسمي بيحاولوا يلغوه من اسمها بعضكم يقول قرب منها ياريت لو بايدي انا مش هسيبها بس هي بالنسبه ليا حلم بعيد اني اشوفه ولما هاشوفه هيكون اتملى بالحقد والكره ليا اما حتة الانفاق ما تقلقوش من ده بالذات انا سايب مع امها عفش بمية الف جنيه ودهب بعشرين متهيالي دول يكفوا بنتي كتير وبعدين في نفقه بتاخدها عن طريق المحكمه ليها وللبنت كمان يعني كده او كده انا اللي هصرف عليها حتى من غير ما اشوفها ومن غير ما تعرف اني ابوها والصوره اللي فوق ده صورتها تخيلوا اخيرا عرفت اشوف صورة بنتي اخيرا ممكن اتخيل شكلها وجت ليا عن طريق فاعل خير راجل محترم بيفهم في الاصول وانا مش هقول اسمه عشان تفضل في ميزان حسناته ليوم القيامه ان هو اللي عرفني صورة بنتي .
اقتراح 
كنت بفكر اكتب رقم تليفون حسين ابو مراتي اللي سارق اسمي من بنتي ونبعت رساله لبنتي بمنتهى الادب والاحترام يوم راس السنه رساله بسيطه جدا ولتكن ( كل سنه وانت طيبه يا ملك اسامه ) بس مش اكتر ويا سلام لو اشترك فيها اصدقائي من الدول العربيه ياريت تقولوا رايكم ليا في الفكره ده. 

هناك 64 تعليقًا:

موناليزا يقول...

عاجبنى جدا تفكيرك فى انك مش عايز ترتبط غير لما تكون من جواك هديت تماما وتخلصت من اثار كل اللى حصل ليك

أما عن فكرتك فأنا شايفة انه خسارة ثمن الرسالة لأنها مش هى اللى هتقرأها ده أولاً
وثانياً الله أعلم ايه الكلام اللى هيقولوه عليك
ثالثا هى اصلا اسمها ملك أسامة غصب عنهم مش بمزاجهم يعنى
ومهما يعملوا مش هيقدروا يغيروا الحقيقة دى

وداد يقول...

انا اتفق مع راي موناليزا

في نقطة عدم الارتباط مع واحده تانية غير لما تكون هديت خالص وقدرت تتعايش تماما مع الواقع

لكن بالنسبة لحكاية الرسائل دي

ملهاش أي لازمة

لأن لو بنتك هي إللي معاها موبايل كنت قلت لك تبعت لها رساالة وتقول لها " كل سنة وانتي طيبة بابا اسامة "

لكن إيه لزمتها تبعتها لواحد اول ما يشوف رسالتك يحذفها

ولا حتى هيقول لبنته عليها

لو تقدر انك تروحلها بنفسك زيارة مفاجأة عندهم بالبيت

وتدخل باللعب والحلويات لبنتك ممكن اشجعك على كده

وربنا يوفقك إللي فيه الخير

شيرين سامي يقول...

ربنا يخليلك بنت و تشوفها و تفرح بيها متيأسش رحمة ربنا كبيره و بعدين ده حقك غصبن عن الكل أنا مش هعرف أفيدك بس أكيد في طرق قانونيه حتى لو مش انسانيه مهم جداً انك تشوفها و تعرفها بنفسك
احترمتك جداً انك هتأجل فكرة الارتباط لحد ما جرحك يشفى تماماً ربنا يوفقك و يعوضك خير و تبقى سنه سعيده عليك
تحياتي ليك

eng_semsem يقول...

مونايزا
اختي الغاليه الكبيره في المقام عندي احترم شديد الاحترام رايك بس انت متهيالك انهم مانعني اني اشوف بنتي ومنعوني اني اتصور معاها في الزياره الوحيده ليها يبقى هيقولوا ايه عليا وليه بيعرفواالعيال الصغيره ان اسمها ملك حسين الا اذا كانت مقدمه عشان يقول بابا مات
شكرا على تواجدك الدائم

eng_semsem يقول...

وداد
اولا ده رايي قبل ما يكون راي موناليزا وبعدين بنتي عندها سنه و9 شهور لسه هستنى لما تجيب موبايل وهجيب نمرته منين اما حكاية الزياره المفاجئه تصدقي ضحكت لما قرتها لاني لو روحت اكيد مش هشوف بنتي ويمكن مش هخش البيت وسيبك ممن كل ده انا بره مصر اساسا ومش هسمح لنفسي انها تهيني تاني لو حته كنت في مصر اكيد مش هروح بيتهم تاني
شكرا على متابعتك

eng_semsem يقول...

شيرين سامي
تحياتي ليكي ويارب تكون سنه جديده فيها علاج للمجروحين وشفاء للمظلومين وانتقام من كل ظالم اما حكاية الطرق القانونيه انا رفعت قضية رؤيا 1/11/2009 الى الان لم يحدث اي جديد وبعدين ايه حكم ساعتين في الاسبوع ده اعمل بيه ايه
ربنا يعين كل واحد على بلوته ويهديه ويصلح ليه دنيته كل سنه وانت بصحه وخير

هبة فاروق يقول...

