الجمعة، 24 ديسمبر، 2010

حكايتي مع الايام (15)

تاني يوم طلبني مديري في الشركه وكان يوم 28/3/2009وقلي انا جه ليا جواب من المحكمه بمرتبك وقلت ليهم بجواب رسمي مرتبك 200 جنيه ومثبت في التامينات وانا سالت عليك اصدقائك في الشغل مدير الموقع والمحاسب والمهندسين وده شجعني اني اقلك انا ليا تجربه شخصيه في المواضيع اللي زي ده واسمح ليا اني احاول اساعدك .
من كتر همي حكيت وقلت كل حاجه عندي وعنه ماخبيت شئ وانا قلبي بيصرخ في ايه ليه كل ده بيحصل عشان ايه ومش عارف ساعتها اخد رقم ابوها مني او من المحامي اللي جاب الورقه وكلمه واقنعني انها لسه برده مراتك لازم تبعت ليها فلوس عشان تثبت حسن نيتك وبعت معاه على 3شهور مبلغ 3500 جنيه وقلت في داهيه الفلوس وانا مش عارف اعمل حاجه بيها تبسطيني يبقى ايه فايدتها واستنيت اي رد ولكن وصل ليا خبر اكيد مراتك ولدت من عشر ايام جابت بنتي يوم 9/4/2009 وانا عرفت من الشارع يوم 19/4/2009 وكمان سمتها ملك اتصلت بيه زي المجنون هو انت بتحل مع مين قلي في ايه هو في جديد قلتله بنتي جت للدنيا بقالها عشر ايام مفيش حد قلك منهم امال انت بتحل في ايه وبصراحه استحمل كلامي برغم انه راجل كبير في السن ومديري بس انا جرحي عجوز وجرحي بقى اكبر من المحيط وعرفت انه اخد مراته من القاهره وراح عندهم كفرالشيخ بعدها واتكلم معاهم كذا مره بس مفيش جديد.
وفي وسط ده زميل ابويا قابل ابوها وقله يا عم حسين بدام مفيش حد عاجبك كلامه واللي في دماغك مش عارفينه ايه رايك في الطلاق واهو برده حل قال ليه انا عايز قايمتها ونفقتها ومؤخرها وشقتها رد عليه انا مش هعرف اجيب ليك الكلام ده لو عندك حد يعرف روح ليه وسابه ومشي وفضل الوضع زي ما هو لحد ما جت ليا ورقه تانيه بتقول انها رفعت قضية نفقه للبنت يوم 6/6/2009 اتصلت بمديري تاني
هو انت بعت الفلوس ولا ايه قلي ليه في ايه قلت ليه انا جت ليا قضيه تانيه نفقه للبنت قلي فلوسك وصلت ليهم وانا هكلمهم تاني واشوف وعادي ولا حاجه حصلت .
لحد ما دخل رمضان وبعد حوالي اسبوع اتصل بيا وقلي تعالى على الشركه هنفطر سوا النهارده رحت ليه لاقيت المحاسب هناك وتقريبا هو كان عارف كل حاجه لانه زميلي وقريب من المدير جدا وطلب مني نمرة تليفون والدي واتصل بيه وقال ليه يا حاج عبدالرحمن انا هاجي افطر عندكم يوم الجمعه وبعد مكالمة والدي قعدنا وفطرنا في مطعم اسمه وادي النيل بتاع سمك جامد برده على فكره وبعد الفطار والصلاه قال ليا تعالى هنشتري حبة هدوم لبنتك وبصراحه انا كنت رافض اني اروح اشوفها عشان مااربطش نفسي بيها او اتعلق بيها ويمكن ما اعرفش اشوفها بعديها وكان نفسي يأما ترجع لبيت ابوها يأما احاول انساها او على الاقل ما اربطش نفسي بيها وكنت رافض الفكره تماما واشترى هو والمحاسب كل حاجه وبعدها روحنا وهو اخد مراته وجاب لبنتي  كمان سلسله وخاتم وطبعا انا دفعت تمن كل حاجه لانها بنتي ورحنا فطرنا عند والدي في البيت وبعد العشاء اخدني ورحنا على بيتهم مااتكلمناش في اي حاجه ابوها طلع بنتي واخدتها على رجلي وشيلتها وحضنتها وقلت ليها في ودنها ما تخافيش ابوكي مش هسيبك وهتفضلي معاه لو حتى ذكرى والمدير بتاعي قلي بص الناحيه ده عشان اصورك معاها ابوها قام وخطفها مني وقال اصلي اسمع ان تصوير العيال الصغيره حرام وانا ضحكت غصب عني لاني قلت في سري ويعني ماسمعش ابدا انه حرام يحرمها من ابوها ومش حرام انه يحرمني من بنتي وقعدنا حوالي ساعه وقمنا ومشينا واحنا في الطريق سكت الكلام خالص مش قادر انطق بكلمه ورجعت معاه على بيتي في فيصل واحنا في الطريق قلي ابعت لمراتك رساله حلوه قلت ليه لما اوصل البيت هبعت ليها وهبعتها ليك عشان تعرف انا قلت ايه وردت عليا بكلام مش جميل بعت برده الرد ليه قلي رد تاني برساله رديت وردت هي برده برساله اوحش من الاولى قلي كفايه ماتبعتش تاني حاجه وبعدها بيومين وصلت رساله تانيه منها ولسه معايا في التليفون لانها اغلى رساله في حياتي وكان مضمونها بالحرف (ازيك انا عايزه اقعد واتكلم معاك) ما صدقتش نفسي طبعا زيكم ياااه اخيرا في امل اتصلت بالمدير على طول وقلت ليه قلي ردت قلت لا قلى اتصل بيها وكلمها على طوول واتصلت وكلمتها وقلت ليها وماله نقعد سوا ونشوف الدنيا فيها ايه انا هنزل كفرالشيخ اخر الاسبوع ولا اجي دلوقتي قالت لا خليها اخر الاسبوع وقبلها بكام يوم رنت طبعا قفلت عليها