السبت، 11 ديسمبر 2010

حكايتي مع الايام(9)

واجتمع الاهل من اجل تمضية ايام العيد في بيت العيله وطبعا فطار يوم الوقفه كلهم متجمعين هناك ولكن رفضت زوجتي الحامل حضور هذا التجمع وبالتالي اعتذرت لوالدي حتى لا اتركها تاكل وحدها وذهبنا لهم بعد الفطار جلسنا معهم بعض الوقت وكانت من عاداتنا في العيد ان نتجمع عند الصلاه في المسجد المجاور لنا ونتقابل مع اقاربنا وقد يمر العيد تلو العيد ولا نراهم الا في الاعياد مثل اولاد عم والدي واولادهم وعم والدي وعمته والاصحاب والجيران وبعد الصلاه نتجمع اما بيت العيله ساعه او اكثر نتقابل ونبارك ونهنئ على من يمر بنا من اصحاب واقارب ثم نطلع فوق لتناول وجبة الفطور وبعدها ننام الى اذان الظهر ونقوم لنتابع انشطة العيد ولكن كان هذا العيد مختلفا .
فقد رفضت الاستيقاظ لصلاة العيد وبالتالي نزلت الى المسجد القريب من منزلي وانا لا اعرف احد هناك غير جيراني في العماره فانا لم انتقل الى تلك المنطقه الا من شهرين فلم اجد من ابارك له او اعيد عليه وطلعت الى شقتي فليس هناك من اقف معه وسالتها هنروح وطبعا ردها استنى شويه لحد ما فطرنا وتقريبا بقت الساعه 11 ثم ذهبنا وكان من الطبيعي ان اجد اغلب البيت في ثبات عميق واستيقظوا بعد الظهر وتحدثنا وتسامرنا وهزرنا وبعدها تجمع الشباب على السرير للعب الاستيمشن التي ننتظر العيد كي نلعبها سويا وننقسم الى فرق وتشجيع والاشبال الصغيره تشجع هذا وتتريق على المغلوب وهي طبعا مش بتعرف تلعبها ولا عايزه قعدت جنبنا على صلاة المغرب شويه وقمنا نصلي الجماعه سوا في البيت وبعدها لعبوا حبة العاب خفيفه عشان الصغار زي الشايب و 31 قعدت شويه معاهم وقلت اطلع اتهوا واشرب سيجاره طلعت فوق السطح  ونزلت لما سمعت اذان العشاء طلبت ان احنا نمشي وانا بكل صراحه مكنتش عايز بس قلت ليها اصلي العشا ونمشي بس للاسف ملحقتش الجماعه والغرفه اتملت ومفيش مكان استنيت لما خلصوا وعملت الجماعه التانيه صليت وبعد الصلاه كانت اختي مسافره تاني يوم سلمت عليها فقالت ليا انا كنت عايزه اخد رايك في حاجه قلت ليها خير قالت عمو جمال بيقول في صيدليه هنا عايزين دكتوره ايه رايك قلتلها لا بلاش خليكي جنب بابا وماما وانت شغاله هناك وكنت عايز اكمل واقول انت ممكن بعد كده يتقال عليكي انت السبب في المشاكل ما بيني وبين مراتي لاي سبب ولو عشان بتيجي عندي البيت وقطع كلامنا صوتها العالي علينا في الغرفه مش يلا بقى انا عايزه امشي انا تعبانه وطبعا ابويا جه من الصاله عشان ما اتكلمش ولا ارد وسالها في ايه قالت ليه انا عايزه امشي قال وماله يلا يا اسامه خدها روحها بدام هي تعبانه وقمت لبست ويلا وابويا نادى عليا اصبر واهدى عليها واضح انها مش واخده على جو اللمه وماتزعلش وبكره احنا مع بعض قلت ليه ان شاء الله يا حاج ونزلت من البيت عندهم وانا نفسي اسهر معاهم  بس بجملت اللي ضاع مني في العيد ده وما عرفتش اعمله غيرانها تكلمني بالطريقه ده قدام اهلي وطبعا روحنا وهي تعبانه دخلت نامت وانا قعدت شويه ودخلت نمت واهلا اهلا بالعيد....

ملحوظه صغيره
لاهل الخير ياريت تزور بيت المدونين في خبر عن واحده محتاجه مساعده ياريت اللي يعرف يساعد يكون ليه الثوابhttp://bloggers-house.blogspot.com/

هناك 40 تعليقًا:

غير معرف يقول...

