الاثنين، 13 ديسمبر 2010

حكايتي مع الايام (10)

 مر شهر رمضان الكريم صحيح فطرت فيه 3ايام لوحدي واتسحرت نصه مع نفسي حتى ايام كنت اكسل واشرب ميه واصلي الفجر وخلاص او ممكن يكون باقي حبة تمر من الفطار اتسحر بيهم وفي الاخير رمضان عدى وكمان اول يوم العيد راح ما عملتش حاجه من اللي نفسي فيها لا وكمان اتسدت نفسي فيه وعادي ورجعنا نمنا وقمنا تاني يوم فطرنا وشربنا الشاي وقلت ليها انا داخل البس عشان انزل واروح اقعد شويه مع الجماعه هتيجي معايا ردت وقالت لا مش هينفع سالت ليه قالت اصل زمان بابا وماما جايين عندنا قلت ليها طلعوا يعني من كفرالشيخ قالت خلاص زمانهم داخلين دول طلعوا من زمان حسيت بحاجه غريبه طيب ليه ماقلتش ما هي اكيد عارفه من بليل ان هما هيجوا او حتى الصبح لما طلعوا ايه يعني عايزه تفاجئني بيهم قلتلها طيب خلاص اقعدي معاهم براحتك وانا رايح هناك ولبست ونزلت وانا اصلا مش عايز اقابل الراجل ده من ساعة الحركه اللي عملها معايا رحت عندنا البيت كان عمي صايم انتظرناه واجلنا الغدا لحد المغرب واكلنا معاه وبعدين ابويا قلي روح بقى اقعد معاها ولو هما لسه موجودين سلم واقعد عادي ولو ما اتكلموش استاذن وادخل غرفتك  ورجعت البيت لاقيت مفيش نفس دخلت اغير لاقيتها نايمه ناديت عليها مريهان انت نايمه قالت لا كويس ان انت لسه فاكر اسمي رديت انا اقدر انسى قالت ليا انت بعت لماما رساله قلتلها اه قالت ليا احسن عشان هي مش عايزه تسمع صوتك قلتلها كويس يعني اخيرا عملت حاجه ريحتكم غيرت وقلت ليها هتنامي  ردت لا انا نايمه طول النهار هما ماقعدوش كتير طيب يلا نتفرج على التلفزيون فضلت قاعد وهي قاعده على اللاب رحت في النوم وانا قاعد وقمت لاقيتها هي كمان نايمه صحتها وقلت ليها نخش جوه ودخلنا نمنا .
قمت تاني يوم الصبح لاقيتها مش جنبي وكانت في الصالون صباح الخير صباح النور انت لسه قاعده على اللاب من امبارح ومشغله التلفزيون كمان طيب مش هنقعد مع بعض شويه هنزل البرنامج ده بس طيب اتفرج انا على التلفزيون لحد ماتخلصي عدى نص ساعه ومفيش طيب مش هنفطر طيب هحضر الفطار قامت حضرت الفطار وجابته انت مش هتفطري لا مليش نفس اكلت يااااه البيض ملحه زياده ردت عليا ازاي وجت داقته ماهو كويس اهو دقته انا تاني اه كده اتظبت لما حطيتي ايدك بقى كويس خلصت فطار لسه هي قاعده استنيت شويه طيب مش هنشرب كوبية شاي حلوه قامت عملت الشاي وقعدت تاني اخدت الكوبيه وطلعت على البلكونه وشربت سيجاره وقعدت شويه وانا بفكر ايه حتى يوم اجازتي مش هعرف اقعد مع مراتي يعني خرجت مش نافع قعدت مش نافع نخرج سوا مش نافع اعمل ايه دخلت تاني قعدت شويه لسه اه لسه شويه جبت ام كلثوم وتغني ولا حياة لمن تنادي وشويه وقامت انا هاخد دش وماله كان اذن الظهر نزلت اصلي وقلت ليها عايزه حاجه من تحت لا ونزلت صليت واتمشيت شويه ورجعت على البيت لاقيتها قاعده في مكانها