واتصلت انا امال هي تدفع تمن المكالمه لا عيب قلت ليها خير في حاجه قالت انا هاجي القاهره ونتقابل هناك احسن قلت وماله هتيجي امتى قالت غالبا يوم الاتنين قلتلها ماشي هتجيبي البنت معاكي قالت اه طبعا يا فرج الله ماشي انا ف انتظارك وجت يوم ماتش مصر وزامبيا في تصفيات كاس العالم كان الماتش قبل الفطار بس ضحيت بمصر وصليت العصر واتشيكت ومليت جيوبي عشان افطرها بره في مكان كويس واتفقنا على المكان اللي هنتقابل فيه في اول الشارع بتاع بيتنا اللي اتجوزنا وبدانا فيه واتصلت تاني انت فين قلت انا هنا واقف قدام محل العصير اهو طيب خلاص انا دقيقتين وهاجي ولاقيت واحد قرب مني وبعدها اتنين قلي انت اسامه عبدالرحمن قلت ليه ايوه طيب بطاقتك قلت ليه من حضرتك قلي انا الظابط .... من تنفيذ الاحكام وياريت تيجي معانا من غير شوشره انت عليك حكم في قضية تبديد قايمه  (اللي هي بتاعة العفش وكده ) وانا جي اخدك وبعد ما ركبنا سوا العربيه قلي انت عمرك شفتني قبل كده قلت ليه لا قلي امال مراتك ليه مقدمه شكوى اني اخدت منك رشوه عشان ما اقبضش عليك وعشان ما تفكرش كتير هي اللي عملت ليك الكمين .
طبعا مش هحكي شعوري لانه اكيد وصل ليكم انا كنت عامل ازاي انا اتخرست واتعميت وشبه اتشليت ومش قادر اعمل شئ واخر ما قدرت اعمله بعت رساله للمدير ولابويا انا في قسم الهرم اتصرفوا ودخلت القسم ساعة اذان المغرب فطرت هناك وكنت بتخيل شعور ابويا كان عامل ايه ابنه الوحيد واخدينه على القسم وبصراحه كل الناس اتحركت ووقفت معايا ليا عم شغال في النيابه خلاني ابات في غرفه هناك لانزلت لا حجز ولا حطوا في ايدي كلبشات بس برده انا بايت في القسم وجه المحاسب وجاب ليا سجاير وكنز ومياه معدنيه بس برده بايت في القسم وجه عمي وعمي التاني ظابط في الجيش وجابوا ليا اكل من مطعم فلفله بس برده انا بايت في القسم موبايلي معايا وقرب يفصل شحن جابوا ليا شاحن بس برده بايت في القسم وقضيت ليلتي هناك وشفت ناس محترمه جدا وملناش دعوه بيهم والصبح خرج معايا امين شرطه ورحنا بعربية عمي النيابه وعلبال ما وصلنا كان المحامي خلص كل حاجه ورجعنا على قسم الهرم سلمنا جواب الاستئناف ورجعت مع عمي وابويا وقالوا ليا تحب تعمل ايه قلت ليهم خدوني على شقتي وصلت شقتي وطلعت وقلت ليهم روحوا انت عند ستو وانا هنام شويه وهاجي افطر معاكم ودخلت اول حاجه عملتها اخدت دش غسلت فيه نفسي من كل ذرة ضعف باقيه من كل نقطة حب جوه قلبي من كل لحظة شوق اني اشوف بنتي وقتلت نفسي بنفسي وحلفت على نفسي اني اكون غير نفسي وبعدين انا الغلطان انا اللي سلمت نفسي وطلعت بعد ما نشفت نفسي كويس عشان مفيش نقطه تكون لسه ماسكه في جسمي ودخلت نمت نوم من نوع تاني انا اعلنت بنومي وفاتي واول ما صحيت اتولدت من تاني لوحدي وبدات اعلم نفسي المشي بنفسي وقررت اني اعيش بس لنفسي وبعت كل حاجه تستاهل اني انساها وقمت ولبست ونزلت وانا مليش غير اهلي ابويا وامي وعمي وخالي وغير كده انا قلبي خالي وشوفت محامي كويس وعملت ليه توكيل واحد في القاهره و واحد في كفرالشيخ وسلمت عفشي بنفسي ليهم وانتهت القضيه والمحامي معاه اوراقها ونسيت كل حاجه فاتت وماتت وعرفت بعدها ان كان في قضية طلاق رفعتها يوم 25/12/2008 واترفضت عشان جابت اتنين شهود خالها من الشرقيه و واحد جارهم في كفرالشيخ انا معرفوش وشهدوا انهم شافوا اثار ضرب على جسمها مني والقاضي طبعا قال شقتها في القاهره وواحد من كفرالشيخ والتاني من الشرقيه ازاي وبعدين بدام ماشوفتهوش بيضرب ملكموش شهاده عندي ورجع خالها بيته اللي انا عمري ما شوفته ولا اعرفه ويمهل ولا يهمل اصابه ربنا بفيرس c ومات في شهر اربعه اللي فات والتاني انا معرفش عنه حاجه ومش عايز اعرف و لسه قضية النفقه بتاعتها وقضية نفقة البنت في المحاكم لسه مخلصتش والمحامي بتاعي رفع قضية طاعه ورؤيا للبنت الى الان لما يصدر الحكم ومش هيفرق معايا كتير لاني بقالي شهور بره مصر كلها بناسها واهلها ومش عايز ارجع لها تاني  وهي ده كانت حكايتي مع الايام حتى 1/1/2010 اما 2010 كلها انا عايش مع نفسي ولنفسي من غير ما انسى اهلى اللي وقفوا جنبي من البدايه للنهايه وعمري ما هقصر معاهم ولاهنساهم والحمدلله رجعت لنفسي ولشغلي ولحياتي من تاني تخيلوا ورا كل قصه حزينه ليها نهايه سعيده انا كنت تهت من نفسي ومعاكم لاقيت نفسي شكرا على متابعتكم ليا .... 

