الخميس، 16 ديسمبر 2010

حكايتي مع الايام (11)

اخيرا خرجت من البيت وحسيت اني عايش صحيح كنت مستغرب انها ضحت ببيتها وزوجها عشان مفيش بس اناكنت تعبت واتقفلت معايا كل طريق وبصراحه انا فرحت جدا وانا بقفل الباب وراهم وخصوصا ان خالها قال ماتتكلمش ياريت تبعت ورقتها لبيت ابوها 
وبصراحه اكتر انا لما هديت وقعدت شربت كوبية الشاي التمام من عمايل ايدي انا حسيت اني ارتحت اكتر كمان بس عشان اخيرا هي راحت بيت ابوها ونتكلم بقى اخيرا وهنقعد ونشوف في ايه هي بتعمل كده ليه وكلمت والدي قلت ليه سالني ايه اللي حصل حكيت ليه استغرب وقلي ايوه بقى سابت البيت ليه؟؟؟
قلتله ده اللي حصل قلي خلاص اصبر وظبط امورك وربك يحلها بعد يومين جارهم جوز طنط ام وائل اتصل بوالدي وساله ايه في ايه الحاج حسين اتصل وقال ميرهان غضبانه وقاعده عنده في البيت ايه اللي حصل ابويا حكى ليه قله كده بس طيب هشوف كده ممكن نعمل ايه واتصل بيا مهندس اعرفه ويعرفهم وسالني وقلت نفس الكلام لان مفيش غيره قلي يعني انت عايز ترجعها قلت ليه هو انا مشتها هي اللي مشيت وبيتها ترجع ليه في اي وقت قلى خلاص انا هتكلم معاهم واشوف وبعدين اتكلم مع والدي وقله هنروح اخر الاسبوع نقعد معاهم وانا روحت في الميعاد على كفرالشيخ وسالني والدي في ايه كانت ده اول مره احكي لوالدي كل حاجه قلي وانت ساكت كل ده ليه انت لما حكيت المره اللي فاتت كان كلام تاني قلتله كنت بصبر يمكن تتغير قلي خلاص بكره لمانقعد ربك يحلها ورحنا في الميعاد مع الناس ودخلنا ونده ليها ابوها احكي وبدات تحكي حكيت اني ضربتها 3 مرات وطبعا انا اللي سالتها امتى لاني ما اعرفهموش حكيت على الحكايه الاولى اللي ابوها جه بعدها ونيلها والمره التانيه مره شدتها من قميص النوم والتالته لما مشيت بس زودت بس اني خنقتها قلتلها انا قالت اه قلتلها ساعة ما انا كنت ماسكك مش انت قلتي حاسب الاطباق اتكلمتي كده عادي وبدل ما تقولي سبني هموت تقولي حاسب الاطباق وده كان الجزء اللذيذ بعد كده فاكر عليت صوتك عليا قدام ماما ومامتك امتى ده يا بنتي وازاي الناس اللي كانت قاعده مخدتش بالها مش انا بس طيب فاكر لما كنا في رمضان واختك كانت نايمه جنبك على السرير بتاعي قلت ليه نعم انت بتهزري امتى ده قالت في رمضان قلت ليها يعني كمان كنت صايم لما كنت نايم وجت تصحيني قبل المغرب عشان افطر قالت اه ومددت جنبك وبعدين قالت انا مش بحب حد ينام على سريري رديت يا بنتي احنا كنا صاحين وبندردش لحد ما المغرب ما ياذن وبابها قاعد عادي بيسمع ولا كلمه وبعد كده لما جيت اتكلم واحد منهم قلي اسكت مش مستاهله كلام هي ما قلتش حاجه تستاهل انها تسيب البيت عشانها اساسا وشويه وعيطت ودخلت جوه شويه وابوها قام ورجع وقال انت مش بتجيب فاكهه ليه قلتله انا والله يا عمو ساعة ما مشيت كان في البيت تفاح ورمان وتين وفي درج في التسريحه هي عارفه مكانه انا سايب فيه فلوس وعمره مافضي في الشهرين اللي قاعدناهم انا ماقلتش ليها ماتجبش وهي كانت بتنزل الشغل عادي يعني ولو مش عايزه تشتري هي ماقلتش ليه ليا انا عايزه كذا او حتى بعتت البواب يشتري وكلمه كده على كلمه كده الناس اتكلمت لا يا اسامه ماتمدش ايدك عليها تحت اي ظرف قلت ليهم حاضر والامور ماتستاهلش انها تسيب البيت يا حاج حسين وفي الاخير وصلنا خلاص هي عشان اعصابها مشدوده سبها النهارده تستريح وربنا يسهل الحال وقمنا وسلمنا والكل بيضحك والامور بخير تاني يوم اتصلت بيه قلي ده كانت لسه بتكشف عند الدكتور ظهرها واجعها شويه قلتله في علاج اجيبه قلي لا خلاص انا جبته طيب اجي قلي لا مش مستاهله طيب اكلمها قلي اصلها جت تعبانه ونامت قلت ليه خلاص انا استنى بكره لما تستريح ونسافر بكره قلي لا سافر وربنا يسهل على اخر الاسبوع قلت ليه ماشي ابقى سلملي عليها لما تصحى وياريت تفتح تليفونها وسافرت تاني لبيتي لوحدي ....  

