الثلاثاء، 23 أبريل، 2013

قطار الحياه (4)


عدت من بلاد الغربه باحثا عن وطني وعن اهلي واصدقائي بعد غياب عامين متصلين فوجدت من غادر الحي من الجيران وانضممت للمدرسه الثانويه بالصف الاول وهكذا ارى وجوها جديده لم اكن اعرفها جاءت من مدارس مختلفه ابحث بينهم عن اصدقاء الابتدائيه او من تعرفت عليهم بالصف الاول الاعدادي وهناك منهم من توجه للتعليم الفني الصناعي او التجاري او الزراعي وكانت البدايه سيئه للغايه حيث لاحظت الفرق بين مستوى التعليم ومستوى المدارس والمدرسين وكذلك الطلبه فهناك فرق بعد ان كنت اجلس في المقعد الخاص بي اصبحت اجلس في مقعدا يشترك معي الاخرين بعد ان كنت استخدم الاقلام الفلوميستر على السبوره البيضاء اصبحت استخدم الطباشير على تلك اللوحه السوداء ولكن هكذا يتعلم الجميع وبدات اعتاد الوضع واتكيف رغم عدم وجود اي مكيفات بالفصل وكان فصلي السابق به جهازين . 
وانتهى الصف الاول بدرجات منخفضه ولكن مرت بسلام وانتقلت للصف الثاني الثانوي واردت وكنت احلم بالالتحاق بكلية الهندسه ولكن الطمع جعلني اسجل احياء وكيمياء ورياضه (1) وبعد مرور شهر او اكثر من الدراسه قررت الوزاره الغاء ماده والغاء نظام الشامل اما ان تاخذ رياضه او علوم وكان اختياري ان اترك الاحياء رغم اني كنت قد ذاكرت فيها جزء كبير من قبل بداية الدراسه وكنت في الصف الثاني لا احب كثيرا الذهاب للمدرسه حتى انها في احدى المرات في حصة الفرنسيه قام المدرس بسؤالي هل انت في هذا الفصل وما اسمك وبحث في الكشوف عن اسمي وسال احد الطلبه هل تعرفه ام لا .
وكان من اكثر المواقف الغريبه التي تعرضت لها بعد تغيير هذه الماده كنت ذاهب للمدرسه متاخرا ومازلت اتمشى في طرقة المدرسه حتى فاجائني المدير في وجهي وسالني انت في فصل كام قولت ليه 2/4 مين المدرس اللي خرجك من الفصل وخارج ليه واخدني ورايح على الفصل عشان يتخانق مع المدرس وصلنا هناك دخل سلام عليكم انت خرجت الطالب ده ليه قاله المدرس ده مش عندي في الفصل وفتحوا الكشف مش لاقوا اسمي قالي انت من المدرسه هنا قولتله ايوه بس انا نسيت لم اجلت ماده اتغيرت الفصول وبقيت في 2/7 روحنا على هناك مش لاقيت اسمي وبس كان هيطلب ليا الشرطه على اني مش من المدرسه ونزلنا تحت عند الوكيل فضلت انا وهو ندور على اسمي في اي فصل لحد الحمدلله لما لاقيته وكان شكلي بايخ قوي قوي ...
المره التانيه كنت جاي متاخر واقف قدام الباب جه شيخ ازهري وقالي تعالى وانا هدخلك وقف على البا وكلم الناظر وقاله معليش هو غصب عنه اتا خر الناظر وماله مفيش مشكله ونادى ليا وقالي ادخل دخلت وقفل الباب وقالي اقف جنبهم هنا انت هتضحك عليا وقفت وبسالهم هو بيعمل ايه قالوا بيضرب عصيتين قولت في عقل بالي هو انا جاي ليهم عشان انضرب يدوب لف وشه وكنت على السور من فوق ينادي عليا وانا اقوله مش نازل انا غلطان اني جيت ليكم اساسا وعلى البيت عدل .
وعمري ما انسى في ايام الثانويه احلى يوم في الاسبوع يوم الخميس كنت دايما في اليوم ده على الساعه 11 اخرج من المدرسه واطلع على بيت عمتي واقعد عندها اتغدى معاهم وبعدين اروح على البيت كانت ايام جميله وعدت وخلصت وانتهت ايام الثانويه وانتقلت الى الجامعه بمدينة 6 اكتوبر لمحطه جديده في الحياه .
يتبع 

هناك 10 تعليقات:

ليلى الصباحى.. lolocat يقول...

ولازلنا نتابع معك محطات قطارك يا اسامة :)
وأسأل الله تعالى ان يصل للنهاية بسلام وسعادة

صباحك ياسمين.... وتحياتى بحجم السماء

موناليزا يقول...

موقف تعجبك من عدم وجود مكيفات في الفصل ذكرني بموقف أول يوم تم قبول تعييني في مدرسة خاصة .. كنت معتقدة إني هكون في مكان هاي كلاس لقيتها مدرسة عادية ماتفرقش كتير عن الحكومي وسألت المدرسات القدامى فعلاً أنتوا ازاي بتدرسوا في الحر ده هو مفيش تكييف :) طبعاً فكروني بهزر أو جاية أتنطط عليهم بس أنا كنت وقتها بتكلم بجد ولما لقيت إن مفيش أمل قلت برجاء طيب هاتولي مروحة أنا مش هطيق الجو ده.. طبعاً خدوها بهزار وسخرية والمِس الجديدة بنت ناس ومش واخدة على الجو ده ^_^

عن أيامي في ثانوي فكانت من أجمل أيام حياتي.. أصلي كنت بذاكر بجد :) وأنا من يومي غاوية علام ^_^

متابعة معاك .. استمر :)

eng_semsem يقول...

ليلى الصباحى.. lolocat
صباحك ورد يا ست الكل
كلها محطات مرت وبنسال ربنا السلامه والنجاه والسعاده
اهلا بيكي

re7ab.sale7 يقول...

هههههههههههه
حلوة حكاية انك مش فاكر فصلك دي
انا كنت مش بتغير خالص
كنت دايما من الابتدائي للاعدادي ف فصل اول عشان مكانش في غير رحاب واحدة بس ف الصف وف المدرسة كلها
بس الثانوي بقيت ف فصل ثالت ومعايا خمسة رحاب غيري ههههه
جميلة حكاياتك متابعة معاك

غير معرف يقول...

كنت بتحب يوم الخميس عشان بتروح فيه بدرى !!!!!!!
هو انت كنت بتشوف المدرسة أساسا
يا فاشل يا فاشل :P

eng_semsem يقول...

موناليزا
انا فصلي اللي كنت فيه في اعدادي كان فيه اتنين مكيف اجي مصر الاقي لمبه صفرا وضع صعب وتغيير كبير
اهلا بيكي

eng_semsem يقول...

re7ab.sale7
انا كان حضوري في المدرسه كضيف وزائر مكنتش مقيم فيها ولا بروح غير لما يكون في موضوع مهم
اهلا بيكي

eng_semsem يقول...

غير معرف
انا مش كنت بحبه عشان بروح بدري انا كنت بحبه عشان بروح عند عمتي فيه
اهلا بيك

ريوبى يقول...

موضوع ممتاز
ryobi

E73 يقول...

المهم في النهاية حضرتك طلعت في فصل 2 كام؟

محطات ممتعة وكثيرة ومتعبة

متابعة