الاثنين، 3 يناير 2011

الصديق

     اولا احب اهني كل المسلمين بالعام الجديد ونامل من الله ان يكون عام سعيد للاسلام والمسلمين واتمنى ان نجد فيه كل ما يسعدنا ويذهب عننا الحزن والهم وان يمدنا الله بالصحه والعافيه ويشفي مريضنا ويرد كل مسافر الى بلده غانما سالما .
تكلم الكثير من الناس عن الاصدقاء بداية برسول الله ولنا فيه الاسوة الحسنه وقد قال فيما معناه الصديق الطيب كحامل العطر ان لم يقع عليك عطر منه اصابتك رائحة العطر والصديق السئ كنافخ الكير لو لم تؤذيك ناره اصابتك الرائحة السيئة منه وتكلم  الشعراء والادباء فهو عنصر مهم في حياة الانسان وانا ارى انه يؤثر على حياة الانسان في اختياراته وحياته بكل ما فيها ورايت انه في بداية العام الجديد ان اذكركم واذكر نفسي بالصديق وقالوا زمان في الامثال اختار الرفيق قبل الطريق ومن تلك النقطه ابدا وقد رسمت طريقي للسنه القادمه انا كان ليا عمرا واتممتها ولذلك فعلي اختيار الصديق الذي ساسير معه في الطريق .
ورسولنا الكريم عليه افضل الصلاة والتسليم كان صديقه الصدوق ابو بكر الصديق وكانت لهم الكثير من المواقف ولكني ساذكر منها الان قصة اعجبتني حينما كانا في الغار عند الهجره فسد ابو بكر الفتحات حتى لا يخرج منها عقرب وبقيت واحده فسدها برجله وذلك من اجل حماية النبي  اشرف المرسلين حتى قرصه فعلا عقرب.
ومن هنا اسال وابدا البحث معكم داخل هاتفي وارقام اصدقائي وابحث حولي من هو الشخص الذي اتخيل ان يفعل ذلك من اجلي ؟؟؟
الصديق هو صاحبك اللي بيكون معاك في كل مكان في الازمات في السعاده و وسط الاحزان  فان كان صديقك يحافظ على الصلوات سيكون خير معين لك على الطاعات وانا كان لا يكذب ولا ينطق بالكلمات السيئه والالفاظ النابيه ستكون تلك اخلاق الحوار بينكم واخلاقك مع الاخرين .
وكنت قديما اتناقش مع احد اصدقائي وكان يقول ان احسن صاحب اللي بيصاحبك من غير مصلحه وانا كنت بعترض على ده لازم صاحبك يبقى ليك معاه مصلحه وليك عنده مصلحه لازم تستفيد منه ويستفيد منك والا يصبح عدم  لا شئ ولكن لا اقصد مصلحة ماديه قد تكون علميه وقد تكون في مجال العمل وقد تكون دينيه وقد تكون شخصيه او اجتماعيه لابد ان يكون له فائده ماديه او معنويه والا كيف نصف شخص ليس منه اي فائده غير انه مجرد هامش لتضييع الوقت تخيل انك تقرا كتاب كامل وفي الاخير لم تستفيد اي شئ هل هذا منطق واشعر بان الشخص الذي لا فائده منه لابد وانه يحتوي على العيوب التي ستصيبك .
اعذروني انا لن اتكلم عن الصديق الذي قد يقذف بك في الهاويه وقد يصيبك في دينك ويعطل مسيرة نجاحك لاني في البدايه فان رايي تجنبه تماما ولن اطيل الكلام في ان مصاحبة الفاشل تصيبك بالفشل ومصاحبة من يقوم بفعل المنكرات كالمخدرات ومعاكسة البنات وتقضية الاوقات في اللهو على الطرقات ستكون نهايتها محتمه بالضرر الصحي ان لم تدفع بك الى اقسام الشرطه واهم من ذلك غضب الرب الذي قد اعطاك الصحه والقوه والمال وانت تنفق كل ذلك في الحرام وان لم تكن شريك له في تعاطي وفعل ذلك ستصيبك السمعه السيئه من مصاحبته.
وفي بداية العام الجديد اقوم بتنقية الاسماء وتذكر الافعال وتذكر الاحداث ورفض كل ماهو سئ وكل شخص قد يدفعني الى الاخطاء حتى تكون سنة جديده بعيده عن ما لايحمد عقباه .
ومش معنى ذلك ان هبيع اصحابي اللي عشنا مع بعض او كان في تعامل بينا بس على الاقل هحافظ على نفسي منهم ولو احتاجوني هيلاقوني جنبهم بس مش هيبقوا شركائي في حياتي سيبقى بيننا ود ولكن دون تواصل دائم او خروج غير فيما يرضى عنه الله والرسول الكريم وتذكروا انه من بين من سيحتمون بظل عرش الرحمن يوم لا ظل الا ظله اثنين تحابا في الله وتفرقا على ذلك .

