الاثنين، 20 ديسمبر 2010

حكايتي مع الايام (13)

قبل العيد الكبير بحوالي 3 ايام تقريبا 6/12/2008 بعتت رساله ليا كلمتها ورحت واخدت اجازة العيد من شغلي ونزلت على كفرالشيخ وقعدت مع ابوها تاني واتكلمنا وقلي عايز اشوف ورق الشقه قلتله ورق ايه يعني قلي عقد البيع ولا الشقه ايجار قلتله سهله بس الورق في مصر قلي عايز اشوفه قلتله بس كده واخد مراتي وامشي عايز اعيد معاها قالي ايوه خرجت ورجعت تاني القاهره جبت الورق اللي كنت سايبه كله مع عمي وكلمتها هو ايه عايز يشوف الورق ده لمحت انه عايزك تكتب الشقه باسمي رحت قايل الاجابه بمنتهى الصراحه والوضوح يبقى كده عايز يحط العقده في المنشار لان ده عمره ما هيحصل وهو ما قلش الكلام ده ليه وانا قاعد معاه وبعدها قالت اصل في واحد قله ان الشقق في فيصل اغلبها ايجار وهو عايز يتاكد ان كانت ايجار او تمليك قلتلها وماله كلها كام ساعه ونعرف هو عايز ايه وبرده رجعت ورحت عنده الورق اهو بص عليه وبعدين قلي عقد البيع بتاع عمك ليك ده ملوش لا صحة توقيع ولا تسجيل قلتله انا والدي هنا في كفرالشيخ وعمي هناك ومعاه المحامي بتاعه خلص هو اجراءات البيع مع الراجل الغريب وكتب بعديها بحوالي سنتين العقد اللي بيني وبينه لما جيت ادخل الغاز واغير عداد الكهرباء لاسمي وادي وصل الغاز والكهربا باسمي غير كده انا كنت شايل العقد معاه هو اصلا لان احنا بينا وبين عمي حاجات كتيروارتباطات كتير الشقه ده بالنسبه ليهم شئ لا يذكر قلي ازاي وانت تضمن منين عمك ما يختش منك الشقه قلت ليه لو هقلق مش هيبقى على الشقه خالص يبقى هقلق على الحاجات التانيه قلي لا انا عايز العقد يتسجل في الشهر العقاري او تعمل صحة توقيع رديت عليه لو هو ده اللي هيوقف الدنيا مفيش مشكله بعد العيد اعمل صحة توقيع وبعدين قام وجاب 3 ورقات الاولى اقرار اني ما اضربش مراتي وانفق عليها بما يرضي الله والتانيه اني ما اكسرش في اساس البيت والتالته انك تعاملها بما يرضي الله وقلي ده ورق كتبته على الكمبيوتر ورق عادي يعني مع ان الورق كان مكتوب على اله كاتبه مش كمبيوتر وباين من شكل الحروف وده صوره منه وبصراحه قلقت بس قلت ليه هو انا حصل مني غير كده هو انا بعاملها مش بطريقه اسلاميه هو انا بكسر عفش البيت قلي عشان ابقى مطمن عليها وبعدين الورق ده مش فيه حاجه غلط قلت ليه وماله همضي عليه بكره الصبح قدام الاتنين اصحاب ابويا اللي كانوا ادخلوا ويمضوا عليه شهود واخد مراتي وامشي قلي لا تمضي دلوقتي يا كده يابلاش قلت ليه بلاش سلام عليكم ولمت ورقي ومشيت وسافرت على مصر قضيت العيد وتاني يوم جت رساله من اختها كل سنه وانت طيب اتصلت بيها وكان في ما بينا كلام كل فتره وسلمت عليها وعلى العيال وقالت ليا ان خالو صابر وده غير اللي اخدها من البيت ممكن يعرف يقنع بابا قلتلها باب دماغه ناشفه قوي قالت ليا خد رقمه وكلمه يمكن ربنا يسهل الحال اتصلت بخالها وكلمته واتفقنا ورحت ليه الشرقيه تاني يوم وعمل الواجب وتمام واتكلمنا وفي الاخير قلي انا اتكلمت معاهم وابوها معندوش غير حلين انك تكتب وصل امانه وترجع معاك او لو معندكش امكانية تشتري شقه في كفرالشيخ ممكن هو ياجر ليك شقه عنده في البيت قلت ليه هو ده كلام قلي هو ده اللي انا وصلت اليه معاه قلتله خلاص ربنا يسهل الحال وانا هرد عليك ونزل وصلني لاول الشارع وسلمت ورجعت تاني القاهره وبعد يومين كلمته قلتله حتة وصل الامانه مش هينفع لان هي ملهاش ضمان وفين مراكز صيانتها (على اساس اني بشتري غساله او تلاجه) وبالنسبه للشقه انا شاكر ليه كرمه انا عندي شقه فعلا في القاهره منين ماتحب ترجعها اهلا وسهلا وعمر الدنيا ماهتقف على حل راح قايل ليا طيب ايه رايك تجيب ليها هديه دهب ونروح سوا وناخدها قلت ليه وماله انا معنديش مانع قلي هتكلم معاهم وارد وطبعا مفيش رد جه.
وبعد العيد بيومين وصلني ورقه من النيابه طلب حضور رحت اشوف في ايه لاقيتها عامله محضر اني طردتها من البيت قدام الجيران واخدت دهبها وغيرت كالون البيت ورافض رجوعها قلتلهم الحقيقه عكس كده تماما وانا عايزها ترجع امبارح مش دلوقتي وهي مشيت مع خالها انا ما طردتهاش وجه معايا امين شرطه وسال الجيران عن الواقعه المذكوره بالمحضر واحد منهم لما سمع الكلام خلى مراته تعمله ميه بسكر عشان داخ وكلهم استغربوا حصل امتى ومشيت ليه وكان في واحد من الجيران كانوا قابلوه ابو مراتي وهي   في البيت عنده معرفش امتى ومعرفش برده ليه وقلي هو الموضوع وصل للنيابه انا معايا رقم ابوها ورقمها انا هتكلم معاهم واشوفهم عايزين ايه قلت كويس عشان تكمل والراجل مشكورا نزل ليهم كفرالشيخ وقعد مع ابوها وما وصلش لاي حاجه ورجع كما راح . 
خلاص اقتنعت بكلامكم ياجماعه انا لازم اخد هدنه واقف وافكر واشوف الدنيا واخداني لايه ولفين وقعدت احاسب نفسي واشوف انا غلطت في ايه واستاهل ايه والناس ده بتعمل كده ليه ووصلت اخيرا لنتيجه اني مش فاهم اي حاجه من اللي بيحصل . 
 

