الاثنين، 6 ديسمبر 2010

حكايتي مع الايام (7)

وبدا شهر رمضان الكريم وكان موافق 1/9/2008 وانا في رمضان بحب اجتهد على قد ما اقدر اختم القران اكتر من مره والصلاه في اوقاتها وجماعه وقيام الليل وكنت بحاول اقرب من ربنا عشان 3 اسباب الاول انه يقربنا من بعض ونفهم بعض والتاني اني ابعد عنها وارتاح منها شويه والتالت ان ربنا اكرمني ورزقني وعرفت انها شايله لحمي في مولود في بطنها وقعدت معاها واتكلمت نقرب بقى من ربنا شويه عشان يكرمنا ويرزقنا الذريه الصالحه وكانت نتيجة الحوار كالعاده بعد كام يوم في رمضان انت مش بتقري قران ليه وكان ردها 
اصلي ريقي ناشف
ما كل الناس الصايمه ريقها ناشف في رمضان وده الطبيعي طيب وبعد الفطار او في اي وقت حاولي تجتهدي وقلت في بالي ده مش فرض وسالتها طيب والصلاه مش بتحافظي عليها ليه كان ردها صدمه يقفل اي كلام بعدها
اصل انت بتنام معايا قبل ما اصلي العشا
ضحكت وقلت ليها والمطلوب اني مااعملش الحاجات الوحشه ده انا مش عارف في مليار مسلم بيتعاملوا عادي يعني وعايشين وانا بصلي العشا عادي والفجر اشمعنى انت الدنيا وقفت عندك وعشان تقفل الكلام خالص  قالت
قالت ليا ان الحمل تعبني وانا مش هصوم 
قلتلها كده تمام لا صلاه ولا صوم ولا قراءة قران هو ده رمضان بجد وسكت وانا في بالي لقد اسمعت ان ناديت حيا ولكن لا حياة لمن تنادي .
وكان الموقع بتاعي خلصت الشغل فيه وخلاص بنسلمه والشركه اخدت شغل جديد في كفرالشيخ وطلب مني صاحب الشغل اني اروح معاه هناك وطبعا رفضت وقلت ليه انا مستقر في القاهره خلاص وشفت شركه جديده وبعدين اتفقت اني اروح كفرالشيخ اصفي  معاه واسلم كارت الفيزا بتاع الشركه واقفل الحسابات والعهد وقلت ليها ان كمان يومين هنزل هتيجي معايا وكان الرد
لا انا مش هقدر وتعبانه ومش هعرف اسافر
انا لازم انزل ومش عايز اسيبك لوحدك وتاكلي لوحدك وكده لكن هي تمسكت ومش نازله لحد يوم السفر لما لاقتني عادي تيجي ولا ما تجيش لبست وقالت خلاص انا هاجي معاك ونزلنا كفرالشيخ وصلتها لبيت ابوها وطبعا ماطلعتش عشان خلاص ماعدش ينفع واتقابلنا بعدها بيومين رحت اخدتها عشان نرجع وطبعا هي ماردتش تيجي عندنا زي ما انا رفضت بس عندي سبب انت ايه سببك كان ردها انك ماجتش سكت ويلا بينا على بيتنا .
كان ليا عم عزمنا اول يوم في رمضان وبعد ما رجعت من كفرالشيخ عم تاني ليا عزمنا قلت ليها ايه رايك  تعبانه ومش قادره يا بنتي ده هنا في ش فاطمه رشدي في الهرم واحنا في الطالبيه في فيصل يعني 10 دقايق مش اكتر قالت لا مش هقدر اتصلت بيه وقلت ليه معلش واعتذرت وقلت ليه انا هاجي بليل وطبعا ما ينفعش اسيب مراتي واروح افطر بره فطرت في البيت ونزلت بعد العشا قعدت معاه شويه وقلي احنا كان نفسنا تحس ان ليها اهل هنا مش مقطوعه من شجره ضحكت وقلت ليه ملهاش في الطيب نصيب ولا يهمك ورجعت على البيت .
وطول شهر رمضان  بحاول انظم حياتي معاها بس للاسف انا كنت بنزل الساعه 7.5 صباحا وبرجع مع صلاة العصر انام ساعه واقوم على الفطار افطر وهي بعد الفطار تقوم تغسل الاطباق وتتعامل مع حاجات زي كده وتتعب وتنام علبال ماتصحى اكون انا خلاص عايز انام يا بنتي ظبطي وقتك ممكن تعملي شغل  البيت كله الصبح ماتستنيش لما اجي واصحى او على الاقل نامي الصبح زي ما انت عايزه انا بجي البيت العصر نامي لحد العصر انا عايز اقعد معاكي شويه وطبعا ولا حاجه حصلت  

