الاثنين، 18 أبريل 2011

صدفه

ساحكي لكم يوم من الايام قد مررت به كي اذكر نفسي وأذكركم بمدى قدرتنا على ترتيب الامور في حياتنا .
بعد نهاية يومي الطبيعي بالعمل عدت الى المنزل وتناولت وجبة الغذاء والقيت بجسمي على السرير فغرقت في نوم استمر 3 ساعات وبعدها استيقظت في العاشره مساء وقررت النزول الى الشارع كي ارى الناس واتنفس الهواء واتصلت بمهندس صديقي وتقابلنا وجلسنا في كوفي شوب واثناء جلوسنا مر علينا صديق اخر لم نراه منذ اكثر من 15 عام كان صديقا لنا في المدرسه الابتدائيه ومع انشغال كل واحد مننا بمجاله وسفره الى السعوديه فلم تكن هناك فرصه كي نتقابل وجلسنا نتسامر حتى مطلع الفجر وعدت الى المنزل وقد تبقى ساعتين للنزول الى العمل مرة اخرى ودخلت لانام مرة اخرى وكان ميعاد نزولي في الثامنه تمر سيارة الشركه لاصطحابي الى العمل وقلقت مبكرا قليلا فقررت ان انزل وكنت احتاج لشراء كارت شحن واتصل بيهم وابلغهم بمكاني حتى لا يمروا عليا في المنزل تمشيت حتى وصلت الى المحل واشتريت الكارت وبعد خروجي من المحل اخرجت تليفوني لاشحن الكارت  فوجدته فاصل شحن وكانت بالنسبه ليا صدمة سيئه فاغلب عملي اديره بالتليفون واحسست ان سهرتي بالامس قد ضيعت يومي وبدا الغضب يملاني من هذا اليوم عدت الى السنترال استاذنه في شحنه قليلا حتى اجري مكالمه واحده او اخرج رقم سائق السياره واخذت اجرب يمينا يسارا هذه الفيشه او هذه وكأن الموبايل اعتبرها مسالة عند وكأنه يخبرني مش هتشحن واصبحت مخير بين امرين اما اعود الى البيت لاشحنه وانتظر السائق ان يصل الى البيت او اركب المواصلات وبيني وبينكم كان الموقف اقرب كسلت ارجع البيت ورحت اركب مواصلات .
وعند الموقف قابلت احد اصدقائي ووقفنا نتحدث قرابة ربع ساعه ونتقابل بليل بقى وبعدين رحت اسال فين العربيه اللي بتروح وما اكدبش عليكم قعدت انقي واحده عشان اركب جنب السواق قدام وبعدين طلعت العربيه ويدوب طلعنا من كفرالشيخ في اتجاه الحامول ممكن بعد عشر دقايق من خروجنا قابلنا حادثه ببص من شباك السياره لاقيت العربيه بتاعت الشركه اللي المفروض كنت اركب فيها نزلت من العربيه جري عشان اطمن عليهم لاقيت الاتنين اللي قدام كانوا طلعوا من الزجاج الامامي للسياره واتنين ورا حبة خدوش على كام ورم على خرابيش بسيطه من الزجاج الامامي واول واحد قابلته كان السواق وهو اللي كان عنده اشتباه في نزيف في الجمجمه اول ما شافني افتكر انه انتقل للعالم الاخر وقعد يقول كلام الناس اللي حوالينا مش فاهمه انت جيت ازاي منين انت ما كنتش معانا هو ايه اللي حصل انا فين والاتنين اللي كانوا قدام اتنقلوا على المستشفى والحمدلله تعتبر جيت سليمه وانا رحت معاهم اول ما فاق السواق بص ليا وقال ليا بعفويه يا ابن المحظوظه انت عملتها ازاي ؟؟؟؟
وبعد كده حكوا ليا انهم اتصلوا بيا كذا مره ولما لاقوه مقفول قالوا يمكن لسه نايم وعدوا عليا في البيت ورنوا الجرس لحد ما والدي صحي وقال ليهم هو مش موجود ده تقريبا نزل وافتكروا اني روحت مع سياره تانيه للشركه .
الخلاصه ان الترتيب الطبيعي بتاع تفكيري كبشر كنت هنام بدري مش هسهر عشان ورايا شغل الصبح كنت هشحن موبايلي قبل ما انام او على الاقل هبص فيه الصبح هو شغال ولا ايه وكان ممكن اكسل انزل اساسا واستنى لما يفوتوا عليا واشتري الكارت بعدين لما انزل تفكيري المحدود وترتيبي كان بيقول ليا ان اسوا حاجه في يومك انك نازل بموبايل مقفول بس في الاخر اتضح ليا انه كان سبب في اني مش احضر التجربه ده وانا داخل السياره .
ترتيب ربنا مفيش احسن منه واللي ممكن نفتكره شر لينا يطلع هو الخير كله ولو علمنا الغيب لاختارنا الواقع ومهما عندك من حذر ما يمنعش وقوع القدر .
كان ذلك يوم قد مررت بيه على خير وليس بقوة مني او ذكاء ولكن كان ضعفي وتقصيري سبب في نجاتي والحمد والشكر لله مقدر الاقدار ومسير من بالارض والسماء . 

