الخميس، 16 فبراير 2012

خد بالك





حاجات كتير بتحصل في حياتنا ممكن مش بنحس بمعناها بس اكيد ليها معنى وقوي ولازم ناخد بالنا منه انا هكتب كلام قابل للخطأ والصواب بس انا حاسس كده وفاهم كده لو في غلط انا مش بزعل من اي نقد .
احيانا بنروح في النوم ونقوم مش حاسين نمنا كتير طيب شبعنا ولا محتاجين تاني كمان شوية نوم احنا قومنا عشان سبب واحد ان الميعاد اللي مفروض نصحى فيه جه وغالبا ده حاجه من الاتنين ان انت قبل ما تنام عقلك بيفكر في حاجات كتير ومشغول بحاجات كتير ملهاش حلول عندك وصحيت لقيت نفسك زي العاده مش لاقي برده حلول طبيعي مش هتحس انك نمت او ما نمتش وممكن تكون لانك نمت لانك مش لاقي حاجه تعملها او نمت عشان مفيش حل تاني غير انك تنام .
في ناس بتنام ومش بتشوف اي احلام لفترات طويله شهور ممكن توصل لسنه مفيش اي حلم  اكيد ده مش من فراغ اكيد في سبب ممكن عشان طول فترة الصحيان بتاعتها مقتنعه تماما ان الاحلام مش بتتحقق وممكن عشان قبل ما تنام خايف تحلم لان كل احلامك حتى لو كانت حلوه بتقلب بكابوس كبير بتعيشه وانت صاحي  ممكن عشان انت مش عندك احلام اساسا كل اللي شاغل تفكيرك ان النهارده خلص وبكره احتمال يجي .
كتير بسرح وفي نص يومي واسال نفسي سؤال خطير هو النهارده ايه ؟؟
السؤال ده مش سهل لان غالبا حاجه من الاتنين الحياه ماشيه بسرعه جدا لدرجة انك مش قادر تعيشها او مش قادر تلحقها او لانك مش حاسس بقيمه للايام اللي انت عايشها حاسس ان كل يوم بيمر عادي مفيش جديد زي ما انت ولو سالت نفسك انا عملت ايه امبارح تلاقي مش عارف تفتكر كام ساعه منهم .
لو بتضحك والضحكه ماليه وشك ولاقيت بدون مناسبه دمعه نازله من عينك ده مش عادي لان ده معناه حاجه من الاتنين انك صاحب قلب رقيق جدا لدرجة ان كتر الضحك بيخليك تدمع او لان قلبك موجوع قوي لدرجة انه مش قادر قلبك يسمع ضحكتك وضحكتك بتصحي اوجاعك من جوه قلبك .
لو شوفت فيلم اسف على الازعاج وشوفت اللقطه اللي كان بيحاول احمد حلمي يتعلم فيها ازاي يضحك  وحسيت بيها قووي يبقى انت اكيد موجوع واكيد بتعاني من مشكله مع الضحك مثلا تحاول تشوف فيلم كوميدي عشان تضحك مش عشان الفيلم حلو لا عشان تثبت لنفسك انك بتعرف تضحك وغالبا نظرة الالم بتكون معاك في اخر الفيلم لانك بتكتشف انك مش عارف تضحك .
لو حد سألك نفسك في ايه وقعدت تفكر كتير ده مش طبيعي لان الطبيعي انك تلاقي حاجات كتير انما انت جواك حاجات كتير بس حاسس انها صعبه ومش هتتحقق وتقول في سرك بلاش انطقها او لانك فعلا عايش النهارده ومش بتفكر بكره في ايه .
لو نزلت تتمشى بليل ولما رجعت بليل حاولت تفتكر هي السما كان فيها نجوم ولا الغيوم كانت مخبياها هو القمر كان بدر ولا هلال ولا مكنش ظاهر اساسا ولاقيت نفسك مش فاكر خالص ده مش  عادي ازاي وانت طول الليل بره والسما بتغطيك في كل مكان ما فكرتش للحظه تبص لفوق ودايما باصص قدامك بس اكيد ليه سبب وانا بقول لانك بتفكر تعيش ومستني الليل ينتهي بيوم جديد زي غيره او لانك مش مستني جديد من السما اكيد لونها اسود داكن وممكن تكون النجوم ظاهره وممكن يكون القمر طالع وممكن لا مش فارقه وكيد شوية ساعات ويجي نور الشمس يطفي نورهم .





هناك 24 تعليقًا:

كريمة سندي يقول...

أحاسيس ملخبطة خالص بتمر بينا من فترة لأخرى فهمه إزاي نمر بها الله المستعان وربنا يقويك يارب

ليلى الصباحى.. lolocat يقول...

الحياه ماشيه بسرعه جدا لدرجة انك مش قادر تعيشها او مش قادر تلحقها

تقريبا اخى الاتنين مع بعض :)


بوست قلب علينا المواجع كتير
صدقنى اخى الكريم كلنا بنعانى من كل الاعراض دى
لكن بالنهاية لازم نصارع بقوة اى اكتئاب او خمول فى الروح علشان نقدر نواصل الحياة برضا وارادة واحتمال

تحياتى لللنصيحة ويارب اقدر اخد بالى :)

دمت بخير

هبة فاروق يقول...

