الخميس، 22 سبتمبر 2011

عسل اسود

الفيلم ده آخر حاجه شفتها قبل ما اسافر وابدا رحلتي كان لسه جديد في السينما وانا بصراحه بحب افلام احمد حلمي بحس انه بيحترم الناس اللي بتتفرج عليه على العموم انا مش بعمل اعلان عن الفيلم انا عيشت الفيلم  عيشت بعيد عن مصر سنه واحده وحسيت باختلاف كبير وعندي احساس كبير ان احنا ممكن نكون احسن من كده بكتيرواللي بيعيش بره مصر في دول كانت زمان بتتعلم من مصر الحضاره وسبقتنا بيشوف احنا اتأخرنا قد ايه اتعاملت مع الحكومه بره مصر وفي مصر وحسيت ان في فرق كبير في روتين موجود في مصر للتعقيد ياريت نعرف نخرج منه والشوارع والعربيات والزحمه واكتر حاجه تعبتني استعمال الة التنبيه بشكل مستفز (الكلكس بتاع العربيه)عمال على بطال وكأن الناس بتتخانق مع بعضها بيه .

احساسي بالطاحونه اللي الناس كلها بتجري فيها ومش عارفه تقف ولا تستريح خايفه لو وقفت دقيقه الناس اللي وراها تدوسها البطاله وقلة الاجور وارتفاع السلع الاساسيه ضاغطه على الناس مش بتخليهم يعرفوا يناموا .

متهيألي اللي يقرا كلامي هيحس اني بكره مصربس الحقيقه على قد ما كنت بفكر اسافر تاني على قد ما انا كان نفسي اقعد واشوف مصر بتتغير للأحسن عايزين نبني مصر عايزين نشوفها بلد الحضاره والرقي عايزين نبني اساس لدوله تبقى كبيره وتفضل كبيره عايزين نستثمر الطاقات البشريه كنت زعلان جدا وانا بشوف عدد القهاوي بيزيد وكراسيها بتكبر والشباب قاعد عليها وحاسس انه شايل هم كبير عليه ومش لاقي حد يساعده ولا ياخد بايده .

هي ده الثوره اللي محتاجينها في حياتنا ومحتاجين نحس بيها  ومحتاجين نبني بلادنا واولادنا ونصنع اجيال تقدر تاخد القرارمحتاجين نهتم بالتعليم عشان نصنع جيل يبني ويعرف يعوض مصر عن الجيل اللي كان بياكل فيها والطفل بداية تعليمه البيت لازم كل اب وام يزرعوا في اولادهم الخير والصح والغلط وازاي تكون ايجابي وتساعد غيرك وتبني في بلدك مش تفكر تستفيد منها ازاي قبل ما تفكر تفيدها ازاي .

يارب اكتب لينا الخير لمصر وكل المصريين وساعدنا على بنائها وترميم اللي اتخرب فيها من الظلمه اللي سرقوها .

هناك 35 تعليقًا:

غير معرف يقول...

انا مش خرجت بره مصر ..... يعني شهادتي مجروحه :)

يا رب نبقى احسن يا رب

مدونة رحلة حياه يقول...

السلام عليكم
انا معاك فعلا يا اوة اننا محتاجين تغييييييييير كتير جدا واتضايقت جدا انا كمان لما لاقيت عدد القهاوى ازداد جدا فى الفترة الاخيرة واتضايقت اكتر لما اطلقوا عليها مسمسيات خاصة بالثورة لو ثورتنا نتيجتها قهاوى يبقى بلدنا مش هتكون غير حكاوى
يارب ننتظر منك الخير الكثير لبلادنا
عود حميد يا باشمهندس
دومت بخير

nour alqamar يقول...

مساء الخير ..
انشاء مصر للاحسن يارب
...
مع تحياتى
نور

Unknown يقول...

فعلا وأحنا بره
بلدنا بنحبها أكتر
وما بنطيق حد يــقول
كلمة وحشة عنها ابدا

لــــ زهــــــراء ــــولا يقول...

يارب مصر احلى واجمل بكره

لولا

لــــ زهــــــراء ــــولا يقول...

