الله عليكي يا مصر
كنت بتفرج على منظر صلاة الجمعه في ميدان التحرير والناس كلها متجمعه تحتفل بانتصار ارادتها على خوفها بانتصار رغبتها على سجانها بانتصار اختيارها على اللي كانت عايشه فيه سنين مجبره وبنتالم كلنا في صمت بنحلم ببكره اللي هتتحقق فيه احلامنا وملقتش حاجه اقولها غير الله عليكي يا مصر . قالوا كتير فتنه طائفيه ومسلمين ومسيحين بيتحاربوا ويتقاتلوا كفايه كدب بقى واعذار عشان استمرار قانون الطوارئ ما كلهم قدامنا اهم حطين ايديهم في ايد بعض وفي الاخر مصر بلدنا كلنا وكلنا بنخاف عليها ومفيش حاجه في الاسلام بتقول ان احنا نقتل اخواتنا اللي ساكنين جنبنا مهما كانت ديانتهم ومتهيالي مفيش في الدين المسيحي حاجه تقول غير كده وطول عمرنا عايشين جنب بعض ولما خرج اللي كان بيحرك الفتنه ظهرت الحقيقه ان احنا كلنا اخوات وبنحب بعض ونحافظ على بعض ومنظر يخلى الواحد يقول الله عليكي يا مصر .
عدد المصلين في الميدان زاد عن 2 مليون غير اخواتهم المسيحين اللي كانوا واقفين حواليهم ومفيش قلق ومفيش حرق ومفيش سرقه والناس كلها بتخاف على بعض وتحافظ على بعض انا شفت العدد والمنظر وحسيت انه يمكن اكبر من العدد اللي كان في المظاهرات وده خلاني اسرح واسال نفسي سؤال امال مين سرق ومين نهب ومين بلطج وضرب ما كلهم واقفين اهو في امان ومفيش خراب يبقى اكيد عنصر الخراب اختفى مع رحيل الرئيس المخلوع الصوره وضحت خلاص مش محتاجه مبرر ولا اسباب رئيس العصابه اتمسك كل اللي معاه هربوا وبداوا يتبرئوا منه ويقولوا لا احنا كنا بنعارضه ورئيس حزبه في اخر ايامه بيفكر يعمل حزب جديد بعد تقديم استقالته من الحزب الوطني . يارب الخير لمصر ولاهل مصر اللي عمري في حياتي ما شفتهم متجمعين في مكان واحد وعلى راي واحد زي النهارده .
هناك 31 تعليقًا:
بالتأكيد منظر جميل ويشرح القلب
نتمنى لمصر الخير دايما
ويارب يحفظها من كل سوء
بصراحة مشهد يفخر بيه كل مصري
والمشهد مش من فراغ ده مشهد تم كتابة السيناريو له وتم تصويره واخراجه ومونتاجه في 7000 سنة
الفتنة الطائفية اتضحت انها كدبة كبيرة روجها حبيب العادلي واعوانه لكن المصريين كلهم اخوات
لما ييجي رئيس جبهة علماء المسلمين في العالم ويقول النهاردة مش هاقول في الخطبة ايها المسلمون لكن هاقول ايها المسلمون والاقباط ده اكبر دليل على اننا بقينا اخيرا كمصريين على قلب رجل واحد
تحياتي وتقديري ومبروك لمصر
شئ مشرف حقيقى .. اللهم انصر مصر دائماَ
اللي حصل حقيقي خلنا نشوف
نشوف الي احنا مكناش شايفينه
شفنا كل شيء علي حقيقته
واتضح لنا اننا كنا مخدوعين كتير بحاجة اسمها مسلم ومسيحي وفتنة
اتخدنا باعلام فاسد
قادة رأي متقلبون
بجد اجمل شيء حصلي منذ مولدي
كتبت بضع كلمات في تلك الايام في مفكرة 2011 بتمني ان يقرأها اولادي بعدي
ان شاء الله الجاي احسن
صعب اكيد
بس الاصعب عدي خلاص
اخي اسامه
الله اكبر كبيرا
الله اكبر
هذه هي صورة العزيمة
هذه هي صورة الصبر مفتاح الفرج
هذه هي صورة الايمان بالقضية
هذه هي صورة الوطنية الصادقه
اتم الله نعمته على ارض الكنانه
تحياتي
ولسه..
