السبت، 20 نوفمبر 2010

رسالة شكر

اولا مبروك لكل اللي ربنا كتب ليهم  الحج السنه ده وربنا يتقبل منا ومنهم صالح الاعمال ويرزقنا رحمته ومغفرته ويرزق اللي نفسه يروح السنه اللي جايه ويزور بيته ويحج ان شاء الله.
ثانيا وده المهم شكر كبير طالع من القلب ودعوات ملهاش عدد لخادم الحرمين الملك عبدالله ابن عبد العزيز ولكل رجال المملكه ورجال الامن خاصة على الدور الكبير اللي قاموا بيه على احسن واكمل وجه.
سمعت كتير عن مشروع قطار المشاعر المقدسه ولكن بعد تجربته احب اقول الله يجازي خير لكل واحد فكر فيه وساعد لانه مشروع جبار كان ليا شرف تجربته اللي استمتعت بيها جدا وساعدني على التركيز في اداء المناسك لعدم وجود صعوبه في التنقلات.
رجال الامن كانوا نعم المعين في التحركات وكانت اجابتهم على اي سؤال حتى اني سالت واحد فيهم على مكان الحلاق وكان ردهم بمنتهى الاهتمام  حقيقي انا حسيت معاهم بالامن والامان والتنظيم لكافة التحركات بدون ملل وحسيت من معاملتهم ان احنا فعلا ضيوف الرحمن.
اما المشروع الكبير اللي يستاهل يتحكي عنه حكايات مشروع كوبري الجمرات منتهى السهوله والامان والسرعه ومفيش زحام انا سمعت عنه بس عمري ما اتخيلت اللي انا شوفته على ارض الواقع فعلا انجاز كبير ساعد كل الحجاج .
اما عن الخير اللي انا شوفته في يوم عرفات كان فوق الوصف كل حاجه تتمناها قدامك اكل عصير فاكهه مياه وكمان شمسيه عشان الحر حتى كان في ايس كريم من شركة البان كويتيه بيتوزع .
صدقوني كلنا فينا الخير لاننا مسلمين واول ما تيجي الفرصه بيطلع ويظهر ويبان وياريت نطفي ونقفل ونبعد عن الحاجات الوحشه اللي غيرت سلوكنا واللي هدت حياتنا لازم نبعد عن الظلم والغدر والخيانه والكدب والقتل والسرقه والكره ونرجع تاني مسلمين بنحب بعض ونساعد بعض ونقوي بعض.
واجمل حاجه في الرحله اني قابلت اخواتي من مصر وفلسطين والعراق والسعوديه وايران والكويت والبحرين والامارات واليمن والسودان والهند وتركيا واوزبكستان وباكستان وافغانستان وتشاد وماليزيا ونيجريا ودول كتير كلنا كنا لابسين نفس اللبس ماشين في نفس الطريق مع بعض بناكل نفس الاكل وكل تحركاتنا كانت مع بعض ياريت نرجع وطن واحد اسلامي.

هناك 28 تعليقًا:

سواح في ملك اللــــــــــــــــــه- يقول...

حمد الله عليالسلامه حج مبرور انشاء الله

غير معرف يقول...

تقبل الله منكم و حمدا لله على السلامة

esraa يقول...

السلام عليكم
ربنا يكتب لنا زيارة بيته الحرام
فعلا المسلمين فيهم خير كتييير نتمنى و ندعى ربنا انه يطلع دلوفتى لاننا فى أمس الحاجة للخير و الوحدة

غير معرف يقول...

حمد لله على السلامه
حد مبرور وذنب مفغور
ان شاء الله
ربنا يتقبل منك
تحياتى

gogo!sf يقول...

حمد الله على السلامه
والف مبروك على الحج ربنا يتقبلها اللهم امين يارب

وربنا يكتبهالنا ان شاء الله

جوجو

Carmen يقول...

حمدالله ع السلامة استاذ اسامه والف مبروك وربنا يتقبل منك يارب اوعي ماتكونش دعيتلنا:)
تقبل تحياتي

همسات وبحــ الحياه ــر يقول...

حج مبرور وذنب مغفور
حمد لله على سلامتك يابشمهندس
اتمنى من الله ان يتقبل منك

الغاردينيا يقول...

تاثرت بكلامك جداااا..لامست قلبي به
وادمعت عيني ..علشان كلام حاج بجد ^_^
كلام واحد لسه راجع من بيت الله
" و بأذن الله الله يجي اليوم وتكون فيه الامه كلها يد واحده "
حمد لله على سلامتك
و حج مبرور ان شاء الله
ووفقك الله في كل مايرضيه

تحياتي

eng_semsem يقول...