هناك 42 تعليقًا:

Dr/ walaa salah يقول...

بجد مش عارفه في ايه

هما ليه اهلها بيعملوا كده

وصولات امانه وشقق ايجار وهدايا دهب


وكمان محاضر

وكل ده بعد شهور بسيطه من جوازكم

هو ده الجواز بالنسبه ليهم

والله بجد ربنا يرحمنا برحمته


معلشي يا اسامه هقولك حاجه وربنا يسامحني عليها

خد حذرك من الناس دي على قد ما تقدر

وبقولهالك تاني

هى لو شارياك هتجيلك ومن غير ما حد يتدخل

بجد المره دي الحكايه كانت قاسيه اوي واخر تلات سطور كتبتهم خلوني ابكي من جوايا على اللي بيحصل في الدنيا

الطيبه للأسف ملهاش مكان دلوقتي


بس متخفش إن شاء الله ربنا هيعوضك عشان طيبتك واللي انت كنت بتعمله عشان بيتك يستمر

صدقني في واحد اعرفه مر بنفس تجربتك يمكن بإختلاف المواقف

وبردوا كان في بينهم طفل

بس سبحان الله

كل شئ اتغير في حياته دلوقتي ومراته اللي كانت متكبره عليه وورته النجوم في عز الضهر

والله مبتمشيش خطوه دلوقتي غير بإذنه

بس بعد ما وقف وقفه صح معاها

وعلى فكره يا اسامه كان اطيب منك كمان


متقلقش وياريت تطمنا عملت إيه معاهم ومتتأخرش علينا لو سمحت

وداد يقول...