ههههههههه ده انا مش لوحدى بقى اللى بيحصلى كده
تعرف انى اطمنت على نفسى كل اللى قولته انا تقريبا مريت بيه
انت قولت كل اللى كان فى نفسى اقوله
الظاهر دى حاله عامه
يارب يبقى فى شىء جديد سعيد يكسر الملل والكأبه والروتين
تحياتى

مصطفى سيف الدين يقول...

كلنا ذلك الرجل يا صديقي
مشاعر متضاربة امنيات ملخبطة و حياة اشبه بالعبثية

سواح في ملك اللــــــــــــــــــه- يقول...

هو الانسان ايه غير شوية مشاعر متضاربة

ينتقي ايهم في الوقت المناسب ليه

الدوشة والضوضاء والالتزامات الكتيرة بتلخبط دايما المشاعر

تحيتي يابشمهندس

eng_semsem يقول...

كريمه سندي
نورتي مدونتي من جديد
ربنا يعين كل واحد مننا ويعدل لينا ظروفنا للاحسن
اهلا بيكي

eng_semsem يقول...

ام هريره
متهيالي والله اعلم شريك الحياه ليه عامل كبير في اننا نعدي الظروف ده هو اللي يقوينا نقوم ونكلم وهو اللي يكون عامل سلبي يدفعنا للياس
اهلا بيكي اختي الغاليه

eng_semsem يقول...

هبه فاروق
لا مش لوحدك كلنا هذا الانسان
ربنا يصلح احوالنا ويصلحنا ويصلح لينا دنيتنا
اهلا بيكي دائما

eng_semsem يقول...

مصطفى سيف الدين
مش عارف حاسين ان احنا تايهين واحيانا نحس ان احنا ماشيين في الطريق الصح
ربنا يصلح الاحوال لينا
اهلا بيك اخي العزيز

عمرو يسرى يقول...

كلنا هذا الرجل ماشين شمال فى يمين
متلخبطين مش عارفين شمال من يمين

richardCatheart يقول...

حلو اوى البوست يا سمسم وحقييقى فعلا

هاقولك ايه اغلبنا بقى كدا وادينا كلللللللللللللللنا بنحاول

صباحك فل يا صديقى واخى

;كارولين فاروق يقول...

حاقول لك شئ كتبته في خواطري
الدنيا تحتاج من لا يفهما حتي يفها
كان هناك زميل ايام الدراسه كان
يتمني ان يكون من المجانين اللي في الشارع
لانه عقله علي طول شغال
وانا موافقه هذا الرأي لاني عقلي شغال
علي طول منذ لحظه صحوي من النوم دائما احب ان احلل كل شئ وافتته حتي يقتل بحثا وكل ده في المصنع الموجود داخل عقلي
المهم مقالتك كلها صحيحه هذه اشياء بتحدث لنا بين كل فتره واخري
تحياتي وتقديري

miroooo يقول...

بوست غاية فى الجمال و الروعة
بجد عبرت عن احاسيس كتير بتدور جوانا
هى دى الحياة لازم هنعيشها سواء فهمناها ام لم نفهمها
تحياتى

eng_semsem يقول...

سواح في ملك الله
مشاعر متضاربه وتوهان واحيانا توقف الاحساس من كتر الالم كمان
اهلا بيكك دائما يا صديقي العزيز

eng_semsem يقول...

الموجي
طيب وبعدين هنوصل كده ولا ماشيين وخلاص
اهلا بيك

eng_semsem يقول...

صباحك نرجس ومنوراني
بس كده مش حلو ان احنا نبقى كده وبعدين ممكن نكمل قد ايه في حياتنا واحنا كده
اهلا بيكي اختي العزيزه

eng_semsem يقول...

كارولين فاروق
وجهة نظر برده وعارفه ممكن كتير لما يشوف حد مجنون يفكر ياترى ايه اللي حصل ليه خلاه يبقى كده ياترى ممكن اكون في يوم زيه
بس ربنا يسترها علينا مصر محتاجه شويه يفضلوا عاقلين هههههههه
اهلا بيك دائما

eng_semsem يقول...

miroooo
الاجمل وجودك في مدونتي الذي يزيدني شرفا
بس هنفضل عايشين كده وخلاص مش فاهمين هي واخدانا فين
اهلا بيكي دائما

BNT ELISLAM يقول...

وجعتنى يااسامه معرفش ليه
بس كل الى عرفه ان يارب يبدلنا طموحات واحلام نقدر نحققها
بس غمتنى على بليل كده ينفع بقى هيجلى نفس اتعشى ازاى

جايدا العزيزي يقول...

الله رائعه جدا اسامه

يسلم احساسك

تحياتى

ريري كربكه يقول...

بوست حلو اوي يا بشمهندس
وفعلا اناكمان بمر بكل ده
تسلم ايدك

eng_semsem يقول...

BNT ELISLAM
يسعدني وجودك دائما بين طيات مدونتي المتواضعه ومش تقلقي هتلاقي حاجه تانيه تفتح نفسك
اهلا بيكي

eng_semsem يقول...

جايدا العزيزي
الاروع هو وجودك
اهلا بك دائما اختي العزيزه

eng_semsem يقول...

ريري كربكه
اهلا بيكي دائما ومنوره مدونتي المتواضعه