هناك 26 تعليقًا:

Dr/ walaa salah يقول...

الاول الف مبروك على الحمل وربنا يجعله او يجعلها من الذريه الصالحه

بصراحه بالنسبه للبوست ده

ممكن نجيب ليها عذر عشان الحمل

انا اعرف ان الحمل بيتعب بعض الستات

بس بصراحه يا اسامه

انا استغربت في الاول لما انت قلت انك بتحاول تقرب من ربنا عشان تقربوا من بعض وفي نفس الوقت عشان ترتاح منها

ازاي الاتنين مع بعض

بس بردوا طول قرايتي للبوست بجيبلها عذر عشان الحمل وكويس انك كنت بتستحملها

رجاله كتير مبيطقوش زوجاتهم وقت الحمل

بس واضح ان مراتك متردده في إتخاذ اي قرار عشان كده بتلاقيها بتقرر اي حاجه بعد مده


حاجه تانيه عايزه اعرفها منك يا اسامه لو سمحت

طول فترة خطوبتكم كانت عامله معاك إيه ؟


معلشي طولت في التعليق

eng_semsem يقول...

الله يبارك فيكي وانا حاولت اقنع نفسي بالعذر ده بس برده انا بني ادم واول مره برده اشوف مراتي حامل يعني مش عندي خبره ولا اعرف هي حاسه بايه وما تستغربيش من التناقد عارفه اللي عاجبه منظر النار بس عارف انها هتحرقه هو ده اللي كنت حاسس بيه وفي فترة الخطوبه زي ما تقولي كده احنا الاتنين كنا بنحاول نهرب من اللي ينكد علينا وما نحاولش نفتح فيه وبعدين يا ستي اكتبي براحتك محدش بيعد عليكي وشكرا على متابعتي

سواح في ملك اللــــــــــــــــــه- يقول...

سؤال بس لوسمحت
هو مش كان فيه فتره خطوبه قبل كده
ثانيا
انت معرفتش تبادر بتغييرها
انت في كل تصرفاتك معاها عبارة
عن رد فعل
وانا مقصدش انك تضربها
بس الحل معاها
انك تشد مرة لدرجه التصميم والصلابة
وترخي مرة لما الزمام يبقي في ايدك
ارجوا كلامي ميزعلكش

شهر زاد يقول...

باب مقفول ما يبقاش عقلك مقفول الست لما بتحمل بتتغير فيها حجات كثيرة
وبتبقى مش طايقه روحها قرب منها وافهمها وريحها ينولك تواب
كل سنة وانت طيب
تحياتي

eng_semsem يقول...

اخي سواح
انا رديت على فترة الخطوبه للدكتوره ولاء وكان دايما اي نقاش بيتحول لحرب شعناء تنتهي بالبكاء ياما السيده الوالده وكان بينتهي الكلام على مفيش وتتكرر نفس الاخطاء تاني وده هيبان الجزء اللي جاي وانا مش بزعل من رايك احنا بنتعلم من بعض وشكرا على متابعتي

eng_semsem يقول...

اختي شهرزاد
وعشان كده كنت بسكت واتحمل مستني بكره الوضع يتغير وهيبان ان كان بيتغير او حتى عايزه هي تتغير وصبرت وسكت والنتيجه الجزء اللي جي

Tears يقول...

موضوع الحمل فعلا متعب بالذات فى اول مرة و فعلا يجوز فيه عدم الصوم لكن الصلاة مالهاش علاقه

عموما الحمدلله انه فيه طفل فيمكن ده يقرب المسافات و كفاية انه اثبات لحبها لك

وداد يقول...