انت بتحكي سلسه كده ؟

طيب انا هستنى اسمع للنهايه اللي اتمنى انها تكون سعيده يا رب

تحياتي

Tears يقول...

شىء طبيعيى ان لو انت اجتماعى و هى لأ مش تبقى حابة اللمه

غير معرف يقول...

لازال الاحتدام موجود..حتى في العيد..!

اعانك الله
طيب ما مر عليكم لحظه كنتوا فيها متفقين..؟

سواح في ملك اللــــــــــــــــــه- يقول...

تحياتي ليك لن احكم علي شئ قبل ان تكمل حتي ولو حلقة او اثنتان اخريان
متابعك

افروديت يقول...

ازيك ياأسامه

متهيألي أن هي مش شخصيه أجتماعيه

ودامش عيب فيهافي ناس كتيركده

بس بصراحه ومن غيرزعل بحس في كل بوستاتك أنها مزوداها شويه

لذلك أنا هأجل تعليقي الكامل علي كل القصه حتي أعرف ماذاحدث في النهايه
وأتمني أن يكون ماحدث خيرآ

تحياتي ليك

eng_semsem يقول...

فتاه من الصعيد
لو انا طولت معلش سامحيني بس انا مش عايز اسيب صغيره او كبيره عشان ما ابفاش ظالم

eng_semsem يقول...

tears
افهم من كده انك موافقه على الطريقه اللي كلمتني بيها او معاها في رد فعلها وطلباتها

شهر زاد يقول...

أسامه
لازم نبحث عن الاسباب لان الاساس هو الي ازم يتعالج مش ردة الفعل يعني لازم تسأل هي مش اجتماعية ليه
تحياتي

eng_semsem يقول...

loosy
انا حكيت من يوم 20/7/2008 الى يوم
1/10/2008 اطرحي الوقت اللي عدى في المشاكل يكون الباقي وقت اتفقنافيه ودايما كان كل كلمه تطلع مني لازم يحصل بعدها موقف
وشكرا على متابعتي

eng_semsem يقول...

سواح في ملك الله
الحلقه اللي جايه هتعرف تحكم على ما اظن وشكرا على متابعتي

eng_semsem يقول...

افروديت
هي من وجهة نظري مزودها قوي مش بس حبه اما عن الاجتماعيه انت شايفه ان اللي هي بتعملوا صح ولا غلط انت شايفه انك تحبي تكوني زيها

eng_semsem يقول...

شهرزاد
انا اتكلمت وسالت وحاولت اعرف اسباب اكيد انا مش حابب ان حياتي تستمر بالشكل ده ودورت على الاسباب وكلها كانت غلط وبعدين انت شايفه ايه اللي ممكن يكون سبب
وشكرا على متابعتي

ツSmiLeY AnGeLツ يقول...

السلام عليكم
لالالالالالا ده كثير جدا
فاق الحد حتى لو مش اجتماعيه تسايرك وتخليك تجلس عند اهلك وهي لو مش اجتماعيه تجلس باي غرفة لوحده وتتعذر انا تعبانه وخلاص
لكن لدي الدرجة
مستنهي البقيه.
تقبل مروري
سلامي ليك اخي.

غير معرف يقول...

هقول احتمال حملها هو اللى مخليها كدا
عصبيه ومش مستحمله المه
او ممكن تكون مش بتحب المه

اخر كلمه فى البوست ضحكتنى اوى
اهلا اهلا بالعيد
كل سنه وانت طيب يااسامه
هههههههههههههه

eng_semsem يقول...

خواطري مع الحياه
فاق وزاد وانا خلاص معدتش قادر استحمل بس كنت تايه ومش عارف اعمل ايه وكل ما اقعد لوحدي ايه الحل ارجع ازاي لدنيتي واعيش حياتي وهو ده الجزء اللي جاي
شكرا على متابعتياللي هيظهر

eng_semsem يقول...

الحب الجميل
احنا علقنا الدنيا كلها على الحمل طيب هي اول واحده تحمل طيب البيوت كلها فيها كده متهيالي لا
وبالنسبه لضحكتك عندي بالدنيا وانا كده هنام مرتاح عشان انت ضحكتي بسببي
وشكرا على متابعتي

Noha Saleh يقول...

