الجمعة، 22 فبراير 2013

غربه


مسافر من زمان لدرجة أني نسيت أمتى بدأت رحلتي وعلى فين واخداني خطوتي ومكمل مستني النهايه اللي هبدأ منها الرجوع لدنيتي اللي نسيتها او خلاص معدتش عارفها أو هي تعرفني .

طال السفر وطالت المسافات ما بيني وبين نفسي ومستمر في البحث عن ذاتي بين اوراقي وايامي وحياتي مش لاقي غير أسم مكتوب وصوره جنبه بتقول ان ده انا .

أخدت صورتي ووقفت قدام مرايتي أتاكد أن أنا لسه أنا ولاقيت في شبه ما بينا بس لاقيت أختلافات كتير يمكن زمان كنت أنا انما دلوقتي بحاول أني أكون أنا بس المشكله اني مش فاكر أوصافي مش فاكر طريقة تفكيري مش عارف أنا كنت مين وبقيت كده أزاي مش عارف انا رايح لفين ولفين واخداني دنيتي .

تايه من نفسي خايف من بكره ناسي امبارح وكتير بحس اني بدور عن حاجه ومع الوقت أحاول افتكر ايه اللي أنا كنت بدور عليه الاقيه ضاع مني ويمكن أنا في الاساس مش لاقي حاجه أدور عليها او يمكن في الاصل أنا كنت بدور على نفسي ما بين صور مرسومه في خيالي كنت فاكر اني في صوره منهم ليا.

يا أهل الخير أفيدوني لو حد يعرفني لو حد يعرف أي شئ عني يفكرني لو حد يعرف أنا فين ومفروض أكون فين يوجهني لو حد يعرف حد يعرفني ينورني لو حد شافني يقولي على مكاني عشان اروحلي لو حد يقدر يقولي مين انا يكتبلي لو حد قابلني يوم من الايام يوصفني يمكن اعرفني لو حد يعرف لون بشرتي او طولي او ملامحي يرسمني جايز أقابل نفسي من نفسي .


هناك 20 تعليقًا:

عاشقة الشتاء يقول...

الغربة عن النفس أسوأ أنواع الغربة
كلنا بيجي علينا وقت بنحس بالتوهان ده
بس الوقت ده بيعدي ونكتشف ان في حجات جميلة احنا عايشين عشانها
و الأيام تاخدنا وتشغلنا حتى عن نفسنا ونبتدي ننسى كل حاجة بتوجعنا ..

ظلالي البيضاء يقول...

شعور الضياع هذا مؤلم للغاية ..
أرجو أن لا نتوه من أنفسنا ولا نتوه في دنيانا ..
لو كنت أعرفك قبل أن تتوه لأوصلتك إليك ودللتك عليك ..
كل التحية وكل التقدير وأمنياتي لك بالخير ..

ليلى الصباحى.. lolocat يقول...

كم هو شاق على النفس الشعور بالغربة والوحدة القاتلة فيها

لكن ربما تجتاحنا هذه المشاعر ونحن بوطننا وبين احضان احبابنا
فنحن دائما من نصنع الوطن باصرارنا وارادتنا باذن الله والصبر

لكن لانك انسان رقيق المشاعر دافىء الاحساس فهذا الشعور بالنسبة لك ( الغربة ) يعتبر قاتل وصعب كتير

اعانك الله اخى وصبرك وكم آلمتنى كلماتك فهى تخرج من القلب وبصدق

اتمنى لك حياة طيبة وهدوء حال وبال ويمن الله عليك بعودة طيبة لاهلك واحبابك وبين احضان كل من تحب

تحياتى لك اخى بحجم السماء

reemaas يقول...

اصعب انواع الغربة يا سمسم انك تتغرب عن حالك ومتتغير ملامح روحك لدرجة انت ماتعرفهاش التغيير حاجة اجبارية بس لازم تحاول على احلى حاجة فيك تربط باللى كان

eng_semsem يقول...

عاشقة الشتاء
ربنا يعدي الوقت ده على خير
اهلا بيكي

eng_semsem يقول...

ظلالي البيضاء
تحياتي لاخي وصديقي محمد وربنا يفرجها عليكم في سوريا
تحياتي

eng_semsem يقول...

ليلى الصباحي
ربنا يرزقنا جميعا السعاده
واشكرك على دعواتك الجميله
تحياتي

موناليزا يقول...