انا دعيت للكل وما نسيتش حد دعيت لكل مظلوم يرجع ليه حقه
وكل مجروح ربنا يدويه من جرحه وكل حزين ربنا يسعد ايامه وكل مريض يشفيه ربنا ويعافيهوكل طالب شئ من ربنا يهديه ويديه اللي فيه الخير ليه

زهرة(جنى)الاسلام يقول...

السلامة عليكم
مدونة رائعة اخى
وكل سنة وحضرتك طيبوحمدلله على السلامة

كلمات من نور يقول...

حج مبرور وسعي مشكور وذنب مغفور إن شاء الله وربي يتقبل دعاؤك أن نعود أمة إسلامية واحدة .خالص تحياتي

Noha Saleh يقول...

حمدالله على السلامة
وحج مبرور ان شاء الله

ツSmiLeY AnGeLツ يقول...

السلام عليكم
الحمدلله على السلامة
حج مبرور انشاءالله
وربنا يتقبل منك حجتك
ويارب اتكبها علينا
تقبل مروري
سلامي ليك ياحج.

richardCatheart يقول...

الف حمد الله على السلامه ربنا يتقبل منك يارب

يارب ديما بخير

محطات ثقافية يقول...

بارك الله فيك اخي وفي الموضوع المميز
ويارب اكتب لنا زيارة البيت

جايدا العزيزي يقول...

الف حمدلله على السلامه

حج مبرور وذنب مغفور

وتقبل الله منك ومنا

دعتلى معاك

الحمدالله انك رجعت بالسلامه

تحياتى

غير معرف يقول...

حجة مقبولة

جعلك الله ممن رجعوا كيوم وُلدوا,,,

كانت سنة فريدة بكثرة الحجاج فيها

الجميع يقول هذا...

كتب اله أجرهم وردهم سالمين مقبولين..

ولا بالاحلام يقول...

السلام عليكم ورحمة الله وبركاته
حمد الله على سلامة حجيج بيت الله الحرام
وربنا يتقبل منا ومنهم صالح الاعمال والطاعات
تحياتى
ابتسام محمد (ولا بالاحلام)
سنووايت (اميرة الاحلام)

انـــــــــت حياتى يقول...

حج مبرور وذنب مغفور يااستاذ اسامه
تقبل الله منك
هذة اول زيارة للمدونه
وان شاء الله هتتكرر
تحياتى

همسات وبحــ الحياه ــر يقول...

انا دعيت للكل وما نسيتش حد دعيت لكل مظلوم يرجع ليه حقه
وكل مجروح ربنا يدويه من جرحه وكل حزين ربنا يسعد ايامه وكل مريض يشفيه ربنا ويعافيهوكل طالب شئ من ربنا يهديه ويديه اللي فيه الخير ليه

ياااااااااااااااارب استجيب دعاؤه

أبو العريف يقول...

حج مبرور ان شاء الله يا مان

ربنا يتقبل منا ومنكم صالح الاعمال

بؤيدك في كل كلمة قلتها

وانا سمعت ناس كتير بودي بتدعي للناس دي

بوست متميز

عباس ابن فرناس يقول...

حمد الله على السلامة يا اخى
وحج مبرور انشاء الله وزنب مغفور باذن الله

ويارب نكون فى الحياة زى ما بنكون فى الحج
عالم اسلامى واحد
متعاون
متحد
ربنا يحقق امنياتنا
تحياتى

just dream يقول...

ماشااااء الله ربنا يتقبل منكم جميعا
وفعلا هما دول المسلمين بجد بس لما نشيل شويه الغبار اللى وقفت على القلوب
مبارك عليك الحج وحمد الله على السلامه يامهندس

سجل .. أنا مصرية يقول...

حج مبرور باذن الله

mrmr يقول...

حمد الله بالسلامه يا اسامه
وحج مبرووووووووك
ربنا يتقبل منك
وكل سنه وانت طيب

رحاب صالح يقول...

حج مبرور ان شاء الله
ويا رب عقبالنا كلنا

Dr/ walaa salah يقول...

حمداً لله على سلامتك يا باشمهندس

حج مبرور وذنب مغفور بإذن الله

بالنسبه لقطار المشاعر بصراحه ده انجاز يشكر عليه كل القائمين على هذا المشروع

وداد يقول...

حمد الله على السلامة

حج مبرور وذنب مغفور

ربنا يتقبل منك ومن الجميع

وعقبالنا يارب

شعور جميل انك تلاقي كل الخير في ارض الخير