مش عارفة والله اقولك ايه
مش عارفة هى ليه بتعمل كده
ماعنديش تفسير والله
بس ربنا معاك ان شاء الله ويصلح الاحوال

eng_semsem يقول...

noha saleh
اختي العزيزه ربنا يصلح احوالنا كلها وهو ده شعوري وقتها اني مش فاهم ليه كده وحاولت افهم ودايما كانت الحجه تضايق اكتر من اللي بتعمله بقيت لا عارف اسال ولا اتكلم وانا من الاول كنت رافض اني اعيش مع مراتي كاني قاعد مع واحد صاحبي في الشقه
تقبلي تحياتي وشكري على متابعتي

Amwaj يقول...

السلام عليكم ورحمة الله وبركاته

ما شاء الله هذا البوست التاسع الذي تتكلم فيه عن حكايتك مع الأيام
وهذي الزيارة الأولى لي لهذه المدونة الجميلة :)
لي عودة إن شاء الله لقراءة الأجزاء السابقة

تحياتي :)

eng_semsem يقول...

amwag
اهلا بيكي في مدونتي ومتهيالي ان انت لازم تقري اللي فات عشان تكوني معانا
وهنستناكي

ليلى الصباحى.. lolocat يقول...

السلام عليكم ورحمة الله

شوف اخى الكريم انا مش عايزة اقول كلام ممكن يزعلك منها زيادة وهنتظر البقية ان شاء الله

بس نصيحتى لك انك تتعامل معها بصبر اكتر يمكن يكون فيه شىء ماتعرفه انت مضايقها ماقالت لك عليه
كلمها واسالها مرة واتنين وتلاتة يمكن تصل معها لحلول لهذه التصرفات ان شاء الله


ياريت تشاركنا حملة ليه انا مدون وتوضح كيف تكون المدونة وسيلة اجتماعية مهمة فى الحياة الاسرية وكيف نصل من خلالها لحل المشكلات الاسرية وحياة اجتماعية مسقرة
http://lolocat-q.blogspot.com/2010/12/blog-post_10.html

تحياتى لك اخى وفى انتظار بقية الحكاية

Carmen يقول...

بجد ربنا يعينك
وربنا يهدي
نو كومنت

eng_semsem يقول...

اختي في الله ام هريره
اشكرك على متابعتي وبعدين انت مهما قلتي و وصفتي اكيد مش اكتر من اللي جوايا وانا اتكلمت كتير وحاولت بس مش عارف ليه مش عارف اوصل هي بتفكر في ايه وصدقيني انا كل كلامي بيصب في الاخر لمصلحة كل سن قبل الرجاله عشان بيوتنا تفضل مفتوحه ومليانه سعاده وانا هكتب عشان حاسس ان تجربتي ممكن تتعلم منها بنات كتير وهتساعد كتير انهم ما يكسروش عش حبهم

eng_semsem يقول...

كارمن
انا كتير كنت بقف عند نفس النقطه مش بقدر افكر واتشل ويقف كل كياني واقول جوه قلبي نو كمونت
ربنا يهدينا كلنا
وشكرا على متابعتي وانتظري الجزء الجديد هيكون فيه المفيد

جايدا العزيزي يقول...

اخى اسامه

انا شايفه ان لازم يكون فيه توافق من البدايه

بالتوافق نقدر نتشارك ونتواصل

يعنى لو بحب العزله

ممكن احيانا اشارك الانسان الذى اخترته سعادته بالمه والاهل

اتابع معك

تحياتى

eng_semsem يقول...

جايدا العزيزي
اختي العزيزه انامعاكي لازم يبقى في ثقه وتواصل مع شريك حياته وحتى لو مكنش موجود قبل الزواج لازم نحاول نوجدهم ونبدا بالثقه الا لو ظهر غير كده ونسال وبعد كده نحاكم
وشكرا على متابعتي

الغاردينيا يقول...

مازلت متابعه :)

تحية

Prince-Palestine يقول...

معك لنهاية الحكاية ان شاء الله


مدونة جميلة تسلمي


تقبلي مروري وخالص تقديري

eng_semsem يقول...

الغاردينيا
شكرا على متابعتك

eng_semsem يقول...

prince palestine
انت مره كلمتني على اني واحده انا رجل واسمي اسامه وشكرا على تواجدك معانا

افروديت يقول...

لا يا"أسامه" أنامش زيها...وبصراحه مش عايزة أتكلم أحسن تزعل

شوف يابشمهندس ممكن الأنسان يكون مش أجتماعي لكن عنده ذوق لدرجة أنه مش ينفع يحرج حد في أي موقف من المواقف وبقول "حد" فمابالك بجوزها

أرجوك /أنالا أحب المجاملات
وأظن أن رأيي العادل لن يحوز أعجابك فلاتطلب مني الصراحه المطلقة
وبجد أنامش أتعوت أني أحكم حكم كامل علي حد معرفوش وأتمني ان يكون رأيي فيهاغيرصائب

eng_semsem يقول...