هناك 41 تعليقًا:

شهر زاد يقول...

اخي اسامة
احسن ما فكرت فيه هذه السنة فعلا

فالتغيير يجب ان يشمل حياتك بكاملها
لكن خذ دائما بعين عين الاعتبار
ان تحبب حبيبك هونا ما عساه يصبح عدوك يوما ما
وابغض عدوك يوما ما عساه يصبح حبيبك يوما ما
بالتوفيق دوما يا خويا
تحياتي

سواح في ملك اللــــــــــــــــــه- يقول...

سلام عيكم
كلامك مظبوط جدا
بس ف عصر رسول الله صلي الله عليه وسلم
كانت هناك اخلاق الفرسان
وكان للعرب عادات لايستطيعون الخروج عنها
من هو الصديق الذي مثل ابو بكر الذي انفق كل ماله من اجل رسالة اقتنع بها وتتبعها غير ابو بكر
في هذا العصر لااحد
ولكنك في عصرناهذا
ستجد اختلافا في الطباع والاساليب

Tears يقول...

و انا مصرية ديانتى الاسلام و اهنئك بالعام الجديد و اهنىء كل المصريين من اى أصل و من اى دين

;كارولين فاروق يقول...

السلام عليكم ورحمه الله وبركاته
اول مره اشعر بكلمه كل عام وانتم
بخير خاصا بعد الاحداث المؤلمه
واشعر ايضا بالسنه الجديده
والكلام عن الصديق كنا نكاد
ننساه لانه وجوده اصبح نادرا
ولكنك احييته من ثاني مع كل ما
امره الله
موضوعك جميل وشفاف

بنوتة مصرية يقول...

وانت طيب وبخير وان شاء الله العام الجديد يكون مليئ بالخير والمفاجأت السارة..

فى مقولة دايما واخدها فى اعتبارى إلا وهى صديق اليوم عدو الغد,, عشان كدة انا كلمه صديق صعب اوى انى اللقب بها اى حد فالصديق هو روحى الثانية التى تشاركنى كل افراحى واحزانى ..(فى زمنا دة صعب اوى انى اللاقى الشخص او الشخصة اللى تحمل كلمه صديق او صديقة ..ودة لاسباب كتير اخلاقنا اتغيرت كتير سلوكيتنا طباعنا حتى اننا بقينا ننسى ونستغنا بسهوله عن من هما اعز الناس بالنسبالنا ..على الرغم من كونى انسانة تتصف بالآجتماعية لكن ماليش اصدقاء كتير او بمعنى اصح مفيش ناس حقيقية اقول عليهم اصدقائى بجد ..لآن جربت اكون صداقات لكن ما منتحتنى تلك الصداقة سوى الغدر اعطتهم حبى فأعطونى الغدر ... عشان كدة اتعلمت ان مش اى حد يحتل مكانه صديق عندى إلا اللى يستاهلها ومع ذلك فى حذر.. لآنى تألمت سابقاَ فتعلمت الآن

تحياتى لك اخى العزيز المهندس اسامة

eng_semsem يقول...

