الخميس، 14 أكتوبر 2010

الانتخابات

انا سمعت كلام اصحابي اللي قعدوا يقولوا ليا اخرج ما تخافش وجه ابويا ليا وقال ليا: يا ابني اسمعني الدنيا ده فيها كتير وزي ما فيها الشر فيها الخير وزي ما فيها الظلم فيها العدل مش عشان تجربه تخسر حياتك ده تجربه ولسه هتقابل كتير واقلك انا طالع معسكر تبع الشغل بتاعي هنلعب كوره وبنج وفرصه نغير جو.
قلت ماشي اهو حتى نغير وشوش الناس وسافرت معاه قضينا ايام جميله لعب وجري وبنج وشطرنج وبحر وميه وكمان المعسكر  كان في العريش وعادت سينا حره لينا بس احنا ما اتحررناش لسه يا سينا وفي يوم صحينا بدري على صوت البشر حوالينا ايه في ايه حصل ؟
قالوا النهارده انتخابات الرئاسه والكل هنا هيروح اجهزوا بسرعه
ناس ردت وقالت ازاي احنا جايين نغير وقت واحنا مالنا بالحوارات ده وناس قالت طيب واحنا مالنا احنا هنا مش في بلادنا مش المفروض كل واحد ليه لجنه في المحافظه بتاعته فيها صوته واحنا هنا من 12 محافظه
قالوا سكوت مش عايزين نسمع صوت كل فريق يلبس زيه ويطلع كامل واسمائكم معانا وياريت بسرعه عشان ورانا غيركم
هنعمل ايه امر ربنا قوم البس يا ابني وخرجنا كلنا وبصراحه يشكروا وزعوا علينا صور الريس ولوح كبيره تأييد ليه وكل فريق ليه صورتين ولوحه وبعد ما نخلص يرجعهم لينا ده اوامر سعادة البيه ومحدش يكسر اوامره احسن له
خرجنا من المعسكر لقينا ناس ما نعرفهاش نظمت المشيه ومشيت قدامنا تهتف واحنا معاهم وصلنا اللجنه لاقيت عساكر قلت بابا هما دول اول ما شافونا بنهتف ضربونا المره اللي فاتت قلي ما تخفش هو كل الهتاف زي بعضه وجاب ليا صورة الريس وقلي خد الحصانه مفيش حد هيعرف يكلمك من بعدها والغريب ان فعلا فتحوا الابواب كلها وقالوا انتم فين من زمان  وكان ناقص يدخلونا على اكتافهم كان هناك ظابط طلع لينا وقال بصوت مسموع:
يا اخوانا مش عايزين قلق احنا كلنا هنا بنحب الريس فخلاص كفايه هتاف وياريت عشان النظام يجي واحد يمثل كل فريق
طبعا ابويا كان قائد الفريق هو المدير الفني اشرب بقى يا حلو واحنا بنتفرج عليه دخل هوومعاه 12 كمان بعدد الفرق اللي كانوا معانا الظابط ساله بس سؤال 
انتم كام واحد في الفريق؟؟؟
رد عليه اللي انت شايفه يا بيه بهزر معاكم قال ليه احنا 25 وابني معايا يبقوا 26
قال ليه ماشي وكان العسكري جنبه نازل تعليم في الورق وكانوا اختيارين ايوه او نعم وهو شغال ولما خلص قال الظابط لبابا تحب تعد ورانا 
رد ابويا ده كلام يا حضرة الظابط وهو جوه نفسه بيقول اذا كان عرفت احنا هنكتب ايه وكتبت اللي احنا مش عاوزينه من غير ما تسالنا نعد ليه 
وخرج لينا وقال خلاص انا قلتله هنموت  ضحك وقال ليا:
ليه انا خلاص انتخبت لكل الناس اصحابه اتلموا في قلق عشان هما عارفينه ضحك وقال ما تخفوش الظابط اللي كتب.
وانا سالته هي ده الانتخابات انا مش فاهم حاجه ؟؟
رد عليا وقلي الكلمه ده ملهاش وجود عندنا زي الدولارات موجوده بس مش بنستخدمها عندنا في بلادنا الغاليه لاننا عندنا عملات تانيه زي اللي شوفته النهارده.
هعمل ايه يعني رجعت المعسكر وقفلت الباب عليا وحاولت افهم معنى الكلمه ديه واعذروني يا جماعة لو غلطت في كتابة العنوان اصل الكلمه ده غريبه عليا وما اعرفهاش ولسه ما قابلتهاش في حياتي.

 ابي يعمل بمؤسسه حكوميه ليس لها اي علاقه بالجيش وانما تابعه لوزارة الماليه بس هنقول ايه حكم ..... 
 

هناك 22 تعليقًا:

غير معرف يقول...

ما دي الانتخابات المصريه الحره النزيهه ... وخد بالك من خالتك نزيهه والنبي :))

تحياتي

جايدا العزيزي يقول...

هههههههههههههه

كتبت لا كتبت اه

هيغنو ويقولوا

احنا اخترناه

هو ده كان رائى فى الانتخابات

بس عارف موضوع فى الصميم

تسلم افكارك

وتعيش وتاخد غيرها

اشكرك

تحياتى

Carmen يقول...

فكرة المدونة هايلة
اسلوب القاء رائع
عجبتني جدا الافكار اللي تناولتها
تسلم ايدك
في تقدم دائم
اوعدك بالمتابعة باذن الله
خالص احترامي
¥k¥

شهرزاد يقول...