افروديت
اولا رايك ما تستنيش مني اعجاب او لا لانه رايك انت واي كان لابد من احترامه وبالعكس انا اريد ان اسمع رايك العادل اما عن الحكم على الاشخاص فانا في حياتي كلها لا احكم على اشخاص وانما احكم على سلوك او فعل يعني من الاخر انا مش بقولك تقولي هي حلوه ولا وحشه بس ممكن تقولي اللي عملته صح او غلط او قلة ادب
وشكرا على متابعتي

اسماء عبدالعزيز يقول...

اخي الكريم معلش اسمحلى
انا استغربت وانا بقرا كل بوست كنت فاكرة انك بتحكي رواية مسلسة لاقتها عبارة عن يومياتك او ما شابة
اولا البوست اللى فات لى تعليق عليه وهو ان فعلا في بداية الزواج السنه الاولى بيكون فيها مشاكل كتير لعدم تفهم طباع البعض .. واضح من اسرتك انهم متفاهمين ومترابطين ..
اكرة كلمة ترويض .. كما ذكر البعض
الترويض خاص بنوع آخر من المخلوقات وليس الانسان

ولكن لابد التفاهم .. اعتقد من خلال السرد انك ايضا لا تحب اهلها كثيرا وهذا متوقع لكثرة شكوتها اكيد والاحتكاك بهم .. والمفروض مهما يحصل المشكلة ماتخرجش براكم
مافيش حاجه اسمها عقلها صغير
مكن يكون الحمل له بعض الآثار وهو فقط بيجعل السيدة عصبية .. ملوله .. تشعر كثيرا بالاختناق .. بعض الآلام
لاحظ سيدي شيء بسيط وهو ان تحمل شيء له وزن ويزيد ويزيد تجلس به وتنام به وتقوم وتفعل ماهو مطلوب منك وهو ملازمك .. ممكن يكون تعب وربنا سبحانه وتعالى قال
وهناً على وهن ..

ولكن هذا لا يبرر لها ل هذه الأفعال
المرأة التى تحب زوجها تحافظ على مظهرة امام عائلتة .. ولا تفسد عليه عاداته التى هى ليست بكل يوم ..حتى لو تعبانه فهو يوم ويعدى وبلاش نكد
لكن هى مش حاسه بالألفه بين اهلك
والواضح انها عندية .. الموقف بتاع جدتك وانها تسلم عليها وضح حاجات كتير
استاذي الفاضل
المشاكل تتفاقم بتجاهلها
وهذه السنه الاولى تخط خط سيركما بعدها
لابد من الحوار والمناقشه .. بعد ان تضع حملها سيكون هناك ايضا مولود ومسؤولية .. والولد بيعيط وانا مش فاضيه ..
لابد ان تتعلم كيف تحترم رغباتك
كما انت ايضا تحافظ على مظهرها ولا تريد احراجها ..

لابد من الحوار بين الزوجين ..
ولابد ان تفهم ما يدور بداخلها .. وما هو سبب ردود افعالها
وان ظل التجاهل عنوانها .. فليكن ايضا من تجاهك .. لا تفعل الاشياء التى تحبها نوعا ما .. لا اقول لك اقسو عليها لا
ولكن تجاهل اشياء تحبها وانت تفعلها من اجلها ..

حين تزول اهلك وهى ترفض لا تصتحبها معك بكل بساطه وفى هذا الوقت تكون جالسه بمنزلها لا تكون بمكان آخر
وحين تذهب لأهلها تكون انت معها حين يسمح وقت عملك .. وهذا مؤقت حتى تفهم الدرس

بالنسبةلزيارتها لقريبتكم ..

هنا شيء آخر غير الشكوى
انك كان من المفروض ان تعاتبها عليه وتحرجها امام نفسها فانت تعطيها الثقة والمفروض انها تخبرك بكل ما حدث لا تقول انها اشتكت منك ولكن على الاقل انا ذهبت لفلانه وانتهى الأمير

وبعد ذلك حين يكون عندها شكوى وملحه لدرجه كبيره ولا تستطيع اخبارك بها لعدم الاحتكاك تحكي لأختك مع انى ارجح ان الامر يكون بينكم وبس

ولابعد وان تعلم انه هذا انت.. زوجها والمفروض انها تشاركك كل شيء كما تشاركها انت

آسفا على الاطالة ولكن ..لا اعلم

اسعد الله ايامكم
دمت بكل الخير

dodoeltaiba يقول...

