الجمعة، 26 نوفمبر 2010

حكايتي مع الايام(2)

كنت محتار في الاختيار وسبت القدر يكتب طريقي وكنت عادي في شغلي بس مشغول بمستقبلي وعيشتي لحد لما نزلت مره اجازه عند والدي وكانت والدتي بتتكلم في التليفون مع واحده صاحبتها وقالت ليها اسامه جه قالتلها سلملي عليه اخدت منها السماعه وكلمتها 
ازيك يا طنط عامله ايه واخبار صحتك؟
الحمد لله يا اسامه هناخد زمانا وزمن غيرنا
ما تقوليش كده ده انا لو مش عارف انت مين هقول بنت حلوه وبتعاكسني
انت لسه بتهزر كده وهتقضي حياتك كلها ضحك في ضحك مش ناوي تكمل نص دينك
ايدي على كتفك بس هي فين اللي تستاهلني
سبها على الله وانا مش هسيبك تروح بعيد
يا سلام يا طنط ده انا نفسي ابقى جنبك على طول
بطل بكش بقى وهات ماما
وعادي قلت مكالمه عاديه وعديت وقضيت اجازتي واتصلوا على اخر الاسبوع وقالوا تعالى وطبعا طاعة الوالدين سيف على رقبتي نزلت واتكلموا معايا في واحده جارت طنط ام وائل(اللي كانت بتكلمني من شويه) واسمها مريهان مهندسه قلت وماله هنخسر ايه اروح واشوفها ورحت وقعدنا مش كتير هي جت من بره بعد مما دخلنا بنص ساعه ويعني مفيش سبب يخليني اقول لا حلوه ومتعلمه ومن اسره شكلها محترمه وبصراحه اجمل حاجه عجبتني فيها اسمها مش بيتكرر كتير  .
كملت وخطبت وعملنا شبكه وهي طبعا على العروسه وهي قالت مكسوفه اقعد في كوشه ونادي احنا هنعملها فوق البيت والفرح اعمل اللي انت عايزه قلت وماله فرحهم يعملوه في المكان اللي عايزينه كان الكلام ده يوم 7/2/2008 وشبكت وقضينا فترة خطوبه عاديه جدا نتخانق شويه وغالبا وتقريبا دايما كنت بصالح وعدت الامور لحد مانزلنا دمياط نشتري العفش واختارنا كل حاجه وكان في واحد رايحين عنده ودخلنا الرجاله في الصالون بعد الغدا لاقيت تليفوني بيرن اي ده؟ رقمها ازاي؟ رديت قالت انا واقفه تحت انزل نزلت لاقيتها بتعيط في ايه يا بنتي حد زعلك 
بابا مش عاجبه اللي احنا اخترناه كله
وايه المشكله مقلش الكلام ده ليه واحنا لسه بندور على العموم مش مشكله ربك يسهلها ونزل والدي اتكلمت معاه قلي ايه الهبل ده ما احنا كنا واقفين قدام الحاجه وبننقي المهم لفينا تاني وغيرنا غرفة النوم في الاخر بس وده كان اسوا موقف وعدت الايام وعملت الفرح اللي كنت بحلم بيه في يوم 20/7/2008 وبعد الفرح في كفرالشيخ رجعنا على شقتنا في شارع فيصل في القاهره ........     
  

هناك 20 تعليقًا:

ولا بالاحلام يقول...

السلام عليكم ورحمة الله وبركاته
اه ده دى طلعت قصة حياتك
على العموم احنا فى انتظار الكماله لانه موضوع بجد مشوق
اتمنى ان تكوِن النهايه سعيده
تحياتى
ابتسام محمد (ولا بالاحلام)
سنووايت (اميرة الاحلام)

Dr/ walaa salah يقول...

اقول مبروك ولو انها جايه متأخر اوي بس مبرووك

اما بالنسبه للمشاكل ده بيحصل كتير اوي

المهم يكون الزوجين متفقين واكيد كل المشاكل تتحل


في انتظار باقي الحكايه والف مبروك مره تانيه

زهرة(جنى)الاسلام يقول...

السلام عليكم
مبروك اخى مع انها متأخرة ونحن فى انتظار البقية

همسات وبحــ الحياه ــر يقول...

اممممممم
مش عارفه اقول مبروك ولا ايه
بس انا هستنى تكملة الحكاية من 2008 ل2010
عشان يمكن واكييد انا فاهمه غلط من تعليقين قريتهم لحضرتك ههههه
ربنا يسعدك ويفرح قلبك دا يما يابشمهندس
بس برضو هقول مبرووووووووووك هههههه

غير معرف يقول...