دخلت ايه لسه قالت لا خلاص اهو انا هقوم احضر الغدا قلت ليها لا انا بقول عشان انا عايز اقعد معاكي شويه ردت عليا اصل انا جعت عشان انا مافطرتش هقوم احضر الغدا وقامت وانا باكل في نفسي بمنتهى الصراحه وجهز الاكل وجابته ومن باب فتح الكلام حطت المعلقتين جنب الطبق قلت ليها مش تناولين المعلقه بدل ما تحطيها وكانت تلك القشه التى قسمت ظهر البعير ما انا حطيتها قدامك اهو خلاص يا ستي انا خلاص اخدتها مش عايز حاجه تسكت لا طبعا كملت وبعدين انا ماشفتش مامتك بتدي لبابك المعلقه رديت وانا بمسك في نفسي ياستي دول متجوزين بقالهم 30سنه يعني خلاص راحت عليهم وبعدين اخر مره اكلوا معانا ماما ادته حتة لحمه من منابها قالت عادي احنا كلنا كده لما بنشبع بنوزع اللحمه بس هو الجواز عندك كده تعالى كل يا حبيبي واناولك المعلقه  واكلك كمان رميت المعلقه يا ستي خلاص مش عايز اكل اساسا وقمت كان العصر اذن صليت العصر ورجعت نايم على الكنبه وبتفرج على التلفزيون قالت ليا 3مرات تعالى كل وانا قلت ليها لا مش عايز قعدت تاكل قلت ليها قومي كلي في اي حته في السفره في المطبخ في اي غرفه في اتنين  جوه قالت هو انت هتاكلني في المكان اللي على مزاجك قلتلها لا اختاري المكان اللي انت عايزاه بس بعيد عني دلوقتي لا مش قايمه قمت شيلت طبقين وحطيتهم على الباب وقلت قومي مش طالبه خناق وقرف قامت وبرده ماسكتتش هو انا خدامه عندك هو انت هتاكلني على مزاجك قمت مسكتها لفيت وشها مسكتها من رقبتها وثبتت وشها في وشي وقلت ليها اهدي شويه خلينا نعيش راحت قايله حاسب الاطباق هتقع رحت زاقق الطبق وقلت ليها يعني الطبق اهم من حياتنا راحت قاعده على الارض وعيطت استنيت شويه وقمت شلتها وحططتها على الكنبه اهدي شويه ما ينفعش كده اكلمك كلمه تردي عليا بمسلسل كامل لحد الحلقه الاخيره انا خلاص مش مستحمل كده هي مامتك بترد على بابك كده وردها الطبيعي ملكش دعوه بامي وابويا انت مالك ومالهم وطلعت يا بنتي ارحمي اللي في بطنك من النكد ده شويه ما ينفعش كده ردت انت اللي ترحمه ما انت مبهدله اهو وقعدت تعيط سكت لاني بجد تعبت وهي فضلت شويه لاقيتها نامت شيلتها دخلتها غرفة النوم  وعلى العشا دخلت اشوفها لاقيتها قلقانه يا بنتي عايزين نتكلم مع بعض شويه فضلت على نفس النغمه وانا مش عايزه اتكلم معاك شويه وجرس الباب رن قلت ليها انت عارفه مين اللي بره قالت لا وانا هعرف منين طلعت لاقيته خالها قلي هي فين مش عايز كلام يلا لمي حاجتك طيب اسمعني انا لا ضربتها ولا شتمتها اسمع الكلام قالت هي ما انت جبت سيرة بابا وماما ولبست واخدت دهبها واللاب ومشيت مع خالها وحسيت اني انتهت فترة عقوبتي من 20/7/2008الى 5/10/2008......
ملحوظه:
اول خناقه كانت بعد ما اهلها كانوا عندنا وكان في واحده في النص اول ما رجعت من كفرالشيخ لما راحت لوحدها والتالته ده لما اهلها كانوا عندها قبلها بيوم

