الجمعة، 10 فبراير 2012

خايف



خايف من بكره هيجي ايه برغم اني كلي أمل انه يكون أحسن  بس برده خايف لاني شايف نبرة كلام صعبه بقيت موجوده بين الناس شا يف أن شعب مصر كله متهم بالخيانه اللي قاعد في البيت خاين وباع حق الشهداء واللي نزل الميدان خاين وعايز يحرق البلد .
ولما انعكست الايه وقرر اللي بينزلوا الميدان يعملوا اعتصام واضراب انقلبت برده معاها الايه اللي هينزل ويشتغل يبقى خاين واللي هيقعد في البيت خاين وعايز يعطل عجلة الانتاج .
أنا مش موافق على الاضراب وده رأيي الشخصي اللي يحتمل الخطأ وأكيد يحتمل الصواب ده أختياري اللي شايف فيه خير لبلدي وليا ولأهلي وناسي وأصحابي وأنا مش هناقش دوافعي وأسباب رفضي هنا لأن كل اللي عايز اقوله أنا كمان بحب بلدي ليه عايز تفرض عليا رأيك ليه تحرمني من حقي في الاختيار ليه مش من حق كل واحد فينا يختار .
سمعت النقد على الاخوان بأنهم دايما شبابهم تابعين لقائدهم ونفس اللي كانوا بيعيبوا عليهم دلوقتي عايزين نبقى تابعين ليهم وحاجه من الاتنين يأما معانا او انت ضد الثوره .
زمان سمعت انتقاد على السلفيين انهم كتير بيكفروا الناس نفس اللي انتقدوهم دلوقتي بيقول على كل اللي مش معاهم خاين .
زمان كنا بنقول ثوره وديمقراطيه ولازم الشعب يختار ويحدد مين يمثله دلوقتي نفس اللي قال كده بيتهم الشعب انه جاهل ومش بيعرف يختار .
اتفق الجميع على ضرورة رحيل المجلس العسكري ومن بداية الثوره اعلن الجميع اننا عايزين ننتقل في اسرع وقت لسلطه مدنيه ولكننا جاء الاختلاف في الطريقه والتوقيت وكانت النتيجه من اراد ان تنتقل الرئاسه بشكل شرعي الى رئيس الجمهوريه المنتخب خائن وباع دماء الشهداء من اجل ان يستمر المجلس العسكري فترة اكبر.
نقطه صغيره عايز اقولها لو المجلس العسكري خائن للثوره وتابع للرئيس المخلوع فلن يسلم السلطه لاحد حتى لو اضطر الى اطلاق الرصاص وقتل الآلا ف مثلما فعل الجيش السوري والجيش الليبي ولن يتم حسم المعركه الا باستسلام الجيش او باستسلام الثوار وهذا لا اراه يحدث الان .
اما لو المجلس العسكري فعلا يحاول الحفاظ على الثوره وعدم رجوع النظام القديم فسيترك السلطه بعد أن يتاكد تماما بعدم رجوع النظام القديم لانه لو عاد فسيتم محاكمتهم جميعا بتهمة الخيانه في محاكمة عسكريه ويتم اعدامهم وهذا ما اراه يحدث الان .
يارب سلم مصر واهلها يارب ارزقنا الامن والامان والاستقرار يارب اعد البسمه الى وجوهنا يارب ضعفت قوتنا وقلت حيلتنا ولا ملجأ ولا منجي الا انت فانصرنا على من ظلمنا واهدينا الى سبيل الخير والرشاد للبلاد والعباد .
اللهم وحد كلمتنا واجمعنا على الخير واحمينا مما نعلم وما لا نعلم 

هناك 20 تعليقًا:

Noha Saleh يقول...

كلنا خايفين

ربنا يحفظ مصر وشعبها

نيللى على يقول...

يارب أحفظ مصر وشعبها يارب آمين

مصطفى سيف الدين يقول...

ان شاء الله خير
متقلقش اصلا عجلة الانتاج اصلا بعافية من غير اضراب
الاضراب حتى لو تم مش هيفرق كتير

eng_semsem يقول...

Noha Saleh
ربنا يحفظنا يارب ويهدينا للي فيه الخير
اهلا بيكي

eng_semsem يقول...

نيللي علي
به نستجير ومن يجير سواه ارحم ضعيفا جاء يحتمي بحماك يااااااااااارب

eng_semsem يقول...

مصطفى سيف الديب
اديبنا الكبير الف مبروك على كتابك الاول
انا مش خايف من الاضراب انا خايف من طريقة تقبل اختلاف الاراء وخايف انها تقلب بحرب اهليه
اهلا بيك

مدونة رحلة حياه يقول...

السلام عليكم
فلتهدأ اخى ولتطمئن نفسك فالله ناصر الحق مهما علا الباطل
حفظ الله مصر امنا وامانا

سواح في ملك اللــــــــــــــــــه- يقول...