هناك 60 تعليقًا:

موناليزا يقول...

مش عارفة أقولك إيه
فتجربة الطلاق فى حد ذاتها مريرة جداً وخاصة لو كان فيها غدر وظلم من الطرف التانى
بس برضه أحييك على قوتك الداخلية واستردادك لنفسك سريعاً أنا عن نفسى أخذت منى سنين عشان اعرف ارجع تانى زى الأول -رغم أن الظلم ما زال واقعاً علىَّ-.

عموماً تمنياتنا لك يحياة جديدة سعيدة ويكون فيها عوض عما آلم بك:)

Dr/ walaa salah يقول...

اولاً الف مبروك لقدوم ملك

ربنا يجعلها ذريه صالحه وتفرح بيها

وانت في الاول والاخر باباها مهما حصل واوعى تنسى كده

بجد يا اسامه انا مكنتش هرد المره دي

لولا اني عرفت انك خلصت حكايتك

مش عايزه اقولك انك تستاهل الكمين اللي حصلك في الاخر


لاني وقتها هضحك على نفسي لاني عارفه كويس انك عملت كده بردوا من باب المحافظه على بيتك

مع العلم ان ده سبب مش مقنع انك تستحمل كل ده

لكن اكيد يا اسامه انك اتعلمت من تجربتك

انت اتنازلت كتير عشان تحافظ على بيتك

لكن اللي مكتوب هو اللي حصل

واكيد لما بتقعد مع نفسك بتندم على التنازلات دي

عشان كده خدها مني نصيحه وعن تجربه والله

اوعى تتنازل تاني وتحسس الناس انك طيب

اللي ربنا كاتبه هنشوفه

وطالما اننا مش هنقدر نغيره

يبقى نشوفه واحنا راضيين عن نفسنا

ومنخليش ابداً يوم يجيي نقول ياريتنا ما عملنا كذا وكذا

ونلوم نفسنا في الاخر

خليك دايماً متصالح مع نفسك

ومتخليهاش في يوم تبصلك بنظرة عتاب على اللي عملته فيها


ربنا يوفقك يا اسامه ويعوضك خير في بنتك

ومحدش بيتعلم ببلاش

لازم نقع ونقف تاني عشان نقدر نواجهه الحياه

ابتدي بص للدنيا بقى بنظره تانيه وشوف مستقبلك ومتخليش تجربه زي دي تهدمك

بالعكس خليها حجر الاساس لحياه جديده تبنيها صح

خواطري مع الحياة يقول...

سبقتني
كنت عايزة اكون الاولى
يلا معلش خيرها في غيرها
ههههههههههه
ايوة كده
غيرت نفسك ونسيت اسامه القديم وطلع اسامه الجديد
عجبني اصرارك وتخليك عنها
دي كانت مريضه هي واهلها كان لازم يوديوهم مصحة المجانين
الكرامه فوق كل حساب
تغورهي واهلها في ستين داهيه
ماعاد بنتك
اكيد قمر
وان شاءالله بتشوفها
وزي ماقلت يمهل ولايهمل
ربنا يوفقك ويخلي لك اهلك ويحقق كل الي تتمناه
تقبل مروري
سلامي ليك اخي اسامه.

سواح في ملك الله- يقول...

ربنا هيعوضك خير
ربنا هيعوضك خير
وابوها الله يسامحه
عشان هو اناسف جوز است
ربنا هيفرج عليه خلقه
اخي الفاضل ربنا معاك

Dr : Nour يقول...

الســلام عليكم و رحمة اللــه و بركاته

بتهــرج ... صح !!

الكــلام دا حصــل ..؟؟!!

يعنى حقيقى .. و ليس خيااااال ..!!!

واقع عشـــته !!

أعتقد أن دا كان الحل الســليم

أول حاجة كانت لازم تعملها أول ما تخرج من القســم
أنك ترســل لها ورقة الطـــلااااااق
وليس هناك حل آخر مهما كانت الأسباب
ولا تراجع فيه

لكن أرجع و أقول
أطراف كتيرة دخلت فى الموضوع
سواء من العائلة أو من الأصدقاء
أو معارف
و للأسف دورهم كان عديم الفائدة
أتمنى تاخد بالك من النقطة دى فى المستقبل

لفت نظرى بعض النثريات الصغيرة التى ذكرتها
منها ..
عمل بابا ..
عمل ماما ..
مكان عملك ..
إسم الكافيه ..
الصراحة إستغربت
أنت فى إيه ولا فى إيه ؟؟؟

بعض الكلمات و العبارات أَضكتنى
فشر البليــلة ما يضحك حقا

لا يسعنى فى النهاية
إلا أن أبارك لك رجــوعك لنفســك
بالفعل أنت نسيتها فى تلك الدوامة

أتمنى لك السعادة و راحة البال فى حياتك المستقبلية

و الأهم أن تتعلم من تلك التجربة
ولا تترك فيك أى أثر سلبى
بل على العكس الحياة مليئة بالمفارقات
و كما يوجد الحزن و الشقاء توجد السعادة

فكرتنى بكلمة ..
قل لمن يحمل همــا .. بأن همــه لن يدوم
فكمـاتفنى الســعادة .. تفنى الهمــوم

دمت بســعادة

eng_semsem يقول...

موناليزا
انا لسه مجربتش تجربة الطلاق عشان احكم عليها بس اي كانت هتبقى احسن من اللي فات ده كله والظلم وقع عليا اول مره لما خرجت انا الللي ساعدتها بعد كده على ظلمي وتمنياتي القلبيه لخروجك من جروحك اقوى والحياه السعيده ليكي ولكل المسلمين
شكرا على متابعتي

eng_semsem يقول...

dr/walaa
الله يبارك فيكي انا مش ناسي اني ابوها بس مع ايقاف التنفيذ وانا حاليا برغم اني زعلان من اللي عملته عشان احافظ على بيتي بس زعلى كان هيكون اكبر لو حسيت اني قصرت في حل المشكله ونصايحك الغاليه تاج على راسي مش هقلعه ابدا لاني من زمان اخدت قراري بكلامك وانا ما وقعتش انا اتهزت ورجعت تاني بروح جديده وقلب اجمد من الاول وحياتي الجديدهبحاول ابني فيها وانا مهندس يعني مفيش اشطر مني في المباني
وشكرا على متابعتي

eng_semsem يقول...

خواطري مع الحياه
المهم الاولى للقلب يا رشا هههههه
اسامه الجديد عايش حتى الان سعيد بيمشي في الطريق مش شايل هم شئ وطالع لقدام وحياته ماشيه تمام وهحكي عنه المره اللي جايه
وشكرا على متابعتك الفتره اللي فاتت

eng_semsem يقول...

سواح في ملك الله
عوضه قريب مني وبشوفه في حياتي وهحكي قصه حلوه حصلت ليا بتقول ان ربنا معاياومع كل مظلوم في الدنيا
شكرا على متابعتك الغاليه

وداد يقول...

مش عارفة ابدا التعليق منين

بس كنت عايزة اسال هو مرتبك 200 جنية بس ولا 2000 جنية

دا انا شغالة مدرسة بالعقد ومرتبي 300 وشوية

دا جزأ

جزأ تاني بقى

بصراحة انا مبسوطة جدا انك اخيرا طلقتها

بس انت أتأخرت قوي قوي

والمفروض إللي حواليك كانوا بدل ما يحاولوا كانوا نصحكوا بالطلاق على طول

لأنه مش معقول كل واحد يحاول ويفشل ويجي إللي بعده وإللي بعده

طولت قوي حكاية الصلح دي

وبعدين إيه حكاية ابعتلها رسالة

إزاي يعني تبعتلها وهي اصلا مفكرتش فيك ولا حتى قالت لك على خبر ولادتها

دي انسانه ربنا يسامحها

استغلت طيبتك جدا

وانت إللي سمحت لها بكده

كان من الأول طلاق والله

لكن على العموم مبروووووووووووك على الطلاق

ومبروك على قدوم ملك

وان شاء الله ربنا هيعوضك عاجلاً غير آجلاً

بس نصيحة مني بلاش الطيبة دي

لأنه كل إللي انت فيه من طيبتك

ومبروك على انك وجدت نفسك أخيرا

عيش حياتك زي ما انت عايز

وحاول تحرص من الناس

مش بقول تخونهم بس على الأقل مش تآمن للكل بكل سهولة علشان متوقعش في فخ آخر وحكاية جديدة