شهرزاد
شكرا على النصيحه الغاليه وانت اكتر واحده عارفه اني مش هسلم رقبتي لحد تاني ابدا
شكرا على وجودك

موناليزا يقول...

أنا توصلت لهذه الحقيقة متأخر.. وقمت بالفلترة أيضاً

بس اللى جعلنى اعمل كده مرورى بأزمتى اللى قدرت اعرف فيها حقيقة مشاعر جميع من حولى تجاهى
مين وقف جنبى وساندنى
ومين اللى كان واقف بدافع الفضول ومش معقول أنتى يحصلك كده!
وفيه اللى ماوقفوش أصلا

حضرتك بتقول ان لازم يكون فيه أى مصلحة بين الأصدقاء أنا كنت معتقدة ان اجمل حاجة ان مايبقاش فيه مصالح وتبقى الصداقة والحب فى الله هى الهدف
لأنى شايفة ان الصديق الحق يكفينى وجوده حتى لو مش هيفيدنى
يكفى انى ألاقيه يسمعنى لما اكون انا عايزة اتكلم
يكفى انه يكون موجود علشانى فى أى وقت

واكتشفت انى كنت ليهم دايما كده وبعد اللى حصلى وخذلانهم لى طبعا ماعدتش معاهم زى الأول لأن كده اكتشفت انانيتهم فى الصداقة أو انها صداقة من طرف واحد .. حد بياخد طول الوقت والتانى بيعطى طول الوقت فكان طبعا لازم موقف حقيقى عشان افوق واعرف ان الصداقة زى أى ارتباط آخر "أخذ وعطاء"

موضوع موفق
وذكرنى بعمل فلترة كل عام:)

eng_semsem يقول...

سواح في ملك الله
صديقي العزيز من عاش مع الرسول كانوا بشر عاديين لم يكونوا انبياء وهم عرفوا دينهم وفيهم من كان سنه فوق الاربعين اما نحن نتعلم ديننا منذ لحظة ولادتنا حين يؤذن في اذن المولود اعلانا بميلاد مسلم جديد لماذا لا نتعلم منهم ونكن مثلهم وفيهم من كان يحمل داخل قلبه كرها عظيما للاسلام وتحول الى حب شديد وتذكر خالد ابن الوليد حارب الرسول في غزوة احد وهو سبب هزيمة المسلمين وبعد اسلامه كان سيف الله المسلول فلمماذا على الاقل لا نحاول ان نكون مثلهم
شكرا على متابعتك

هبة فاروق يقول...

كل سنة وانت طيب يا اسامة وعام سعيد علينا جميعا
وللاسف يا اسامة مفهوم الصداقة الان تغير ولكن مازال هناك اصدقاء اوفياء
تحياتى لك يا اخى الكريم

eng_semsem يقول...

tears
حتة الجنسيه ما تفرقش معايا كتير لاننا في الاخر اهم شئ نحب الخير للكل وكان الرسول عايش في المدينه وكان يسكنها اليهود وكانت زمان الدوله الاسلاميه حدودها من تركيا الى المغرب العربي كلهم اسمهم مسلمين كل عام والمسلمين عامة بخير والمصريين ومصر بخير

eng_semsem يقول...

كارولين فاروق
ليه بس كده اكيد كتير حواليكي قالوا ليك نفس الكلمه ويارب تكون سنه سعيده وجميله عليكي الصداقه موجوده بس احنا بقينا بنخاف من حاجات كتير
شكرا على تواجدك

eng_semsem يقول...

بنوته مصريه
انا شايف ان المشكله حكاية خوف مش اكتر مش كل الناس وحشين ولا كلهم حلوين وبعدين لو انت كنت صديقه مخلصه وانا كذلك واصدقائي اللي بيزوروني واللي بزورهم في مدوناتهم يبقى اكيد في مخلصين وفي طيبين لازم نغير من سلوكنا من تاني للاحسن عشان نرجع نلاقي اصحاب ابقى انا وانت اصحاب لناس تقدرنا ونقدرهم
شكرا على تواجدك

eng_semsem يقول...