هناك 44 تعليقًا:

Dr/ walaa salah يقول...

الاول والله العظيم كنت مستنيه البوست ده

لدرجة اني كنت هدخلك واقولك اكتب يلا بوست جديد

عايزه اعرف ايه النهايه


بس بصراحه يا اسامه انت طيب اوي زياده عن اللزوم

انا كان هيجيلي شلل من كلامك معاهم

وبعدين سؤال

هو انت عيلتك كلهم زييك كده

لان واضح ان والدك طيب بردوا

المهم واضح انها دلوعه اوي اوي ودلع مش كويس كمان

الحاجه اللي نرفزتني انها بتشتكي منك قدام كل الناس دي وتقول انك ضربتها

امال لو شافت الرجاله اللي بتضرب بجد كانت عملت ايه


بس لغاية دلوقتي انت غلطتك الوحيده انك مكنتش حازم معاها وطول الخط طيب معاها وعامل خاطر ليها


على العموم انا هستنى البوست اللي جاي بس يارب ميحصلش اللي في بالي لانه لو حصل انا مش هتابع يومياتك دي ابداً


في انتظارك يا اسامه

موناليزا يقول...

أنا متابعة الحكايات وبستناها بس قليل لما بعلق لانى بحب اقرأ الموضوع على بعضه:)
لكن المرة دى بجد لقيت ان فيه حاجة واضحة جدا وضوح الشمس وهى انكم بجد مختلفين عن بعض تماما
هى مش وحشة وانت كمان مش وحش بس انتوا مختلفين عن بعض فى كل حاجة فى التفكير وفى الشخصية وفى التنشئة الاجتماعية واللى بيحصل ده -انا اسفة - طبيعى

غير معرف يقول...

واضح إنكم بتستنوا لبعض الغلط :)

واضح كمان ان في سوء تقدير للامور بينكم وبين بعض

تحياتي

eng_semsem يقول...

dr/walaa
ديه مش نهايه ده بدايه جديده وممكن اي اتنين يحصل ما بينهم مشاكل ويحاولوا يحلوها بس المهم الطريقه اللي تخلي البيت مفتوح انما اللي حصل زود المسافات ما قربهاش وغالبا يا دكتوره البوست اللي جاي هيبقى جديد عليكي متهيالي هيبقى بره توقعاتك
وشكرا على متابعتي وننتظر كتاباتك

eng_semsem يقول...