تصدق بالله

انا بصراحة ومتزعلش مني

انا زهقت بجد

انتي باقي عليها ليه

وليه كل الشروط دي

يا إما تكتب الاقرار إنك متضربهاش

يا إما تجيب لها شقة

بجد دي عيلة مخها تعبان اوي

وانت إللي عملت في نفسك كده

ريح دماغك والله وطلقها

انت مستني ايه بس

لما يودوك تاني على المحكمة باي تهمة تاني

وعايز تراجع نفسك وتشوف إيه الغلط

اقولك انا بقى إيه الغلط

انك اتساهلت في حاجات كتير ودي كانت النتيجة

انهم عايزين ياخدوا منك كل حاجة حتى شخصيتك

مش هتقدر على فكرة تعيش مع واحده زي دي

صدقني الطلاق افضل حل ليها

تعرف انت بس لو قولت كلمة كلاق قدامهم

ومتحركوش يبقى لازم تطلق فورا

بجد انا زهقت من معاملتهم الوحشة دي

اسفة على الإطالة

ツSmiLeY AnGeLツ يقول...

السلام عليكم
بجد عندك صبر ماشفته عند حد
غير امي
ههههههه
الله كان في عونك
متابعه للنهاية
تقبل مروري
سلامي ليك اخي.

Unknown يقول...

مكدبش عليك أنا متابعتش الحكايه من الأول بس واضح انك انسان طيب و صريح
ربنا هيعوضك خير و يسعدك ان شاء الله
تحياتي الخالصه

سواح في ملك اللــــــــــــــــــه- يقول...

الناس دي جشعة
ومالهومش امان
الناس الكويسة لو حصل مشكلة بين بنته
وزوجها
يتحري الامر ويعرف في ايه
ولو بنته غلطانة يجيب لك حقك ويادبها
وعايز اقوللك حاجه ومتزعلش
شوف انت حكيت عن الراجل كتير
وماجبتش سيرة والدتها ام مراتك يعني
بس انا بقي باكد لك
الراجل ده العوبه في ايد مراته وبنته
وشخصيته اللي بيرسموها قدامك دي
شخصية وهميه
يعني من الاخر
الراجل نفسه لابيودي ولا بيجيب

eng_semsem يقول...

dr /walaa salah
انا مكنتش عارف هما بيعملوا كده ليه برده ودورت بس ملقيتش وانا هستحمل واخلي بالي كويس وبعد الشر عليكي من الحزن والالم وبالنسبه للطيب والصيبه اللي تعرفيهم ربنا يكرمهم ويسعد ايامهم اما عن كلمة الطلاق انتظري البوست اللي جاي

موناليزا يقول...

تصدق بالله
أنا دمى اتحرق

eng_semsem يقول...

وداد
لما انت تزهقي انا اعمل ايه وبعدين انا كنت سايب حكاية الطلاق اخر حل وكانت الدنيا كل شويه تفتح باب في وشي وتقفل الباب وكنت بتساهل عشان اقول اني عايز اعيش مش اكتر بس مكانش على حساب كرامتي عشان كده كنت برفض الحلول الهبله وبالنسبه للطلاق ده هتشوفيه البوست اللي جي
شكرا على متابعتي

eng_semsem يقول...

خواطري في الحياه
بيقولو الصبر مفتاح الفرج وانا كنت بدور على المفتاح اللي يفتح الباب اللي اتقفل
وشكرا ليكي على متابعتك

جايدا العزيزي يقول...

اسامه

حقيقى بتعب نفسيا ودمى بيتحرق

وزعلانه عليك جدا اخى

وبدعيك

فى انتظار البوست القادم

ونصيحه وجع ساعه ولا كل ساعه

تحياتى

Amwaj يقول...

آنا بعد مو عارفة شنو صار
وشنو يبون أهلها ؟!!

بس آنا متأكدة إن أهلها أهما السبب في تعقيد المشكلة

اصبر والفرج من رب العالمين

eng_semsem يقول...

شيرين سامي
ربنا يكرمك ويعوضني خير ويسعد كل المسلمين
شكرا على تواجدك معانا

eng_semsem يقول...