هناك 43 تعليقًا:

ツSmiLeY AnGeLツ يقول...

السلام عليكم
عايزه انا اعرف
هو كل مايحصل خناقة تدخل اهلها جري تتصل بيهم
كيف لو ضربتها
كانت اتصلت بالشرطة
تقبل مروري
سلامي ليك اخي.

سواح في ملك اللــــــــــــــــــه- يقول...

لو مكانك اسيبها سنه مكلمهاش
ولو طلبت الطلاق اطلقها
اصبح ماينفعش غير كدة
ياتحسم امرك وتعيش زي مانت عايز
يااما مع السلامة
لانك لو اتنازلت تاني هتفضل تعبان طول
عمرك

Tears يقول...

معلش انا مشكلتى فى الحياة انى مش بعرف اجامل و لا انا ست منكسرة عشان تعليمى الاجنبي و عائلتى و تدريسي فى الكلية و حبيبي خلونى كده

فحقول رايي اكيد مش ح يعجبك بس مادمت طرحت الموضوع للنقاش فربنا يتسع صدرك

مبدئيا انت بتحاول تلطف احيانا معاها و بتهزر بس لو واحدة مش ح تاخد كلامك بتاع المعلقة ده بهزار يبقى ح تعتبره دلع مستفز و ح تتعصب من الاسلوب

حياتكم كلها بتدور حوالين الاكل و زيارات الاهل و مافيش اهتمامات مشتركة و لا حوار و ده احد اهم اركان الزواج التى تضمن استمراريته و التى غابت من البداية طبقا لتدويناتك

طبعا كونك حكيت بامانة و عرضت الواقع حتى لو ضدك فده شىء تشكر عليه و اخلاق منك

"قومي كلي في اي حته في السفره في المطبخ في اي غرفه في اتنين جوه"

ازاى اصلا زوج يقول لمراته كده او هى تقوله كده...مش متخيلة ان ممكن نكون مش بنحترم مشاعر بعض كده

الصراحة انا لو اتقالى كده رد فعلى ح يبقى بايخ اوى لان لو مش عاجبه يغير هو مكانه او يقعد فى حته تانية خاصة ان الذوق و الاتيكيت بيقول ان هى الست و كمان حامل و بيقول ان البيت بتاعها هى كمان و تاكل مكان ما تحب

اما فكرة انك مسكتها و لفيتها و العنف ده فاكيد ده شىء مش مقبول اطلاقا اننا نستخدم ايدينا و كفيل بانهاء اى علاقة

مش صعبان عليه غير الطفل لان فى النهاية الرجل و المرأة مسئوليتهم متساوية و عليهم تحمل العواقب


تحياتى

غير معرف يقول...

كويس انها جات منعندهم وعندها الخسارة القريبة احسن من المكسب البعيد واضح انها مش بتحبك ولا عاوزة تعيش اصلا ومش هممها حاجة

وداد يقول...

ايوة كده

اخيرا ادتها الواجب التمام

عجبني اوي عتابك ليها

ومسكتك لرقبتها

والله متخيلة المنظر

بجد تستاهل

بس اسحملي انت اتهاونت اوي في حقك

يعني لما جه خالها وقال الكلمتين دول

والله العظيم كان احسن حل له انك تقوله له

انت عايز ايه ؟

هيرد طبعا عايز ميرهان

قول له يلا بره ، ولو مريهان طلعت بره البيت هتكون طالق

والله كان رد هيكمل الموقف الجميل إللي عملته معاها

خليك قوي معاهم

ولا يهمك حد

اسماء عبدالعزيز يقول...

احلى حاجه انها اخدت الدهب والابتوب
الله .. دي حياتها الزوجيه غالية اوى
لدرجة انها ماتساويس حتى الاب والدهب
عيشة تقصر العمر ..
بصراحة ..ان كان كل دا بجد زى مابتحكى وهي كما صورت .. اعتقد ان الحياة بينكم ..........................

كل اللي اقدر اقولة
ربي يعطيك ماتتمنى ويقدر لك الخير حيث كان ثم يرضيك به

ويصلح بينكم على خير .. ان كان خيرا لكما

دمت بخير حال

غير معرف يقول...

حلوة موقع ويب ، لم أكن قد تأتي عبر بلوق الخاص بك من قبل في عمليات البحث بلدي! حمل على عمل رائع!

eng_semsem يقول...

خواطري مع الحياه
كويس انها مشيت قبل ماتبلغ عني الشرطه
وشكرا على متابعتي

eng_semsem يقول...