هناك 48 تعليقًا:

الغاردينيا يقول...

حمد لله عالسلامه اذن :)

صلى ركعتين شكر لله وتصدق هذا ما كنت سافعله لو كنت في مكانك ,

وانا دائما امشي واقول في كل شئ لعله خير :) زميله بالكليه طلعت من امتحان وكانت متعصبه انها نسيت سؤال فقلت لها لعله خير فانهالت عليا ^_^
وانه من فين الخير بيجي !
هي نسيت سؤال بكامله ! وهتنقص في درجات

النتيجه طلعت الدفعه كلها جاوبت سؤال غلط وكلنا نقصنا وجبت انا وهي وزميله 3 اعلى درجات في الماده :)
بينما البقية نقصوا فقلت لها صدقتيني
انه لعلعه خير ^_^

تحية و الله يطول في عمرك
ودا يعلمك ان الحياه اثمن من اننا نقضيها بعكننه وزعل :)

انا كنت رسلت لك تعليق شفته ؟

Mona Hekal يقول...

سبحان الله
اللي نحسبه شر يطلع خير و ترتيب ربنا اقوي من اي شئ .. و الحمد لله ان ربنا نجاك

افروديت يقول...

الحمد لله

ربنا كريم

موناليزا يقول...

:) سبحان الله حقاً
لو نعلم كيف يدبر الله أمورنا لذوبنا شوقاً فى محبته

حمدالله على السلامة:)

جايدا العزيزي يقول...

الف حمدالله على السلامه محظوظ ههههههههه

بقر عندك مانع احمد ربنا اسامه

ولو علمنا الغيب لاختارنا الواقع ومهما عندك من حذر ما يمنعش وقوع القدر .

انا مؤمنه جدا بالكلام ده

علشان كده لا اريد الغيب حتى ولو كان افضل

ربنا يوفقك يارب

ويسترها معاك ويحفظك

تحياتى

سواح في ملك اللــــــــــــــــــه- يقول...

هي مشيئة الله يااخي
الحمد لله

Unknown يقول...

الحمدلله على قد كده والحمدلله ان ربنا كتب بسلامتك

بنوتة مصرية يقول...

الحمد لله ... سبحان الله وبحمده سبحان الله العظيم

حمد لله على السلامه :))

eng_semsem يقول...

الغاردينيا
انا فعلا صليت ركعتين وطلعت مبلغ لله وفعلا في حاجات بنبقى فاكرينها وحشه لكن في الاخر تطلع احلى حاجه حصلت في حياتنا
وبالنسبه للتعليق اه شفته وانا قلت ليكي انا استفدت منه جامد ومش مبالغه
والف شكر ليكي ومنوراني على طول

eng_semsem يقول...

mona abo -elso3od
الحمد لله الذي لا يحمد على مكروه سواه
اهلا بيكي

eng_semsem يقول...

افروديت
الحمدلله عالم بحالنا وغني عن سؤالنا
اهلا بيكي

eng_semsem يقول...

موناليزا
مفيش احسن من تدبير ربنا ومهما تكون خططك منسقه في الاخر تدبير ربنا هو اللي بيسير الامور
نورتيني

eng_semsem يقول...

جايدا العزيزي
هذا من فضل ربي ولم يكن لي اختيار فيه وقدراتي البشريه لم تكن لتحميني من قضاء الله
اهلا بيكي وحمدالله على السلامه

eng_semsem يقول...

سواح في ملك الله
الحمدلله حمدا كثيرا طيبا مباركا
اهلا بيك

eng_semsem يقول...

mena
الحمدلله هذا من فضل ربي
اهلا بيكي

Casper يقول...

قدر الله وما شاء فعل
والف حمدالله على سلامتك

فعلا نحن ننظر للأمور بنظرة ضيقة ولا نعرف أين الخير

________

تقبل مروري
Casper

مصطفى سيف الدين يقول...

سبحان الله
هذه مقادير الله يسوقها كيف يشاء
الحمد لله انك سليم ومعافى
تحياتي لك

richardCatheart يقول...

الحمدلله قدرولطف

سبحان مافيش احسن من تقديره ولا ترتيبه

ولا تكرهو شىء وهو خير لكم ولا تحبو شىء وهو شر لكم

يلا روح بقى اشحن بعشره ههههههههههههههههههههه

صدفه بردو

د/دودى يقول...

انه النصيب حين يلعب دور البطوله...

Carmen يقول...

سبحان الله ونعم بالله حمدالله استاذ اسامة

غير معرف يقول...

السلام عليكم و رحمة الله و بركاته كيف حال الاخوة المدونيين لي الشرف أن أدعوى سيادتكم الموقرة لزيارة مدونتي و التفاعل فيها و اعطائي رأيكم في مدونتي

تقبلو سلامي و تحياتي

eng_semsem يقول...

بنوته مصريه
الله يسلم الجميع من كل سوء

eng_semsem يقول...

casper
وهذا كل ما كنت اريد قوله نحن لانعرف ولا نستطيع معرفة ما هو الاحسن
اهلا بيك

eng_semsem يقول...