سواح في ملك الله
افعال الناس ده توصفهم اكتر من كلامك اما حكاية امها ده اللي انت قلتها خلتني مرتاح انك ذكرتها لاني كده اتاكدت اني بحكي زي اللي حصل بالظبط لان ده وصل ليا ان الراجل ده بينفذ اوامر مش اكتر هو ملوش حرية اتخاذ قرار هما بيقولوا ليه روح قول لازم تجيب شقه تمضي على الورق بس مين اللي بيحرك بقى البنت ولا امها طيب هي بتكلمني عشان توقعني بالغلط
ولا ايه وانا بجد حسيت ان في دايره انا جواها وهما بيلفوا حواليا وانا مخبين عنيا بس بجد كلامك ده كان في دماغي بالظبط
شكرا على متابعتي والتركيز في قصتي

eng_semsem يقول...

موناليزا
بعد الشر عليكي من حرقة الدم وافتكري اني انا اللي بيتعمل فيه كل ده وانا لسه عايش وكويس الحمدلله ومفيش حد بيتعلم ببلاش ان مع العسر يسر
شكرا على متابعتي

eng_semsem يقول...

جايدا العزيزي
عزيزتي انا هتعب اكتر لو شفت القصص ده بتتكرر تاني وفي ناس لسه ما اتعلمتش وتخرب بيوتها بايديها وتتصرف غلط مع اولادها ده رساله لكل بنت وولد وام واب ويارب توصل الرساله ونصيحتك وصلت وهتشوفيها الجزء اللي جاي
وشكرا على متابعتي

eng_semsem يقول...

amwaj
اولا هي السبب الرئيسي في المشكله واهلها كبروها وهي السبب انها وصلت ليهم اسرار بيتنا والفرج قريب من كل مظلوم ان شاء الله
شكرا على متابعتك

Unknown يقول...

اسامه دى زيارتى الاولى مقدرتش طبعا

اقرأ كل اللى فات بس القدر اللى قرأته

يخلي الواحد مابين حزن شديد وغضب

اشد انت ازاى لحد دلوقت معملتش ثورة

وانتفاضه عن اللى بيحصل ده بجد انت

شايل هم يهد جبال زمان حد قالى انا

صباعى اللى يوجعنى اقطعو وانت يابنى

مش بتتوجع ده انتى بتتقطع وحلك ف

أيديك ياريت يكون قصدى وصلك مش لاقيه

حاجه تانيه اقولها غير ربنا يفك

كربك وييسرلك امرك ويزيل عنك همك امين يا رب

Carmen يقول...

لولا البيبي كنت قلتلك الانفصال افضل حل
انما كده يبقي رجعها باي طريقة انشالله تطلبها في بيت الطاعة
ولك حق تمنعها عن اهلها طالما شايف ده بيهدد حياتك
ربنا يهديلك الحال

هبة فاروق يقول...

اسامة انا شايفة ان مراتك سلبية
جدا وماشية وراء كلام ابوها على فكرة
هى لو كانت بتحبك وباقية على العشرة
كانت تلم هدومها وحاجتها وتهرب وتجيلك
وبعدين وصولات امانة اية وتوصل كمان
للنيابة انت انسان طيب جدااا واكيد
تستاهل انسانة تفهمك وتقدر طيبتك
انا متجوزة وعارفة يعنى اية بيت واسرة
وعلى راى المثل الست هى اللى بتعشش على بيتها وحياتها مش العكس
اتمنى لك الهدوء النفسى واعادة التفكير
وربنا يهدى الحال

شهر زاد يقول...

اقولك حاجه وما تزعلش من خلال تجربتي الطويله
كده الجوازه مابقتش نافعه
لما يتدخل طرف ثالث بين الزوجين تبقى خربت وانت شايف
كل يوم كلام وكل يوم شرط هي الزجه دي مالهاش رأي هو انت متجوزها هي والله ابوها
والله القصة دي ابتدت تنرفزني
ربنا معاك تحياتي

افروديت يقول...