احترم وجهة نظرك فى تاجيل الزواج اكيد
جرحك لم يشفى بعد
وبعدين انت قطعت قلبى يعنى اية اصبحت بنتك مجرد حلم انا لو منك اروح واخطفها
بجد طليقتك لا تعرف معنى ما تفعلة فالبنت فى احتياج دائم الى ابوها وبكرة حتندم على فعلتها
بجد انا حزينة على اللى بيحصل وحسبى الله ونعمة الوكيل فى هؤلاء الناس التى اصبحت قلوبهم مثل الحجر
دعواتى لك وربنا يقرب البعيد وتشوف ملك قريب وتسعد قلبك

سواح في ملك الله- يقول...

ربــــــنا يخليهالك
سيب الحكاية للظروف
هماهيحتاجولك
وانت هتشوفها بمزاجهم او غصبن عنهم
اسمعني كويس
متخليش بنتك القمر دي تبقي
الكارت اللي يلاعبوك بيه
عشان دي الخطوة الجاية
ولو بعتولك صورتها
يبقي لغرض ما في نفوسهم

الحسينى يقول...

أنا معاك فى أنك تستنى شوية قبل ما تبدأ حياة جديدة تفكير سليم احييك عليه.
وموضوع أنك تشوف بنتك ده حقك أرفع قضيه وخليك وراها لحد ما ربنا يمكنك إن شاء الله وحتى لو تشوفها يوم فى الأسبوع المهم تعرف إنك موجود وبتحبها وتعرف تتكلم معاها.
ربنا يوفقك وييسر لك امورك.

أم هريرة (lolocat) يقول...

السلام عليكم ورحمة الله

انا لله وان اليه راجعون
عليك بذكر الله اخى كثيرا جدا

اكتر انسان ظلم فى هذه المشكلة هى ابنتك دون شك


ان تنازعتم فى شىء فرده لله ولرسوله

اخى العزيز دائما وابداً حيل امرك لله تعالى واحكم فيه بمايرضى الله وسوف يبدل الله حالك للخير ان شاء الله

وما فشلت انت به لن يكل الله به ان شاء الله

هذا شيطان لعين فرق بين الاسرة وشتت شملها لعنه الله

اصبر واحتسب اخى ولا تقدم على اى شىء الا اذا كان يوافق الله ورسوله

وبعدين يا سيدى عيد راس سنه ايه احنا مسلمين قوم صلى ركعتين وتوسل الى الله تعالى فى جوف الليل واساله التوفيق والتيسير
وسيب راس السنه للى اخترعوه
استغفر الله دائما كما امرنا الحبيب محمد فكثرة الاستغفار سبب فى الرزق
رزقك الله تعالى الجنة

شوف اقولك حاجة طول ما الابتلاء فى شىء بالدنيا توكل على الله اهم شىء ان الابتلاء مش فى ديننا الحمد لله

ومش بقلل من المصيبة لكنى اذكرك انه بعد ما فقدنا رسولنا عليه السلام كل مصيبة تهون

قوم شوف عملك وحياتك وبلاش كلام هظلم فلانة لو تزوجت ليه اخى الدنيا بخير ان شاء الله
ومش كل صوابعك مثل بعضها
الدنيا بخير والله شوف حياتك

اختار صح وان شاء الله ربنا معاك

واظفر بذات الدين تربت يداك

اتبع الحبيب محمد وان شاء الله ربنا هيسترها معاك وبلاش نبرة اليأس فى كلامك مش علشان واحدة الدنيا تقف ابدا

الدنيا بخير وامه محمد بخير ان شاء الله

اسال الله لك التيسير ان شاء الله

خواطر شابة يقول...

مشكلة كبرى عندما يتحول الزواج الذي هو سكن ومودة الى حرب وصراعات الخاسر الاكبر فيها هم الابناء

drsimoooooooooooooooooooooooooooo يقول...

انا مش مع انك تبعت رسالة لابوها لانة هيضحك عليها وبنتك لسة صغيرة مش هتفهم حاجة زى كدة وربنا يعينك بس انا عاوز اسال سؤال اخر علمك باهل مراتك ومراتك امتى ومتقدرش تعرف اية اخر التطورات يمكن فية جديد او ان احد يتدخل عشان تشوف بنتك يمكن يكون فى الامر امور ولا تيئس من رحمة اللة انة لايياس من رحمتة الا القوم الخاسرين انا عارف انهم مش كويسين بس حاول ولو من بعيد ممكن ربنا يهدى عشان بنتك وعشانك اللة اعلم

eng_semsem يقول...