موناليزا
الصداقه الحقيقيه هي لازم يبقى فيها اخد وعطاء عشان تعيش وانت من تجربتك اكد حسيتي كده انما الصاحب نحبه في الله ونعمل كل اللي نعمله معاه في الله انما ما اخترش واحد سئ وغادر واقول انا بحبه في الله فقط وفي الاخر محدش بيتعلم ببلاش
شكرا على تواجدك

eng_semsem يقول...

هبه فاروق
في حاجات كتر في حياتنا اتغيرت للاسوا بس لازم احنا نرجعها من تاني ونحاول نحافظ على الحاجات اللي بتمزنا عن الاخرين والصديق هيفضل موجود طول ما في بشر في الكون
شكرا على تواجدك

ليلى الصباحى.. lolocat يقول...

السلام عليكم ورحمة الله

اولا ياريت كل الاصدقاء يسامحونى لتقصيرى فى التعليقات بمواقعهم فانا منذ هذه الاحداث لا اشعر الا بالحزن والألم فأعتذر على تقصيرى اخى الكريم

ثانيا اشكرك بشدة على كلماتك الطيبة وشعورك الجميل الرقيق

بارك الله فيك وياريت كل الناس تفكر بشكل هادىء ويعرفوا كلهم ان لنا عدو واحد بيحاول يدمرنا

ويخلوا بالهم من كل اللى بيحبوهم ومن اصدقاؤهم وينسوا كل اساءة
فخير الاصدقاء من صدقك

جزاك الله خيرا اخى واعزك الله
لك تحياتى

BRiDe Gh0sT يقول...

أول شي الله يخليلك أصحابك .....
لأن الدنيا من دون صديق تبقى موحشة ...
أنا في غربتي إنحرمت من كل حاجة....
خاصة الأصدقاء .......بسبب سكني بمنطقة بعيدة عن الكل(المغتربين زيي)
فإزا لاحظت عندي أحلى صديقين يلي هم أصحابي وما بقدرش اكمل يومي وإلا وهم عم يلعبو وينطوطو قدامي (موني ونوتي) قطي وأرنبي ....:)
غريبة شوية إنك تتخذ حيوان أليف كصاحب إلك مش هيك؟
بس الظروف حتمت علي هيك
الله يفرجها على الجميع
تقبل مروري اخي اسامة
تحياتي.....

Dr : Nour يقول...

الســلام عليكم و رحمــة الله و بركاته


بالفعــل الصــداقة الحقيقية أصبحت نادرة فى زماننا هذا
قلت نادرة .. و لم أقل منعــدمة أو مفقودة !!

أشعر أن المشكلة الحقيقة تكمن فى كل منا و ليس فى الصداقة
فإذا أحسنت إختيار الصديق
بالتأكيد لن تجد الغدر و الخيانة
بل الوفاء و الحب و الإحترام المتبادل

أحيانا يختلط علينا الأمر بين الزملاء و الأصدقاء
الزمالة ربما تخلق نوع من الألفة و الود
و لكنها لن ترقى إلى مستوى الصداقة بسهولة
لذا تجد الخيانة و الغدر مع الزملاء و ليس الأصدقاء

اذا إختيار الصديق الصحيح هو البنية الأساسية لنجاح تلك الصداقة

جميعنا نملك أصدقاء منذ الطفولة ولازالت علاقتنا بهم مستمرة
بالرغم من إختلاف الظروف و المشاغل و ربما الأماكن
و لكن الود لازال قائم و لم ينقطع و لن ينقطع بهذه السهولة
لأن هناك أسس قوية و متينة .. تقوى و تزيد مع مرور السنين