منتظره النهايه ويارب تكون بخير وليك تحياتى

eng_semsem يقول...

اسماء عبدالعزيز
اختى نورتيني بزيارتك واكيد انا تعبتك في قراية اللي فات بس هوضح ليكي بعض الحاجات قصة كرهي لاهلها بينت السبب الرئيسي في الجزء السادس وبالنسبه للحمل انا قلت ان في مواقف ممكن تبرر على انها بسبب الحمل وفي مواقف ما ينفعش يبقى ليها عذر وبالنسبه لوزن الجنين في بطنها فهو كان لا يتعدى 10 جرام لانها كانت لسه في الشهر الاول فكل ما حكيت كان من 20/7/2008 الى 1/10/2008 وهي فترة زواجنا
اما بالنسبه لنصايحك الغاليه فهو الغرد الاساسي من كتاباتي فقد تكره امراه كلام يكتبه رجل لانه محارب بنظرته السيئه للمراه وعندما انت تكتبين تسمعك المراه على انها نصائح قيمه وهذه هي الفائده المطلوبه ان تتعلم المراه كيفية تصحيح مجرى حياتها وما قد يبعد زوجها عنها وهدفي الاساسي ليس حربا مع المراه وانما حربا على من شوهوا شخصية المراه بكلمات ضاعت معها شخصيتها المتميزه من حريه ومساواه وانت مش اقل من الراجل في حاجه ونسيت كونها امراه واصبحت تنافس الرجال فيما لو تفوقت فيها لا يضيف شئ لبيتها وزوجها واولادها وسعادتهم جميعا وتركت دورها الاساسي
اما عن مبدا المشاركه والثقه بين الزوجين فهي رساله مشتركه للرجل قبل الانثى وهذا ما شد انتباهي في قصتك الشيقه واما عن اطالتك فهي مرحب بها لابداء رايك ومساحتك مفتوحه لكتابة ما تشائين واهلا ومرحبا بيكي مرة اخرى

eng_semsem يقول...

dodo
يسعدني تواجدك معنا واتمنى التوفيق للجميع في حياته

وداد يقول...

بصراحة انا كنت متعصبة وانا بقرأ البوست ده

لكن في الآخر بجد ضحكت جدا على كلمة

" أهلا أهلا بالعيد "

ربنا يهديها بجد دي انسانة غيظاني

تعرف والله لو مش المدام حامل كنت قلت لك

اضربها ألم يفوقها

بس بلاش للصبر حدود وربنا يقويك

eng_semsem يقول...

وداد
اهم حاجه انك في النهايه ضحكتي وده شئ يسعدني جدا انا احب اكون سبب للسعاده ولا اعيش ثانيه وحد زعلان مني
شكرا على متابعتي

Dr/ walaa salah يقول...

في البدايه بعتذر عن التأخير بسبب سفري

نيجي بقى لموضوعك

بص يا اسامه انا اقبل اي افعال من اي امرأه إلا حاجتين

عدم احترام الواحده لزوجها وخصوصا قدام اهله حتى لو عمل معاها إيه

لازم تحترمه مهما حصل

الراجل راجل في كل مكان

الشئ التاني اهمال الواحده لامومتها والحمد لله ان مراتك معملتش غير اول حاجه

فاضلها عندي تاني حاجه ودي وقتها هقولك وبقلب جامد اديها كارت احمر بلا رجعه


لكن نرجع للكلام الجد يا اسامه

بقولك لازم يكون في سبب للي بتعمله مراتك

ليه مسألتش مامتها هى ليه بتعمل كده

ليه بحس انها عايزه تبعدك عن اهلك


في سبب يا اسامه ودور عليه وانت هتلاقي حل لمشاكلك دي

eng_semsem يقول...

dr/walaa
دورت في كل الاسباب يمكن عايزه تخرج وتتفسح لما نخرج تحصل مشكله يمكن عايزه تقعد في البيت برده تحصل مشكله عايزه تشتغل الاقي كانها بتعاقبني ولما تقعد يبقى كاني حابسها مع ان كلها اختياراتها لحد ماسالتها انت اهلك غصبوكي على انك تتجوزي مني وكان ردها انا مفيش حد في الدنيا يغصبني على حاجه انا مش عايزهاوبعدين اعمل ايه بتحايل على مراتي عشان اقعد معاها لاني مكنتش حابب اني اتجاهلها واريح دماغي وخلاص
وشكرا على متابعتي وحمدالله على السلامه