هبه فاروق
اختي هبه فاروق لو ينفع اروح اخطفها مكنتش اتاخر لحظه بس للاسف مش هينفع مش معايا سلاح ولا قوه لو تقدري تساعديني بدول انا ممكن اضحي بعمري عشان اوصل لهدفي وان بنتي تعيش معايا وانا اسف اني سببت الحزن ليكي ويارب تكون اخر احزانك وتكون السنه الجديده فيها الخير ليا وليكي وللمسلمين

eng_semsem يقول...

سواح في ملك الله
حتى في اسمك حته من دمي ملك بنتي صحيح هي بنتي بس خلاص اخوك اتعلم وانا سايب كل ما يتعلق بالموضوع للظروف وعلى فكره الصوره ماجتش عن طريقهم وانا لما حطيتها على الفيس قعدوا يسالوا كل قرايبهم مين اللي وصل الصوره ليا وعلى فكره انا بطلت العب مع العيال الوحشين يعني خلاص مش فارقه معايا وشكرا للتحذير

eng_semsem يقول...

الحسيني
انا مستني لما بنتي تعرف تتكلم وبعد كده هحاول جاهدا اني اشوفها اما حكاية القضيه انا رافعها من اكتر من سنه ولسه مفيش حكم
شكرا على تواجدك وسامحني اني مقصر معاك كتير

eng_semsem يقول...

ام هريره
اختى هريره اشكرك على النصيحه الغاليه وانا فعلا قبل ما اعمل اي شئ بشوف لو الرسول كان قاعد معانا ممكن ينصحني بايه اما حكاية الصوابع مش زي بعدها انا معاكي ومفيش اختلاف في ستات كتير فاتحين بيوت وكمان صابرين على ازواجهم بس انا خوفي اني انا اللي اظلمها بنت الحلال اللي هجوزها بسبب غيرها اما حكاية راس السنه انا ماقلتش ان احنا نحتفل ونشرب خمرا ونسهر انا قصدي بمناسبة بداية العام الجديد اكون معاها مش اكتر ويارب التيسير لكل المسلمين في امور دنياهم

eng_semsem يقول...

خواطرشابه
للاسف دمار الاسره دمار للمجتمع كله ولازم نفكر نحافظ قبل ما نفكر نهدالبيت

eng_semsem يقول...

drsimooo
اخي الدكتور هيثم العزيز اما علمي بتطورات الموضوع فهي اصبحت شئ ماضي لا اشغل بالي بيه مش فارقه معايا التطورات خالص وبعدين حد يتدخل تاني حانت قريت كام بوست وشفت كام واحد اتدخلوا واستفدت من تدخلهم ايه غير اني اتحبست واتبهدلت وانا قلت كذا مره اني بره مصر يعني كده او كده مش هشوفها

خواطري مع الحياة يقول...

السلام عليكم
اخي اسامه
ربنا قادر على كل شيممكن يرجع الحلم حقيقة
بعدين لو بعت لجدها رساله البنت كيف بتعرف هو جدها بيقول لها
بجد اصبر لحد ماتكبر ويكون معاها تلفون
واكيد بنعمل لها الي انت عايزة
عارفة انك بتقول لسه استنى لما تكبر ويكون معاها تلفون
لكن اصبر
ماضاقت الاوفرجت
طيب اقولك على حل
انت تعرف حد اهل زوجتك يثقوا فيه ويخلوا عنده البنت
لو تعرف حد وانت كمان واثق فيه خليه انت انت وياه على مكان تتقابلوا فيه ويجيب معها البنت تشوفها
وتتصور معاها
واكيد ربنا مابيناسك وخاصتا عارف انك تحب بنتك
وانك مابتسيبها
واكيد بيرحمك
هذا ربنا قادر على كل شي
صلي كل يوم قيام الليل وادعي
واكيد ربنا بيقبل دعائك
ربنا يوفقك وان شاءالله تقدر تشوفها
واكيد بتعرف ان لها اب بيحبها ويموت فيها
على فكره البنوتة قمر عسل والله عسل
نفسي اعضها بخدها
هههههههه
اصلي بحب اعض الاطفال
بحب اسمع بكائهم
ربنا يخليها لك ويارب تقدر تاخذها واكيد في يوم بتحبك واكدي في ناس كثير لما تكبر بقولولها انك طيب وبتحبها طبعا غير اهل امها
تقبل مروري
سلامي ليك اخي اسامه.

eng_semsem يقول...

خواطري مع الحياه
ياريت ينفع اشوفها وياريت حد بيثقوا فيه كان اتدخل من زمان في حل المشاكل بس هو فين اذا كان قال لاخوه ملكش دعوه ببنتي وخالها قال هما رايهم يعني هو ملوش لازمه او كلام وخالها التاني راح شهد انه شاف اثار ضرب واختها قالوا ليها لو ادخلتي في الموضوع مش هتدخلي البيت تاني
ربنا ما بينساش حد ويمهل ولا يهمل وانا واثق في ربنا انه مش هيضيع حقي
تقبلي تحياتي ودعواتي بعام جديد

Tears يقول...