اسفة على الإطالة

بس فرحانه انك الآن سعيد بحياتك ومفيش كوابيس ولا هم

eng_semsem يقول...

dr /nour
تخيل في بشر كده في الدنيا والانحطاط بالناس وصل لحد فين وعلى العموم انا لو طلقتها يبقى ريحتها وانا لازم اخد حقي منها ولو معرفتش في الدنيا هستنى الاخره
وبالنسبه للكلمات الغريبه في وسط الموضوع انا كان هدفي ان كل واحد يقرا ما يكتأبش زياده عن الزوم واحاول اخرجه من المود الكئيب اللي كنت عايش فيه عشان يفكر بعقله ما يحكمش بس بقلبه
وانا حاطط شعار على المدونه لا تقل عندي هم كبير يارب بل قل يا هم عندي رب كبير
شكرا على تواجدك الاخير ولكن جميل جدا ومؤثر

Noha Saleh يقول...

انا مش هعلق بقى خلاص
ربنا يعوضك خير

Tears يقول...

غسلت فيه نفسي من كل ذرة ضعف باقيه من كل نقطة حب جوه قلبي من كل لحظة شوق اني اشوف بنتي وقتلت نفسي بنفسي وحلفت على نفسي اني اكون غير نفسي وبعدين انا الغلطان انا اللي سلمت نفسي

******************************
انت قلت الخلاصة

eng_semsem يقول...

وداد
ده المرتب اللي موجود في التامينات مش الحقيقي اكيد اولا مش عايز ازعلك بس انا لسه ماطلقتهاش وربنا يبارك فيكي ويرزقك الذريه الصالحه اللي تتربى قدام عنيكي وانا اكيد اتغيرت وخصوصا بعد الليله اللي قضتها في القسم ساعدتني على التركيز كويس وانا هسمع كلامك ومش هخون الناس بس مش هسلم ليهم رقبتي وربنا يسعدك ويحلي ايامك
وشكرا على متابعتي طول الفتره اللي فاتت

eng_semsem يقول...

noha saleh
حتى وانت مش هتعلقي منوراني وانا تعبتك معايا في تجربه كانت نهايتها من بدايتها وانا اللي اخرتها وربنا يدي كل واحد على قد نيته
شكرا على متابعتي طول الفتره اللي فاتت

eng_semsem يقول...

tears
افهم من كلامك اني وصلت للي كنت مفروض اوصل ليه من زمان بس انا اتاخرت كان لازم اتعلم ومفيش تعليم ببلاش
شكرا على متابعتي طول الفتره اللي فاتت

هبة فاروق يقول...

ربنا يعوض عليك واظن انت كدة استريحت
ووجع ساعة ولا كل ساعة
وان شاء الله ربنا يعوضك بانسانة تحبك وتهتم بيك وتعوضك كل اللى فات
تمنياتى بحياة جديدة جميلة

eng_semsem يقول...

هبه فاروق
اختى العزيزه انا استريحت جدا فوق ما انا كنت متخيل بس صدقيني احساسي وعتابي لنفسي لو مكنتش عملت كل ده كان فعلا هيتعبني اما حكاية الانسانه اللي تسعدني سبيها للبوست القادم
وشكرا على متابعتي طول الفتره اللي فاتت

جميله المصرى يقول...

السلام عليكم

والله بجد لازلت مش عارفه اقول ايه

بس اكيد ربنا هيعوضك كل خير

ربنا يوفقك يارب ويخلى ليك بنتك وتقدر تشوفها وتربيها زى ما بتتمنى

اعذرنى والله مش عارفه اقول ايه

ربنا يوفقك يارب

دمت بكل خير

اختك جميله

eng_semsem يقول...

جميله
اختي الجميله جميله كفايه عليا الدعوتين الحلوين دول منك ويارب كل واحد وواحده مايتحرمش من ابنه يشوفه ويربيه ويكبر قدام عنيه وشكرا على متابعتك لقصتي برغم انها كانت في قترات طويله في صمت بس لما تظهري تنور مدونتي

carmen يقول...

استاذ اسامة
اولا الف مبروك قدوم الجميلة ملك وربنا يخليهالك ويجمعكم علي خير
ثانيا بجد مبسوطة جدا بقرارك وقوة ارادتك
الحمدلله وقدر الله وماشاء فعل
ربنا يريح قلبك وبالك دايما
تحياتي

غير معرف يقول...

ازيك يا اوس اوس

بعيدا عن الحكايه

حابب اقولك ان اسلوبك في الجزء التاني خاصة اسلوب مميز جدا

وبصراحه انا قشعرت

ثانيا

انا دلوقت بس عرفت ان اسامه اللي اعرفه غير الاولاني



تصدق انت اتغيرت قوي بعد الخناقه

تصدق انا مش فاكر شكلك قبل الخناقه






حاجه بقي بالنسبه للحكايه

بعد كل اللي حصل

وبعد كل اللي قريته

كل الناس عماله تقولك الطلاق الطلاق

انا شخصيا ومش عايز حد يقول علي شرير

او محراك شر

بس انا لو مكانك مش هطلقها

وعلي راي الناس القديمه

خليها كده زي البيت الوقف

لا هي متجوزه ولا هي متطلقه

اسف عالاطاله

eng_semsem يقول...

carmen
عزيزتي الغاليه سمسمه متهيالي بتحبي الاسم ده زي ما انا كنت بحبه زمان ربنا يكرمك ويبارك فيكي وعقبال ما تشوفي اولادك بتكبر وتجري حواليكي اما قراري وارادتي فيها شبيه بالتريقه وانا عارف انه مش قصدك لو جه من زمان كان يبقى قرار واراده انما بعد ما ادخل القسم واتبهدل عشان واحده ماتستاهلش يبقى غباء وتاخير وخوف من الاختيار والحمدلله اولا واخيرا وده قدري وانا متاكد ان فيه الخير ليا
شكرا على متابعتك الطويله لقصتي وحكايتي

eng_semsem يقول...

غير معرف
اتمنى يكون تغيري للافضل واكون اتحسنت مش بقيت اوحش اما حكاية الطلاق ده لسه بدري عليها وانا مش بفكر فيها على الاقل لما اطمن انها واخدها بالها من بنتي وخصوصا في الفتره اللي عمرها فيها اقل من خمس سنين
شكرا على تواجدك ونصيحتك

Mohamed يقول...