سواح في ملك الله
انا بعد ماهي مشيت قعدت افكر وهكتب كل تفكيري في البوست اللي جاي عشان هفكر بصوت عالي معاكم وتقريبا كلامك انا عملته

eng_semsem يقول...

tears
انا مش مستني مجامله ونوع تعليم ستي كانت بتفك الخط بالعافيه بس ربت تسعه البنات فيهم اتخرجوا من كلية سياسه واقتصاد والتانيه كلية تربيه البيت اساس التربيه مش التعليم اما رايك انا احب اسمعه حتى لو مش هيعجبني لانه رايك ولازم احترمه وبالنسبه لحياتنا اللي بتدور حوالين الاكل لان هو ده الوقت الوحيد اللي بيجمعنا وزي ما انت شوفتي انا من اول النهار وانا بقول عايز اقعد معاكي وهي بتعمل ايه وزي ما انت قلتي من البدايه ومفيش حوار ومش عارف اتكلم معاها بس ده مش ذنبي وعلى فكره انا مش بنقي انا بحكي اللي حصل كما حصل عشان انت تعرفي تحكمي وانت شايفه ان قلة ذوق اقول كده بينما هي تاكل قدام زوجها اللي قومته من الاكل مش قلة ذوق وبالنسبه لو اتقال ليكي كده هو انت هتسمحي لنفسك انك تعملي زيها وتردي ردها شايفه ان ده وارد وممكن انت تعمليه مع زوجك وانا معاكي تماما ان العنف عمره ما هيحل مشكله وانا مكنتش اتصور في يوم من الايام اني اقدر اتعامل مع انثى بالطريقه ده ولا احب انه يتكرر ام عن المسئوليه ياريت ده يبقى درس لكل واحده انها تفكر في ابنها وبنتها قبل حياتها
وشكرا ليكي على متابعتي وانت منوراني دايما

eng_semsem يقول...

غير معرف
انا قلت كده برده ايه الست اللي بايعه بارخص الاسعار ليه حياتها وبيتها ملهمش تمن عندها
شكرا على متابعتي

eng_semsem يقول...

وداد
اختي العزيزه حتى لو اللي عملته كان صح وقتها انا ما اتمناش اني اعمله تاني انا كنت بحلم بس للاسف صحيت على دنيا تانيه مفيهاش حاجه من احلامي كان نفسي تفهمني وتقدر ولما يبقى في مشكله تتكلم عشان نحلها مش كل حياتنا عباره عن مشكله ملهاش حل اما بالنسبه لموقف خالها سيبي حاجه بقى للبوست اللي جاي هتكلم مع نفسي بصوت عالي عشان الكل يسمعني ويعرف كان في ايه جوايا
شكرا على متابعتي

eng_semsem يقول...

اسماء عبدالعزيز
اختي الغاليه كل واحد فينا بيفكر في الغالي عنده وهي اختارت اللي شايفاه اقيم ليها وده اختيارها
ودعوتك الجميله ربنا يجعل لكل مسلم ومسلمه نصيب فيها
وشكرا على متابعتي

Amwaj يقول...

لا حول ولا قوة إلا بالله
صارلي أكثر من نص ساعة أتصفح مدونتك
وقريت كل الأجزاء

بصراحة مادري شقولك
أمرها غريب !!
وإنت ما قصرت معاها بشي

يمكن أبوها ما كان زين مع أمها وهذا الشي انعكس عليها بشكل سلبي
أو يمكن مغصوبة على الزواج منك

لازم تصارحها وإذا ما رضت تتكلم معاك قولها إنك راح تنفصل عنها وينهدم بيتها

يمكن تخاف وتحاسب نفسها
وإذا ما نفع فآنا أتوقع الحل الوحيد أهوا الطلاق

الله يهديها ويريح بالك من هالمشاكل والنكد

تقبل مني أرق التحايا وخالص الدعوات بالخير والسعادة :)

eng_semsem يقول...

amwaj
غرقتك في بحر احزاني وتوهتك بين صفحات كلها مضت وعدت بس جرحها زي ماتعبك انا عشت اعاني منه كتير عارفه انا سالتها نفس السؤال هو ابوكي غصبك على الجواز مني بس كان ردها لا انا مفيش حد في الدنيا يقدر يغصب عليا اما عن حتة هطلقك وتهديدها اكيد بالنسبه ليها عادي والا ماكنتش فكرت تخرج من بيتها
شكرا على متابعتي

غير معرف يقول...

