الأربعاء، 4 يوليو، 2012

اعترافات مدون

س : عرف نفسك ؟؟؟
ج  : الاسم اسامه ناصر      المهنه مهندس            السن 30    
     الحاله الاجتماعيه : معقده على الاخر 
س : ما أكثر مايميز شخصيتك ؟
 ج  : بحاول اكون مع ناس كتير دايما وبحاول اكون في كل مكان وبحاول اكون قريب من كل انسان اعرفه وبرده بحس بالوحده .
س : ما هي اهم نقطة تحول في حياتك ؟ 
ج : نقطة نهاية زواجي الاول 
س :كيف دخلت الى عالم التدوين ؟
ج : كان نفسي اكتب واحتفظ باللي انا كاتبه في موضوع معين عشان مش انساه طول حياتي ولاقيت اللي انا عاوزه في عالم التدوين واللي ساعدني في انشاء المدونه صديق ليا اسمه محمد علي 
س : ما اسم مدونتك ولماذا اخترته ؟؟
ج  :اسم المدونه باب مقفول واختياره فيه فكره اني عايز اقفل الباب على اي شئ يسيب حزن جوايا اي شئ يتحكم في حريتي اي شئ اكرهه في حياتي واكتشفت ان الباب الوحيد اللي بيتقفل باب عليا انا ويمنعني من الحياه .
س:صف مدونتك ؟
ج : الحاله النفسيه الخاصه بيا مترجمه على شكل كلمات 
وهي تعبر عن قناعاتي تحتمل الخطأ والصواب 
س :من هم اكثر ثلاث شخصيات اثروا بك من داخل عالم التدوين ؟ وخارج عالم التدوين ؟
ج :من داخل عالم التدوين في شخصيات كتير ارتبطت بيها دون سابق معرفه او حتى على الفيس وكان ده دافع اني اتعرف عليهم اكتر.
من خارج الفيس اكثر شخصيه بحاول اتعلم منها وليها تاثير كبير عليا والدي بلا منازع ومن بعده جدي الله يرحمه كنت دايما بحس اني بستفيد منه كتير والشخصيه التالته الحابي اسامه ابن زيد كنت بحاول دايما اعرف عنه يمكن ابقى زيه .
س :ماهي طقوسك الخاصه عند الكتابه ؟
ج : تيجي الفكره الاول وادرسها في دماغي وممكن اكتبها في ورقه وبعدين اكتبها وممكن ده ياخد يوم او اتنين .
س:ما هو الاسلوب المفضل لديك في التدوين ؟
ج : انا دايما بحاول التجديد استخدام طريقة السؤال والجواب في واجبات تدوينيه وغيره استخدمت القصه القصيره حاولت اكتب شعر خواطر احداث حقيقيه مقال بحب التغيير .
س :في رايك ما اهم ما يميز تدويناتك ؟
ج : اهم حاجه انها تعبر عن رايي الشخصي واحترم من يختلف معي تماما مثل احترامي من يتفق معي .
س :ما هو تقييمك لعالم التدوين في الفتره الاخيره ؟
ج : حاسس ان في انفصال ما بين الاجيال والظروف السياسيه اللي بتمر بيها مصر اثرت بشكل قوي عليه معدتش نشيط زي الاول .
س : اختر اقرب التدوينات الى نفسك وضع رابطها وحدثنا عنها ؟
ج : اقرب تدوينه ليه بعنوان كذاب 
رابطها :http://osamanasser.blogspot.com/2011/03/blog-post_28.html
سبب قربها ليا اني حاسس اني واقف في نفس النقطه ده من زمان ومهما الف وابعد عنها بلاقي نفسي راجع فيها ويارب اخلص منها .
س : استعرض اهم المواقف الغريبه او الطريفه التي صادفتك مع التدوين ؟
ج : كان في متابع ليا بيوقع باسم Dr Nour وعلقت عندي اكتر من مره وهي مش ليها مدونه ومكنتش بلاقي ليها تعليق عند اي حد من اللي انا بزورهم وبصراحه شكيت انه حد يعرفني لحد ما مره مش قدرت امسك نفسي وسالت انت مين وقالت انها بتتابع مدونه صديقه بس ليها صديق اسمه اسامه ناصف وعنده مدونه وحاطط نفس الصوره بتاعتي وكمان بيشتغل مهندس بصراحه قرب الاسم مع كل التوافقات ده مكنتش اتوقع اني اقابلها في عالم التدوين .
س : هل احدث التدوين تأثير عليك ؟ وكيف ؟
ج : التدوين احدث عليا تغيير جذري انا اول ما دخلت التدوين كنت اضعف مايكون او تقدروا تقولوا حاله يرثى لها بسبب مشاكل شخصيه كبرت جدا لدرجة اني حسيت ان خلاص دوري في الدنيا انتهى وماكنتش اظن اني هعيش لحد اللحظه ده ووقف جنبي وشجعني بكلمه بدعوه باحساس كتير من المدونين وعملت بوست مخصوص اشكرهم فيه وهفضل طول عمري فاكرهم وفاكر وقفتهم جنبي في اصعب لحظات حياتي .
س : اختر اي مدون ووجه ليه سؤال ؟
ج : صديقي واخي الذي احبه في الله ولم اتقابل معه اخويا خالد سواح في ملك الله نفسي اساله انت ليه مش عايز تدخل عالم الفيس عشان نتشرف بمعرفتك اكتر ؟؟؟
اشكرك وان كنت اطلت عليكم اعذروني فالحديث معكم ممتع 
اسامه ناصر 