احساسي بالطاحونه اللي الناس كلها بتجري فيها ومش عارفه تقف ولا تستريح خايفه لو وقفت دقيقه الناس اللي وراها تدوسها البطاله وقلة الاجور وارتفاع السلع الاساسيه ضاغطه على الناس مش بتخليهم يعرفوا يناموا .


...................................
حاسة بكل حرف بتكتبه ومتنساش ان مجهودك يبخس بيه الارض عشان مرتبك ( سعر مهراتك ) تبقى الارض صاحب الشغل ميهمهوش هو كسب ايه من وراك او استغل مجهودك ازاي الاهم انه كسب فلوس وفرها منك
ومشافش انه خسرك ثقتك في نفسك واهتزاز ثقتك في قدراتك
بأختصار حجمك

لولا

ツSmiLeY AnGeLツ يقول...

ان شاءالله مصر تتحسن وتصير احسن من قبل
ربنا يحمي مصر واهلها

تقبل مروري ^_^

BNT ELISLAM يقول...

والله العظيم انت عشره على عشره وقلت كل اللى فيها
نفسى الثوره تبقى من جوه البشر دى انها عاوزه تبقى احسن
وتبطل الروتين وتبطل الغمقان ده
تبطل تكبر عشان نحس اننا زى باقى البشر الى علمناهم ازاى يعيشوا
يارب تكون احسن بلد فى العالم وحالها ينصلح
دونمت بخير وتحياتى ليك

سواح في ملك اللــــــــــــــــــه- يقول...

لااملك الا ان اؤمن علي دعائك

اللهم امين يابشمهندس

غير معرف يقول...

مساء الغاردينيا اسامة
ومين قال مش بتحب مصر احتجاجك وكلامك دليل على انك عاوزها تبقى اجمل واجمل ودا طبيعي دي بلدرك ةوحك فيها مهما سافرت وبتمنى معاك تبقى مصر زي مابيحب كل مصري واجمل "
؛؛
؛
من قلبي ربنا يحمي مصر وكل المصريين
لاني بحبهم اوي :)
؛؛
؛
لروحك عبق الغاردينيا
كانت هنا
reemaas

eng_semsem يقول...

فتاه من الصعيد
ان شاء الله تبقى احسن بينا
اهلا بيكي وحمدالله على السلامه

eng_semsem يقول...

مدونة رحلة حياه
وعليكم السلام
احنا محتاجين تغيير من جوانا مش كل حاجه في ايد الحكومه هي اللي هتغيرها وعايزين نبقى مجتمع منتج مش مستهلك
اهلا بيك يا صديقي العزيز

eng_semsem يقول...

نور القمر
ان شاء الله هنسعى كلنا للاحسن لمصر وللمصريين
اهلا بيك

eng_semsem يقول...

norahaty
متهيالي عشان واحنا بره بتبقى الصور اوضح وبنكون عشنا في بلد تانيه ومجتمع تاني بنقدر نعمل مقارنه حقيقيه على واقع بنعيشه
اهلا بيكي

eng_semsem يقول...

لولا وزهراء
كلامي كان للي هيشتغل ولصاحب العمل لازم نبني ونساعد بعض نبقى احسن الشركه تكبر وانا والموظف ياخد حقه عشان يبقى عنده استعداد ان يدي شغله اكتر
اهلا بيكي لولا

eng_semsem يقول...

خواطري مع الحياه
يارب كل الشعوب العربيه تكون احسن واحسن وتحصل على الاستقرار والهدوء والامان والعدل
اهلا بيكي يا رشا

eng_semsem يقول...

BNT ELISLAM
ان شاء الله هنكون احسن وهنحاول نبني اللي جوانا قبل ما نفكر في اللي حوالينا وهتتحسن الامور ونشوف مصر بتطلع لفوق
اهلا بيكي يا بنوته

eng_semsem يقول...

سواح في ملك الله
وربنا يستجيب مني ومنك وتكون مصر احلى واحسن واهلها يدوقوا الامن والاستقرار

eng_semsem يقول...

ريماس
تسلم دعواتك يا ريماس وانا معنديش شك في انك بتحبي مصر والمصريين
يارب اخير لكل بلاد المسلمين
اهلا بيكي ريماس

Carmen يقول...

والله يا استاذ اسامة كلنا كده بنحبها ومش بنحبها بس هنرجع في الاخر ونقول احنا البلد واحنا الشعب واحنا اللي عاملين فيها وفي نفسنا كده

رحاب صالح يقول...