لو لم يكن أهل روما وعولا لما أصبح قيصر أسدا (:
يا راجل حرام عليك , تصرفك تأخر كتير ,ماتزعلش انت ماخسرتش, الايام حتمر و حتندم وتعرف غلطتها و الجرم الا ارتكبته في حق نفسها, حنقل لك تعليق للاستاذ عبد الوهاب مطاوع في قصه طبق الاصل من قصتك مع فارق الوقت الزمني , تحياتي ليك يا طيب
"
كان الكاتب الأيرلندي العظيم برنارد شو يقول‏:‏ تعرف أنك عاشق حين تبدأ في التصرف ضد مصلحتك الشخصية‏!‏
ولا شك في أنك قد أحببت زوجتك حبا كبيرا‏,‏ وتحملت في سبيل الأمل في استعادتها ولم شمل أسرتك معها الكثير مما لا يتحمله غيرك من السعي والاستجداء‏..‏ ومن المؤسف حقا أن يحمل المرء لأحد كل هذا الحب فلا يلقي منه إلا الصدود‏..‏
غير أن الواقع يفرض علينا في كثير من الأحيان أن نتعامل مع حقائقه مهما تكن مجافية لآمالنا ورغباتنا الحقيقية‏..‏ والواقع يقول لنا إن زوجتك لم تحمل لك بعض ما حملته لها من حب ورغبة فيها‏,‏ وإنها قد طوت صفحة تجربتها معك إلي الأبد‏..‏ وراحت تخطط لحياة جديدة لا مكان لك فيها‏,‏ ومن واجبنا تجاه أنفسنا أن نسلم أحيانا بالفشل في تحقيق بعض ما كنا نرجوه لأنفسنا‏..‏ وأن نتقبل فشلنا بروح عالية لا تسمح له بأن ينال من إحساسنا بالجدارة‏..‏ ولا من ثقتنا في النفس أو إيماننا بحقها في السعادة‏..,‏ فإذا كنا قد خسرنا من أخلصنا له الحب ورجوناه كثيرا لأنفسنا فلقد خسرنا هو أيضا بنفس القدر وخسر عاطفتنا الصادقة تجاهه‏..‏ وهيهات أن تعوضه الحياة نفس هذه العاطفة الدافقة التي حملناها له‏..‏ وإذا كنا قد شقينا بفقد الحب فلقد نعمنا لفترة ثمينة من العمر بمعايشة أحاسيسه النادرة وخبرنا حلوها ومرها‏..‏ ولم تذهب تجربتنا معها سدي في كل الأحوال‏,‏ وليس عيبا في النهاية أن نحب ذات يوم من لم يبادلنا مشاعرنا المخلصة‏,‏ لكن العيب كل العيب هو أن نمتهن أنفسنا وكرامتنا الإنسانية في استجداء حب من لا يحمله لنا بعض ما نحمله له من مشاعر طاغية‏,‏ وإذا كنت قد صدمت بالمفاجأة القاتلةوصدمت بمنطقها الأناني الذي لا يؤمن بالتضحية من أجل الطفل‏,‏ فلأن كل منكما يتعامل مع الموقف برؤية مختلفة‏

تابع

DR SIMOOOOOOOOOOOOOOOOOOOOOO يقول...

اخى الفاضل اسامة برضة اتضحك عليك تانى ولا يلدغ المؤمن من جحر مرتين وان كيدهن عظيم بس اكيد ربنا مخبيلك حاجة كويسة وانشاء اللة القضية بتاعة رؤية البنت تكون لصالحك وزى مقولت يمهل ولا يهملوربنا اكيد هينتقم منهم واهم حاجة تفكر فيها هى البنت وسيبك من اى حاجة تانية ومع الايام بنتك هترجعلك بس الصبر ومتقصرش فحقها واصرف عليها ع قد متقدر ولو مراتك اتجوزت متخليش جوزها يصرف ع بنتك دى اصلا ان نفعت فجوازة

Mohamed يقول...

,‏ ولسنا هنا بصدد تقويم فلسفة زوجتك في رفض التضحية‏..‏ أو رفض المحاولة مرة أخري من أجل الطفل الصغير ونشأته الآمنة بين أبويه‏,‏ لكني سأقول لك فقط ما قلته مرارا من قبل وهو أن التضحية لا تطلب من أحد وإنما تنبع من نفس مانحها ومن إحساسه الداخلي بالإيثار‏..‏ وهو إحساس لا يمكن فرضه علي أحد لا يشعر به في أعماقه ولا تجدي المناشدة في تحريكه في قلب من لا يستشعر مسئوليته عن سعادة الغير إلي جانب مسئوليته عن سعادته الشخصية‏.‏
فدع زوجتك إذن لما اختارته لحياتها‏..‏ ولما سوف تتحمله من تبعات هذا الاختيار‏.‏ وابدأ أنت أيضا صفحة جديدة من حياتك‏,‏ مسلحا بخبرة الفشل في التجربة السابقة‏,‏ وأهم دروسها أن الزواج لا ينجح ولا يستمر بحب أحد الطرفين للآخر فقط‏,‏ وإنما بالحب المتبادل بين الطرفين وبحسن المعاشرة‏..‏ والرغبة المشتركة في السعادة‏,‏ والإحساس المتبادل بالمسئولية عن نجاح الحياة الزوجية وسعادة الأبناء‏,‏ وبالرؤية المتقاربة للأمور الأساسية في الحياة‏..‏ وبالتطلع المشترك إلي الأمان والاستقرار‏.‏
أما تفكيرك في الارتباط بكاتبة رسالة الانسحاب الهاديء فهو تفكير سليم‏..‏ فخير ما يقرب الزيجات للنجاح والاستمرار هو ما يقدم لأطرافها الحل الملائم لمشاكل كل منهم‏..‏ ويشبع احتياجاته وتطلعه الصادق عنهم إلي السعادة وتعويض الخسائر ومسح الأحزان فاتصل بي مساء الاثنين المقبل‏..‏ ولنأمل خيرا بإذن الله‏.‏

eng_semsem يقول...

dr simooooo
اكتر مره فرحت في حياتي ان اضحك عليا عشان افوق واصحى وابص قدامي وافتح عيوني اللي كنت مغمضها وعايش في حلم لا يمكن يعيش في ارض الواقع اما حكاية قضية الرؤيا فانا قلت مش هتفرق معايا كتير لاني مش موجود اساسا في مصر يعني كده او كده مش هشوفها اما حكاية مصاريفها فانا سايب لامها عفش بمية الف جنيه ودهب كنت شاريه ب 20 الف جنيه متهيالي دول هيكفوها لحد ما تدخل الجامعه على الاقل وسواء هي تتجوز ده اساسا هيحصل لما اطلقها الاول ده مرحله لسه بدري عليها
شكرا على متابعتك الفتره الماضيه

eng_semsem يقول...

mohamed
اولا قصة زواجنا كلها عمرها شهرين ومكنش فيهم سعاده كتير وانا خلاص دفنتهم وممكن تقول انا كل همي في رجوعها بنتي تتربى مع ابوها مش اكتر اما قصة حب ليها ده ادفن من زمان اما زوجتي فقد تركتها تختار حياتها كما تشاء فان لا اريد منها شئ ولا اريدها تماما وبدات الصفحه الجديده فعلا ومش بدور على شريك فيها انا كاتب في الصفحه اسمي ولسه مش عايز اضيف اسم تاني فيها اما القصه الاخيره بتاعة كاتبة الانسحاب الهادئ واني اتصل بيك ده انا مش فاهمها خالص هو المفروض اني معايا تليفونك ورقمك اعذرني لجهلي بس بجد مش فاهم اتصل بيك ازاي
وشكرا على حضورك القيم ونصائحك الغاليه وياريت توضح ليا

Mohamed يقول...