موناليزا
ممكن كل اللي انت قلتيه صح بس هي ده الطريقه الصح لحل المشاكل وتقريب وجهات النظر ولا نسلم ونقول امين اكون ليها عبد او نفترق بسبب ان هي مش عاجبها ان جوزها قلها ناوليني المعلقه ييعني انت قلتي رايك ناقص كملي ليا ياريت المفروض نعمل ايه
وشكرا على متابعتي سواء بكتابة تعليق او لا يكفيني انك عندما تريدي التعليق فهناك مكان لكي في المدونه واخر عندي لاسمعك

eng_semsem يقول...

فتاه من الصعيد
وبعدين نحل الامور ده ازاي
شكرا على متابعتي

سواح في ملك اللــــــــــــــــــه- يقول...

هما بس مش هاين عليهم كده بنتهم ترجع من غير شروط
يقوموا يكبروا لك الحكاية وان حكمت هيقولولك عايزة تتطلق عشان يحققوا اكبر مكاسب منك قبل مترجع وتستعد للنصيبة الي بعدها
معلش متزعلش من كلامي
دي عالم فاضيه وانا لو مكانك كنت طلقتها فورا
ايا كانت الخسائر

miroooo يقول...

انت انسان طيب جدا بتفكرنى بواحد اعرفه
اكيد لازم يكون فى مشاكل بس من رايى مش لازم يوصل للاهل خالص
مفروض المشاكل تتحل بين الطرفين
منتظرة البوست الجاى بس ياريت تيجى تقولى علشان باسرح هههههههه
تحياتى

غير معرف يقول...

اعتقد الحل انكم تقربوا من بعض اكتر وتلتمسوا العذر لبعض ...

وارغوا مع بعض كتيييييييييييييير :)

وبلاش تمد ايدك حتى لو كده .... لان الاهانه مش في وجع الضرب قد ماهي في مدلول الاهانه

تحياتي

eng_semsem يقول...

miroooo
والله حاولت بدل المره ميت مره اني احل معاها لكن هي مش بتحل وكمان بتعقدها عليا بس هعمل ايه نصيبي اللي حصل ليا وسامحيني لو كنت انا كمان بسرح شويه
وشكرا على متابعتي

eng_semsem يقول...

سولح في ملك الله
هو ده اللي جه في بالي وكنت بستحمله ومش عايز اطلق لان الموضوع مش يستاهل وبالنسبه للخساير الفلوس بتروح وتيجي بس اللي في بطنها لو راح مش راجع
شكرا على متابعتي

ツSmiLeY AnGeLツ يقول...

السلام عليكم
طيب كنت كملت شوية طولت البوست شوية
ربنا اعناك وصبرك
مستنية الاخير
تقبل مروري
سلامي ليك اخي.

eng_semsem يقول...

فتاه من الصعيد
انت قريتي البوست اللي فات انا اتحايلت قد ايه عشان اقعد اتكلم معاها والبوستات اللي قبل كده وبالنسبه لمد الايد انا برفضه تماما وماكنش في بالي اني امد ايدي على واحده ست لو عملت ايه معايا بس المشكله اني استحملت لحد ما انفجرت ومش قادر وده اللي حصل معايا بس ربك عنده الحل
شكرا ليكي

eng_semsem يقول...

خواطري مع الحياه
انا نفسي اكتب النهايه لان في النهايه بدايه بس انا ممكن اظلمها واتظلم لو نسيت حاجه وخايف اطول يضيع التركيز وتفوت منك حاجه واخر حاجه في حياتنا هي الموت طول ما احنا عايشين حياتنا مستمره والحكايات بتخلص واحده تبدي التانيه وصدقيني اللي جاي اهم من اللي فات
شكرا على متابعتي

ليلى الصباحى.. lolocat يقول...

السلام عليكم ورحمة الله

اخى الكريم اسامة

حاول تحل الامور بشرع الله
بلاش تغلطوا فى حق بعض
ولو هى صممت على تدخل اهلها ارفض بشدة لا انت تدخل حد ولا هى كمان
اتكلموا تانى لوحدكم بهدوء بس بشرط انتم الاتنين تكونوا مقدمين التضحية لبعض مش تبدأوا الكلام وكل واحد مستنى للتانى غلطة

لازم كل واحد (ده لو عايزين الاصلاح ) يحاول يقدم تنازلات شوية

اسأل الله لكم الهداية وراحة البال
والتيسير ان شاء الله تعالى

الجأ لله بالصبر والصلاة والدعاء
دمت بخير اخى الكريم

غير معرف يقول...