بص يااسامة

احنا تخلصنا من ديكتاتورية الرؤساء

الي ديكتاتورية الشعب

فالشعب اصبح ديكتاتور

تحيتي

ليلى الصباحى.. lolocat يقول...

السلام عليكم

الخوف شىء صحى
لكن لو زاد عن حده بيكون نتيجته مش كويسه
اما كمان خايفة اوى اوى على حبيبتى مصر لكن بقلبى امل و يقين بالله ان مصر بلد الاصالة والخير ومش ممكن ابدا تنكسر

دى فترة وهتمر زى غيرها لان بعد اى ثورة بيكون فيه وقت ضايع من الفوضى

ان شاء الله الجاى احلى

وانا كمان ضد الاضراب والاخوان والسلفيين ضد الاضراب وكل انسان عاقل بيحب بلده لازم يشتغل ويعمر مش يهد


تحياتى لك اخى
دمت بخير

هبة فاروق يقول...

كلنا خائفين وسيستمر الخوف الا ان تسلم السلطه ربنا معانا ويعدى الفتره دى على خير
انا ضد الاضراب اصل الضرب فى الميت حرام
تحياتى لك اخى اسامه

بسمة الورد عطر المشاعر يقول...

بكرة هيبقى احسن ان شاء الله فمصرنا فى رباط الى يوم القيامه
واهلها بخير ان شاء الله

ونساله سبحانه ان يحفظنا بحفظة امين

احترامى لقلمك

بيت المدونين يقول...

السلام عليكم ورحمة وبركاته

الزميل / الزميله المدون
يدعوك بيت المدونين

للمشاركه فى مبادرة " المعونه المصريه "
من خلال مدونتك الكريمه
المبادره ابتدأها بعض المشايخ المحترمين للرد على تهديد امريكا بقطع المعونه عن مصر
مع العلم ان هذه المعونه لا تغنى ولا تسمن من جوع فهى دائماً مشروطه ويتم انفاقها على الخبراء الامريكان الذين يتم اشتراط تواجدهم فى المشاريع التى توجه لها المعونه ، بالاضافه الى المحاصيل التى يتم الاشتراط على مصر فيها شراءها من امريكا وأشياء اخرى كثيره لا مجال لحصرها
فبالتالى كانت هذه المعونه وبالاً على مصر . اقتصادياً وسياسياً وعزة وكرامه

وقد آن الاوان لوقفها واثبات اننا رجالا لا نمد الايادى لغيرنا

نريد ان :
نحيا كراماً

رابط المبادره على بيت المدونين :

http://bloggers-house.blogspot.com/2012/02/blog-post_12.html

رابط المبادره على الفيس هو :


http://www.facebook.com/events/307332485983060/


حساب البنك سيتم نشره قريبا
ان شاء الله

eng_semsem يقول...

مدونة رحلة حياه
والله خبر المعونه المصريه بتاع امبارح حسيت معاه بالراحه بغض النظر على النتيجه بس في ناس مش بنسمع صوتها ولا نشوفها في مظاهرات او تلفزيون بتحاول تعبر عن مدى حبها لمصر

eng_semsem يقول...

سواح في ملك الله
احيانا بحس يا خالد ان في ناس عايزه تسرق الكاميرا
ناس عايزه تقول انا موجود حتى لو بالغلط او بالفاظ ما تشجعش حد انه يقول انا موافق
بكره احسن ان شاء الله

eng_semsem يقول...

ام هريره
ان شاء الله تتحقق احلامنا ونشوفها مصر اللي بنحلم بيها كلنا
اهلا بيكي دائما اختي العزيزه

eng_semsem يقول...

هبه فاروق
جميل المثل الضرب في الميت حرام
فعلا هي في غرفة الانعاش وعايزه اللي يديها الامل وعايزه اللي يبني مش ناقصه واقفه وضعف
اهلا بيكي

eng_semsem يقول...

بسمة الورد
ان شاء الله بكره كل خير على كل الوطن العربي
اهلا بيكي

eng_semsem يقول...

بيت المدونين
تعجبني الفكره وانا معكم بكل ما استطيع

جايدا العزيزي يقول...

يارب سلم مصر واهلها يارب ارزقنا الامن والامان والاستقرار يارب اعد البسمه الى وجوهنا يارب ضعفت قوتنا وقلت حيلتنا ولا ملجأ ولا منجي الا انت فانصرنا على من ظلمنا واهدينا الى سبيل الخير والرشاد للبلاد والعباد .
اللهم وحد كلمتنا واجمعنا على الخير واحمينا مما نعلم وما لا نعلم

لا تخف محفوظه باذن الله مصر قويه

لاتخف

رائع هو احساسك بين السطور

تحياتى

miroooo يقول...

كلنا خايفين بجد على بلدنا
بس عندى ثقة وامل فى ربنا اننا هنبقى افضل و هيحمى مصر من اى شىء يضرها