أنا عملت كوبي بيست يا طيب للتعليق للكاتب عبد الوهاب مطاوع علي قصه مشابهة ,
لست المقصود بأخر جزء,غلطه مطبعيه (:, اعذرني,
رب يكتب لك التوفيق والسعادة إن شاء الله
تحياتي

eng_semsem يقول...

mohamed
معلش يا اخي في الله بس انا لما قريت الكلام واسم محمد وفي كندا افتكرت اني اشتهرت ووصلت لكندا وخفت اكون اعرفك ومش واخد بالي على العموم فرصه سعيده ونورتيني في مدونتي المتواضعه

الغاردينيا يقول...

لا حول ولا قوة الا بالله

بجد مش عارقة اقولك ايش

بس بجد برضه احمد الله خلصت منها

وكمان ربك اذا حب عبد ابتلاه

اعطر تحياتي :)

lossy❤❤ يقول...

في مثل دايما بتقوله ماما
"يا بخت المظلوم بالجنة"

وفعلاً انت واهلك كنتم ناس راقية معاهم لآخر لحظة,, وكل واحد يعمل بأخلاقه..
لأن المؤمن يصل بأخلاقة لدرجة الصائم القائم..

احيّ فيك شجاعتك واهم شيء انك رجعت لنفسك وهيه رجعت لك..

تمنياتي لك بحياة أسعد وأجمل وأحلى

eng_semsem يقول...

الغاردينيا
الحمدلله على نعمه الكثيره التي لاتعد ولاتحصى وانا كان الانفصال شر بس فيه كتير خير ليا وهو نعمه من عند ربنا يستاهل الحمد والشكر عشانها
شكرا على متابعتي ومتابعة قصتي

eng_semsem يقول...

loosy
كلاماتك الجميله احلى واغلى هديه استقبتلتها في مدونتي ويارب يكون ليا الجنه ولاهلي ولصالح المسلمين
والحمدلله ان رجعت نفسي صحيح متاخر بس في الاخر رجعت
شكرا على تواجدك الدائم معانا

شهر زاد يقول...

أسامة
أسفة على التعليق
ولا يهمك المهم انك لقيت نفسك الطلاق حل ربنا علشان كده علشان هو في حالات كثيرة بيبقى هو الحل
ربنا يعوض عليك بالاحسن
وخليك حابب الدنيا واوعى تفقد الامل انا بكلمك عن تجربة
ا
لزمان كفيل انو ينسي الجراح وبيخلي ندوبها ما بتبينش
حظ سعيد
تعرف الحلقة دي انت أبدعت فيها علشان فعلا هي خارجة من القلب

تحياتي

شهر زاد يقول...

أسامة
أسفة على التعليق
ولا يهمك المهم انك لقيت نفسك الطلاق حل ربنا علشان كده علشان هو في حالات كثيرة بيبقى هو الحل
ربنا يعوض عليك بالاحسن
وخليك حابب الدنيا واوعى تفقد الامل انا بكلمك عن تجربة
ا
لزمان كفيل انو ينسي الجراح وبيخلي ندوبها ما بتبينش
حظ سعيد
تعرف الحلقة دي انت أبدعت فيها علشان فعلا هي خارجة من القلب

تحياتي

eng_semsem يقول...

شهرزاد انا نشرت تعليقك مرتين عشان افهم يعني ايه اسفه على التعليق عموما انا من جرحي هتعلم وهعيش لحد ما اموت مش هضيع وقت في حاجه ماتستاهلش وعلى فكره انا لسه ما طلقتش
شكرا لمتابعتك ليا طول الفتره اللي فاتت

الحسينى يقول...

أنا متابع حكايتك من أول ما ابتديت تحكيها ومش عاوز أعلق لأنى كنت عاوز أعرف هتخلص أزاى وكل مره أبقى متنكد ومتغاظ أوى ومعلقش برضه لحد لما أعرف أخرتها.
أكيد مينفعش أننا نحكم على حد من غير ما نسمع وجهة نظره لكن خلينى أقولك أنى مصدق كل اللى أنت قلته أولاً لأن معندكش سبب تقول كلام محصلش وثانياً أن واضح أن زوجتك صغيرة فى السن ومدلله وانا شفت حواليا نوعيات كده كتير وكمان شفت نوعيات الأب اللى معندهوش مشكله يخرب بيت بنته مقابل قايمه وعفش وشويه دهب ومؤخر صداق
وطالما الموضوع وصل لمحاكم وقضايا نفقه وتبديد قبل سنة من الجواز يبقى أكيد فى حاجه غلط.
اللى حابب أقوله لك ربنا يعوضك خير ويرزقك زوجة صالحة وذرية صالحة
بس حاول تحافظ على اى خيط يربطك ببنتك وأوعى تخليها تكبر من غير ما تعرف أنك موجود وبتحبها وربنا إن شاء الله هيساعدك
تقبل تحياتى.

eng_semsem يقول...

الحسيني
اخي العزيز يسعدني تواجدك ومشاركتك سواء كان بتعليق او لا انا هدفي الحقيقي وراء نشر القصه هي العبره لكل بنت وولدم مقبلين على الزواج انهم يفكروا اكتر من مره قبل ما يكبروا المشاكل والاختيار الموفق هيكون سبب في السعاده اما حكاية بنتي فانا رافع قضية رؤيه بس حتى القضيه مش هتفرق معايا كتير لاني بره مصر حتى لو اخدت حكم مش هشوفها الا لما ارجع مصر
وانا اسف على نرفزتك طول الفتره اللي فاتت وشاكر ليك تعليقك

re7ab.sale7 يقول...