الخير أكيد هيكتر والأمن هيرجع أحسن من الاول بإذن الله
ما شاء الله عليهم
هو دا الشعب المصرى بقوة وشجاعته واصرارة وعدم الانهزام
شكلهم كان يفرح القلب وقت الصلاة
ويارب فرحتنا تكمل باكتمال تطهير البلد
casper
يارب احفظ مصر واهلها من كل سوء
مصطفى سيف
فعلا كلمات الشيخ يوسف كانت موفقه وقريبه من قلبنا وكنا من وراه بنقول امين وكاننا معاه في التحرير
منورني دايما
بنوته مصريه
فعلا مشرف لينا كلنا
re7ab sale7
يارب يكون اللي جاي احسن واجمل لمصر والمصريين
اهلا بيكي دايما في مدونتك
شهر زاد
هي ابهى صورة شفتها في حياتي وعمري ما شفت تجمع بالحجم ده لاي مناسبه في مصر
وكل اللي جمعهم انهم بيحبوا مصر
اهلا بيكي
موناليزا
يارب الخير دايما لمصر والمصريين
الحب الجميل
انا شايف ان احلامنا من كام يوم بتتحول لحقايق
يارب تكمل ونشوف مصر في ابهى صوره
منوره المدونه
ربنا يبارك فيهم ويحميهم ويحمي مصر الحبيبة يااااارب
تحياتي لك استاذ اسامة
منظر بديع حقا يا اسامه
ما فيش ابهى واجمل من كده ايد واحد وصوت واحد والمحبه تسود بينهم
يارب احمى مصر وشعبها
واكتب لها الامان والاستقرار
مبروك عليناالنصر
رحل مبارك الى شرم الشيخ حيث كان طوال الوقت و بقى نظامه
الثورة لابد ان تستمر حتى التطهير و الا التف علينا ذيول الحيه حتى تطلع لها رأس جديدة
مكنتش عارفه ان بلدنا حلوه كده
ولا كنت اعرف ان ولاد بلدنا رائعين كده
ربنا ينتقم من الي كان مضيعنا
كان يوم جميل جدا
احلى حاجه انك تحتفل بنصرك
بجد ربنا يبارك في الشيخ القرضاوي
مش معقول كان كلامه بياخد الواحد في عالم تاني
يارب يحفظ بلدنا
اخي اسامة
هذا منظر الاسلام العظيم والله نشعر بعظم والله وحلاوة النصر
اتمنى تنعموا بالامن والامان دائما
تحياتي
carmen
ربنا يبارك في مصر واهلها اللي على ايديهم عرفنا طعم الحريه
تحياتي لك
mrmr
يارب الامان والاستقرار لمصر والمصريين
فعلا منظر يفرح
tears
مازالت مستمره وكل يوم يموت جزء في الحيه
يارب الخير لمصر
من كل بستان زهره
يارب ما تحرمناش من الفرحه بالنصر طول حياتنا
والشيخ القرضاوي من كبار علماء الامه في هذا العصر
حره من البلاد
يارب الامن والامان لجميع الاوطان العربيه
مشهد رائع وفخر لكل مصرى
يارب دايما فرحنين ويارب مصر دايما فى خير وسلام
تحياتى
السلام عليكم
كيفك يااسامه؟
يارب تكون بالف خير
مشهد ولا اروع
مشهد يذكرني بالحرم وكم الناس مجتمعه في مكان واحد يصلون في مكان واحد
يركعوا ركعه وحد شجود واحد
والاكثر جمال في اجمل مشهد
ان المسلمين والمسيحين مع بعض
يد وحده قلب واحد شعب واحد
ربنا يحميك يامصر ويحمي شعبك
تقبل مروري
سلامي ليك اخي.
منظر روعه فعلآ
بجدروح جميله اوي روح الحماس والفرحة بالنصر
انامبسوطة جدآ لأني كنت هناك وفرحانه كمان لأننا قدرنانوصل لهدفناالمشروع وبطريقة سلمية
مبروك ياأسامه
هبه فاروق
يارب دايما الفرحه ليكي ولكل اهل مصر والفخر
دمتي بخير
خواطري مع الحياه
الحمدلله كلنا بخير منظر اهل مصر الجميل اهلنا واخواتنا رجع لينا الامل والسعاده
ويارب اامور تهدى عندكم ونطمن عليكم
تقبلي تحياتي
افروديت
يارب دايما السعاده لكل اهل مصر
وخلاص بقى انت بقيتي من الاحرار بدام كنتي واقفه معاهم
ازيك استاذ اسامة يارب تكون بخير ايه الغيبة الطويلة دي
إرسال تعليق