مش عارفه ليه حاسه احساس غريب بانها عملت حاجه وخفت نفسها عنك

مش هسبق الاحداث

والله كتر خيرك انك روحت لحد عندها مع انها هى اللى مشيت لوحدها ولا حتى انت كرشتها ولا قولتلها امشى
يعنى المفروض كانت رجعت لوحدها

متابع

eng_semsem يقول...

ام هريره
اختى الغاليه كلماتك الجميله شرف ليا ان تنشر على صفحاتي وهي نصائح قيمه لكل من يقراها وهذا ما حاولت فعله ولكن ما يمكن عمله اذ اتصلت بخالها وهو ده كان فعله او اتصلت باهلها وحكت او زارت جارتها وتحكي كيف امنعها عن ذلك وانا كنت اظهرت اعتراضي عدة مرات ولكنه يتكرر دوما ولما حاولت افهمها نحل مشاكلنا مع بعض وبلاش تطلع بره كان الرد عليا من اهلها وكمان عايز يقطعها عننا ومش عايزها تحكي لينا حاجه طيب اذا كان اهلها كده بدل ما يقولو ليها اقعدي مع جوزك وحلوا مشاكلكم ككان ده ردهم واما عن شرع الله فهذا هو ما اسير عليه ومن تركه ضل
شكرا على متابعتي

eng_semsem يقول...

الحب الجميل
الاحداث هقولها كلها وربنا يقدرني وما انساش حاجه لاني لا احب اظلمها او اظلم نفسي وبعدين انا روحت عشان احل المشكله لاني باقي على بيتي وعلى اللي في بطنها وكنت منتظر اب يساعدني ويساعد بنته
شكرا على متابعتي

Carmen يقول...

فضلت مستنية البوست عشان اعرف سيبتها ازاي تخرج من بيتها برضه ماقولتش ^_^
اذا كان عشان خالها قالك ماتتكلمش فده مش سبب خالص لانك زوجها وحقك عليها اكبر من اي حد
عموما انا متابعاك للاخر اكيد هقدر اقيم الموضوع احسن
تحياتي

eng_semsem يقول...

karmen
عزيزتي انا اول البوست قلت اني خلاص غلبت وكده كنت مرتاح لانها خرجت وماكنتش عايزها اصلا تقعد ولما هديت وفكرت لاقيت ان ده احسن حل يمكن لما نقعد مع ابوها وامها ويسمعوا كلامها وطريقتها في الدنيا يفهموها ان ده غلط وانها بتهد بيتها وكنت فاكر ان لما الاب يسمعها هي خرجت ليه وعشان ايه يقلها انت غلطانه ما ينفعش تتكلمي كده ولا تتعاملي مع جوزك كده ولاني ساعتها لو كنت قلت لا ماكنتش حاجه اتحلت وانا كنت عايز احل ومفيش طريقه نفعت مابيني وبينها
وشكرا على متابعتي

جايدا العزيزي يقول...

اسامه

بجد انا المرة دى اتنرفزت جدا

ليه كل ده حصل ايه فى الدنيا

واضح يااسامه انها مش فهماك خالص

وانت كمان لسه بتحاول تكون هادى

بس ده ما ينفعش لازم تكون فيه خطوة جاده

للنزاع اللى بيحصل بنكم دايما

وبدعى ربنا يوفقك ويهديها

ولازم تعرف ان زوجها الاول والاخر فى كل شئ

ربنا يسعدك يارب

متبعاك

تحياتى

eng_semsem يقول...