يعني زعلتوا علشان مش ناولتك المعلقه؟؟

وهي اتصلت باهلها علشان نفس المعلقه برضو :)

أعذرني انا مش بتريق بس بحس أن في تلاكيك وانفجارات في مواقف ماتستاهلش

أكيد في اسباب اقوى في النفوس

عموما ربنا يوفقكم يا رب

تحياتي

eng_semsem يقول...

فتاه من الصعيد
انا كمان كان نفسي اعرف ايه السبب لكل ده ليه يكون الرد على كلمه زي ده كل الكلام ده لا افضل اتحايل على مراتي طول يوم اجازتي عشان اقعد واتكلم معاها
مش عارف
شكرا على متابعتي

زينب علي حبيب يقول...

مممممم

تعودت أنو مش أحكم على أي علاقة أو مشكلة من طرف واحد

يمكن عشان كل شخص يشوف من وجهة نظرو ...


الموضوع مؤلم بس. ..

رب العالمين عزوجل إن شاء الله يعوضك أخي ... و أهم شي إن شاء الله ينشئ الطفل منشئ صالح :)

Noha Saleh يقول...

انا مش هعلق على الاحداث
بس مش عاوزة الموضوع يوصل للنهاية اللى انا متوقعاها
حاول تتفاهم معاها شوية اكتر
ممكن يكون فوق طاقتك
بس خلاص اصبح بينكم طفل حاولوا تعيشوه فى جو مستقر

Carmen يقول...

والله يا استاذ اسامة انا مش عاجبني تصرفكم انتو الاتنين
هي اسلوبها مستفز جدا وانت اصبحت زيها كمان هي حامل والست في الوقت ده بتكون اعصابها متوترة وفاقدة الثقة في نفسها وحاسة ان زوجها خلاص مابقاش بيحب يبصلها مش يمكن هي حاسة بكل ده وحاسة ان في حد تاني خصوصا انك بتقضي وقت كبير جدا علي حد قولك خارج البيت وكل ده نوع من لفت النظر؟
ثانيا الست لها اساليب كتير جدا عشان تدخلها بها بدل انك تنكشي بحركة هزار اكيد مش هتقبلها وانتو شايلين من بعض حاول تقربلها تطمنها تحسسها انك مهتمة بها زي اول جوازكو
هي لو حست معاك بالامان هتحبك حتي لو ماكانتش حبتك لا قبل الجواز ولا في بدايته
ثالثا انت غلطان انك سبتها تخرج من بيتها انا ابويا وهو بيوصيني علي حقوق زوجي قالي مشاكلك ماتخرجش من باب اوضة نومك ومهما حصل بينكو ماتسبيش بيتك
احنا مشكلتنا بجد بعدنا عن ربنا سبحانه وتعالي , في رأيي اي حد عاوز يعيش مرتاح في زواجه يتبع سنة الرسول صلي الله عليه وسلم مع زوجاته , موقف السيدة خديجة لحظة نزول الوحي ضرب اروع مثل في الزوجة الحنونة المتفهمة
وموقف الرسول صلي الله عليه وسلم حينما اتاه جبريل عليه السلام واخبره ان زوجاته هيسألوه في امسية ايهن احب الي قلبه , فأعطي كل واحدة منهن دينارين وعندما سألوه قال احب من اعطيتها دينارين بالامس
طبعا موقف مش محتاج وصف اد ايه بيخافو علي مشاعر بعض ويحترمو بعض
ربنا يهديكو لبعض
تحياتي

dodoeltaiba يقول...

اسامه ازيك يارب تكون بخير انا متبعاك للنهايه وعايزه اقولك هى اللى خسرانه مش انت
تحياتى ليك

شهر زاد يقول...

القصة دي تحمل شاهدا موجودابقوة في الحياة الزوجية المعاصرة
وقد تتبعتها من بدايتها كمسلسل تلفزيوني
انا لن انصر طرف على طرف لانهما معا مخطئين فهي لا تريد ان تخرج من وضعها الاسري القديم كابنة دلوعة لوالديها
والبطل لم يستوعب بعد مسؤولية الحياة الزوجية وما تتطلب من الاحتساء من قدح الصبر
تحياتي

غير معرف يقول...

هى غلطانه وانت كمان غلطان

eng_semsem يقول...