انا بقول تصرفاتها في الجزء ده ليه عذره

انها حامل وزي ما قالوا إللي ردوا قبلي انها بتكون عصبية ومش متقبلة الكلام

انا حاسة كمان انها زي ما بتعمل انت فيها بتعمل فيك

يعني انت مطلعتش عند والدها هي كمان مطلعتش عند اهلك

المفروض هي بتمشي تحت طوعك

على العموم منتظرة الجزء القادم ولعل الحمل يقرب المسافات شوية

مع إني مظنش حاجة زي دي

واتوقع كده والله اعلم انه الخلافات هتزيد

لأنه قبل وجود حمل كانت الخلافات

يبقى لما يكون في حمل ولو ربنا كملها على خير وولدت هتتبخر الخلافات

مظنش

اسفة على الإطالة

Unknown يقول...

أنا أول مره أقرى الحكايه و بصراحه مش متاعطفه معاها خالص رغم اني دائماً بحب أنصف البنات بس ما كل الناس بتحمل و مبتبطلش تعبد ربنا بأي شكل
اسمحلي أتابعك و كل سنه و انت طيب

Noha Saleh يقول...

بعتذر على التأخير
بس انا شوفت كل اللى فاتنى
مبروك على الحمل
على فكرة ممكن الحمل يكون هو السبب
ان شاء الله البوست الجاى تكون العلاقة اتحسنت شوية

ليلى الصباحى.. lolocat يقول...

السلام عليكم ورحمة الله

اقولك شىء اخى الكريم
واضح ان مفيش بينكم حب من الاساس
لو فيه حب مش ممكن كنت تشوف فيها عيب حتى لو كان امام عينك
وواضح انك فى وادى وهى فى وادى

انت بتبحث عن شىء وهى عايشة فى حياة تانية خالص

يبقى الحل كما قال تعالى عشرة بمعروف او تسريح باحسان
حاول تقرب منها اكتر وتتناقش معاها اكتر يمكن تشوف منها خير فى المستقبل ان شاء الله

ومعلش نفسى اقولك حاجة صدقنى االناس مش هتنفعك بشىء ولا كلامنا كلنا ممكن ينفعك
انت اللى شايف مشكلتك وانت اللى عارف التفاصيل خلى بالك من حياتك اخى وخليها فعلا باب مقفول وحاول تلجأ لله ولاصحاب العقول الراجحة من اهلك او اهلها .... سامحنى لو لقيت فى كلامى شىء من قسوة بس صدقنى عن تجربة ماحدش بينفع حد اللى ممكن ينفعك هو حكم الله فى كل مسألة من حياتنا

ربنا يرزقك راحة البال ويحل لك مشاكلك اخى والله احس بك كتير اللهم اصلح شأنك كله وتقرب لله ( كفى بالله وكيلا )


اعتذر لطول كلامى اخى الفاضل
دمت براحة بال وحال
كل سنة وانت طيب

غير معرف يقول...

تنكح المراة لاربع لمالها وجمالها وحسبها ودينها فاظفر بذات الدين تربت يدك ان لم تفعل وبم انك مجتهد فى العبادات اكيد عارف الحديث دة الصيدلى هيثم جمال

غير معرف يقول...

تخيروا لنطفكم صدق رسول اللة الصيدلى هيثم جمال

محمد سعد القويري يقول...

تحية عطرة معطرة
Attention Please >>>>
المعذرة .. هذا تعليق خارج النص ..
دعوة للمشاركة في
مشروع مقروءاتي الثالث
للمشاركة ولمزيد من التفاصيل .. هنا
http://qweary555.blogspot.com/2010/12/1431.html
ــــــــــــــــــــــــ
وإن شاء الله تكون هذي بداية سلسلة من الزيارات :)

جايدا العزيزي يقول...

اسامه

انا معاك انك بتحاولتحافظ علىتعاليمدينك

وفروضه واعلمان الله سيحاسبك على زوجتك

ولكن ديننا يسر وليس عصر

بالتفاهم سوف تنفذكل ما تامرها به

وربنا يوفقك يارب

والفمبرووووووك النونو



كل عام وانت الى الله اقرب وعلى طاعته ادوم

كل عام وانت واسرتك بالف خير

تحياتى

غير معرف يقول...