جايدا العزيزي
اذا كان قاعده تحكي قدام ابوها على كلام كله ملوش لازمه وهو اسكتهاش ولا قال عيب يا بنتي واذا كان مفيش موضوع يستاهل اساسا وبعدين هي بالنسبه ليها زوجها اخر واحد في الدنيا في كل حاجه اخر واحد تسمع كلامه اخر واحد تحترمه اخر واحد تهتم بيه اخر واحد ممكن تقعد وتتكلم معاه بعد ما تحكي للناس كلها
شكرا على متابعتي واوعي تتنرفزي صحتك بالدنيا وما فيها

وداد يقول...

ايه العيلة دي

يعني كل إللي بيعملوه يغلطوك وخلاص

بدل ما واحد منهم سواء امها او ابوها ينصحوها ويعلموها إزاي تعامل جوزها

وكمان إزاي تخليه يحترمها ويحبها

ولو هي فعلا عايزة تعيش معاك كانت عملت المستحيل علشان متهدمش بيتها

وبصراحة بقى انت طيب اوي ودا إللي مخليها متفرعنة كده

اقولك ايه بس

أتأقلم انت على تصرفاتها وحاول تفهمها وتتلاشي اي حاجة هي مش بتحبها

مع إن الكلام ده المفروض يكون ليها بس نعمل ايه بقى

دماغها مقفوله

eng_semsem يقول...

وداد
اختي الغاليه وهو ده اللي كنت عايز اوصله في البوست بالظبط انا كنت مبسوط انها خرجت عشان ابوها وامها يفهموها ان اللي بتعمله غلط لاقيت مفيش منهم رجا ولا هيحلوا ولا ينصحوا اما لو بطلت اعمل اللي هي مش بتحبه ده هيحصل لما اموت لان مجرد وجودي واضح ان هي بتكرهه
شكرا على متابعتي

Tears يقول...

هى عقلها صغير و بوش معاك و غيره معاهم و انت صبور بس

المشكلة ان انتو الاتنين ماعندكمش حاجات تشغلكم و قاعدين لبعض على الواحدة

eng_semsem يقول...

tears
كل اللي حصل زمان انا مكنتش بقف عليه ولا بحكيه لحد ولا بتخانق عشانه انا بحكيه ليكم بس انما كنت بعدي وافوت واطنش بس دايما كان يحصل الحوار بسبب اول مره لما حكيت واتصلت بامها وهي كلمت ابويا وتاني مره لما حكت للست جارتهم وتالت مره لما اتصلت بخالها وخرجت يعني انا هعملها ايه اربط لسانها هي اللي بتخرج المواضيع بره يعني انا ماطلبتش تدخل من اي حد
تقبلي تحياتي

Noha Saleh يقول...

دايما السنة الاولى بتبقى صعبة اوى
ان شاء الله ربنا يهديكم
الاختلاف والمشاكل ضرورى جدا علشان اختلاف طباعكم

eng_semsem يقول...

noha saleh
في فرق كبير مابين اختلاف الطباع وسلوك الضباع اختلاف الطباع امر لازم يحصل ووكل واحد او واحده بيخاف على بيته هيحاول يتاقلم ويتعامل ويفهم ويتفاهم وعمر ما كانت خروج المشاكل بره البيت يحلها بالعكس بيعقدها اكتر
شكرا على متابعتي

هبة فاروق يقول...

اسامة
دى اول زيارة لى بالمدونة وبجد انا قريت
البوست دة بس وطبعا لازم اكون فكرة عن بقية البوستات علشان اعرف سر المشكلة
لكن اتمنى ان تهدى الامور ونصيحة استشير قلبك وعقلك
تحياتى لك ومتبعاك ان شاء الله

eng_semsem يقول...

هبه فاروق
للاسف عشان توصلي معانا الكلام القديم هيفرق كتير لو عرفتيه عشان تبقي معانا في المشكله وحلها عشان انا في الوقت ده من القصه طار العقل ومات القلب
شكرا على متابعتي

dr haitham يقول...