طبعا متفقة معاك فى انك لازم تاخد هدنة عشان تستعيد روحك الاولى و ماتظلمش حد

ربنا يخليلك ملك و يسهل و تقدر تشوفها و تجيبلها لعب كتير معاك و انت رايح مصر عشان تعرف انك بتحبها

موضوع الرسالة على الموبايل مش مفيد مع نمط الاسرة اللى وصفتها..خيه لما ملك تكبر شوية و يبقى عندها موبايل

عارف...انت متماسك عشان ما شفتش البنت بس لو شفتها مرة ح تتعلق بيها و ح تصحى فيك الابوة و ح تتوجع لما تحس انكوا بعيد


ربنا كبير و قادر يهدى النفوس

eng_semsem يقول...

tears
ربنا كبير وقادر ينتقم من كل ظالم وربنا يسهل الحال وتبقي بنتي على طول في حضني ووصل رايك اللي تقريبا الكل اجمع عليه
انا ملهاش لازمه الرساله وانا بثق في رايكم
شكرا على متابعتي

شهر زاد يقول...

أسامة أخي
ملك دي ملك المدونين كلهم وأنا أولهم
هي على راسي والي ريحك أنا معاك فيه واسمي حكيون االأوال انشاء الله
ولا يهمك ربنا موجود واتأكد ان بنتك حتكبر وتبحث عن أبوها بنفسها ومش حتسكت
والمركب سايرة وانا معاك بلاش تتجوز دلوقت خلي الايام تداوي جروحك وتنسيك الاسى الي شفتو غريبة قوي هو في ناس زي كده
بس أقول لك حاجة أنا أكثر واحدة انجرحت من الناس الاقربون أكثر من البعاد
بس بنخ وبقوم وقصتك فيها كثير عبر
اوعى تزعل ولا تنقهر علشان لك رب اسم كريم ولك اخوان انت مشفتهمشه صحيح بس حسين بيك قوي بقلوبهم الي عيطت معاك ومشارعهم الي اجرحت بجرحك
أخي أسامة اوعى تستسلم ولا تكتئب وتخبي نفسك عن الناس
قوم واخرج ووري نفسك لي الناس وقول انا أنا موجود ولازم أعيش
عش يا خويا ولا يهمك وربك حيعوضك خير
وكل سنة وانت طيب وبألف خير

Amwaj يقول...

أصابع اليد يا أسامة مو مثل بعضهم

آنا متأكدة إنك قوي وتقدر تتزوج مرة ثانية وتعيش حياة سعيدة
حتى وإن كانت تجربة الزواج بالنسبة لك تعيسة

ومهما حاولوا يحرمونك من بنتك تأكد إن الله أهوا القوي اللي برجع حقك ومردها تكبر وترجع لأبوها وتعرف حقيقة خوالها

وبالنسبة للرسالة, ما أعتقد إنها تنفع بشي لأنها ما راح تقراها

eng_semsem يقول...

amwaj
حمدالله على السلامه ويارب تكوني بخير
انا مش بقول ان كل الستات كده انا بس بقول ان اللي شفته ممكن يخليني ما اعرفش اتعامل مع مراتي بثقه والثقه مهمه بين الراجل وزوجته انما انا متاكد ان في كتير بنات يعرفوا ربنا ويقدروا قيمة اجوازهم ويحافظوا على بيتهم حتى لو هيجوا على نفسهم ورايك وصل بالنسبه للرساله
شكرا على تواجدك وحرصك على قراءة ما فاتك

eng_semsem يقول...

شهرزاد
اختى العزيزه كلامك وقود ليا يخليني اسعى واعيش وانا زعلت زمان بما فيه الكفايه لحد ما اكتفيت وقلت كفايه وانا بدات طريقه من ساعة ما خرجت من القسم وكتبت فيها نفسي وبكره ربنا يرجع ليا بنتي ويارب ما اقبلش حد في دنيتي محروم من انه يشوف بنته وربنا يجعل العام الجديد عام سعيد على المسلمين ويرد الاقصى لينا وندوق الفرحه والسعاده كلنا
شكرا على تواجدك الدائم معايا

Ramy يقول...

صدقنى

تحية كبيرة جداً من القلب

لموقفك الصح جداً من أن أنت مش عاوز تظلم حد بذنب حد

أنا يمكن جديد على مدونتك بس

التدوينة دى فهمتنى كتير من القصة

و بعدين مش غلط انهم يغيروا الأسم علشان الأنساب و لا أيه مش عارف الصراحة

ربنا معاك و يوفقك و بأذن الله هيجى اليوم اللى هتقولها بنفسك

كل سنة و انتى طيبة يا ملك


ربنا معاك

Ramy يقول...

صحيح انت كويس ان انت مذكرتش اسم الشخص دة اللى جاب الصورة
علشان يفضل سر و يقدر دايماً لو فى ايدة حاجة يقدمها

افروديت يقول...

أنا متعاطفه معاك جدآ في البوست ده يا"أسامه"

ومش هعلق عليه دلوقت

باي

الحــب الجميـــل يقول...