عارفاه أنا الشعور ده :(
لكن هيعدى
هتيجى على أهون سبب وهتلاقيه بيعدى

مش عارفة أقولك وصفة سريعة
لكن عليك بالدعاء
وربنا كبير

مصطفى سيف الدين يقول...

كلنا عايشين في غربة يا اسامة يمكن الغربة بتاعتك اهون على الأقل متغرب و انت عارف انك متغرب
غيرك متغرب و عايش في سراب
ربنا يزيح عنك كل هم

eng_semsem يقول...

موناليزا
ملنا ش غير ربنا نلجا ليه
اهلا بيكي

eng_semsem يقول...

reemaas
بحاول افتكر انا كنت ايه وبقيت ايه وربنا يستر والاقيني
اهلا بيكي

eng_semsem يقول...

مصطفى سيف الدين
انا بقيت متردد وخايف جدا من بكره
وربنا يستر
اهلا بيك صديقي العزيز وكل عام ومدونتك بخير

richardCatheart يقول...

كل انواع الغربة دانيئة غربة الوطن غربة الروح غربة الجسد بس بعد الاحساس بيها بفترة طالت او قصرت بتكون انسان جديد بقايا اللى كان بتظهر لو حدها حتى لو ماكنتش شايف منها شىء دلوقتى وبتختلط وتتبلور مع الانسان الموجود دلوقتى والنتاج انسان جديد بفكر وحياة جديدة

ربنا يردك ويرد كل مغترب عن نفسة وعن ارضة بالخير

صباحك فل

افكار مبعثرة يقول...

و ما اقساه من شعور تلك الغربة عن النفس
تظل تدور في الدائرة تسال نفسك لعلها تجيبك تدور بعينين تائهتين تبحث عن اثر هنا او هناك تستنجد بمن حولك ليذكروك كيف كنت لعلك تعود
تحاول و تحاول و تحاول حتى ان ترغم نفسك على عمل ما كنت تعتاده لعلك تعود
حالة قاسية تاخذ وقتها و تذهب بعيدا او هكذا نامل
تحياتي

جميله المصرى يقول...

السلام عليكم

والله مش عارفه اقولك ايه لانى كتير بحب اتابع مدونه حضرتك فى صمت بس المره دى حسيت انك بتكلم عنى .. الحاجه الاصعب من غربتك هى انك تتغرب فى بيتك فى وطنك ومع اهلك اللى المفروض انهم اقرب الناس ليك . بس مع ذلك تحس انك لوحدك ومحدش حاسس بيك بتصرخ لوحدك وتبكى لوحدك وتحلم لوحدك وتحس انك عايش فى مدينه الظلال كلها ظلال لكن انت الوحيد اللى انسان فيها .. واخير اقدر اقولك لا تحزن يا اخى الكريم فلست وحدك من تشعر بالغربه ولكن هناك الكثير من يشاطرك نفس الشعر ولكن احمد ربنا وتمنى ان تجد احد يملئ قلبك بالسعاده ويسكن به فلن يعد بعدها شعورك بالغربه ابدا ..تمسك بالامل ..

اختك جميله أم مريم

حنين محمد يقول...

صباح الغاردينيا آسامة
عارف أصعب إحساس لما تحس بالغربة
مع نفسك تبحث عن آسامه ولاتجد له ملامح "
؛؛
؛
عارف الاغنية هذي بحب أسمعها
لما بحس أني لوحدي رغم كل الي حولي
؛؛
؛
كن بخير ياصديقي وتعلق بـ الحلم والأمل
ولاتيأس من رحمة الله مهما عصفت بك الغربة"
؛؛
؛
لروحك عبق الغاردينيا
كانت هنا
reemaas

eng_semsem يقول...

richardCat
ربنا يتقبل منك الدعوات ويارب كل واحد متغرب عن اهله عن بلده عن نفسه يلاقيهم
اهلا بيكي

eng_semsem يقول...

افكار مبعثرة
وكم اتمنى ان تذهب بعيدا تلك الحاله
اهلا بيكي

eng_semsem يقول...

جميله المصرى
نورتيني بزيارتك واتمنى كل غريب ان يجد ما يبحث عنه او يجد من يبحث عنه
اهلا بيكي

eng_semsem يقول...

ريماس
وكم اتمنى ان اجد احلامي او ان اجد نفسي او ان اعيش فقط
اهلا بيكي