أنا أختلف معك فى نقطة المنفعــة بين الأصدقاء
بالطبع ليس أساس للصداقة
ربما يكون هناك شخص بطبيعته معطاء و لا ينتظر مقابل من أحد
و شخص آخر بالرغم من حبه الكبير و تفانيه و لكن لا يستطيع التعبير الصحيح عن هذا الحب
و لكن تلمس هذا فيه

أعتقد أن الأصدقاء الحقيقيين لابد أن يأخذوا بيد بعضهم فى جميع الأحوال
دون إنتظار المقابل
و يكونوا نعم السند و أعظم مثال للأخوة
و رب أخ لم تلده أمــك

اذا ليس من السهل التخلى عن صديق
بمحو إسمه من الذاكرة أو ذاكرة الهاتف مهما بدر منه
لأنه طالما أضفتـه إلى ذاكراتك و ذاكرة هاتفك
إذا فأنت تملك الكثير له و يمثل لك معنى
وإلا لم يكن له وجود من البداية
وهذا يأخدنا لنقطة البداية و هى حسن إختيار الصديق

سعدت بتواجدى هنا

تحيـ أرق ــاتى

غير معرف يقول...

اسامة انت طبعا عارف نظرتى للحياة مختلفة شوية ووجهات نظرى دائما لاتعجب البعض لكنى مقتنع بها تمام الاقتناع احب اقولك ان الطيور ع اشكالها تقع يعنى لو انت كويس هتلاقى صديق كويس الارواح جنود مجندو فما تعارف منها ائتلف وما تناكر منها اختلف يعنى اية الكلام دة يعنى انا لو مخلص لصديقى وانا كويس من نفسى وبحاب صديقى وبخاف علية ومش هغدر بية اكيد هو كمان هيكون كدة دى حاجة يعنى احب اسالك سؤال انت اسامة راجل كويس وتعمل على الطاعات وانا هيثم ع عكسك تماما دة مثلا يعنى دة افتراض لية انا الوحش اخدك انت الكويس للسوء لية ميكونش العكس انت الى تاخدنى لية كلنا بنفكر فالغير ومبنبداش احنا اكيد المعرف يقابلة معروف والشر يقابلة شر وجهة نظر ابدا بنفسك لتجد صديقك الوفى ولا تنسى من رابع المستحيلات خل وفى لاننا لانفكر غير فانفسنا ولا نغكر فالاخرين

eng_semsem يقول...

ام هريره
اختي ام هريره اشغلنا سماع تلك الاخبار عن ما حدث في شوارع اسكندريه كثيرا ولكني اتمنى من الله ان يكون حدث عابر ولن يتكرر باذن الله ويارب كل واحد يلاقي صديقه المخلص ويحافظ عليه
شكرا على تواجدك

eng_semsem يقول...

bride ghost
اختى العزيزه انا الان اعيش بغربه بعيدا عن اوطاني ولكنى بحثت حولي لاجد شريك لي في حياتي كصديق مخلص واكون له مخلصا ولابد من تواجد الاصدقاء ليس بالضروري طوال الوقت قد يكفيكي في مجال دراستك زملائك او في مجال العمل اصدقاء العمل
بس عندي سؤال ليك لو موضوع وقف قدامك وعايزه تسالي حد بتاخد راي موني ولا نوتي عزيزتي ولماذا نحن هنا وهذا شرف لنا ان نكون اصدقاء لك
شكرا على وجودك

eng_semsem يقول...

dr nour
بارك الله لك في اصدقائك ورزقك الصحبه الحسنه وبالنسبه للنقطه التي تختلفي معي فيها سارد عليكي من كلماتك وانت قد قلت (أعتقد أن الأصدقاء الحقيقيين لابد أن يأخذوا بيد بعضهم فى جميع الأحوال
دون إنتظار المقابل و يكونوا نعم السند و أعظم مثال للأخوة) وده فايده كبيره جدا مابين الاصحاب يساعدوا بعد وياخدوا بايد بعض ويكونوا سند وكانهم اخوه ياريت كل اصدقائي اخد منهم الفايده ده بس وانا برده هديها ليهم بدون شروط وبدون انتظار المقابل
وانا مش همسح حد انا كل ما في الموضوع اني مش هتشارك معاهم حياتي وهيبقى ليهم جزء خاص بيهم
شكرا على تواجدك

eng_semsem يقول...