قطرة وفا
يلرب يعوضنا عوض الصابرين وعلى فكره انا مش محتاج اقول حاجه ماحصلتش لانك اصلا ما تعرفنيش يعني مش محتاج احسن صورتي قدامك وكلامي مش هيفرق ليكي
قصدي اني لو حكيت حاجه غلط انت هتحكمي على حاجه محصلتش يبقى انا ما وصلتش لحاجه
وشكرا على متابعتك

eng_semsem يقول...

nohasaleh
لحد دلوقتي في القصه لسه الطفل لم ياتي وبرده انا بتحايل عليها عشان تقعد ونتكلم سوا وكانت النتيجه انها سابت البيت طيب هفهمها ازاي او نتفاهم وهي في بيت ابوها تابعيني ستجدي اجاباتك

eng_semsem يقول...

karmen
اقري البوست تاني هتلاقيني من ساعة ما صحيت وانا بحاول اتكلم معاها وهي اللي مش عايزه مش زي ما انت قلتي انها حاسه اني مش عايز ابص ليها وبعدين انت سمعتي هو ده حالنا من اول جوازنا وانا مش غلطان اني سبتها تخرج بدليل كلامك ان ابوكي هو اللي قلك مش جوزك ونصحك ان مشاكلك ما تخرجش فما بالك اني كنت بمشي في الشارع حاسس ان كل الناس عارفه من حكايتها لامها واختها وجارتهم يعني هي اللي حكت واتصلت بخالها مش انا اما كون سبتها تخرج ليه ده اللي انا هقوله البوست اللي جاي وان كان انت ضربت مثل بالرسول وازواجه انا مره قلت ليها حديث عن الرسول فضلت تسال عليه ابوها وابويا وشيخ وهي تقتنع لا طبعا وكلمتها بالقران مره سالت اخوها وهو في اولى اعدادي واقتنعت بكلامه يبقى اعمل ايه
وشكرا على متابعتي

eng_semsem يقول...

dodoeltiba
انا بخير طول ما انت موجوده معايا في المدونه انت منوراني على طول وصدقيني انا ما يهمنيش مين خسر قد ما يهمني ان مفيش حد يخسر تاني
وشكرا لوجودك معايا

eng_semsem يقول...

شهرزاد
اختي العزيزه المشكله ان القدح من الصبر مش هيكفي هي كانت محتاجه برميل صبر وللاسف انا انسان طاقتي في الاحتمال محدوده وبصراحه انا صبرت لحد ما الصبر زهق مني ومل وحطي نفسك مكاني تخيلي انك صحيتي من النوم وتتحايلي على جوزك انه يقعد معاكي شويه وهو معاكي في البيت وسيبك عشان ينزل برنامج على الكمبيوتر وعلى فكره كان برنامج حيلهم بينهم تخيلي اهميتك في حياته لما ما يعبركيش زي ما هي عملت
وشكرا على متابعتي ومازال هناك بقيه

eng_semsem يقول...

الحب الجميل
انت زي ماتكوني شتمتي وجريتي يحسن امسكك انت وهي غلطانين وخلاص احب اسمع رايك عشان انا اتعلم وغيري يتعلم
شكرا على متابعتي

جايدا العزيزي يقول...

اسامه اخى

اولا انا مع تريز فى كل كلمه قالتها

ثانيا لازم يكون فيه خصوصيه بين كل زوجين

لازم هى تفهم ده وتقدرة

الهل ليس لهم عندها غير صله الرحم والمعامله الطيبه

لازم تفهموا بعض ويكون فيه حوار

واهتمامات مشتركه

ارجو التفكير بتانى

ولك تحياتى

eng_semsem يقول...

جايدا العزيزي
ازاي هيحصل حوار وانا من اول الحوار وانا بقول مش راضيه تقعد ونتكلن وفي البوست ده من ساعة ماصحيت من النوم وانا حاولت اكتر من مره عايزين نقعد مع بعض وهي مش عايزه وهيحصل ازاي اهتمامات مشتركه وانا عايز اتكلم معاها وهي بتنزل برنامج حيلهم بينهم وبعدين وقت المحاوله خلص وهي راحت بيت اهلها
شكرا على متابعتي

r يقول...