ياربنا
والله ما عرفه اقول حاجه
كفايه صورة ملك
وايه الفايده من الرسايل
البنت لسا صغيرة ومش هتدرك شىء
وكل اللى حواليك من اهلك واهلها عارفين انها بنتك وانك اتظلمت منهم ظلم كبير
ويخدوا منك بنتك كمان ؟؟
قمة الظلم والله

ربنا يخليهالك يارب
وتشوفها على خير
وتتربى وياك وانت اللى تجوزها ان شاء الله
مفيش حال بيفضل زى ما هو

ادعى ربنا وان شاء الله ربنا يستجاب دعوتك
ربنا يريح قلبك يارب
ويصبرك على بعد بنتك عنك
لحد ألقى ...

eng_semsem يقول...

ramy
زيارتك الاولى بس اثرت نقطه مهمه كان في زمان صحابي كانوا بيسموه زيد ابن محمد ولما نزلد الايه (ادعوهم لابائهم )امر الرسول الكريم بان الصحابه يسموه باسمه الحقيقي لوالده والصدفه ان الصحابي ده هو ابو اسامه ابن زيد وانا معاك في حكاية اني اخبي اسمه للسبب ده
شكرا على وجودك

eng_semsem يقول...

افروديت
يعني هنستنى وجودك وتعليقك تاني

eng_semsem يقول...

الحب الجميل
ربنا يستجاب دعاكي الجميل ويجعل لكل مسلم نصيب فيه واناا مليش غير ربنا اشكي ليه هم واطلب منه ينصرني ويرجع ليا بنتي
حمدالله على السلامه

غير معرف يقول...

ربنا يخلي ملك اسامه

وهتفضل غصب عن الجميع ملك اسامه

اما حكاية الكره اكيد هييجي اليوم اللي تكبر وتعرف كويس الحقيقه مهما حصل
هتفضل حته منك

ما شاء الله زي القمر

جوزهاني يا اوسي

حلوه اوسي دي

eng_semsem يقول...

غير معرف
ياريت يجي اليوم اللي فعلا اعرف اختار ليها عريس وما اعرفش فجاه اني بنتي اتجوزت زي ولادتها لما عرفت بعدها ب10 ايام
اهلابيكي يا سيدي اوسي اوس اوس اللي انت عايزه انا معاك

Noha Saleh يقول...

ى شهادة الميلاد اسمها ملك اسامة مش حد تانى
اصبر وربنا يهديهم ويفهموا ان البنت مالهاش ذنب تتحرم من ابوها

حرّة من البلاد..! يقول...

أخي أسامة
كل يوم يزيد احترامي لك وتقديري
انت بالفعل انسان تستحق الخير كله
على فكرة بنتك ما شاء الله مثل القمر
ان شاء الله ربنا يجمعك فيها لا تفقد الامل بالله تفألوا بالخير تجدوه والظالم راح يجيه يومه
والله الفكرة حلوة يا ريت كنت بقدر اساعدك فيها
المهم انني سأدعمك بالدعاء دوما وان شاء الله يفرج همك ويقضي حاجتك
توكل على الله ولن يخذلك بمشيئته

تحياتي الخالصة لشخصك الكريم

جايدا العزيزي يقول...

طبعا اسامه

اكيد لازم تاخد وقت وتفكر قبل ما تقرر الارتباط للمرة التانيه

وبعدين كفايه عليك ملك ربنا يخليهالك

هى احسن شئ فى الدنيا



تبعت البوست اللى فات

بس انت عارف انى فى شرم

بس ما قدرتش اتاخر على اخواتى فى الرد

دمت انت وملك بخير دائما

تحياتى

eng_semsem يقول...

noha saleh
شهادة الميلاد هي مش هتقراها ويمكن ما تعرفش اسم ابوها الا لما تخش المدرسه
ومفيش في ايدي غير الصبر
شكرا على تواجدك

eng_semsem يقول...

حره من البلاد
اشكرك جزيل الشكر على الكلام الجميل اللي ياريت اكون استحقه بجد وربنا يكتب الخير لكل المسلمين ويصلح احوالهم ويداو كل جروح وكل عام وانت بخير

eng_semsem يقول...

جايدا العزيزي
وجودك جنب زوجك وانك تكوني بتقضي ايام سعيده شئ يفرحنا ويخلينا نستحمل بعادك عننا الاجازه ده بس انت قلتي اسبوع بس ما تعجبكيش القعده تفضلي هناك كتير
ربنا يسعدك ويملى ايامك فرح ويكون العام الجديد كله سعاده واطمئنان
وشكرا على تواجدك وتواصلك معنا

بنوتة مصرية يقول...

كان الله فى العون من الواضح كدة ان فى مشوار حياتك كانت الآحداثة كثيرة جدا لكن اظن بعضها كدة غير مفرح ..