غير معرف
قصدي الدكتور هيثم مع احترامي الكامل لسيادتك انت مش لسه من يومين بتشتكي من واحد كنت فاكره صديق وعمل معاك موقف بايخ ضرك في شغلك ولما اتكلمت عن الصديق ان بوصفه ليكم اللي عايز اشوفه في صديقي واللي هيشوفه مني هيبقى كده وحكاية الكويس ليه ما يخدش الوحش عشان يتعدل انا معاك هحاول اشوف السئ فيه واساعده لاقيته مش فارقه معاه هسيبه عشان ما يضرنيش بوحشه وفي حاجات عن حاجات بتفرق حاجات ينفع استحملها فيه وحاجات هتضرني فعلا لو مشيت معاه
نورتيني وطمني عليك انت فينك بقالك يومين

miroooo يقول...

اولا كل عام وانت بخير
عندك حق فعلا فى كل كلمه قولتها يا بشمهندس
الصديق هو اهم شخص فى حياتنا بعد الاهل
الاهل لم نختارهم اما الصديق فلابد ان نختاره جيدا
فكرة جميله فى السنه الجديده
ربنا يجعلها سنه سعيده علينا جميعا يارب ويعدى المرحله الصعبه اللى احنا فيها على خير يارب
تحياتى

gogo!sf يقول...

قرار سليم حكيم

كل سنه وانت طيب وربنا يجعلها سنه سعيده عليك يارب

eng_semsem يقول...

mirooo
كل عام والاسلام والمسلمين بخير وحلوه قوي الحته اللي انت قلتيها احنا مش بنختار اهلنا بس ممكن نختار اصحابنا
شكرا على وجودك رغم غيابك فترات كبيره

eng_semsem يقول...

gogo!sf
كل عام وانت بالصحه والسلامه
شكرا على تواجدك

Carmen يقول...

ربنا يرزقك بالخير دايما وجزاك الله خيرا ع هذا اللفت الرائع
تحياتي لك استاذ اسامة

eng_semsem يقول...

carmen
يارب ارزقنا بالخير كلنا وارحمنا واغفر لنا وارزقنا الصحبه الحلوه
اهلا بيكي نورتيني

غير معرف يقول...

كل شىء اتغير فى زمانا
كل حاجه حولينا
حتى ناسها
وانفسنا

من الصعب لما تلاقى الصديق بمعنى الكلمه والفعل والقول


كل سنه وانت طيب يا ابو ملك
وتشوف ملك على خير يارب

eng_semsem يقول...

الحب الجميل
الدنيا لو اتغيرت للاسوا يبقى بسببنا واحنا لازم نتغير عشان هي تتغير وانا عايز اكون صديق انت تتمني تعرفيه وانت لما تعملي نفس الكلام ونحسن في سلوكنا اكيد هنحس بتغيير ولازم نرفض الشخصيات اللي بتلوث الدنيا بمناظر مؤذيه انا ما احبش اشوفها ولا احب بنتي تشوفها ولا احب اي مسلمه تشوفها
كل سنه وانت طيبه انت ومصر كلها باهلها وناسها

مدونة رحلة حياه يقول...

السلام عليكم
باشمهندس
سيدنا عبدالله بن مسعود كان يقول ان الله اصطفى النبى واختار له أصحابه (اولا )
الصاحب ساحب (المرء على دين خليله فلينظر أحدكم من يخالل (ثانيا )
سعدت بوجودى هنا (ثالثا )

eng_semsem يقول...

مدونة رحلة حياه
اهلا بيك ونورتيني وانا اسعد بوجودك وشكرا على اضافاتك المفيده

رحاب صالح يقول...