بصراحة ياأسامه أنامش هقدر أعلق لسببين

أولآ /أنت حرقت دمي جدآوعصبتني
ثانيآ/ تعليقي مش هيعجبك نهائي


لاتعليق

والله أول مرة أشوف حد باله طووووووووووووووووووووووووووويل كده
ومن فضلك بلاش تقولي اللي في بطنهاوالكلام ده
أحنامش خرابين بيوت بس أنت مادام قررت تحكي وتسمع الأراء يبقي تسمع للأخر

eng_semsem يقول...

mena
انا عملت انتفاضه وثوره داخليه مش عارف اطلعها ولا اتنفس ولمين هشكي غير لربي وفهمت قصدك كويس بس صابعي لو كان مراتي ممكن بس لو اللي في بطنها دمي اعمل ايه اقطعه ازاي وشكرين على الدعاء الجميل وربنا يكتبه لكل المسلمين
واهلا بيكي في مدونتي المتواضعه

eng_semsem يقول...

karmen
تعرفي انت تعيشي مع واحد مش عايزك
صعب جدا وحتة انها تيجي بالعافيه مش هيحل مشكله وانا كنت مقتنع انها طريقه مش صح اني اقف قدام مراتي في محكمه ومازلت مقتنع بكده اما حتة امنعها عن اهلها اول ما ترجع هعمل كده
انتظري البقيه وشكرا على متابعتي

eng_semsem يقول...

هبه فاروق
الكلام ده لو مش هي اللي بتقنع ابوها بالغلط اساسا وانا متاكد ان هي لو عايزه ترجع كانت هترجع وحتة الست هي اللي تعشش على بيتها ده حقيقه لانها هي اللي في ايدها تلم حياتها او تهدمها وانا غرضي من الموضوع ان كل واحده تعشش على بيتها فعلا
شكرا على متابعتي

eng_semsem يقول...

شهرزاد
دخول طرف تالت للحياه مابين زوجين بيكبر المشاكل ومش بيحلها وبعدين اللي ينرفز اكتر انها محاولتش حتى تحلها لا قبل المشاكل ولا بعد خروجها من البيت حاسس اني بجري لوحدي في طريق ومش لاقي نهايه بس لازم اجري عشان اوصل
ربنا معانا كلنا يساعدنا في كل مشاكلنا
ومشكوره على متابعتك واستماعك ليا

eng_semsem يقول...

افروديت
السبب الاولاني انا اسف ليه لاني مش قاصد بس هو ده اللي حصل فعلا معايا ولسه في تاني اما كون تعليقك مش هيعجبني او يعجبني برده هنشره لانه رايك وانا مستعد اسمع من اي حد رايه وافتكري ان هدفي ان الكلام ده مايتكررش تاني وانا مستعد اسمع لحد ما انت تزهقي مني اتكلمي براحتك
وشكرا على متابعتك

جميله المصرى يقول...

السلام عليكم

انا متابعه من فتره بس متابعه فى صمت ولا ادى لما

يمكن لانى مش لقيه كلام اكتبه اعبر بيه ولا يمكن مستنيه لحد ما اعرف باقى الحكايه

بجد مش عارفه

عموما لازلت متابعه فى صمت

ربنا يوفقك

دمت بكل خير

اختك جميله

dodoeltaiba يقول...

اسامه ازيك اخبارك ايه يارب تكون بخير انا منتظره للنهايه
وتحباتى ليك

غير معرف يقول...

نيابه ... يا فضيحتي :D

مستنيه النهايه

تحياتي

miroooo يقول...

بجد كلام ولا فى الافلام
الحاجات دى بتحصل حقيقى مش عارفه والله هى الستات دى بتتجوز ليه؟ سورى يعنى
الموضوع مستفذ جدا ونرفزنى
بجد ربنا معاك
مفروض الست تحافظ على زوجها ومتوصلش الامر لاهلها مهما كان
والله حصلت لواحد قريبنا حكايات زى كده باردو بس مفيش حد بيتعلم
مستنيه طبعا اعرف ايه اللى هيحصل بعد كده
يارب بس اعرف اتابع داخلة بقى على امتحانات وحاجات زى الفل
ربنا معاك يا بشمهندس

غير معرف يقول...

كتب الله أجرك على كل
أذى لقيته منهم..
ايه اللي وصولات وتوقيع وتسكن عندنا ومدري ايه...؟!!
في انتظار البقية

eng_semsem يقول...

dodo
انا الحمدلله بتقلب في خيرات ربنا وبالنسبه للنهايه فخلاص قربت
وشكرا على متابعتي وتواجدك الدائم معنا

eng_semsem يقول...

