ايوه انا مخلوق ضعيف وأصل خلقي عباره عن تراب وماء ودائما ما أنسى ذلك والنسيان من علامات الضعف ومن منا لا ينسى أشياء مهمه في حياته . مخلوق ضعيف كلمه وحشه بتزعله وممكن كمان تحبطه وكلمه حلوه تخليه طاير في السما وكلمه تانيه توقعه ويحس أنه مش ممكن يعيش وبيعيش ولما كلمه تحرك كيان يبقى اكيد الكيان ضعيف . كتير بقع في الغلط لاني انسان ومين فينا مش بيغلط في حياته ولو غلطات بسيطه لكن غيرك ممكن يكون صابه ضرر كبير بسبب غلطه صغيره منك واصل الغلط ضعف مني او تقصير. انسان محتاج اسمع كلمه حنينه من أم من صاحب من حبيبه من صديق من غير كلامهم مش هعرف اعيش وكلامهم بيولد جوايا الامل ووقت الشده الاقي السند والحافز الاقي اللي واقف جنبي ومش مستني لوقفته نهايه . انسان بيتعب ويصيبه المرض بسيط او معقد وساعتها بيحس بضعفه وهو نفسه يشرب الميه ومش عارف من غير مساعده نايم في سريره وشايف امه بتخدمه حتى بعد ما كبر لانه في مرضه بيرجع صغير وسؤال عليه من صاحبه بيبسطه وتليفون صغير يحسسه انه هيرجع لقوته . لازم نراجع نفسنا ونفكر مين قصر في حقنا لان اكيد ان السبب تقصير مننا شوف وافتكر ودور جوه عقلك وقلبك مين انت مقصر معاه مين مش بتسال عليه مين صاحبك اللي مش شوفته ولا سمعت صوته من كتير لانه اكيد محتاجك ومستني امتى هتفتكره . اهلك وناسك وبلاش عشيرتك عشان ناس بتزعل منها اسال عليهم لانهم محتاجين سؤالك ونفسهم يسمعوا صوتك ويطمنوا عليك وانت كمان تطمن عليهم وده واجب عليك . افتكر دايما هدي الحبيب المصطفى اللي اتعلمنا منه ان التبسم في وجه اخيك صدقه تخيل ممكن تدفع كام صدقه في اليوم وبالبسمه البسيطه اللي مش متعبه ليك ممكن تريح قلوب كتير وتحس انها مش لوحدها وافتكر دايما ان في مخلوق ضعيف زيك مستني كلمه منك .
اليوم وبكل الفخر والاعتزاز بمدونتي الجميله بالنسبه لي واتمنى ان تكون كذلك بالنسبه لاصدقائي زوار مدونتي اكتب تدوينتي المئه التي لم أكن اتصور من البدايه أن أصل لهذا العدد ولم اكن اتوقع ان أستمر في الكتابه ولم أكن لأستمر لولا وجودكم بجواري تحفزوني بكتاباتكم وقرائتكم لكتاباتي .
اليوم أحتفل ولا قيمة للاحتفال دونكم فأنتم من صنعتم مدونتي وانتم ما جعلتم ليها قيمه بالنسبه لي أكبر مما كنت أتوقع حتى اصبحت جزء مني لا أستطيع الابتعاد عنه أنتم من ساندني في بدايتي وأنتم من اعطاني الامل بلا مقابل .
باقة ورد اقدمها لكل من شرفني بزيارة مدونتي المتواضعه ..... باقة ورد اقدمها لكل من علق عندي ببضع كلمات من المؤكد أنها اضافت لي ولتتدويناتي من معاني جميله . باقة ورد اقدمها لكل من قرأ لي ولكل من يقرأ لي ولكل من سيقرأ لي . باقة ورد تليق بورود تعرفت عليهم هنا اخذت من عطرهم ومن عبراتهم كلمات ارشدتني في حياتي ودفعتني للمضي قدما في كثير من الاحيان . وكم اتمنى أن استمر دوما معكم وأجدكم دائما بجواري طبتم وطابت لكم الدنيا ورزقتم العفو والغفران في الاخره
دبله فضه مرسوم عليها اسمك عشان يبقى اسمك مكتوب عندي مرتين مره على دبلتك ومره جوه قلبي .
دبله دهب بتقول اني حبيبك وان شاء الله اكون من نصيبك وانك رضيتي اكون شريك حياتك ويوم ما كنت بحطها في ايدك كنت حاسس اني بحقق حلم بيكي .
دبله فضه حاسس انها احلى حاجه فيا وان يوم هكون معاكي وتكوني ليا زوجه وام لعيالي وتكون كل دنيتي ليكي .
دبله دهب قيمتها كلها وجمالها انها في ايدك وكانت عاديه واحنا بنشتريها لحد ما كتبتي اسمي عليها اصبح جمالها ما يتوصفش مش عشان اسمي اكيد عشان في ايديكي .
دبله فضه نفسها تنتقل من ايدي اليمين وتروح لايدي الشمال وحاسه انه مشوار طويل لكن معاكي بتحس ان المستحيل الشئ بسيط .
دبله دهب في ايديكي تفكرك دايما اني جنبك واني ابيع الدنيا كلها عشان خاطر عينيكي لاني مليش غيرك انت دنيتي وبدايتي واتمنى اني اموت وانا بين ايديكي .
دبله فضه توعدك اني هكون امين عليكي واحاول بكل جهدي اني اسعدك واحقق امانيكي ولو اطول اجيب القمر هديه مش هيكون كتير عليكي .
دبلتين نفسي تجمعهم الحياه وتدينا السعاده وبعد الخطوبه تكتب لينا الجواز وشقه تجمعنا واحلام نحققها وايدي في ايديك ما تبعدش عنها لحظه واحده وتكوني انت نور طريقي اللي بنرسمه سوا ونمشي فيه مع بعضنا نحقق فيه احلامنا ويكون اللي جاي اجمل واحلى طول ما انت جنبي ربنا ما يحرمني منك .