السلام عليكم
شوف لازم يكزن فى صبر شويه الحياه ما تتاخد كدا
بجانب انت بتقول وجهه نظرك ومن الحق معرفه وجهه النظر التانيه
انا اشارك تيرز فى تعليقها
بس احب أأكد عليك انت وهى شخصين لكل منكم فكره وطبعه ومش معنى جواز يبقى الفكر واحد والطبع واحد الحاجات دى كانت من الاول فى الاختيار

اتمنى ان يهدى الله النفوس بوجود اطراف
تحب الخير فعلا لطرفين لان هدم البيوت معناه انتهاء مشروع يباركه الله
كل التحيه وان شاء اله نقرا المره الجايه الخير
ومايكون عنوان المدونه دليل على محتواها
تفاءلوا بالخير تجدوه

عباس ابن فرناس يقول...

والله يا اسامة انا مندهش من تصرفاتكم انتو الاتنين وبصراحة تصرفات زوجتك تدعو للدهشة اكتر

وخصوصاً ان فى موقف انتا حكيته انها اترجتك
لو والدها طلب منك ان انتا تسيبها تروح معاه انك ترفض
الموقف بيظهر منه انها متمسكة بيك وتصرفاتها بتقول غير كدا خالص
على الاقل انتا عندك بعض المرونة لكن هى صلبه وعنيدا جداً
وراى ان المفروض اوالسائد هو ان الزوجة اكتر مرونة فى تعاملها مع الزوج
عموما وبرغم كل ماقلت لحد الان
انا شايف ان دى كلها مشاكل ليست قوية
وما تستهلش انكم تهدو بيت علشانها
الله ما الا اذا كان هناك شى فى النفوس
تحياتى

Dr/ walaa salah يقول...

بصراحه انا عايزه اقول حاجه بس متزعلش لان مهما كان دي مراتك وام بنتك او ابنك

مراتك نكديه

ومتزعلش صدقني في ستات بتموت في النكد زي عينيها

وواضح ان مراتك كده


بس معلشي في حاجه انت قلتها ومعلقتش عليها خالص

لما مراتك قالتلك ان مامتها مش عايزه تسمع صوتك


معلشي يعني يا اسامه انا اتنرفزت وانا قاعده من الكلمه

وانت مفيش اي رد فعل نهائي

وبعدين حكاية ان كل مشكله تروح تحكي لاهلها دي كارثه لوحدها


المفروض مشاكلكم بينكم وبس لا اهلك ولا اهلها


معلشي جمد قلبك وسيبها شويه طالما انها سابت بيتها ومشيت مع خالها خليها عنده


صدقني لو تراجعت انت اللي هتخسر

معلشي اصل في اهل بيخربوا بيوت ولادهم

سيبها شويه تكبر وتتعلم يعني ايه زوج وبيت


ربنا يهديها يا اسامه ليك

رحاب صالح يقول...

اسامة ازيك..؟ اخبارك اية..؟
يارب تكون بخير اصل انا من فترة النت فصل بسبب موجة الشتا ولسة يا دوب راجع امبارح
انا قريت البوست اللي فاتني وده كمان وحبيت اعلق عليهم مرة واحدة ...
في الاول بالنسبة للصيام ورمضان والعيد اللي بيحليهم الناس اللي معانا وعبادتنا وتشجيعهم لينا للعبادات دي وتقبلك انت لان تفعل هذا....وده محصلش معاك
وبالنسبة للخناقات الزوجية فهي اكيد كتيرة وفي احصائية بتقول ان الثلاث سنوات الاولي من الزواج مشكلاتهم اكثر من باقي السنوات التالية لهذا لو حاولت بجهد تمرر هذه السنوات بكل مشكلاتها فقد انقذت زواجك وهذا بفضل تحملك ...وحتي مع الحب القوي , اسامة انت لية متحاولش اكتر من مرة انك تتكلم معاها تفهمها وتفهمها تقولها ان الجواز ومشاكله مش حاجة سهله وبلاش تدخلوا اهاليكم في مشكلاتكم لاء حاولوا تحلوا مشكلاتكم مع بعض ....هي علي ما يبدوا مرفهه جدا ومنساقة وراء كلام اهلها ...واسفة للفظ هي لا تفهم في لغة الحوار ابدا ...
ربنا معاك وحاول بقدر الامكان ان تستقر حياتك

eng_semsem يقول...