جميله المصري
مجرد متابعتك تكفيني واريد ان ابلغ الرساله لكل اخواني واخواتي من اجل الحفاظ على بيوتنا معموره بالحب والود والسعاده تابعيني في صمت وسكون ولكني في الاخير اريد الاستفاده للجميع
وشكرا على متابعتي

eng_semsem يقول...

فتاه من الصعيد
يا فضحتي انا بين الجيران وياريتها وقفت على كده لسه هتفضح اكتر تابعيني
وشكرا على تواجدك معنا

eng_semsem يقول...

mirooo
وانا عمري ماكنت اتخيل ان ده ممكن يحصل معايا ودورت كتير على الاسباب مش لاقي واللي انت قلتيه هو اللي انا عاوز اوصله وجايب تجربتي الحقيقيه اللي حصلت علشان كل واحده تفكر مية مره لان تدخل اهلها في مشاكل بيتها ممكن يكون سبب في خرابه مش حمايتها وربنا يقويكي على الامتحانا وانا مش ناوي اطول عشان كل اللي وراه امتحانات وهتكون النهايه قريبه
تقبلي تحياتي

eng_semsem يقول...

loosy
وانا مش مستني حاجه من البشر انا مستني اجري من رب البشر وهو اللي دايا معايا يحميني من غدرهم
شكرا على متابعتي

Tears يقول...

بغض النظر عن الزوجة اللى مش باين ان ليها شخصية او موقف لكن من تصرف اهلها واضح ان مش فارق معاهم استمرارية الجوازة مش عارفه ليه

عموما مستنية اشوف ح توقف المهازل دى ازاى لان مش معقول فى الاخر مش ح تاخد موقف قدام كل ده

eng_semsem يقول...

tear
بغض النظر هي ليه شخصيه او لا انا كنت في الاول مقتنع انها المفروض تخاف على بيتها او حياتها او اللي في بطنها وبالنسبه لاهلها انا الطبيعي مفيش حد بيحب يشوف بنته مطلقه وقاعده كده والمفروض والطبيعي انهم يحلوا مشاكلها مش يعقدوها اما اللي هيحصل بعد كده
انتظري البوست القادم وشكرا على متابعتك

غير معرف يقول...

السلام عليكم و رحمة الله و بركاته أخي الكريم المشرف على المدونة

أن صاحب مدونة الأمل أردت أن أدعيك لزيارة مدونتي و ترك بصمتك فيها و الادلاء على رأيك فيها

تقبل مني فائق الاحترام و التقدير

رحاب صالح يقول...

كالعادة قريت اللي فاتني واتقهرت بما فيه الكفاية ...
انا مش فاهمة وعايزة افهم بجد
دي حاجات غريبة فعلا
تعرف انا ليا ثلاث اهخوات متزوجين والله ما في شيء بيحصل بيقولوه لينا ولو كان اية هو ..
لان البيوت اسرار ومتوصلش ابدا للدرجة دي
وحتي لما اختي الكبيرة اول ما تزوجت وزوجها حب يسافر بلد تانية غير بلطيم بسبب الشغل مكانش في معارضة من ناحية بابا خالص لان الزوجة مكانها مع زوجها
وده الطبيعي اما وصولات امانة وورق وامضاءات وكلام من ده ...؟؟؟!!!!
انا بجد مذهولة ومش فاهمة ده كله لية...؟
مستنية اشوف اللي هيحصل

eng_semsem يقول...

Rehab saleh
ةانا برده كنت مستغرب في ايه والناس لما كانت بتدخل بتقول مش معقول هو في ايه وتلاقي الكلام ده قدامها تتصدم وترجع ومفيش فايده اما اهل الاصول بيعرفوا الاصول واللي بيعملوه اخواتك في حفظ اسرار البيوت هو ده اللي بيحافظ على حياتهم وعشان كده عايشين وبالنسبه لاختك اللي نقلت مع جوزها عملت الصح هي وباباك وده فكرت فيه امال لو شغلى اتنقل الصعيد ممكن بقى تقولي لا روح لوحدك انا مش رايحه
شكرا على متابعتي

غير معرف يقول...

انا بقى جالى شلل من الناس دى طلقها واخلص