هناك 21 تعليقًا:

شيرين سامي يقول...

إحنا اللي إستمتعنا بحديثك يا أسامه و بجد إنت إنسان طيب جداً و إجتماعي بشكل لطيف أعتقد كل الناس صحابك :)

بتمنى لك كل التوفيق و النجاح و السعاده في حياتك

و نفرح بيك عن قريب :)

مصطفى سيف الدين يقول...

حبيبي و اخويا سمسم
يا عم افتح بابك للفرح و متقلقش كل حزن وراه فرح
و حالتك الاجتماعية بقى معقدة ليه و انت خاطب و كلها شوية و تتجوز يعني و لا مش عايز حد يعرف :)
خلاص مرسي الزملكاوي بقى ريس و بكرة الزمالك ياخد كل البطولات و الدنيا تزهزه :)
تحياتي يا عزيزي

Menna يقول...

سعدت بالتعرف على حضرتك يا بشمهندس اسامة
و اتمنى ان تختفي لمحة الحزن من كتابتك في القريب باذن الله
تحياتي :)

سواح في ملك اللــــــــــــــــــه- يقول...

اخي وصديقي اسامة


سعدت جدا بالتعرف عليك عبر كلماتك

وأجابة سؤالك اخي

اني ارتاح للمدونة اكثر من عالم الفيس بوك

احسه عالما صاخبا

ولكن تحت امرك صديقي

قريبا سوف انشئ صفحة

تحيتي لك

ليلى الصباحى.. lolocat يقول...

شخصية هادية ومتواضعة وبسيطة ولك روح الاطفال فى برائتها
كلنا نتشرف بمتابعتك يا اسامة

اسعد الله حياتك ويارب تعود لبلدك وتبظل غربة وتستقر ونفرح فيك :)
اراح الله حالك وبالك اخى الكريم

تحياتى الدائمة لك

;كارولين فاروق يقول...

سيب الحزن وارميه وراك
ولا يهمك وافنح بابك وابتسم
عموما سعدت بحديثك
تحياتي

شمس النهار يقول...

اهلا بيك في اسرة التدوين
انا بعتبر بلوجر دكتور نفساني ببلاش

تعرفت عليك اكتر
من كلامك
:)

كريمة سندي يقول...

