رمضان كريم

كل سنه وانتم طيبين وبخير

هبدأ كلامي بالصلاه والسلام على خير خلق الله سيدنا محمد عليه الصلاة والسلام وبعد كده اهنيكم واهني نفسي بدخول الايام الاخيره من شهر شعبان واقبال شهر رمضان الكريم شهر المغفره والعفو والرضوان علينا كلنا ان شاء الله .

واحب اذكركم واذكر نفسي ان الشهر الكريم هديه من الرحمن لعباده فيه ليله خير من الف شهر وصيامه ركن من اركان الاسلام الخمسه وهو شهر الطاعات والتقرب من الله. 

اول حاجه هنبدأ بيها الشهر إعلان توبتنا عن المعاصي وعزمنا على الا نعود اليها ابدا.

ثاني حاجه اللسان هنحافظ عليه في شهرنا وبعده ان شاء الله وهناخد بالنا من الحاجات  اللي ممكن تبوظ صيامنا زي الغيبه والنميمه والكدب ونحاول يفضل ذكر ربنا على لسانا طوال النهار (سبحان الله والحمدلله ولا اله الا الله والله اكبر) .

ثالث حاجه قراءة القرآن هننوي من البدايه ان احنا نخلص القران ولو مره على الاقل في الشهر الكريم ومصحفك الصغير هيكون في جيبك في كل مكان عشان نقرا على قد ما نقدر طوال الشهر الكريم .

رابع حاجه هنحافظ على صلاة الجماعه ونكثر من الدعاء اثناء السجود لكل الناس ولنفسنا ولاوطاننا وجميع المسلمين وطبعا اكيد صلاة التراويح اوعى حد يكسل عنها يوم لان الكسل بيجيب كسل .

خامس حاجه شهر رمضان بنصوم ونحس بالجوع والعطش وده شعور في ناس بتحس بيه في غير رمضان من قلت المال يبقى لازم نفتكرهم ونعمل حسابهم في جزء من مالنا ونحاول نقدر مبلغ من اول الشهر نطلعه ولو على فترات ونفتكر صدقه معانا طوال الشهر وهي تبسمك في وجه اخيك صدقه بلاش نرفزه ونقول معليش عشان الصيام احنا عايزين نتعلم الصبر مش الغضب .

سادس حاجه وده مهمه جدا وهي صلة الارحام وهنحاول نخلي كل يوم في الشهر نزور حد من قرايبنا نعزمه يفطر معانا نقبل دعوته ونروح نفطر معاه نكلمه في التليفون نقابله في المسجد اللي بيصلي فيه وطبعا اهم الارحام الاب والام ودول مش محتاجين توصيه.

سابع حاجه زيارة المريض مش هنكسل لو عرفنا ان اي حد تعبان ونروح نزوره لان فيها ثواب كبير وبرده حضور الجنازات والصلاه والدعاء للميت لانها فيها ثواب كبير .

ثامن حاجه هنقرب من جيرانا ونفتكر ان النبي وصى على سابع جار ونتصالح مع اصدقائنا اللي في بينا وبينهم خلاف ونجعله شهر الموده ما بين الناس .

تاسع حاجه رد المظالم لاهلها افتكر كويس وراجع نفسك وحاسبها وشوف انت ظلمت مين ورد ليه حقه .

عاشر حاجه ابعد عن التلفزيون على قد ما تقدر وياريت لو يكون نهائي لان البرامج اللي هتيجي فيه هتضيع منك كل حاجه قولنا هنعملها وهتضيع وقتك ومجهودك وتركيزك في حاجه بعيده عن عبادتك .

وفي الاخير هقول تاني كل سنه وانتم طيبين ويارب يكون شهر كله خير وطاعه للجميع وتكون مع نهايته ننال العتق من النيران ومغفرة رب العالمين وطبعا لو حد عنده اضافه احب اسمعها ونسمعها كلنا ونستفيد اعاده الله علينا بالخير واليمن والبركات . 

أجازه

أعذروني يا جماعه هاخد أجازه صغيره اتابع فيها التدوينات الرائعه المشاركه في مشروع مئة تدوينه من شهر يونيو .
في تدوينات انا قريتها قبل كده من التدوينات المشاركه لكن تجميع الكميه ده في مكان واحد لاقيت حاجات كتير متميزه يمكن مكنتش شوفتها قبل كده وأول مره اقراها وحسيت اني مقصر في زيارة مدونات اصدقائي لذلك قررت اخد اجازه بدون مرتب عشان اعرف اقرا كل تدوينه مشاركه في الكتاب .
وانا شاركت بتدوينه عزيزه عليا اسمها هديه في قسم التدوينات الاجتماعيه ونفسي تكون فعلا هديه اقدمها ليكم وليها
تمنياتي للجميع بالتوفيق وشكري للقائمين على هذا العمل  

http://100posts-voting.blogspot.com/2011/07/blog-post_4230.html

ومضى عام

كانت هذه الليله هي اخر ليلة أنام فيها على سريري بغرفتي فاليوم اكملت عاما كاملا وأنا خارج أرض الوطن وكان عاما جيدا على المستوى العام فقد اكتسبت الكثير من الاصدقاء وكان من بينهم من حولي في المكان ومن كان معي على مدونتي المتواضعه واتمنى رؤيتهم دائما معي  .
ورزقني الله في هذا العام حج بيته الحرام وعمرة في رمضان الماضي وزيارة مسجد الرسول ثلاث مرات رزقني الله واياكم ذلك مرات كثيره وهذا من فضل الله.
وفي عملي كانت ومازالت الامور على ما يرام ربما ليس ما كنت اتوقعه ولكنه للامانه  فاق ذلك فقد ساعدني على الراحة وهدوء البال .
ومن خلال سفري وكتاباتي تم تفريغ شحنات سلبيه كنت احملها معي اثناء سفري وكان هناك غضب بداخلي يثور كما البركان أما الآن فقد اصبح خامدا والحمد والشكر لله.
ولا أستطيع ان اقول لكم أني غير مشتاق للعوده ولكنها لا تتواجد في خططي الآن أمامي بضعة خطوات مع انتهائها سيأتي موعد رجوعي ولكن من المؤكد انه ليس الآن .
وكانت افضل اللحظات عندما قررت أسرتي ان تاتي  لقضاء مناسك العمرة وكانت رؤيتهم  شئ جيدا قد ساعدني واحسست براحة كبيرة بعد ان قضيت معهم اكثر من خمس ايام فقد شعرت بالاطمئنان عليهم وهم ايضا  شعروا بذلك وكانت تلك الزياره هي اجمل ما مر بيا خلال هذا العام .

وفي ذكرى مرور عام تحتفل اختي الصغيره والقريبه الى قلبي بحفل خطوبتها وشبكتها كم كنت اتمنى ان اكون الى جوارها ولكن هذه ارادة الله وربما استطيع حضور حفل زفافها ولكن في الاخير اتمنى لها التوفيق في حياتها الجديده .
مر عام بمنتهى السرعه واسرع مما كنت اتخيل فحينما كنت ببلدي لم تكن تمر الايام ولا حتى الساعات ولكني الآن اشعر بتوالي الاحداث وتغير الاوضاع .