عاجبنى جدا انك محبتش تظلم زوجه ثانية فى الآرتباط قبل ان تتخلص من ضغوطك النفسية اللى تسبب فيها البعض من الناس .. وربنا يخليلك ملك وياريت ترسل لها دعوة تقولها فيها كل سنة وهى بنتك حبيبتك ..

تحياتى

re7ab.sale7 يقول...

عجبني كلام كله كله المرة دي
ومعاك حق جدا فيه
بدعيلك ف كل صلاة
ومهما حصل هي بنتك وهتفضل بنتك مهما عملوا وغيروا...
انت المفروض ترفعلا قضية عشان تشوف بنتك....
موضوع الرسالة مش مفيد
بس صدقني مع مررور الوقت هتلاقي الف طريقة وطريقة تاخد حقك بيها من الناس الغريبة دي وبالعقل مش بطريقتهم البشعة دي....
ربنا معاك وان شاء الله بنتك ترجعلك بالسلامة مهما حصل

carmen يقول...

انا قرأت البوست اول مانزل بعشر دقايق ومن ساعتها بجد مش قادرة اعلق
كل اللي اقدر اقوله
ربنا يقويك ويهدي حال بنتك وتطلع افضل من الجو اللي حواليها ويجعلها ذرية صالحة ويجمعك بها علي خير

eng_semsem يقول...

بنوته مصريه
صديقتي الجديده انا احداث حياتي سيئه منذ 20/7/2008 الى 1/1/2010 والسنه اللي فاتت كنت بلم نفسي واحوالي وشغلي وبحاول ارجع لنفسي وفي كتابة موضوعي حكايتي مع الايام ارتحت من همي
اهلا بك زائره دائمه

eng_semsem يقول...

rehab
انا رافع قضيه فعلا من شهر نوفمبر 2009 والى الان لسه مفيش حكم انت عارفه شغل المحامين وتضييع الوقت لحد ما زهقت وسبت مصر كلها ويا عالم هرجع لليها امتى ويارب بنتي ترجعلى
شكرا على شعورك ودعواتك وتعليقك الجميل

eng_semsem يقول...

carmen
يارب ترجع تاني ليا وتعيش معايا وتكبر قدام عنيه
شكرا على وجودك

arab video يقول...

دمت و دامت إبداعاتك

Dr : Nour يقول...

الســلام عليكم و رحمــة الله و بركاته

فى مثـل عندنا بيقول
<< اللى إتلسع من الشـوربة .. ينفخ فى الزبادى >>

و أكيد تجربتك الأولى تحتم عليك الكثير من الحذر و التأنى فى المستقبل

بالرغم أنها حتما ستترك فى نفسـك بعض الآثار مهما حاولت تجاهلها و ستؤثر على تعاملاتك فيما بعد
ستجعلك أقدر على الحكم على الآخرين و لن تعطى الآمان بسهولة
و كذلك ستترك بعض من سوء النيه تجاه الآخرين و لو لفترة
و هذا شىء طبيعى بكل المقاييس

أما مســألة إبنتـك << مــلك >>
أعتقد فعلا أنها مسألة وقــت لا أكثر

و بمرور الزمــن و الأيام أتمنى ألا ينطفىء الحنين و لا يخبو الأمل فى اللقــاء
و بخاصة إذا بدأت حياة جديدة

موضوع المسج ..!!
أعتقد أنه لا أمل مرجو منه
و ربما يفهم خطـأ
فلتجعل نفسك دائما فوق مستوى الشبهات

دمت بخير
تحياتى و أرق أمنياتى بالعــام الجــديد

eng_semsem يقول...

dr/nour
اهلا بيك ونورتني وغالبا انت جمعت اللي هيحصل هستنى شويه في الارتباط وبنتي ربنا يسهل واللي عايزه ربنا هيكون والرساله فكره خلاص ماتت لان تقريبا الكل رفضها وحكاية ان ليها معنى تاني قلقتني اساسا كل عام وانت بخير ويارب تلاقي احلامك قدامك في السنه الجديده

سندباد يقول...

انا كنت متابع الموضوع ده من اوله بس محبتش اعلق الا لما تقول كل اللي عندك
انا حاسس ومقدر وعارف كل اللي انت حاسس بيه ده لاني مريت بنفس الظروف تقريبا مع الاختلاف ان كان موضوعي في قدر من التحضر والاخلاق شوية اللي اقدر اقوله ان اي حاجة في الدنيا مجرد وقت بتبقي في مرحلة اشتعال واحتراق في البداية وبعدين الموضوع كله بيبقي رماد ربنا يعينك ويعطيك القدرة علي التحمل
تقديري واحترامي

eng_semsem يقول...

اخي سندباد
واعتقد ان الوقت قد مر بما فيه الكفايه لتحويل ما تبقى من النار الى رماد
شكرا على وجودك وجعلها الله عام سعيد عليك وعلى سائر المسلمين

فتاه من الصعيد يقول...