واللة يااسامة انت ربنا بيحبك عشان انت راجل طيب وربنا هيعوضك خير انشاء اللة دى اصلا متستاهلش انك تحكى عنها اللة يكون فعونك كل متفتكر الموضوع وتكتب في المدونة طبعا اعصابك بتتحرق ياقلبها يا اخى ربنا يسهلك ياعم بس الى مساعدها اهلها ودى مش تستاهل الضرب دى تستاهل الشنق

eng_semsem يقول...

dr haitham
انا هزعل اكتر لو شفت بيت اتخرب بالطريقه نفسها لاني بكتب عشان انا وغيري نتعلم ازاي نحافظ على بيوتنا واسرارها اما حكاية الضرب والشنق ده مش هيفديني بحاجه خالص
شكرا على متابعتي

الغاردينيا يقول...

حسنا حسنا :)

نحن هنااااا :)

اللى يريد يحافظ على بيته مابيعمل كل هذا هذا كل ما اقدر اقوله هنا
واللى يحب بجد بيعمل المستحيل عشان يبنى عشه ^_^ وخصوص ان في طفل جاي بطريق

بس الظاهر هداها الله مدلله كثير وطفولية جدا :)

تحية

أبو العريف يقول...

انت بتنرفزني يا عم اسامه
اصلا مش عارف اقولك ايه
يعني انا قريت التعليقات كلها

وقريت ردودك عنها

كل الناس بتقول انك طيب لدرجه تنرفز

صبور لدرجه تغيظ

انا كده ممكن اضربك وانا مطمن انك طيب

مش هتعمل حاجه

هع هع ه هع هع هاااااااااعع

خاف بقي ياريس

افروديت يقول...

يا اسااااااااااااااااااااامه

ريح نفسك مفيش تكافؤ .. مش هتنفع

وع العموم ربنايهدي

بس أنابطبيعتي مش بحب الأراء العايمه ياأه يا لأ

" كرامة الأنسان أهم حاجة يابشمهندس "

وياريت مش تقولي بين الأزواج مفيش الكلام ده

في وربنا ...

eng_semsem يقول...

الغاردينيا
تمام بس انت حطيتي شرط اللي بيحب وده شئ مش ملكي عشان اقول هي بتحبني ولا لا بس الواضح انه لا عشان كده كان القرار سهل بالنسبه ليها
شكرا على متابعتي

eng_semsem يقول...

ابو العريف
هو غلط اني ابقى طيب وصبور وان كانت هي ده طبيعتي اتعلم الترفزه وقلة الادب عشان اعيش مع مراتي ولو كان ده طبعي صحيح المفروض انها تفرح ولا تنكد عليا
شكرا على مرورك ومستنين تواجدك معنا

eng_semsem يقول...

افروديت
في البيت ما بين الازواج ممكن تخف مسالة الكرامه شويه بس لو الموضوع خرج بره البيت خلاص معدش ينفع اني اقدم ولو تنازل بسيط بس عاجبني كلامك بثقه مش تستني تشوفي اللي هيحصل انت تعرفيها ولا ايه
يسعدني تواجدك معي ومنوراني وربنا

حرّة من البلاد..! يقول...

أنا متابعة وانتظر الجديد بكل شوق
لك كل الاحترام تحياتي

dodoeltaiba يقول...

هاى اسامه ازيك انا متبعاك بس منتظره النهايه
ويارب تكون بخير
ليك تحياتى

eng_semsem يقول...

حره من البلاد
سياتي المزيد والمزيد
شكرا على متابعتي

eng_semsem يقول...

dodo
النهايه لازم يبقى فيها خير لان الخير هو اللي بيفضل للنهايه والشر بيموت في وسط الحكايه
شكرا على متابعتي

Amwaj يقول...

للحين متابعة قصتك
وما أقول إلا الله يزيدك صبر

فعلا إنت طيب ومستحملها على الرغم من اسلوبها والنكد اللي سببته لك

الله يعينك ياخوي

eng_semsem يقول...

amwaj
الله يعين كل واحد على مشاكله ويديه صبر يكفيه ان يمر منها بسلام
شكرا على متابعتي