مصطفى سيف
ايوه يا دكتور مقادير ربنا مكتوبه ومكتوب علينا نعيشها
الله يسلمك من كل سوء ويصلح الاحوال في قنا وكل محافظات مصر

eng_semsem يقول...

richardcatheart
تتقدير ربنا وجاري على الكل ومهما بلغت مهاراتنا وذكائنا ما نعرفش نرتب حاجه في حياتنا وانا دلوقتي بفكر مية مره قبل ما اشحن
اهلا بيكي

eng_semsem يقول...

د / دوودي
انه قدر الله وقد حماني من تلك التجربه ربما كي اتعلم او اخذ العظه
اهلا بيكي

eng_semsem يقول...

carmen
الله يسلمك ويسلم الجميع من كل سوء

eng_semsem يقول...

مدونة الامل
اشكرك على تواجدك وتعليقك

D... Nour يقول...

السلام عليكم و رحمة الله و بركاته

اقل ما يُقال ..

نصيب و قدر
ســـبحااااان الله

مشيئة الله فوق كل التوقعات و الإحتياطات

ذكرى و عِبرة لمن يعتبر

دمت بكل خير سليماً معافياً

أرق تحياتى

ツSmiLeY AnGeLツ يقول...

الف الحمدلله على السلامة
"وعسى ان تكرهوا شيئا وهو خيرا لكم"
تقبل مروري ^_^

ميرام يقول...

كلام مظبوط
لو عرفنا الغيبيات لاخترنا المقدر لنا
لأنه الخير
حمد الله على سلامتك

♥نبع الغرام♥♪≈ يقول...

مش هقول غير الحمد لله على كل حال

ربنا ينجيك يارب من كل شر

Tears يقول...

الحمدلله ان الموضوع مر بسلام على الجميع

كل شىء قضاء و قدر

غير معرف يقول...

الحمدالله على سلامتك
وهي الاقدار لا نعلم ماذا تخبئ لنا ولا اين هو صالحنا وخيرنا "
؛؛
؛
لروحك عبق الغاردينيا
كانت هنا
reemaas

eng_semsem يقول...

d nour
هو كل هدفي من قصتي احنا البشر ترتيبنا ضعيف ما يحركش الامور ترتيب ربنا هو اللي بنمشي عليه
دام الجميع بصحه وسعاده

eng_semsem يقول...

خواطري في الحياه
قدر ربنا مفيش فرار منه ويارب يكتب ليكم الخير ولكل اهل اليمن
اهلا بيكي

eng_semsem يقول...

ميرام
اختياراتنا محدوده وفكرنا ما يساعدناش اختيار ربنا مفيش احسن منه
اهلا بيكي

eng_semsem يقول...

نبع الغرام
ربنا يحمينا كلنا والحمدلله على كل شئ
اهلا بيكي

eng_semsem يقول...

tears
ونعم بالله كل شئ في حياتنا بتدبير من الله
اهلا بكي وحمدالله على السلامه ويارب تكوني بخير

eng_semsem يقول...

ريماس
الاقدار تحمل لنا الخير كله ونحن لانعلم الخير حتى نجده في ايدينا
اهلا بيكي في زيارتك الاولى ويارب تكون متكرره

غير معرف يقول...

سبحان الله بنحصل فعلا ساعات

الحمد لله على سلامه حضرتك :)

eng_semsem يقول...

فتاه من الصعيد
الله سلمك وربنا يطمناعليكي انت بقيتي بتظهري كل سنه مره

faroukfahmy يقول...

اخى المهندس سمسم
من كان يدرى ولن يدرى ما سيحدث لسعد بواقعه
اننى معك اخى ان الخيرة دوماما يختاره الله ان الله يسبب الاسباب ليسير عليها العباد
وقد سبب تقابلك مع صديقك وغيابك عن النوم وعطة محمولك كل هذه المسببات تقابلهالتسير على ما سيره الله لك .
لوزرتنى ساتشرف بلقائك

الفراغ يقول...

قعدا زهقانه ومش لاقيهحاجه اعملها
ومخى بيودى ويجيب
قلت ادخل المدونات ااقرا اى حاجه
ومن مدونه لاخرى ..لقتنى عندك
قريت وقلت سبحان الله
يمكن انا كمان زهقى دا ليه سبب عند ربنا احسن كتير من اللى فى دماغى
وشكرا

غير معرف يقول...

I’m still studying from you, but I’m bettering myself. I definitely love studying all the things that's written in your blog.Hold the tales coming. I loved it!

eng_semsem يقول...

faroukfahmy58
اشكرك على تواجدك الطيب واسف على التاخير واوعدك بالزياره
اهلا بيك

eng_semsem يقول...

الفراغ
كم اتمنى ان تتكرر زيارتك ولكن ليس عن طريق الصدفه اهلا بيكي

eng_semsem يقول...

غير معرف
كم كنت اتمنى ان تكون معرف حتى اعرف من يهتم بكلامي واتمنى ان يكون من كلامي فائدة دائمه لك
اهلا بيك