أولا أنا قريت البوست اللي قبل كده وبجد أنا متألمه إن الأمور بينكم توصل لكده

بس هو دايما إتعودنا على الأساليب الغريبه دي من أي أتنين بينفصلوا للاسف

بالنسبه لإقتراحك فأنا مش عارفه بس هو تصرف كيدي أكتر منه شيء أخر

لان بنتك مش هتعرف بيه ولا هيفيدها بشيء

ربنا يجمعك بملك عن قريب ... وترجع لحياتك وتستعيدها إن شاء الله

تحياتي

eng_semsem يقول...

فتاه من الصعيد
حتى لو ده اللي بيحصل ما بين اي اتني بينفصلوا هو غلط ومش من الاسلام ولازم نحاربه الانفصال مش عيب ايه يعني لما اتنين ما اتفقوش بس لازم يخرجوا بالاصول لا اسيب فيها جرح ولا هي تجرحني وكفايه اللي هيضيع في السكه ما نضيعوش بزياده اما عن رجوعي لحياتي فانا خلاص رجعت لنفسي وحياتي وبنتي ربنا يسمع منك ويجمعني بيها

اسماء عبدالعزيز يقول...

اخي الكريم كل عام وانت بخير حال وجعله الله عام سعيد عليك وعلى ابنتك الجميلة
حماها الله ورعاها لك ..

بالنسبة للارتباط باخرى نعم ليس هذا وقته وانما متى وقته فهو متروك لله سبحانه وتعالى وحينما تصادف القلب الذي تستحقه لن تسأل اين ومتى ولم تعلم الى اين ستذهب معه ..
وتأكد بان الله عز وجل اقسم على نفسه ان يرد حق المظلوم .. ولن يخيب رجاه ..

بالنسبه لابنتك انه اخذ اسمك
ساروى لك شيء حدث بالفعل وهى حكاية صديقة لى .. ولك ان تشعر وتفكر

كان هناك زوجان انجبا بنتا .. وكان الاب قاسي ومتعسف وطلقها واخذ بعض من حقوقها .. وتزوج باخرى
وحينما تزوجت الام كانت الطفله تبلغ من العمر عام ..
اخذها والدها واعطاها لزوجته وكان مع كل يوم تكبر فيه يسمعها ان امها كانت مثال لسوء الخلق وانها توفت
وظلت الطفله بداخلها تبكى وتشتاق لامها ولم تصدق كلامه
ومرت الايام وكبرت وكان يمنع اى تواصل للام مع ابنتها
حت بالقانون لم تفلح الام المسكين
ورغم ذلك حين دخلت الابنه المدرسه بعامها الاول
وقفت امها على باب مدرستها والطفله بداخلها وراحت تبكي وجاؤو المدرسين بها
اليها وحين راتها دمعت عينا الطفله ..
ولم تدرى من هذه التى اخذ الحزن منها الكثير
فقالت لها برفق انا ماما .. فما كان منها الا ان خافت لوهلة ثم جرت على احضانها وهى تبكي وتقول لها انهم قالوا لها انها ماتت
ومن بعدها عاشت الطفله بينهما وتزور امها ..ولكن ظلت تكره والدها الذى كذب عليها .. ولم تحترمه قط

زى مابيقولو مسير الحي يتلاقى

وبعدين باقولك ابعت رسايل زى مانت عايز واعملهم ازعااااااااااااااااج
يقولوا اللي يقلوه يتفلقوااااااااا

واصبر على جارك ...
صدقنى هتيجى لحد عندك
واحده زى دي اهلها بيدوروا على الفلوس وسرعان ماهتاخد خطوه بحياتها
وهتيجى بحضانك
او حضاة والدتك
لان حين تتزوج طليقتك
من حقك تطلب حضانة البنت .. لانك مش متزوج
ولو متزوج يبقى والدتك اللى تاخد حضانتها ...

عامتا اصبر والدنيا هتفتحلك من تانى اكيد
وربك هيرد شوقك لبنتك
واقرفهم ... مافيش مشكلة
وكل اصحابك معاك
وعام 2011 خير بامر الله تعالى

Dr/ walaa salah يقول...

طبعاً انا جيت متأخره

لكن في الاول احب اقولك ما شاء الله

بنوتك جميله اوي

ربنا يفرحك بيها ويجعلها ذريه صالحه


نيجي بقى لكلامك

بالنسبه لاول جزء فيه انك مش هترتبط بحد دلوقتي عشان متظلمهوش معاك


ده رد فعل طبيعي لاي انسان طيب بيتعرض للظلم

الانسان ده طالما انه داق طعم الظلم عمره ما بيتمنى انه يكون سبب في ان غيره يدوق طعمه هو كمان


لكن احب اقولك ويمكن الايام تثبتلك كلامي

انت زي ما انت متخافش

الانسان الطيب اللي جواك لسه ما متش

يمكن نقول انه مريح شويه من الحرب اللي كان فيها

وقاعد بيعيد حساباته

لكن متغيرش صدقني

ويمكن يا اسامه لو مريت بنفس التجربه تاني هتمشيها بنفس الخطوات

ممكن يكون بحذر لكن صدقني هتمشيها

فمتقلقش من انك تظلم اي واحده بسبب مراتك لان القلق ده في حد ذاته انتصار لمراتك على نفسك