سرد لطيف
تسلم ايدك
تحياتي

حلمى البعيد يقول...

جميل جدا إسلوبك
ورائع إختيارك للأفكار وطريقة ترجمتها
وطول مانتا ف مصر
هتشوف العجب بس إنت قول يارب
ربنا يهدى

سندباد يقول...

عندما يتحدث التاريخ الكل يصمت والتاريخ بيقول ايه
بيقول كل ظالم ليه نهاية الكلام ده من اول التاريخ لحد دلوقتي من اول نمرود لحد هتلر
صبرا ال ياسر فان موعدك الجنة
صبرا ياشعب مصر فان النهاية قريبة
تحياتي لمدونتك

Dr/ walaa salah يقول...

ههههههههههه

بس كويس انهم جابوكم اصلا


في انتخابات بتتعمل لناس ميته واصواتهم بتكون في الانتخابات


بوست جميل ومدونه اجمل

تقبل زيارتي

أبو العريف يقول...

سيدون التاريخ يوما اننا كنا خراف


مش فاكر الباقي بقي

كفايه عليك كده

ال انتخابات ال


يا عم خليك راكن في ال............

علي راي ايمن

ليس فقيرا من يحب يقول...

تسمحلى اخبط بشويش على الباب

وافتح الباب بهدوء وادخل ابص يمين وشمال

فى المدونه الجديده دى

مبروووووك عليك نورت عالمنا الجميل

ويارب دايما فى وسطنا كده بس وانت فاتح الباب
لانى جيت لقيته مقفول كنت هادور وارجع

لولاش بس انى زقيت الباب لقيته فتح اتاريك كنت ناسى الباب مفتوح ومش قفلته

بالنوسبه للبوست فاحب اقولك


احبك محشش مفرفش مطنش ودايخ مدروخ واخر انسطال
احبك مكبر دماغك مخدر ممشي امورك كده باتكال

على رأى الراجل الطيب اللى قال

متفكرش كتير فى احوالنا المنيله لانك كده هتقفل الباب وقت طويل اوى اوى

يارب اكون ضيفه خفيفه على مدونتك وان شاء الله يدوم التواصل

eng_semsem يقول...

صحيح يا جماعه هي ده الانتخابات المصريه بس لا مؤاخذه هي فين بقى الانتخابات لما يبقى مرشح واحد واحنا مش بنختار كمان هو في كدن اكتر من كده وبعد ده كله نقول انتخابات طيب ازاي

eng_semsem يقول...

واحنا ايه الفرق بينا وبين الميتين على الاقل هما ما بيعرفشوا يتكلموا او يتحركوا انما نبقى عايشين ميتين فين العدل يا ناس
ومعلش يا عم سندباد انت قلت النهايه قريبه ياريت بعد كده تحدد نهايتنا احنا ولا الحكام

eng_semsem يقول...

انت يا رانيا تنورني في اي وقت وزقي الباب وادخلي انا بابي مفتوح لصحابي كلهم بس افتكري كلمة السر عشان تخشي المره اللي جايه

mrmr يقول...

باب مقفول
ومفتاحه فين
ممكن تدينى نسخه منه علشان ادخل بشويش واسرق اصل انا فيا داق السرقه
بس اسرق والكل راضى ومبسوط
هههههه

سرد رائع
مبروك عليك المدونه
وتقبل مرورى وصداقتى
اقعد بالعافيه ( يعنى غصب وافتضر )
هههههه

غير معرف يقول...

شكرا على البوست

ساسو يقول...

كلامك اكتر من رائع
وافكارك جميله
ومدونتك رقيقه جدا
تسلم ايديك

bananaQ8 يقول...

المدونة اكثر من رائعة مشكووره عالجهود

جنون عـبقري يقول...

أهل بك أخي في الله في عالم التدوين الساحر ..

اما مصطلح انتخابات فنحن في جزيرة العرب لم نسمع عنه من قبل .. لأن كل شيء بالعافية .. ويا بختكم أن كان هذا المصطلح متداول لديكم .. على الأقل!!!

أشكر لك مرورك الكريم

حازم ربيع يقول...

ياعم بلاش كلام فى السياسة انا

اول واحد هيعترف عليك

ههههههههههههههههه


بوست شيق

يحمل سخرية مغلفة بالمرارة

----------------------------

مع تحياتى /حازم ربيع

miroooo يقول...

والله خلتنى اغير رايى
قال وانا كنت عايزة اعمل بطاقه انتخابيه ههههههه علشان يكون ليا راى وصوتك امانه والحركات دى
ربنا ع الظالم والمفترى
احييك على البوست الجامد ده
بجد برافو
الى الامام دائما

غير معرف يقول...

مع تحياتي للوالد
الحكومة عايزة تقول لنا:
اسمع الكلام و امشي جنب الحيط

غير معرف يقول...

مدونة مميزة
للامام دائما

eng_semsem يقول...

يعني يا اصدقائي خلاص ننسى موال الانتخابات من حياتنا طيب ومين يحكم البلد لو كان واحد اجنا بنكرهه او مش اختيارنا هو ده ينفع صحيح بيحصل بس مش صح وهيخلينا في مكانه على طووول ده لو ما رجعناش لورا بس هو ده امر الله