بجد حوار شيق قرأته هنا .. وكم هو جميل أن نعترف بنقاط قوتنا رغم حزننا الشديد تحية ود وتقدير

re7ab.sale7 يقول...

اسامة مش طيب يا جماعة زي ما انتم فاكرين
لالالالالالالالالالا
اسالوني انا
لعلمكم مش عايز يعزمنا علي فرحه
طيب ابقي اعملها يا اسامة وانا ابوظ لك الفرح
هههههههه
مبسوطة اني عرفتك وكان لي الشرف اني شوفتك
وبجد مش عشان احنا بلديات
بس حسيت طيووووب اووي وده مش دايما في الرجالة ههههه
عشان كدة خفت منك شوية
ههههه
مبسوطة بمعرفتك
وسؤالك عن الاخ سواح ف ملك الله بجد ف محله لانه من الناس اللي بحترمهم جدا وبتمني معرفتهم

ahmed said يقول...

مساء المكان وما حوى
" سمسم "
:
تشرفت بالقدوم هنا
وقراءتي لأجاباتك الراقية التي تدل
على فكر صاحبها وتمرسه في الحياة
تشرفت بك أخي العزيز
كل التحية .

..
..
..

أحمــ سعيـد ــد

eng_semsem يقول...

شيرين سامي
اشكرك جدا مبدئيا على الدعوات الجميله وعلى الدعوه اللي رجعت كتير لعالم التدوين
اهلا بيكي دائما يا دكتوره

eng_semsem يقول...

مصطفى سيف الدين
حبيبي واخويا اللي كان نفسي احضر حفل توقيع كتابه وعقبال يارب ما احضر حفل زفافك انت كمان هههههههههه انت اللي ابتديت
دائما ما اسعد بتواجدك

eng_semsem يقول...

Menna
وانا اسعد بوجودك واتمنى ما تمنتيه والله بس اعمل ايه
اهلا بيكي

eng_semsem يقول...

سواح في ملك الله
اخي العزيز الذي اعتز بمعرفته دون ان اراه احنا بنقول صفحة الفيس عشان نقرب اكتر من غير ما تشغلك عن مدونتك
واشكرك على تواجدك الدائم وفي انتظار صفحتك على الفيس
اهلا بيك

eng_semsem يقول...

ليلى الصباحي
اختي العزيزه التي طالما استمتعت لدعواتها في كل تعليقاتها واتشرف دائما بوجودك وتعليقك
اهلا بيكي

eng_semsem يقول...

كارولين فاروق
نفسي اسيبه والله بس هو ماسك فيا وحالف ما يسبني وكل ما انساه يرجع يفكرني
اهلا بيكي دائما

eng_semsem يقول...

شمس النهار
بلوجر عياده مليانه دكاتره شاطرين وهم كل الاصدقاء من المدونين بنعالج بعض ممكن عشان بنحس ببعض
اهلا بيكي دائما

eng_semsem يقول...

كريمه سندي
انا عرفت نفسي اكتر هنا في المدونه من اشخاص نصحوني او ساعدوني اني اعدى على ضعفي
اهلا بيكي دائما

eng_semsem يقول...

re7ab.sale7
مش عارف اقول ايه يا بنت بلدي بس يارب اكون عند حسن ظنك
واخونا سواح قرر هيفتح صفحه خلاص
اهلا بيك

eng_semsem يقول...

ahmed said
اهلا بيك في مدونتي المتواضعه واتمنى اني اكون ستحق كلامك وتتوالى زياراتك
اهلا بيك

gogo!sf يقول...

يا شيخ حرام عليك هههههههههههههههههههه عينى وجعتنى انت مش بترحمنا ابدا

صباح الخير يا اسامه
اجاباتك صريحه وتلقائيه اوى
ربنا يسعد قلبك
ويبعد عنك اللى انت نفسك انه ينتهى من حياتك