وفكر في جملتي دي كويس

لكن خد وقتك على الاقل لغاية لما تستقر في موضوع القضايا

وبعدين فكر صح في اختيارك بعد كده

اظفر بذات الدين

وبعدين اسأل عن الاهل قبل ما تسأل عن البنت


ربنا يوفقك


بالنسبه للرساله

طبعا انت غيرت رايك لان الكل رفض الفكره

لكن اللي لفت انتباهي ان في ناس قالولك استنى لما بنتك تكبر وابعتلها

انا بقولك اوعى يا اسامه تخلي بنتك زي الكوره وسطيكم

وزي ما قال سواح انهم هيستخدموها في يوم ككارت يلاعبوك بيها

اوعى انت كمان ترد ليهم اي فعل عن طريقها


زي مثلا لما بيقولوا للعيال ان دي ملك حسين

تقوم انت بعتلها رساله وتقولها ملك اسامه

بنتك ضحيه يا اسامه لمشاكلكم وملهاش ذنب في كل ده


انت ليها اب وبس

سيبك من افعالهم وعاملها كأب

اديها الحنان والامان والدفء

واوعى في يوم تخليها تحس انها مشتته بينكم

هما من ناحيه وانت من ناحيه

معلشي طولت في التعليق بس صورة ملك مخلياني اكره القصه كلها من غير ما افكر حتى مين الغلطان ومتزعلش مني

eng_semsem يقول...

اسماء عبدالعزيز
كل عام وانت بخير وصحه وهناء وسعاده ادام الله عليك افراحك قصتك فيها العبره وفيها الامل وانا مستني بكره لما اشوف بنتي واحضنها واعذريني لو مذكرتش اسمك في البوست التاني لاني بجد معرفتش اقراك لسه ومنك نستفيد وكفايه دعواتك النبيله اللي بيحركها قلبك

eng_semsem يقول...

dr/walaa
انت بتتاخري مهما تتاخري بس برده بستنى رايك ويمكن قريتي الكلام اللي انا قلته لاني كنت محتاج اقوله وصدقيني كنت هتحمل امها عشان تعيش وتكبر قدام عيوني وعمري اني فكرت استخدمها انا خايف يبعدوها عني ونفسي اكون قدامها واقلها انا هنا ونفسي اكون جنبك واساعدك وانت بتحاولي تمشي وكل حاجه في حياتك انا هنا ليكي بس مش عارف اوصلها
كل عام وانت بخير

الغاردينيا يقول...

ماشاء الله قمر :)
بجد بجد مش مجاملة ربي يحميها ويحفظها
انا قرات البوست من بدري على فكرة بس كنت مستعجلة فاخرت التعليق
احييك على مساله تاخير زواج لان الظلم وحش والانسان الصح يعمل اللى انت بتعمله انتظر عيش حياتك كذا بلا قيود وبلا نكد وبيجي يوم وبتحس انك تحررت من وجعك يومها بتكون رجعت اسامه عبد الرحمن اللى لسه اتخرج و بيدور على عروسة وربك كريم ومابينسي حد

مساله الرساله اذا انت تحب هذا فليش لا ؟ مع انه صدقني التطنيش احسن ومسيرها بنتك هتكبر وتسئل ابويا فين
واظن عندك شهود كثير يوضحوا لها الحقيقة بجد احمد الله تخلصت من زوجة متعبة
كان ممكن تعمل فيك شئ اسوا مثلا .. ^_^
تذبحك وانت نايم :)
تحية

bride ghost يقول...

الله يوفقك أخي أسامة
ويفرجها عليك من غامض علمو
وحبيت أذكرك إن :الصبر مفتاح الفرج.....
تقبل مروري المتواضع
تحياتي ....

faroukfahmy58 يقول...

من حبى لمدوناتك اللى دخلتنى من بابها واغلقت الابواب ونسيت المفتاح وبصراحة انا مش عاوز اخرج واخرج ليه وانا ميسوطكدخ مع ابداعاتك ياريت ياشيخ ما تلاقى المفتاح

eng_semsem يقول...

الغاردينيا
ربنا يكرمك وانت رافعه معنوياتي وانا هعتمد على سياسة التطنيش اللي الكل تقريبا ان اجمع بلاش تعبرهم والحمدلله اني لسه عايش وما قتلتنيش يا ستي الرب واحد والعمر واحد ساعة ما هيجي الاجل مش هيتاخر لحظه
كل عام وانت بخير

eng_semsem يقول...

bride ghost
مرورك مرور غالي عاليا ربنا يجعل الفرج قريب علينا كلنا ويجعل ايامك وايامنا كلها سعاده

eng_semsem يقول...

farouk
اهلا بيك في مدونتي وتنورني في اي وقت وبيتك تدخله ومعاك مفتاحه