اسامة انا هقول رأي بصراحة ومن غير زعل وان زعلت متنشرش التعليق اوك...؟
شوف الاول من البداية انت الغلطان لانك اتجوزت عمياني والجواز قدر ونصيب انا عارفة بس ف ايدينا اننا نخللي قدرنا احلي ...انت اتجوزت جواز صالوناتي ومعرفتش زوجتك ولا اهلها صح وكان الاولي انك تعمل فترة خطوبة عشان تعرفهم برغم ان فترة الخطوبة مش كل حاجة لان الخطيبين بيتجملوا ومش بيظهروا علي حقيقتهم اووي بس علي الاقل كنت عرفتها ولو جزء بسيط وكنت عرفت تكمل والا متكملش ولو عرفتها كنت عرفت تتعامل معاها ...ده اولا
ثانيا بنتك ...عارف يعني اية بنتك ...؟ جزء منك مش بس شايله اسمك ولا مجرد سائل تخصيب منك وبس ....انا كش عارفة ازاي جالك قلب تعرف ن بنتك جات الدنيا ومتسيبش اللي ف ايدك وتروح تشوفها وتحضنها وتخليها معاك مهما حصل ....
بنت اختي اتولدت ليلة امتحاني لا عرفت اذاكر وروحت قبل الامتحان بنص ساعة عشان اطمن علي اختي وبنتها وف داهية الامتحان وربنا كان رحيم وجبت مقبول مش سقت ولا حاجة واهي دي بنت اختي مش بنتي ...لاء انت بجد غلطان
ثالثامتقولش اتولدت من جديد لنفسي وعيلتي بس ...؟ يا سلام وبنت راحت فين ...؟ لاء انا مش معاك خالص ف ده
انت ليك بنت لازم تهتم حتي لو حصل طلاق انك تنفق عليها بما يرضي الله وتراعيها وتزورها وتهتم فيها
وصدقني لو انت عملت كدة زوجتك هتخسر كتير اووي
واذا كنت حكيت بما يرضي الله اكيد ربنا هيعوضك خير عنها ....
بس بالله عليك لا تظلمها ولا تظلم بنتك
قلت رأي بما يرضي الله واتمني بجد ربنا يكرمك ويعوضك خير ووالله بدعيلك في صلاتي

eng_semsem يقول...

rehab
اولا عندك كل الحق في حكاية الاختيار ده بس كل كان في بالي واحده بنت ناس متعلمه والمفروض انها عايزه تعيش بس برده انا غلطان اما حكاية اسيب اللي في ايدي واروح لبنتي هو انا كنت عرفت اصلا انها اتولدت انا واحد جارهم اللي قلي شكل البيت فيه حاجه مختلفه سالت في السجل المدني لاقيتها اتولدت من عشر ايام وهو كانوا منعني اني اشوف بنتي وانا دفعت ليهم 3500 جنيه عشان اشوف بنتي غير الهدايا اللي جبتها ليها اعمل ايه عشان اشوفها اذا كان استمرت مفاوضات اني اشوف بنتي من 9/4/2009الى نصف شهر 8 انا غلطان في ايه يعني امسك مسدس واروح البيت ليهم واقلهم هشوفها غصب عنكم اما حكاية عيلتي ونفسي وبنتك راحت فين بنتي راحت ليهم ومش عارف اشوفها ومانعنها عني انت بتسال هي راحت فين اساليهم هما لاني ما اعرفش اي حاجه عنها ومش بمزاجي غصب عني وانا رافع قضيه عشان اشوفها اعمل ايه تاني اما حكاية انفق عليها انا سايب ليهم عفش بمية الف جنيه ودهب ب 20 الف جنيه يا ترى يكفي بنتي لحد ماتكون عندها كام سنه
وشكرا على تعليقك وانا بحترم راي الاخرين حتى لو كان ضدي

افروديت يقول...

أغرب كمنت هتقراه ياأسامه وحتي لومش عجبك فابصراحة ده رأيي ولن أحيدعنه

مبروك علي أستردادك لكرامتك أخيرآ.

ونفسي أقولك مبروك ع الطلاق لكن بتقول لسه بدري علي قرارك ده

شوف أناهقولك حاجة طول ما أحناعايشين في الدنيادي بنتعلم بنشوف ونعرف ونقيم لكن مفتكرش أبدآ أنه ينفع نحكم علي نفسنا" نموت بالحياه"
بصراحة لم أرفي حياتي وقاحة وقلة أصل أكثرممارويت عن هذه ...
ولن أري ....
عندمايفكرأحدنابالزواج فهولن يبحث عن شريكة فقط أو شريك بل يفكر في المستوي والأهل وأعتبارات أخري
وأنت غرك الأسم "فليست كل مريهان تصلح زوجةيابشمهندس"
وليسامحني الله اذاكنت متجنيه عليهاولكن تعليقي في نطاق حكايتك ليس أكثر

miroooo يقول...

قدر الله وما شاء فعل
ان شاء الله ربنا يكرمك
ربنا معاك يارب
الخيرة فيما اختاره الله

eng_semsem يقول...

افروديت
يعني ايه حتى لو مش عاجبك ده غصب عني ولا ايه وبعدين الله يبارك فيكي انا فعلا رجعت ليا حاجات كتير كانت ضاعت مني من بينها كرامتي وبالنسبه للوقاحه وقلة الاصل والغدر والخيانه انا عمري ما شوفت ولا سمعت ويارب لا انا ولا انت نشوف شخصيات زي ده وما تنسيش المهمة الاصليه لحكايتي الاختيار وطريقة حل مشاكل البيت بين الازواج اما حتة الاسم ده انا كان قصدي اني اخترت واحده وخلاص اما حكاية لو هي كده ومتبقيش متجنيه عليها يارب لو غلطت غلطه في الكلام اللي حكيته لا تسامحني ولا تدخلني الجنه
وشكرا على تواجدك المتميز من البدايه

eng_semsem يقول...

miroo
ربنا يكرم كل مظلوم ياخد حقه وكل ظالم ياخد عمره
وان كان هذا قضاء ربي اللهم لا اعتراض ولا راد لقضائك
شكرا على تواجدك معنا طوال القصه

افروديت يقول...

تذكرت شيئآ يابشمهندس فعدت من أجله

أنتهت قصتك ولكن لاتنتهي الحياة الحمدلله

منتظرين الجديد الجميل اللي يسعدك ياأسامه .....

أنت دونت لكي تحكي لناوحقآأنت بارع في الحكايا لذا ننتظر تدوينات جديدة بهاتفاؤل
أعانك الله علي هذا الهم ورفعه عنك

eng_semsem يقول...

افروديت لو وقفت الحياه عند فقدان احد لوقفت حين مات رسول الله وياربتكوني استمتعتي بحكايتي واتعلمتي عشان اوعي تزعلى جوزك منك رفع الله عننا جميعا الهم والحزن

حرّة من البلاد..! يقول...