قلبى مش مطمن للجوازه دى ؟؟؟
وبعدين ؟؟؟؟؟؟؟؟؟؟؟؟؟
ايه اللى حصل ؟؟؟؟

رحاب صالح يقول...

اوك
مستنية الباقي
بس علي فكرة انا من كفر الشيخ
هي البلد مكنتش عجباك والا اية...؟

eng_semsem يقول...

اخواتي القلقانين مفيش سبب للقلق انا عايش دلوقتي كويس وبتقلب في نعم ربنا اللي مغرقاني وكله هيجي في ميعاده

eng_semsem يقول...

اختي رحاب انا اتولدت في كفرالشيخ وعشت فيها اكتر من 15 سنه تقريبا وبغض النظر عن ده كل بلد فيها الكويس واللي مش كويس وانا مش بكره مكان بس ممكن اكره اشخاص لسلوكهم بس مش عشانهم هكره بلدهم والا مش هيفضل حد يحب مصر عشان خاطر السيد ........وشركاه

ツSmiLeY AnGeLツ يقول...

السلام عليكم
مقدرش اقول شي الا لما اقرئها للنهاية
قبل كل زواجة تحصل مشاكل عادي.
تقبل مروري
سلامي ليك اخي.

غير معرف يقول...

يابشمهندس شوقتنا لباقى القصة وبالتوفيق انشاء اللة احنا مستنين الجزء التالت ع احر من الجمر

كلمات من نور يقول...

زواج سعيد (:

في انتظار التكمله ولو إن القصه حتخلينا نقرا العجب طالما الخطبة كانت كده فيها شوية معارك وووووو

جايدا العزيزي يقول...

اصبحت انتظر بفارغ الصبر

قصتك فيها عبر ومعانى

بس عايزة اقول من امته الاباء دائما موافقون على ما نفعله

مهما كبرنا نحن فى نظرهم صغار

زواج سعيد

وانتظر

تحياتى

eng_semsem يقول...

اختي جايدا علاقتي بوالدي مميزه من زمان واحيانا يناديني عشان ياخد رايي في موضوع يخصه او شراء ارض شقه وبيع وكانت اخر مره يسالني امبارح بليل حتى واحنا ما بين آلاف الكليموترات عارفه الديمقراطيه احنا بنعيش احلى صورها عندنا في البيت

Tears يقول...

جميل اوى اسلوبك شيق

مستنية الباقى و يارب يكون خير و سعادة :)

Carmen يقول...

نقول الف مبروك لحد مانشوف الباقي ^_^
في انتظار القادم
تحياتي

افروديت يقول...

أسلوبك في الكتابة راقي وممتع

بس لا أعلم لماذا شعرت أنك تسرد قصتك

بنوع من الشجن والهدوء الغريب ..

أو خيل ألي هذا ...

في أنتظار باقي القصة

تحياتي لك

eng_semsem يقول...

اولا اشكرك اختي افروديت على المجامله الرقيقه ثانيا الموضوع مر عليه سنتين والطبيعي بتاعي هادي زياده حبتين اشكرك على متابعتي وهتلاقي اسباب كتير الجزء اللي جاي هتفهمي فيها كتيييييييييير

وداد يقول...

ربنا يوفقك يا استاذ اسامة

اسفة على التأخير في الرد

بس طريقة سردك جميلة جدا ما شاء الله

اروح اشوف باقي الأجزاء

تقبل مروري المتواضع

الغاردينيا يقول...

اذن عجبك اسمها هههه انا اؤمن ان الرجال مؤمنين لحد الموت بالشكليات
ذكرتني بزميل لنا بالجامعه خطب وكان مبسوط جدا ان اسمها ساره سئلوه ليش
يعني قال اسم ساره حلو ومن طفوله ونا بحب الاسم هذا وهو مميز وماظلت خطوبته معها لوقت طويل ... راحت ساره هي واسمها هههه لانه ركز على شكليات ونسي
الجوهر ..
وتزوجتم اذن .. مبروك ياعم
اشوفك في الحكايه 3 .. سلامو هههه

eng_semsem يقول...

انا قلت ليكي يا جاردينيا انا ماكنش في خيالي واحده معينه كنت عايز واحده محترمه بتقدر تفتح بيت ونعيش مع بعض