ابو ملك
صباحك ورد
معك حق
ولابد ان نتبع رسولنا الكريم فينما قاله وفيما كان يفعل
ولن في سيرته وسيرة الصحابة حكم ومواعظ واخلاق
ولكن للأسف الشديد ان الان اصبحت الاخلاق عملة نادرة
ولكن ليس كل شيء بهذا السواد
فكل جيل به الحسن والسيء
والحمد لله اننا نعرف الحسن ونبتعد عن السيء

رحاب صالح يقول...

عايزة ارد علي العزيزة تيرز هنا في كلمات
انا خايفة يجي يوم اجي اتعرف علي زميل لي ف العمل او زميلة تقولي انا فلانة هشتغل معاك انا من المكان الفلاني وانا مسيحية او مسلمة
يعني التعرف بالديانة ايضا
يااااة بجد وصلنا لمرحلة وحشة اووي

غير معرف يقول...

اعظم هبه الخل الوفي

تحياتي

eng_semsem يقول...

rehab
انا مش بحب جملة الاخلاق يبقى عمله نادره لان احنا الاخلاق انا وانت وكل اللي كانوا معانا واللي مش معانا لو احنا شايفين ان اخلاقنا وحشه لازم نطورها ونحسنها وزي ما انت قلتي فيه الكويس والوحش واحنا عايزين ندور على الكويس وياخد حقه يمكن الوحش يتكسف ويعمل زيه.
وبالنسبه لردك على تيرز انا ليا تعليق صغير ان كان معايا مشرف في الموقع اكتشفت بعد حوالي شهر ان مسيحي لما سالت مره انت ربنا مش هيهديك بقى وتحافظ على الصلاه تعالى صلي معانا طبعا هو ضحك وناس كانوا واقفين ضحكوا وانا فهمت بعدين
شكرا على وجودك

eng_semsem يقول...

فتاه من الصعيد
خير الكلام ما قل ودل

اعتراف عاشقة يقول...

السلام عليكم ورحمة الله وبركاته
وكل عام وأنت والقراء بكل خير .

وفعلا الصداقة عملة نادرة الوجود في هذا الزمن الصعب .. يجب علينا أن نحسن إختيار أصدقاؤنا كي لا نقع في المحظور..
تحياتي

eng_semsem يقول...

اعترافات عاشقه
كل عام وانت بخير اهلا وسهلا بيكي في زيارتك الاولى ومهما كانت نادره فهي ضروريه اهم حاجه نختار صح
ونورتيني ويارب تتكرر

BRiDe Gh0sT يقول...

أووووووووه
الله يسلمك أخي أسامة
والله إلي الشرف كون صديقة وإخت لحضرتك
أكيد لأ ....طبعا ما فيني أخد رأي موني ونوتي بشي :( للأسف
بس يعني شو طالع بلإيد .....ملينا من العلاقات الرسمية وإدعاء الصداقات يلي ما بيجي منها غير الحسد والبغض في أغلب الأوقات .... بلنسبة إلي إخترت إني كون وحيدة ببيتي بغربتي أحسن ما أعاشر ناس يكون عندها كبر وتعالي وغرور أو تكون تحسد وتبغض ....وما أقدرش أتأقلم معاها بسبب طبيعة المختلفة بلحياة من تفكير وقناعات ...إلخ
أشكر إهتمامك أخي
ومرورك الدائم لمدونتي
لك مني كل التحية والإحترام

eng_semsem يقول...

bride ghost
ده شرف ليا انا يا عسل انك تكوني صديقتي وده حاجه تفرحني وبعدين انا معاكي انك ما تصحبيش اللي بيحسد والمغرور واللي بيبغض واللي عندهم كبر وده تكمله لموضوعي ان انت تختاري اصدقائك صح بس بلاش تعيشي وحيده عشان الاشباح والجن ما يطلعوا ليك عشان انت ضعيفه ولوحدك
شكرا على وجودك