أخي أسامة
كنت متابعة القصة من أولها حتى النهاية
انت أبكيتني وشعرت بمقدار الظلم الواقع عليك وكنت كل مرة أقول ما أغرب صبره وطيبته
أنت بالنهاية اخترت الطريق السليم
وعسى أن تكرهوا شيئا وهو خيرا لكم
اتمنى ما تتخلى عن بنتك بأي حال من الأحوال فهي ليس لها ذنب أن تعيش بدون حنانك
ووالد مراتك هو الجاني وهو من دمر حياة عائلة
اتمنى تكون حياتك الجديدة كلها خير وسعادة وربنا يعوضك خير بكل شيء
تحياتي لك

eng_semsem يقول...

حره من البلاد
مفيش حد بيتخلى عمره عن بنته الا لو هو مش انسان اما حكاية حناني ليها ده مش بايدي هعمل ايه اذا كنت مش عارف اشوفها ازاي هديها الحنان
وشاكر ليكي متابعتك الجميله واسف لو كنت يوم سبب في زعلك والحمدلله انا خرجت من التجربه باستفاده كبيره وياريت الكل يستفيد بيها ويستغلها في الحفاظ على بيته

re7ab.sale7 يقول...

فاهمة يا اسامة بس انا بجد مستغربة الناس دي جدا جدا ...دي مش بني ادمين بصراحة....
بس حاول قدر الامكان ان تكون قريبا من بنتك مهما حصل ....دي بنتك
ربنا معاك ويقدرك وفلوس الدنيا متعوضكش عنها ابدا
لكن صدقني ما دمت لم تظلمها فالله سيرد لك حقك كاملا
بدعيلك من كل قلبي
وان شاء الله ربنا يعوضك خير

eng_semsem يقول...

rehab
انا مش قصدي اي حاجه ومتشكر جدا على دعواتك وامنياتك بس انا عايز اجابه محدده (حاول قدر الامكان تكون قريب من بنتك)يعني ايه وازاي اذا كان انا مش عارف اشوفها يبقى اكون قريب ازاي
وربنا يعوض عليا

اسماء عبدالعزيز يقول...

انا بصراحة مكنتش حابة ارد
كانت مفاجئة صاعقة بالنسبالى انه يكون كمين .. لكنه يدل على وقاحة وغدر وهذا جعلنى افكر كيف كنت تعيش معها ولا تعلمها ..
وعندما لجأت للقضاء كان المفروض انك تتركها نهائياً ..
استاذي القدير
البنت مش هتموت .. سورى ان كلامى قاسي
طبعا ربنا يخليهالك ..ويباركلك فيها وتكون مافيهاش خصال من والدتها .. بعدين طال الزمان او قصر هى من ستبحث عنك وستلعنها بعد ان ينهش الزمن ملامحها ويرسل لها من يعاقبها على الغدر وسياكل الندم قلبها والدنيا صغيرة جدا والديان لا يموت ..

دائما ارى الاحتمال وان الواحد يجي على نفسه عشان خاطر اسرته واولادة يكون من ناحية الست اكتر
ولكنك برهنت لى ان هناك فعلا من هو جدير بالاحترام ويكافح من اجل اسرته الصغيرة وزوجه لم تمكث معه الا بضعة شهور
اتعلم
فالطيبون للطيبات وانت لست لها
فلازال هناك نصفك الآخر الذي تستحق
فقط لا تغلق نفسك على نفسك او تجعلها عنوان لبنى جنسها .. تزوج ولكن تخير النسب ..المثل الفلاحي بيقولك حاسب قبل ماتناسب ..
تزوج واسعد بحياتك واجعل لمكلك اخوه واخوات كثيرين ...
لأنك تستحق وصدقنى ستجد السعادة والهناء
ربي يجعل عام 2011 عام سعيد عليك
كن بخير اخى الفاضل

eng_semsem يقول...

اسماء عبدالعزيز
اختي العزيزه مش عارف حاسس اني بكلم اختي الكبيره وبتنصحني بس بطريقه تخليني غصب عني اقول حاضر ومن عنيه
انا عشت معاها 75 يوم وكانوا كلهم مشاكل من البوست رقم 3 الى 15 وانا كنت سابتها فعلا فتره وسبت الموضوع بس لما جت بنتي كانت المحاوله الاخيره عشانها هي مش اكتر اما حكاية الواحد يجي على نفسه عشان بيته انا مش معاكي ان الست اكتر حتى لو هي ده الحقيقه لازم الاتنين يبقى بيتهم وحياتهم اغلى شئ اما حكاية نصفك الاخر سيبيها للبوست اللي جاي ان شاء الله وربنا يجعل عام 2011 عام سعيد للاسلام والمسلمين
تقبلي تحياتي

محمد الجرايحى يقول...

تقبل أخى الكريم
مرورى وتقديرى واحترامى
بارك الله فيك وأعزك

Amwaj يقول...

حسبي الله عليها وعلى أهلها :@
لي هالدرجة وصل الظلم إنهم يشهدون ضدك من غير دليل ؟!!
وفوق هذا أكثر من 10 أيام ما تدري إن الله عطاك بنت !!
شنو هالقسوة اللي بقلوبهم !

الله يعوضك خير يا أسامة ويخليلك أهلك
وإن شاء الله الله يعوضك باللي أحسن منها

eng_semsem يقول...

amwaj
ربنا يعوض كل مظلوم وياخد حقه من الظالم في الدنيا والاخره وبعدين في الاول عدى عشر ايام ما شفت بنتي دلوقتي قربت تعدي سنتين
انا تعبتك معايا معلش بس بجد انت منوره المدونه

غير معرف يقول...

انا اسمي لؤلؤة القران
دي اول مرة ابتدي اعلق على اي حاجة بس الي انا قراته حضرتك مش غلطان هي غلطانة وصدقني هتندم على كل الي حصل لسبب مهم ان حضرتك بجد من الكلام الي قراته انك شخصية محترمة وربنا يقدملك الي فيه الخير

غير معرف يقول...

لاحول ولاقوة الا بالله انت بصراحه جبل انك تستحمل كل ده زوجه بمعنى الكلمه غبيه بس انت اتاخرت اوى ف القرار ده المفروض كنت اخدته من فتره يلا كويس انك رجعت لنفسك تانى بس بنتك هتعيش ازاى مع الست دي ربنا يصلح الحال ليك ويقدملك اللى فيه الخير يارب تقبل مروري

ظلالي البيضاء يقول...

لا حول ولا قوة إلا بالله ..
صبر جميل والله المستعان ..
أنا ندمت إني سألتك السؤال اللي كلف 15 حلقة .. مش علشاني .. لأ علشان ما كونش فتحت جروحك ..

أخ عزيز وغالي أخي أسامة ..
وربنا المنتقم ..

يارب يكرمك ويعوضك خير يارب ..
دمت بألف خير .. مع التحية الطيبة .