اية ده انت نسيت الطابور...؟
ههههه
فعلا هو عسل اسود
معاك حق
بس احنا محتاجين وقت فعلا عشان التغير
وقوانين ونظم عشان التغير يكون صح
لان لو طالبت بالتغير من غير قانون هيبقي ولا شيء
لو كل قانون كان رادع كل حاجة هتبقي صح

عبدالحميد خطاب يقول...

شكرا لك يا افندم على كلماتك

إحنا للأسف بقينا فى المؤخرة

شكرا لك يا باشمهندس

eng_semsem يقول...

Carmen
احنا بنحبها ومش قادرين نكرهها مهما عملت فينا بس في الاخر مش هتتغير الا بايدينا وباننا احنا اللي نتغير
اهلا بيكي

eng_semsem يقول...

re7ab.sale7
انا وقفت طوابير في مصر قعدت سنه براها ما وقفتش طابور واحد منهم ربنا يعينا
انا معاكي ان لازم يكون في قوانين تدفعنا للاحسن بس برده لازم كل واحد يحط قوانين شخصيه لنفسه تفيده وتفيد البلد قبل ما نفكر في قوانين البلد
اهلا بيكي

eng_semsem يقول...

حميد
حتى لو بقينا في المؤخره العجله ماوقفتش لازم نكمل وندور ازاي نرجع للمقدمه بمجهودنا وافعالنا مش مجرد كلمات وشعارات
اهلا بيك

بسمة الورد عطر المشاعر يقول...

مساؤك خير وسعاده اخى

ماشاء الله سعدت بمرورى هذا الماء على مدونتك وكم اسعدنى الانضام لها

رائعه هى كلماتك التى المح فيها الغيره على مصرنا الحبيبة .... كل الامنيات ان ربك يصلح لنا الاحوال قريبا ان شاء الله

مودتى واحترامى

فشكووول يقول...

السلام عليكم
تحياتى
اهم حاجه الاول اوعى تغلط وتقعد فى مصر .. يا بنى حد يلاقى بلد تانيه غير مصر ويقعد فى مصر
عشان الحاله تتعدل زى ما انت فاهم ونبقى من ناحية الروتين اقل عايزين عشر سنين وكمان عشان الحاله الاقتصديه تتععدل عايزين 15 سنه .. اسألنى انا انا عشت فيها 60 سنه وعارفها كويس

زينة زيدان يقول...

أخي أسامة

يشرفني التعرف لمدونتك
أتمنى لمصر العزيزة التغيير إلى الافضل
ولكل بلاد العرب التقدم والازدهار

تحيتي لك

eng_semsem يقول...

بسمة الورد
واسعدني تواجدك ويارب يتكرر فقد زاد صفحتي جمالا
كلنا نحلم بمصر نفتخر بها ويرى الجميع جمالها فعليا وليست مجرد كلمات
اهلا بيكي

eng_semsem يقول...

فشكووول
على فكره النصيحه ده سمعتها كتير وعلى قد ما انا مقتنع انها صح بس زعلان برده انها صح ياريت بلادنا تبقى جميله وتشجعنا نعيش فيها مش عشان نحقق احلامنا لازم نخرج ونسيبها
اهلا بيك

eng_semsem يقول...

زينه زيدان
يشرفني تواجدك بمدونتي المتواضعه واتمنى صلاح الحال لكل الوطن الاسلامي
اهلا بيكي

آخر العنقــــــود يقول...

فاهمه جدا اللي بتقوله لاني عشت شوية سنين كده بره مصر
وفعلا كل سطر كتبته صحيح مائة بالمئة
وأمامنا كتير نعمله عشان نخليها بلد كما يليق بها
ربنا يستخدمنا يارب

eng_semsem يقول...

اخر العنقود
ان شاء الله هتكون احسن بينا ونكون سبب في انها تعلى بايدينا
اهلا بيكي

Chaimae Ali يقول...

تعليقي قصير جدا و ليه معاني كبيرة اوي و برضه حتة من عسل اسود
مصر على بعضها كده بعيوبها حتة من الجنة

eng_semsem يقول...

شيماء علي
وان شاء الله هتكون احسن من الاول
اهلا بيكي