بسنت
اختى العزيزه متهيالي ده اول زياره ليكي مدونتي وانت نورتيني وده الجزء العاشر في سلسله كلها من نوعيه تخنق مش ده اول مواقف ولو عرفتي تقري القديم هتعرفي اني حاولت اكتر من مره اصنع مجال لفتح لغه للكلام والحوار لكن كل مره كانت بتقفلها هي
وشكرا على متابعتي

eng_semsem يقول...

ابن فرناس
كلها تصرفات غريبه ومش لاقي مبرر ومهما سالت مش بوصل لاجابه ومهما حاولت افتح كلام كلها طرق مسدوده وزي ما انت قلت انا كمان مكنتش شايف مشكله اللي تخليها تعمل كده وتتصل بخالها وتسيب البيت عشان كده سبتها وهتفهمني اكتر البوست اللي جاي
شكرا على متابعتي

eng_semsem يقول...

dr/ walaa
كلامك على دماغي من فوق بس انا ممكن كنت شايف الوضع بشكل مختلف انا شايف ان مراتي بتستفزني وعايزه توقعني في الغلط عايزاني ارد مثلا بشتيمه لامها او اني امد ايدي عليها عشان كده انا كنت بحارب نفسي ولما انتصر اعرف ارد عليها اما كون حكايتها اللي من غير داعي لاختها واهلها وحوار خالها ده بالذات انتظري ردي البوست اللي جاي هتلاقيني سمعت كلامك من سنتين
شكرا على متابعتي وما تتاخريش تاني

eng_semsem يقول...

re7ab saleh
حمدالله على السلامه ان سمعت عن حوار سوء الاحوال الجويه في مصر وانه مبهدل الدنيا ربنا يسترها علينا وعليكم وللنقطه التانيه خلينا اقولها بطريقتي انا متربي في بيت ليه اسلوبه وتقاليده وعاداته وهي نفس النظام واكيد في اختلاف ما بين البيتين لازم كل واحد يحاول يقرب من التاني في عاداته وانا زي ما حكيت ليكم عادتي في العيد قبل الموضوع نفسه انا حكيته لمراتي قبل العيد وهي برده عملت كل شئ ضد اللي انا عايزه بالظبط
في فرق بين وجهات النظر وان يبقى مفيش اصلا وجهة نظر غير عكس كده وخلاص لان ز ما ذكرت في كذا بوست في حاجات ممكن نلاقي ليها مبرر وحاجات لا ملهاش شكرا على متابعتي واتغطي وتقلي في اللبس

افروديت يقول...

أستفزااااااااااز بجد

علي فكره ياأسامه ومش تزعل

دي مش عايزه تعيش خالص

ومش عيزاك

لأنهاشايفه نفسهاعليك اوووووووووي

ومش بتحبك
حكاياتك دي عقدتني من الجواز اكترمنامتعقده
خلص الكلام

eng_semsem يقول...

افروديت
انا قلت كده برضه انها مش عايزه تعيش وبعدين ماتتعقديش الدنيا فيها وفيها
فيها اللي ممكن يعمل اي حاجه عشان يبني بيت ويسعد حبيبه وفي اللي مستعد يبيع بارخص الاسعار

الغاردينيا يقول...

انا هنا بحس بشجار 2 حبايب هههههه
كتاكيت يعني وكان بيكون جميل جداااا
لو مدخلش الاهل فيه
المشاكل ملح الحياه و ان تتصرفت بشكل طفولي لماطلبت منها تروح مكان 2 تاكل وهي كمان بتتصرف بطفوله كان ممكن طفوله دي تنضج مع الوقت لوحدها بس بلا تاثير من العائله :)

تحية

eng_semsem يقول...

الغاردينيا
نورتيني بوجودك برغم انك بتتاخري عليا
مفيش بيت جديد من غير مشاكل واختلاف الطباع والاراء موجوده بس لما يبقى انا الطرف الوحيد اللي لازم اتنازل كل مره شئ مش سهل ومتعب جدا وهي كبرت المواضيع مابقاش موضوع مابيني وبين مراتي
تقبلي تحياتي