أجمل ما في البوست

انو راح تصير أو صرت "بابا"أو ..

انا عقلي قلب ,,

انتظر البقية

محطات ثقافية يقول...

السلام عليكم ورحمة الله
تعجبني طريقة سردك للاحداث اسلوب جميل وسلس وبسيط جدا
بارك الله فيك اخي وكل عام وانت طيب

الغاردينيا يقول...

مبروووووك البيبي

واتفق مع كل الاراء في الاعلى

المراه الحامل ليها ظروفها

انتظر بقية الحكايه

:) ارق التحيات

eng_semsem يقول...

انا اسف يا جماعه عندي مشكله في النت وان شاء الله تتصلح وارد على الكل

eng_semsem يقول...

الله يبارك فيكم كلكم واعذروني هرد المره ده بس رد جماعي عشان مشاكل النت
زي ما انا قلت اخدت ليها العذر عشان الحمل وده اللي هيبان الجزء اللي جاي
وبالنسبه للاخت شيرين اهلا بيكي وياريت تقري الاجزاء الماضيه عشان تبقي معانا وبالنسبه للاخت جايدا الدين يسر اه بس مش نسيبه واناذكرت قراءة القران مش فرض والصوم هي اقدرى بنفسها وده حاجه مابينها وبين ربنا ان كانت تقدر اولا طيب والصلاه والاقبح من تركهم العذر اللي كان بيتعبني اكتر يعني في القران طيب هي فطرت اكتر من نص رمضان ريقها ناشف ليه والصلاه انا موجود في البيت في المغرب والعشا والفجر واحيانا بوصل قبل العصر طيب ايه علاقة كلامها بانها بتسيب الفروض ده

eng_semsem يقول...

اختي ام هريره
انا معاكي في كل كلامك قلبا وقالبا وتابعيني هتعرفي كل حاجه في وقتها
وهتعرفي انا بحكي ليه وايه السبب
وصدقيني انا في القصه لحد دلوقتي مفيش حد حكيت ليه ولا اتكلمت وبحافظ على اسرار بيتي وبالنسبه للحب وتصيد الاخطاء انا قلت من البدايه ان احنا مش بداية علاقتنا حب وكنت ناوي اقوي العلاقه ده واعمل حب بجد بعد الزواج والاخطاء انا مش بعمل حاجه هي اللي بتيجي تتخبط في وشي وتابعي الجزء اللي جاي واحكمي

eng_semsem يقول...

اختي ام هريره
انا معاكي في كل كلامك قلبا وقالبا وتابعيني هتعرفي كل حاجه في وقتها
وهتعرفي انا بحكي ليه وايه السبب
وصدقيني انا في القصه لحد دلوقتي مفيش حد حكيت ليه ولا اتكلمت وبحافظ على اسرار بيتي وبالنسبه للحب وتصيد الاخطاء انا قلت من البدايه ان احنا مش بداية علاقتنا حب وكنت ناوي اقوي العلاقه ده واعمل حب بجد بعد الزواج والاخطاء انا مش بعمل حاجه هي اللي بتيجي تتخبط في وشي وتابعي الجزء اللي جاي واحكمي

dodoeltaiba يقول...

ازيك يااسامه يارب تكون بخير
متابعه ومنتظره الباقى ان شاء الله

dodoeltaiba يقول...

ازيك يااسامه يارب تكون بخير
متابعه ومنتظره الباقى ان شاء الله

غير معرف يقول...

ربنا معاها ومعاك ويوفقكم مع بعض

مابعرفش انصح الصراحه في الحاجات دي :)

تحياتي

زهرة(جنى)الاسلام يقول...

السلام عليكم
على فكرة حضرتك انا وصلت للشئ المفقود
وهو ان مفيش حب مابينكما ودة اللى واضح
حضرتك خطبتها تقريبا والواضح من كلام حضرتك بسرعة
وحدث الزواج بدون حب فى فترة الخطوبة
وحتى بعد الزواج